Chapter 67

[English text for this chapter is available]

raivatake dvividvadhaḥ |
śrīrājovāca |
bhūyo'haṃ śrotumicchāmi rāmasyādbhutakarmaṇaḥ |
anantasyāprameyasya yadanyat kṛtavān prabhuḥ || 1 ||
[Analyze grammar]

śrīśuka uvāca |
narakasya sakhā kaścid dvivido nāma vānaraḥ |
sugrīvasacivaḥ so'tha bhrātā maindasya vīryavān || 2 ||
[Analyze grammar]

sakhyuḥ so'pacitiṃ kurvan vānaro rāṣṭraviplavam |
puragrāmākarān ghoṣān adahad vahnimutsṛjan || 3 ||
[Analyze grammar]

kvacit sa śailānutpāṭya tairdeśān samacūrṇayat |
ānartān sutarāmeva yatrāste mitrahā hariḥ || 4 ||
[Analyze grammar]

kvacit samudramadhyastho dorbhyāṃ utkṣipya tajjalam |
deśān nāgāyutaprāṇo velākūle nyamajjayat || 5 ||
[Analyze grammar]

āśramān ṛṣimukhyānāṃ kṛtvā bhagnavanaspatīn |
adūṣayat śakṛt mūtraiḥ agnīn vaitānikān khalaḥ || 6 ||
[Analyze grammar]

puruṣān yoṣito dṛptaḥ kṣmābhṛddroṇīguhāsu saḥ |
nikṣipya cāpyadhācchailaiḥ peśaskkāskārīva kīṭakam || 7 ||
[Analyze grammar]

evaṃ deśān viprakurvan dūṣayaṃśca kulastriyaḥ |
śrutvā sulalitaṃ gītaṃ giriṃ raivatakaṃ yayau || 8 ||
[Analyze grammar]

tatrāpaśyad yadupatiṃ rāmaṃ puṣkaramālinam |
sudarśanīyasarvāṅgaṃ lalanāyūthamadhyagam || 9 ||
[Analyze grammar]

gāyantaṃ vāruṇīṃ pītvā madavihvalalocanam |
vibhrājamānaṃ vapuṣā prabhinnamiva vāraṇam || 10 ||
[Analyze grammar]

duṣṭaḥ śākhāmṛgaḥ śākhāṃ ārūḍhaḥ kaṃpayan drumān |
cakre kilakilāśabdaṃ ātmānaṃ saṃpradarśayan || 11 ||
[Analyze grammar]

tasya dhārṣṭyaṃ kapervīkṣya taruṇyo jāticāpalāḥ |
hāsyapriyā vijahasuḥ baladevaparigrahāḥ || 12 ||
[Analyze grammar]

tā helayāmāsa kapiḥ bhūkṣepaiḥ saṃmukhādibhiḥ |
darśayan svagudaṃ tāsāṃ rāmasya ca nirīkṣitaḥ || 13 ||
[Analyze grammar]

taṃ grāvṇā prāharat kruddho balaḥ praharatāṃ varaḥ |
sa vañcayitvā grāvāṇaṃ madirākalaśaṃ kapiḥ || 14 ||
[Analyze grammar]

gṛhītvā helayāmāsa dhūrtastaṃ kopayan hasan |
nirbhidya kalaśaṃ duṣṭo vāsāṃsyāsphālayad balam || 15 ||
[Analyze grammar]

kadarthīkṛtya balavān vipracakre madoddhataḥ |
taṃ tasyāvinayaṃ dṛṣṭvā deśāṃśca tadupadrutān || 16 ||
[Analyze grammar]

kruddho musalamādatta halaṃ cārijighāṃsayā |
dvivido'pi mahāvīryaḥ śālamudyamya pāṇinā || 17 ||
[Analyze grammar]

abhyetya tarasā tena balaṃ mūrdhanyatāḍayat |
taṃ tu saṅkarṣaṇo mūrdhni patantamacalo yathā || 18 ||
[Analyze grammar]

pratijagrāha balavān sunandenāhanacca tam |
mūṣalāhatamastiṣko vireje raktadhārayā || 19 ||
[Analyze grammar]

giriryathā gairikayā prahāraṃ nānucintayan |
punaranyaṃ samutkṣipya kṛtvā niṣpatramojasā || 20 ||
[Analyze grammar]

tenāhanat susaṅkruddhaḥ taṃ balaḥ śatadhācchinat |
tato'nyena ruṣā jaghne taṃ cāpi śatadhācchinat || 21 ||
[Analyze grammar]

evaṃ yudhyan bhagavatā bhagne bhagne punaḥ punaḥ |
ākṛṣya sarvato vṛkṣān nirvṛkṣaṃ akarod vanam || 22 ||
[Analyze grammar]

tato'muñcacchilāvarṣaṃ balasyoparyamarṣitaḥ |
tatsarvaṃ cūrṇayāmāsa līlayā musalāyudhaḥ || 23 ||
[Analyze grammar]

sa bāhū tālasaṅkāśau muṣṭīkṛtya kapīśvaraḥ |
āsādya rohiṇīputraṃ tābhyāṃ vakṣasyarūrujat || 24 ||
[Analyze grammar]

yādavendro'pi taṃ dorbhyāṃ tyaktvā musalalāṅgale |
jatrāvabhyardayatkruddhaḥ so'patad rudhiraṃ vaman || 25 ||
[Analyze grammar]

cakampe tena patatā saṭaṅkaḥ savanaspatiḥ |
parvataḥ kuruśārdūla vāyunā naurivāmbhasi || 26 ||
[Analyze grammar]

jayaśabdo namaḥśabdaḥ sādhu sādhviti cāmbare |
surasiddhamunīndrāṇāṃ āsīt kusumavarṣiṇām || 27 ||
[Analyze grammar]

evaṃ nihatya dvividaṃ jagadvyatikarāvaham |
saṃstūyamāno bhagavān janaiḥ svapuramāviśat || 28 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
dvividavadho nāma saptaṣaṣṭitamo'dhyāyaḥ || 67 ||
[Analyze grammar]