Chapter 8

tatrāpaśyaṃ puradvārānniryāntīṃ janatāmaham |
citrālaṃkārasaṃskārāṃ vācaṃ kavimukhādiva || 1 ||
[Analyze grammar]

turaṃgarathamātaṅgakareṇuśibikādibhiḥ |
kuṭumbiparivāro'pi yatrāgacchadamaṇḍanaḥ || 2 ||
[Analyze grammar]

iti saṃpaśyamāno'hamapaśyaṃ hastinīgatam |
niṣkrāmantaṃ rumaṇvantamāryaveṣasahāyakam || 3 ||
[Analyze grammar]

adhyāsitavaśāyūthamambādvayapuraḥsaram |
kañcukyādiparīvāramantaḥpuramataḥ param || 4 ||
[Analyze grammar]

sārdhaṃ makarayaṣṭyā ca cañcadraktapatākayā |
gaṇikāgaṇamākṛṣṭapramattajanamānasam || 5 ||
[Analyze grammar]

atha māṃ gomukho'vocadaryaputra kimāsyate |
ayaṃ vaḥ samayo gantumityathāhamavātaram || 6 ||
[Analyze grammar]

saṃcārimerukūṭābhamāruhya sasuhṛd ratham |
nadannandimṛdaṅgāditūryaḥ pracalamadhvagam || 7 ||
[Analyze grammar]

turaṃgaheṣitaistārairmandraiśca gajagarjitaiḥ |
śikhaṇḍighanasaṃghātanirghoṣae iva jṛmbhitam || 8 ||
[Analyze grammar]

janasaṃghaṭṭaniṣpiṣṭatulākoṭikamekhalam |
rājamārgamatikramya rājadvāramayāsiṣam || 9 ||
[Analyze grammar]

suyāmunasthastatrasthamanujñābhinayena mām |
gaccha gaccheti bhūpalaḥ kṣiptapāṇiracodayat || 10 ||
[Analyze grammar]

ahaṃ tu taṃ namaskṛtya harṣamasyābhivardhayan |
prātiṣṭhe bandisaṃghātaprayuktajayaghoṣaṇaḥ || 11 ||
[Analyze grammar]

prāgdvāreṇa ca niryāya janasaṃpaddidṛkṣayā |
rājamārgamadhiṣṭhāya mandiraṃ gantumārabhe || 12 ||
[Analyze grammar]

athāṣṭābhiḥ śaśāṅkābhaiḥ kuṅkumasthāsakāṅkitaiḥ |
hemabhāṇḍaiḥ pravahaṇaṃ yuktamukṣakumārakaiḥ || 13 ||
[Analyze grammar]

dhavalāmbarasaṃvītaṃ sajyotsnamiva mandiram |
gṛhītamandasaṃcāraṃ paśyāmi sma samīpagam || 14 ||
[Analyze grammar]

tatra pravahaṇācchādachannārdhamahamānanam |
apaśyaṃ megharuddhārdhamiva prāleyadīpitam || 15 ||
[Analyze grammar]

lalāṭataṭavinyastamṛdutāmrāṅgulidvayam |
nibaddhamañjaliṃ cārusarojamukulākṛtim || 16 ||
[Analyze grammar]

kāmopacāravijñānaśūnyo yasmādahaṃ tataḥ |
na jānāmi sma kenāpi taṃ baddhaṃ vandanāñjalim || 17 ||
[Analyze grammar]

atha māṃ gomukho'vocatsrastena mukuṭena vaḥ |
lalāṭamāvṛtaṃ tena tatsamādhīyatāmiti || 18 ||
[Analyze grammar]

athāmṛṣṭe lalāṭānte mayā dakṣiṇapāṇinā |
yāne kanyābhirunmuktastasmin kalakalaḥ paṭuḥ || 19 ||
[Analyze grammar]

anyataśca mukhaṃ kṛtvā pārśvaspandanasūcitam |
gomukhena smitaṃ sadya upakṣiptaṃ kathāntaram || 20 ||
[Analyze grammar]

krīḍāsthānāni paśyantaḥ kāritāni rumaṇvatā |
samāsīdāma kālindīṃ tarajjananirantarām || 21 ||
[Analyze grammar]

yattatpravahaṇaṃ pūrvaṃ dṛṣṭaṃ dṛṣṭaṃ ca tanmayā |
uttāryamāṇaṃ yamunāṃ sādareṇa rumaṇvatā || 22 ||
[Analyze grammar]

utsāhitaniṣādena siddhayātreti vādinā |
nāvaḥ saṃcaratā nāvaṃ tenaivottāritā vayam || 23 ||
[Analyze grammar]

sukhaṃ vihitasaṃbhāre nadītaṭaniveśite |
sthitvā krīḍāgṛhe rātrimutthitāḥ prasthitāstataḥ || 24 ||
[Analyze grammar]

nātidūramatikramya kṛcchrāl labdhāntarāḥ pathi |
prāptā nāgavanodyānaṃ śobhāninditanandanam || 25 ||
[Analyze grammar]

saṃtatānantavṛttāntāṃ nitāntahitakautukaḥ |
yātrāṃ paśyanprayāmi sma janatāṅgulidarśitaḥ || 26 ||
[Analyze grammar]

senāpatistu māṃ nītvā prāṃśu kāñcanatoraṇam |
kḹptanānāvidhākrīḍaṃ yātrāgṛhamavaśayat || 27 ||
[Analyze grammar]

tatrāhaṃ sasuhṛdvargaḥ krīḍāsnānāśanādikaḥ |
kriyāḥ kurvannayāmi sma netronmeṣasamaṃ divam || 28 ||
[Analyze grammar]

atha pradoṣe senānīrāgatyāsmānabhāṣata |
śvaḥ saṃpādayitā krīḍā yā vaḥ sā kathyatāmiti || 29 ||
[Analyze grammar]

mṛgayeti mayākhyāte yāte senāpatau vayam |
abhinīya niśāṃ prātaḥ pratiṣṭhāmahe kānanam || 30 ||
[Analyze grammar]

anye'pi madanujñātāḥ prītāḥ paurakumārakāḥ |
kareṇukarabhāśvādivāhanāḥ saṃghaśo'vrajan || 31 ||
[Analyze grammar]

atha duṣparisaṃkhyānamapaśyaṃ vanarandhragam |
pluṣṭasthāṇuvanākārapulindabalamagrataḥ || 32 ||
[Analyze grammar]

tato niryāya pīnāṅgo nikharvastāmralocanaḥ |
senāpatiḥ siṃhaśatruḥ senāpatimavandata || 33 ||
[Analyze grammar]

tenoktaṃ bhrātṛjāyā me kīdṛśī cintyamekhalā |
tau vā śāmbarasāraṅgau putrau kuśalināviti || 34 ||
[Analyze grammar]

siṃhaśatruravocattaṃ śivaṃ naḥ sakale kule |
yadarthaṃ vayamāhūtāstatsamājñāpyatāmiti || 35 ||
[Analyze grammar]

rumaṇvānabravīdeṣa kumāraḥ sasuhṛttava |
nyāsastena sasainyena prayatnātpālyatāmiti || 36 ||
[Analyze grammar]

nailahāridrakausumbhavāsorāśimadāpayat |
tailakumbhasahasraṃ ca rumaṇvān siṃhaśatrave || 37 ||
[Analyze grammar]

susaṃvihitarakṣaṃ māmanujñāpya rumaṇvati |
nivṛtte gomukhenoktamaho tātena śobhitam || 38 ||
[Analyze grammar]

vijñātāsmadabhiprāyo na nivarteta yadvayam |
kumāravaṭakeveyaṃ bhaveddāruṇayantraṇā || 39 ||
[Analyze grammar]

tato dvārādimṛgayāprakārairbahubhirmṛgān |
nighnanto ghātayantaśca na tṛptimalabhāmahi || 40 ||
[Analyze grammar]

atha nāthamaraṇyānyādviṣantaṃ vājikuñjarān |
yamāya prahiṇoti sma mahiṣaṃ marubhūtikaḥ || 41 ||
[Analyze grammar]

ratnabudbudacitrāṅgāstato'dṛśyanta saṃghaśaḥ |
carantaḥ saṃcarantaśca tatra vātamajā mṛgāḥ || 42 ||
[Analyze grammar]

tān hantuṃ darśitotsāhāściraṃ hariśikhādayaḥ |
bhagnotsāhā nyavartanta vīrebhya iva bhīravaḥ || 43 ||
[Analyze grammar]

taistu senāpatiḥ pṛṣṭo na dṛṣṭāḥ kaiścidīdṛśāḥ |
mṛgā yadi ca jānāsi tato naḥ kathyatāmiti || 44 ||
[Analyze grammar]

tenoktamahamapyetānna jānāmi pitā tu me |
prastāve kvacidācaṣṭa yāṃ vārttāṃ kathayāmi tām || 45 ||
[Analyze grammar]

utpadyate yadā loke cakravartī tadā kila |
evaṃrūpajavākārādṛśyante mṛgajātayaḥ || 46 ||
[Analyze grammar]

na ceśvaraśareṇāpi tripurendhanadāhinā |
samāsādayituṃ śakyāḥ kuta evānyasāyakaiḥ || 47 ||
[Analyze grammar]

etānpradakṣiṇīkṛtya yena kṣiptaḥ śaraḥ kila |
tūṇamāyāti tasyaiva vitta taṃ cakravartinam || 48 ||
[Analyze grammar]

tānahaṃ baddhasaṃrambhaḥ prasthitaśca vihiṃsitum |
te ca māṃ dūramākṛṣya divaṃ haṃsā ivāsthitāḥ || 49 ||
[Analyze grammar]

athāvatīrya turaṃgādgṛhītaprabalaśramaḥ |
ramaṇīyasarastīratarucchāyāmupāśrayam || 50 ||
[Analyze grammar]

cirānmṛgayamāṇā māṃ turaṃgapadavartmanā |
senānubaddhavartmānaḥ prāptā hariśikhādayaḥ || 51 ||
[Analyze grammar]

tataḥ kurvanparīhāsaṃ māmabhāṣata gomukhaḥ |
kiyanto vātahariṇāyuṣmābhirnihatā iti || 52 ||
[Analyze grammar]

mayoktaṃ na mayaiko'pi hataḥ kṣiptastu yaḥ śaraḥ |
pradakṣiṇīkṛtya sa tāneṣa tūṇaṃ mamāgataḥ || 53 ||
[Analyze grammar]

atha tenoktametasya śararājasya pūjanam |
yaścakravarticihnānāṃ sphuṭānāmagraṇīriti || 54 ||
[Analyze grammar]

siṃhaśatruratha tāmiṣuṃ mudā gomukhādibhirapūjayatsaha |
siddhasārthavadhajātasaṃmado dattakāṅkṣitavarāmivāmbikām || 55 ||
[Analyze grammar]