Chapter 77

[English text for this chapter is available]

bhagavatā saubhasahitasya śālvasya vināśaḥ |
śrīśuka uvāca |
sa tūpaspṛśya salilaṃ daṃśito dhṛtakārmukaḥ |
naya māṃ dyumataḥ pārśvaṃ vīrasyetyāha sārathim || 1 ||
[Analyze grammar]

vidhamantaṃ svasainyāni dyumantaṃ rukmiṇīsutaḥ |
pratihatya pratyavidhyan nārācairaṣṭabhiḥ smayan || 2 ||
[Analyze grammar]

caturbhiścaturo vāhān sūtamekena cāhanat |
dvāvābhyaṃ dhanuśca ketuṃ ca śareṇānyena vai śiraḥ || 3 ||
[Analyze grammar]

gadasātyakisāmbādyā jaghnuḥ saubhapaterbalam |
petuḥ samudre saubheyāḥ sarve saṃchinnakandharāḥ || 4 ||
[Analyze grammar]

evaṃ yadūnāṃ śālvānāṃ nighnatāmitaretaram |
yuddhaṃ triṇavarātraṃ tad abhūt tumulamulbaṇam || 5 ||
[Analyze grammar]

indraprasthaṃ gataḥ kṛṣṇa āhūto dharmasūnunā |
rājasūye'tha nivṛtte śiśupāle ca saṃsthite || 6 ||
[Analyze grammar]

kuruvṛddhānanujñāpya munīṃśca sasutāṃ pṛthām |
nimittānyatighorāṇi paśyan dvāvāravatīṃ yayau || 7 ||
[Analyze grammar]

āha cāhamihāyāta āryamiśrābhisaṅgataḥ |
rājanyāścaidyapakṣīyā nūnaṃ hanyuḥ purīṃ mama || 8 ||
[Analyze grammar]

vīkṣya tatkadanaṃ svānāṃ nirūpya purarakṣaṇam |
saubhaṃ ca śālvarājaṃ ca dārukaṃ prāha keśavaḥ || 9 ||
[Analyze grammar]

rathaṃ prāpaya me sūta śālvasyāntikamāśu vai |
sambhramaste na kartavyo māyāvī saubharāḍayam || 10 ||
[Analyze grammar]

ityuktaścodayāmāsa rathamāsthāya dārukaḥ |
viśantaṃ dadṛśuḥ sarve sve pare cāruṇānujam || 11 ||
[Analyze grammar]

śālvaśca kṛṣṇamālokya hataprāyabaleśvaraḥ |
prāharat kṛṣṇasūtāya śaktiṃ bhīmaravāṃ mṛdhe || 12 ||
[Analyze grammar]

tāmāpatantīṃ nabhasi maholkāmiva raṃhasā |
bhāsayantīṃ diśaḥ śauriḥ sāyakaiḥ śatadhācchinat || 13 ||
[Analyze grammar]

taṃ ca ṣoḍaśabhirviddhvā bāṇaiḥ saubhaṃ ca khe bhramat |
avidhyaccharasandohaiḥ khaṃ sūrya iva raśmibhiḥ || 14 ||
[Analyze grammar]

śālvaḥ śaurestu doḥ savyaṃ śārṅgaṃ śārṅgadhanvanaḥ |
bibheda nyapatad hastāt śārṅgamāsīt tadadbhutam || 15 ||
[Analyze grammar]

hāhākāro mahānāsīd bhūtānāṃ tatra paśyatām |
ninadya saubharāḍuccaiḥ idamāha janārdanam || 16 ||
[Analyze grammar]

yattvayā mūḍha naḥ sakhyuḥ bhrāturbhāryā hṛtekṣatām |
pramattaḥ sa sabhāmadhye tvayā vyāpāditaḥ sakhā || 17 ||
[Analyze grammar]

taṃ tvādya niśitairbāṇaiḥ aparājitamāninam |
nayāmyapunarāvṛttiṃ yadi tiṣṭhermamāgrataḥ || 18 ||
[Analyze grammar]

śrībhagavānuvāca |
vṛthā tvaṃ katthase manda na paśyasyantike'ntakam |
pauruṣaṃ darśayanti sma śūrā na bahubhāṣiṇaḥ || 19 ||
[Analyze grammar]

ityuktvā bhagavān śālvaṃ gadayā bhīmavegayā |
tatāḍa jatrau saṃrabdhaḥ sa cakampe vamannasṛk || 20 ||
[Analyze grammar]

gadāyāṃ sannivṛttāyāṃ śālvastvantaradhīyata |
tato muhūrta āgatya puruṣaḥ śirasācyutam |
devakyā prahito'smīti natvā prāha vaco rudan || 21 ||
[Analyze grammar]

kṛṣṇa kṛṣṇa mahābāho pitā te pitṛvatsala |
baddhvāpanītaḥ śālvena saunikena yathā paśuḥ || 22 ||
[Analyze grammar]

niśamya vipriyaṃ kṛṣṇo mānuṣīṃ prakṛtiṃ gataḥ |
vimanasko ghṛṇī snehād babhāṣe prākṛto yathā || 23 ||
[Analyze grammar]

kathaṃ rāmamasambhrāntaṃ jitvājeyaṃ surāsuraiḥ |
śālvenālpīyasā nītaḥ pitā me balavān vidhiḥ || 24 ||
[Analyze grammar]

iti bruvāṇe govinde saubharāṭ pratyupasthitaḥ |
vasudevamivānīya kṛṣṇaṃ cedamuvāca saḥ || 25 ||
[Analyze grammar]

eṣa te janitā tāto yadarthamiha jīvasi |
vadhiṣye vīkṣataste'muṃ īśaścet pāhi bāliśa || 26 ||
[Analyze grammar]

evaṃ nirbhartsya māyāvī khaḍgenānakadundubheḥ |
utkṛtya śira ādāya khasthaṃ saubhaṃ samāviśat || 27 ||
[Analyze grammar]

tato muhūrtaṃ prakṛtāvupaplutaḥ |
svabodha āste svajanānuṣaṅgataḥ |
mahānubhāvastadabudhyadāsurīṃ |
māyāṃ sa śālvaprasṛtāṃ mayoditām || 28 ||
[Analyze grammar]

na tatra dūtaṃ na pituḥ kalevaraṃ |
prabuddha ājau samapaśyadacyutaḥ |
svāpnaṃ yathā cāmbaracāriṇaṃ ripuṃ |
saubhasthamālokya nihantumudyataḥ || 29 ||
[Analyze grammar]

evaṃ vadanti rājarṣe ṛṣayaḥ ke ca nānvitāḥ |
yat svavāco virudhyeta nūnaṃ te na smarantyuta || 30 ||
[Analyze grammar]

kva śokamohau sneho vā bhayaṃ vā ye'jñasambhavāḥ |
kva cākhaṇḍitavijñāna jñānaiśvaryastvakhaṇḍitaḥ || 31 ||
[Analyze grammar]

yatpādasevorjitayā'tmavidyayā |
hinvantyanādyātmaviparyayagraham |
labhanta ātmīyamanantamaiśvaraṃ |
kuto nu mohaḥ paramasya sadgateḥ || 32 ||
[Analyze grammar]

taṃ śastrapūgaiḥ praharantamojasā |
śālvaṃ śaraiḥ śauriramoghavikramaḥ |
viddhvācchinad varma dhanuḥ śiromaṇiṃ |
saubhaṃ ca śatrorgadayā ruroja ha || 33 ||
[Analyze grammar]

tatkṛṣṇahasteritayā vicūrṇitaṃ |
papāta toye gadayā sahasradhā |
visṛjya tad bhūtalamāsthito gadāṃ |
udyamya śālvo'cyutamabhyagād drutam || 34 ||
[Analyze grammar]

ādhāvataḥ sagadaṃ tasya bāhuṃ |
bhallena chittvātha rathāṅgamadbhutam |
vadhāya śālvasya layārkasannibhaṃ |
bibhrad babhau sārka ivodayācalaḥ || 35 ||
[Analyze grammar]

jahāra tenaiva śiraḥ sakuṇḍalaṃ |
kirīṭayuktaṃ purumāyino hariḥ |
vajreṇa vṛtrasya yathā purandaro |
babhūva hāheti vacastadā nṛṇām || 36 ||
[Analyze grammar]

tasminnipatite pāpe saubhe ca gadayā hate |
nedurdundubhayo rājan divi devagaṇeritāḥ |
sakhīnāṃ apacitiṃ kurvan dantavakro ruṣābhyagāt || 37 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
saubhavadho nāma saptasaptatitamo'dhyāyaḥ || 77 ||
[Analyze grammar]