Chapter 119

brahmovāca |
andhe tamasi duṣpāre narake patitātkila |
saṃkrośamānānsaṃkṣubdhānuvāca yamakiṅkaraḥ || 1 ||
[Analyze grammar]

vilāpairalamatreti kiṃ vo vilapite phalam |
yatpramādādibhiḥ pūrvamātmāyaṃ samupekṣitaḥ || 2 ||
[Analyze grammar]

pūrvamālocitaṃ naitatkathamante bhaviṣyati |
idānīṃ yātanāṃ bhuṅdhvaṃ kiṃ vilāpaṃ kariṣyatha || 3 ||
[Analyze grammar]

deho dināni svalpāni viṣayāścātidurbalāḥ |
etatko na vijānāti yena yūyaṃ pramādinaḥ || 4 ||
[Analyze grammar]

janturjanmasahasrebhya ekasminmānuṣo yadi |
sa tatrāpyatimūḍhātmā kiṃ bhogānabhidhāvati || 5 ||
[Analyze grammar]

putradāragṛhakṣetrahitāya satatodyatāḥ |
na jānanti tato mūḍhāḥ svalpamapyātmano hitam || 6 ||
[Analyze grammar]

vañcito'haṃ mayā labdhamidamasmādupāgatam |
na vetti mohitaḥ kaścitprakrāntanarako naraḥ || 7 ||
[Analyze grammar]

na vetti sūryacandrādīnkālamātmānameva ca |
sākṣibhūtānaśeṣasya śubhasyehāśubhasya ca || 8 ||
[Analyze grammar]

janmānyanyāni jāyante putradārādidehinām |
yadarthaṃ yatkṛtaṃ karma tasya janmaśatāni tu || 9 ||
[Analyze grammar]

aho mohasya māhātmyaṃ mamatvaṃ narakeṣvapi |
krandate mātaraṃ tātaṃ pīḍyamāno'pi yatsvayam || 10 ||
[Analyze grammar]

evamākṛṣṭacittānāṃ viṣayaiḥ svādutarpaṇaiḥ |
nṛṇāṃ na jāyate buddhiḥ paramārthavilokinī || 11 ||
[Analyze grammar]

tathā ca viṣayāsaṅge karotyavirataṃ manaḥ |
ko hi bhāro ravernāmni jihvāyāḥ parikīrtane || 12 ||
[Analyze grammar]

vartitaile'lpamūlye ca yadvarttirlabhyate sudhā |
ato vai kataro lābhaḥ kā taścintā bhavettadā || 13 ||
[Analyze grammar]

yenāyateṣu hasteṣu svātaṃtrye sati dīpakaḥ |
mahāphalo bhānugṛhe na datto narakāpahāḥ || 14 ||
[Analyze grammar]

naro vilapate kiñcididānīṃ dṛśyate phalam |
asvātaṃtrye vilapatāṃ svātaṃtrye sati māninām || 15 ||
[Analyze grammar]

avaśyaṃ pātinaḥ prāṇā bhoktā jīvo'pyaharniśam |
dattaṃ ca labhate bhoktaṃ kāmayanviṣayānapi || 16 ||
[Analyze grammar]

etatsthānaṃ duṣkṛtairvā yuktaṃ cādya mayekṣitam |
idānīṃ kiṃ vilāpena sahadhvaṃ yadupāgatam || 17 ||
[Analyze grammar]

yadyetadanabhīṣṭaṃ vo yadduḥkhaṃ samupasthitam |
tadadbhutamatiḥ pāpe na kartavyā kadācana || 18 ||
[Analyze grammar]

kṛte'pi pāpake karmaṇyajñānādaghanāśanam |
kartavyamanavacchinnaṃ pūjanaṃ savituḥ sadā || 19 ||
[Analyze grammar]

brahmovāca |
nārakāstadvacaḥ śrutvā tamūcuratiduḥkhitāḥ |
kṣutkṣāmakaṇṭhāstṛṭtāpavisaṃsphuṭitatālukāḥ || 20 ||
[Analyze grammar]

bho bhoḥ sādho kṛtaṃ karma yadasmābhistaducyatām |
narakasthairvipāko'yaṃ bhujyate yatsudāruṇaḥ || 21 ||
[Analyze grammar]

kiṅkara uvāca |
yuṣmābhiyauṃvanonmādānmuditairavivekibhiḥ |
ghṛtalobhena mārtaṇḍagṛhāddīpaḥ purā hṛtaḥ || 22 ||
[Analyze grammar]

tenāsminnarake ghore kṣuttṛṣṇāparipīḍitāḥ |
bhavantaḥ patitāstīvre śītavātavidāritāḥ || 23 ||
[Analyze grammar]

brahmovāca |
etatte dīpadānasya pradīpaharaṇasya ca |
puṇyaṃ pāpaṃ ca kathitaṃ bhāskarāyatane'cyuta || 24 ||
[Analyze grammar]

sarvatraiva hi dīpasya pradānaṃ kṛṣṇa śasyate |
viśeṣeṇa jagaddhāturbhāskarasya niveśane || 25 ||
[Analyze grammar]

ye'ndhā mūkā badhirā nirvivekā hīnāstaistairdānasādhanairvṛṣṇivīra |
taistairdīpāḥ sādhulokapradattā devāgārādanyataḥ kṛṣṇa nītāḥ || 26 ||
[Analyze grammar]