Chapter 72

yudhiṣṭhira uvāca |
yadetadatulaṃ puṇyaṃ vratānāmuttamaṃ vratam |
kartavyaṃ kārttike māsi prayatnādbhīṣmapañcakam || 1 ||
[Analyze grammar]

vidhānaṃ kīdṛśaṃ tasya phalaṃ ca yadusattama |
kathayasva prasādānme munīnāṃ hitamicchatām || 2 ||
[Analyze grammar]

śrīkṛṣṇa uvāca |
pravakṣyāmi vrataṃ puṇyaṃ vratānāmuttamaṃ vratam |
yathāvidhi ca kartavyaṃ phalaṃ cāsya yathoditam || 3 ||
[Analyze grammar]

mayāpi bhṛgave proktaṃ bhṛguścośanase dadau |
uśanāpi hi viprebhyaḥ prahlādāya ca dhīmate || 4 ||
[Analyze grammar]

tejasvināṃ yathā vahniḥ pavanaḥ śīghragāminām |
vipro yathā ca pūjyānāṃ dānānāṃ kāñcanaṃ yathā || 5 ||
[Analyze grammar]

bhūlokaḥ sarvalokānāṃ tīrthānāṃ jāhnavī yathā |
yathāśvamedho yajñānāṃ mathurā muktikāṃkṣiṇām || 6 ||
[Analyze grammar]

vedo yathaiva śāstrāṇāṃ devānāmacyuto yathā |
tathā sarvavratānāṃ tu varoktaṃ bhīṣmapañcakam || 7 ||
[Analyze grammar]

duṣkaraṃ bhīṣmamityāhurna śakyaṃ tadihocyate |
yastatkaroti rājendra tena sarvaṃ kṛtaṃ bhavet || 8 ||
[Analyze grammar]

vaśiṣṭhabhṛgubhargādyaiścīrṇaṃ kṛtayugādiṣu |
nābhāgāṃgāṃbarīṣādyaiścīrṇaṃ tretāyugādiṣu || 9 ||
[Analyze grammar]

sīrabhadrādibhirvaiśyaiḥ śūdrairanyaiḥ kalau yuge |
dināni paṃca pūjyāni cīrṇametanmahāvratam || 10 ||
[Analyze grammar]

brāhmaṇairbrahmacaryeṇa japahomakriyādibhiḥ |
kṣatriyaiśca tathā śaktyā śaucavrataparāyaṇaiḥ || 11 ||
[Analyze grammar]

parādhiḥ parihartavyo brahmacaryeṇa niṣṭhayā |
madyaṃ māṃsaṃ parityajya maithunaṃ pāpabhāṣaṇam || 12 ||
[Analyze grammar]

śākāhāraparaiścaiva kṛṣṇārcanaparairnaraiḥ |
strībhirvā bhartṛvākyena kartavyaṃ sukhavarddhanam || 13 ||
[Analyze grammar]

vidhavābhiśca kartavyaṃ putrapautrādibruddhaye |
sarvakāmasamṛddhyarthaṃ mokṣārthamapi pāṃḍava || 14 ||
[Analyze grammar]

nityaṃ snānena dānena kārttikī yāvadeva tu |
prātaḥ snātvā vidhānena madhyāhne ca tathā vratī || 15 ||
[Analyze grammar]

nadya nirjharagarte vā samālabhya ca gomayam |
yavavrīhitilaiḥ samyaktarpayecca prayatnataḥ || 16 ||
[Analyze grammar]

devānṛṣīnpitṝṃścaiva tatonyānkāmacāriṇaḥ |
snānaṃ maunaṃ naraḥ kṛtvā dhautavāsā dṛḍhavrataḥ || 17 ||
[Analyze grammar]

tato'nupūjayeddevaṃ sarvapāpaharaṃ harim |
snāpayeccācyutaṃ bhaktyā madhukṣīraghṛtena ca || 18 ||
[Analyze grammar]

tatraiva pañcagavyena gaṃdhacaṃdanavāriṇā |
candanena sugaṃdhena kuṃkumenātha keśavam || 19 ||
[Analyze grammar]

karpūrośīra miśreṇa lepayedgaruḍadhvajam |
arcayedruciraiḥ puṣpairgaṃdhadhūpasamanvitaiḥ || 20 ||
[Analyze grammar]

gugguluṃ ghṛtasaṃyuktaṃ dahetkṛṣṇāya bhaktitaḥ |
dīpakaṃ ca divā rātrau dadyātpaṃcadināni tu || 21 ||
[Analyze grammar]

naivedyaṃ devadevasya paramānnaṃ nivedayet |
oṃ namo vāsudevāyeti japedaṣṭottaraṃ śatam || 22 ||
[Analyze grammar]

juhuyācca ghṛtāktāṃśca tilavrīhīṃstato vratī |
ṣaḍakṣareṇa maṃtreṇa svāhākārānvitena ca || 23 ||
[Analyze grammar]

upāsya paścimāṃ saṃdhyāṃ praṇamya garuḍadhvajam |
japitvā pūrvavanmaṃtraṃ kṣitiśāyī bhavennaraḥ || 24 ||
[Analyze grammar]

sarvametadvidhānaṃ ca kāryaṃ paṃcadineṣu hi |
saṃviśetkaṃbale cāsminpadapūrvaṃ śṛṇuṣva me || 25 ||
[Analyze grammar]

prathame'hni hareḥ pādau pūjayetkamalairnaraḥ |
dvitīye bilvapatreṇa jānudeśaṃ samarcayet || 26 ||
[Analyze grammar]

pūjayecca tṛtīye'hni nābhiṃ bhṛṅgarasena ca |
madhye bilvajayābhiśca tataḥ skaṃdhau prapūjayet || 27 ||
[Analyze grammar]

tato'nupūjayecchīrṣaṃ mālatyāḥ kusumairnavaiḥ |
kārttikyāṃ devadevasya bhaktyā tadgatamānasaḥ || 28 ||
[Analyze grammar]

arcayitvā hṛṣīkeśamekādaśyāṃ samāhitaḥ |
saṃprāśya gomayaṃ samyaṅ maṃtravatsamupāvaset || 29 ||
[Analyze grammar]

gomūtraṃ maṃtravatkṛtvā dvādaśyāṃ prāśayedvratī |
kṣīraṃ tatra trayodaśyāṃ caturdaśyāṃ tathā dadhi || 30 ||
[Analyze grammar]

saṃprāśya kāyaśuddhyarthaṃ laṃghayeta caturdinam |
paṃcame tu dine snātvā vidhivatpūjya keśavam || 31 ||
[Analyze grammar]

bhojayedbrāhmaṇānbhaktyā tebhyo dadyācca dakṣiṇām |
tathopadeṣṭāramapi pūjayedvastrabhūṣaṇaiḥ || 32 ||
[Analyze grammar]

tato naktaṃ samaśnīyātpañcagavyapuraḥsaram |
evaṃ samāpayetsamyagyathoktaṃ vratamuttamam || 33 ||
[Analyze grammar]

sarvapāpaharaṃ puṇyaṃ prakhyātaṃ bhīṣmapañcakam |
madyapo yastyajenmadyaṃ janmano maraṇāṃtikam || 34 ||
[Analyze grammar]

tadbhīṣmapañcakaṃ tyaktvā prāpnotbhyayadhikaṃ phalam |
brahmacaryaṃ naraścīrtvā sughoraṃ naiṣṭhikaṃ vratam || 35 ||
[Analyze grammar]

yatprāpnoti mahatpuṇyaṃ tatkṛtvā bhīṣmapaṃcakam |
gātrā bhyaṃgaṃ śiro'bhyaṃgaṃ madhu māṃsaṃ ca maithunam || 36 ||
[Analyze grammar]

brahmalokamavāpnoti tyaktvaikaṃ bhīṣmapañcakam |
saṃvatsareṇa yatpuṇyaṃ kārttikena ca yadbhavet || 37 ||
[Analyze grammar]

yatphalaṃ kārttikenoktaṃ bhavettadbhīṣmapañcake |
vratametatsuraiḥ siddhaiḥ kinnarairnāgaguhyakaiḥ || 38 ||
[Analyze grammar]

phalaṃ samīhitaṃ prāpya kṛtvābhyarcya janārdanam |
pāpasya pratimā kāryā raudravaktrātibhīṣaṇā || 39 ||
[Analyze grammar]

khaḍgahastātivikṛtā sarvalokamayī nṛpa |
tilaprasthopari sthāpyā kṛṣṇavastrābhiveṣṭitā || 40 ||
[Analyze grammar]

karavīrakusumāpīḍā calatkāñcanakuṃḍalā |
brāhmaṇāya pradātavyā kṛṣṇo me prīyatāmiti || 41 ||
[Analyze grammar]

anyeṣāmapi dātavyaṃ yatkṛtvā vasu vāṃchitam |
kṛtakṛtyaḥ sthiro bhūtvā viraktaḥ saṃyato bhavet || 42 ||
[Analyze grammar]

śāṃtacetā nirābādhaḥ paraṃ padamavāpnuyāt |
nīlotpaladalaśyāmaścaturdaṃṣṭraścaturbhujaḥ || 43 ||
[Analyze grammar]

aṣṭaṣaṣṭhaikanayanaḥ śaṃkukarṇo mahāsvanaḥ |
jaṭī dvijihvastāmasyo mṛgarājatanucchadaḥ || 44 ||
[Analyze grammar]

ciṃtanīyo mahādevo yasya rūpaṃ na vidyate |
idaṃ bhīṣmeṇa kathitaṃ śaratalpagatena me || 45 ||
[Analyze grammar]

tadeva te samākhyātaṃ duṣkaraṃ bhīṣmapaṃcakam |
vrataṃ ca rājaśārdūla pravaraṃ bhīṣmapañcakam || 46 ||
[Analyze grammar]

yastasmiṃstoṣayedbhaktyā tasmai muktiprado'cyutaḥ |
brahmacārī gṛhastho vā vānaprastho'thavā yatiḥ || 47 ||
[Analyze grammar]

prāpnoti vaiṣṇavaṃ sthānaṃ satkṛtvā bhīṣmapañcakam |
brahmahā madyapaḥ steyī gurugāmī sadākṛtī || 48 ||
[Analyze grammar]

mucyate pātakātsamyakkṛtvaikaṃ bhīṣmapañcakam |
nāsmādvratātpuṇyatamaṃ vaiṣṇavebhyo yato vratam || 49 ||
[Analyze grammar]

athāsmiṃstoṣito viṣṇurnṛṇāṃ muktiprado bhavet |
śrutvaitatpaṭhyamānaṃ tu pavitraṃ bhīṣmapaṃcakam || 50 ||
[Analyze grammar]

mucyate pātakebhyo vā pāṭhako viṣṇulokabhāk |
dhanyaṃ puṇyaṃ pāpaharaṃ yudhiṣṭhira mahāvratam || 51 ||
[Analyze grammar]

yadbhīṣmapañcakamiti prathitaṃ pṛthivyāmekādaśīprabhṛtipañcadaśīniruddham |
annasya bhojananivṛttivaśādamuṣminniṣṭaṃ phalaṃ diśati pāṃḍava śārṅgadhanvā || 52 ||
[Analyze grammar]