Chapter 51

[English text for this chapter is available]

śrīśuka uvāca |
taṃ vilokya viniṣkrāntamujjihānamivoḍupam |
darśanīyatamaṃ śyāmaṃ pītakauśeyavāsasam || 1 ||
[Analyze grammar]

śrīvatsavakṣasaṃ bhrājatkaustubhāmuktakandharam |
pṛthudīrghacaturbāhuṃ navakañjāruṇekṣaṇam || 2 ||
[Analyze grammar]

nityapramuditaṃ śrīmatsukapolaṃ śucismitam |
mukhāravindaṃ bibhrāṇaṃ sphuranmakarakuṇḍalam || 3 ||
[Analyze grammar]

vāsudevo hyayamiti pumānśrīvatsalāñchanaḥ |
caturbhujo'ravindākṣo vanamālyatisundaraḥ || 4 ||
[Analyze grammar]

lakṣaṇairnāradaproktairnānyo bhavitumarhati |
nirāyudhaścalanpadbhyāṃ yotsye'nena nirāyudhaḥ || 5 ||
[Analyze grammar]

iti niścitya yavanaḥ prādravantaṃ parāṅmukham |
anvadhāvajjighṛkṣustaṃ durāpamapi yoginām || 6 ||
[Analyze grammar]

hastaprāptamivātmānaṃ hariṇā sa pade pade |
nīto darśayatā dūraṃ yavaneśo'drikandaram || 7 ||
[Analyze grammar]

palāyanaṃ yadukule jātasya tava nocitam |
iti kṣipannanugato nainaṃ prāpāhatāśubhaḥ || 8 ||
[Analyze grammar]

evaṃ kṣipto'pi bhagavānprāviśadgirikandaram |
so'pi praviṣṭastatrānyaṃ śayānaṃ dadṛśe naram || 9 ||
[Analyze grammar]

nanvasau dūramānīya śete māmiha sādhuvat |
iti matvācyutaṃ mūḍhastaṃ padā samatāḍayat || 10 ||
[Analyze grammar]

sa utthāya ciraṃ suptaḥ śanairunmīlya locane |
diśo vilokayanpārśve tamadrākṣīdavasthitam || 11 ||
[Analyze grammar]

sa tāvattasya ruṣṭasya dṛṣṭipātena bhārata |
dehajenāgninā dagdho bhasmasādabhavatkṣaṇāt || 12 ||
[Analyze grammar]

śrīrājovāca |
ko nāma sa pumānbrahmankasya kiṃ vīrya eva ca |
kasmādguhāṃ gataḥ śiṣye kiṃ tejo yavanārdanaḥ || 13 ||
[Analyze grammar]

śrīśuka uvāca |
sa ikṣvākukule jāto māndhātṛtanayo mahān |
mucukunda iti khyāto brahmaṇyaḥ satyasaṅgaraḥ || 14 ||
[Analyze grammar]

sa yācitaḥ suragaṇairindrādyairātmarakṣaṇe |
asurebhyaḥ paritrastaistadrakṣāṃ so'karocciram || 15 ||
[Analyze grammar]

labdhvā guhaṃ te svaḥpālaṃ mucukundamathābruvan |
rājanviramatāṃ kṛcchrādbhavānnaḥ paripālanāt || 16 ||
[Analyze grammar]

naralokaṃ parityajya rājyaṃ nihatakaṇṭakam |
asmānpālayato vīra kāmāste sarva ujjhitāḥ || 17 ||
[Analyze grammar]

sutā mahiṣyo bhavato jñātayo'mātyamantriṇaḥ |
prajāśca tulyakālīnā nādhunā santi kālitāḥ || 18 ||
[Analyze grammar]

kālo balīyānbalināṃ bhagavānīśvaro'vyayaḥ |
prajāḥ kālayate krīḍanpaśupālo yathā paśūn || 19 ||
[Analyze grammar]

varaṃ vṛṇīṣva bhadraṃ te ṛte kaivalyamadya naḥ |
eka eveśvarastasya bhagavānviṣṇuravyayaḥ || 20 ||
[Analyze grammar]

evamuktaḥ sa vai devānabhivandya mahāyaśāḥ |
aśayiṣṭa guhāviṣṭo nidrayā devadattayā || 21 ||
[Analyze grammar]

yavane bhasmasānnīte bhagavānsātvatarṣabhaḥ |
ātmānaṃ darśayāmāsa mucukundāya dhīmate || 22 ||
[Analyze grammar]

tamālokya ghanaśyāmaṃ pītakauśeyavāsasam |
śrīvatsavakṣasaṃ bhrājatkaustubhena virājitam || 23 ||
[Analyze grammar]

caturbhujaṃ rocamānaṃ vaijayantyā ca mālayā |
cāruprasannavadanaṃ sphuranmakarakuṇḍalam || 24 ||
[Analyze grammar]

prekṣaṇīyaṃ nṛlokasya sānurāgasmitekṣaṇam |
apīcyavayasaṃ mattamṛgendrodāravikramam || 25 ||
[Analyze grammar]

paryapṛcchanmahābuddhistejasā tasya dharṣitaḥ |
śaṅkitaḥ śanakai rājā durdharṣamiva tejasā || 26 ||
[Analyze grammar]

śrīmucukunda uvāca |
ko bhavāniha samprāpto vipine girigahvare |
padbhyāṃ padmapalāśābhyāṃ vicarasyurukaṇṭake || 27 ||
[Analyze grammar]

kiṃ svittejasvināṃ tejo bhagavānvā vibhāvasuḥ |
sūryaḥ somo mahendro vā lokapālo paro'pi vā || 28 ||
[Analyze grammar]

manye tvāṃ devadevānāṃ trayāṇāṃ puruṣarṣabham |
yadbādhase guhādhvāntaṃ pradīpaḥ prabhayā yathā || 29 ||
[Analyze grammar]

śuśrūṣatāmavyalīkamasmākaṃ narapuṅgava |
svajanma karma gotraṃ vā kathyatāṃ yadi rocate || 30 ||
[Analyze grammar]

vayaṃ tu puruṣavyāghra aikṣvākāḥ kṣatrabandhavaḥ |
mucukunda iti prokto yauvanāśvātmajaḥ prabho || 31 ||
[Analyze grammar]

ciraprajāgaraśrānto nidrayāpahatendriyaḥ |
śaye'sminvijane kāmaṃ kenāpyutthāpito'dhunā || 32 ||
[Analyze grammar]

so'pi bhasmīkṛto nūnamātmīyenaiva pāpmanā |
anantaraṃ bhavānśrīmāṃllakṣito'mitraśāsanaḥ || 33 ||
[Analyze grammar]

tejasā te'viṣahyeṇa bhūri draṣṭuṃ na śaknumaḥ |
hataujasā mahābhāga mānanīyo'si dehinām || 34 ||
[Analyze grammar]

evaṃ sambhāṣito rājñā bhagavānbhūtabhāvanaḥ |
pratyāha prahasanvāṇyā meghanādagabhīrayā || 35 ||
[Analyze grammar]

śrībhagavānuvāca |
janmakarmābhidhānāni santi me'ṅga sahasraśaḥ |
na śakyante'nusaṅkhyātumanantatvānmayāpi hi || 36 ||
[Analyze grammar]

kvacidrajāṃsi vimame pārthivānyurujanmabhiḥ |
guṇakarmābhidhānāni na me janmāni karhicit || 37 ||
[Analyze grammar]

kālatrayopapannāni janmakarmāṇi me nṛpa |
anukramanto naivāntaṃ gacchanti paramarṣayaḥ || 38 ||
[Analyze grammar]

tathāpyadyatanānyaṅga śṛṇuṣva gadato mama |
vijñāpito viriñcena purāhaṃ dharmaguptaye || 39 ||
[Analyze grammar]

bhūmerbhārāyamāṇānāmasurāṇāṃ kṣayāya ca |
avatīrṇo yadukule gṛha ānakadundubheḥ |
vadanti vāsudeveti vasudevasutaṃ hi mām || 40 ||
[Analyze grammar]

kālanemirhataḥ kaṃsaḥ pralambādyāśca saddviṣaḥ |
ayaṃ ca yavano dagdho rājaṃste tigmacakṣuṣā || 41 ||
[Analyze grammar]

so'haṃ tavānugrahārthaṃ guhāmetāmupāgataḥ |
prārthitaḥ pracuraṃ pūrvaṃ tvayāhaṃ bhaktavatsalaḥ || 42 ||
[Analyze grammar]

varānvṛṇīṣva rājarṣe sarvānkāmāndadāmi te |
māṃ prasanno janaḥ kaścinna bhūyo'rhati śocitum || 43 ||
[Analyze grammar]

śrīśuka uvāca |
ityuktastaṃ praṇamyāha mucukundo mudānvitaḥ |
jñātvā nārāyaṇaṃ devaṃ gargavākyamanusmaran || 44 ||
[Analyze grammar]

śrīmucukunda uvāca |
vimohito'yaṃ jana īśa māyayā tvadīyayā tvāṃ na bhajatyanarthadṛk |
sukhāya duḥkhaprabhaveṣu sajjate gṛheṣu yoṣitpuruṣaśca vañcitaḥ || 45 ||
[Analyze grammar]

labdhvā jano durlabhamatra mānuṣaṃ |
kathañcidavyaṅgamayatnato'nagha |
pādāravindaṃ na bhajatyasanmatir |
gṛhāndhakūpe patito yathā paśuḥ || 46 ||
[Analyze grammar]

mamaiṣa kālo'jita niṣphalo gato rājyaśriyonnaddhamadasya bhūpateḥ |
martyātmabuddheḥ sutadārakośabhūṣvāsajjamānasya durantacintayā || 47 ||
[Analyze grammar]

kalevare'sminghaṭakuḍyasannibhe |
nirūḍhamāno naradeva ityaham |
vṛto rathebhāśvapadātyanīkapair |
gāṃ paryaṭaṃstvāgaṇayansudurmadaḥ || 48 ||
[Analyze grammar]

pramattamuccairitikṛtyacintayā pravṛddhalobhaṃ viṣayeṣu lālasam |
tvamapramattaḥ sahasābhipadyase kṣullelihāno'hirivākhumantakaḥ || 49 ||
[Analyze grammar]

purā rathairhemapariṣkṛtaiścaran |
mataṃgajairvā naradevasaṃjñitaḥ |
sa eva kālena duratyayena te |
kalevaro viṭkṛmibhasmasaṃjñitaḥ || 50 ||
[Analyze grammar]

nirjitya dikcakramabhūtavigraho varāsanasthaḥ samarājavanditaḥ |
gṛheṣu maithunyasukheṣu yoṣitāṃ krīḍāmṛgaḥ pūruṣa īśa nīyate || 51 ||
[Analyze grammar]

karoti karmāṇi tapaḥsuniṣṭhito nivṛttabhogastadapekṣayādadat |
punaśca bhūyāsamahaṃ svarāḍiti pravṛddhatarṣo na sukhāya kalpate || 52 ||
[Analyze grammar]

bhavāpavargo bhramato yadā bhavejjanasya tarhyacyuta satsamāgamaḥ |
satsaṅgamo yarhi tadaiva sadgatau parāvareśe tvayi jāyate matiḥ || 53 ||
[Analyze grammar]

manye mamānugraha īśa te kṛto rājyānubandhāpagamo yadṛcchayā |
yaḥ prārthyate sādhubhirekacaryayā vanaṃ vivikṣadbhirakhaṇḍabhūmipaiḥ || 54 ||
[Analyze grammar]

na kāmaye'nyaṃ tava pādasevanādakiñcanaprārthyatamādvaraṃ vibho |
ārādhya kastvāṃ hyapavargadaṃ hare vṛṇīta āryo varamātmabandhanam || 55 ||
[Analyze grammar]

tasmādvisṛjyāśiṣa īśa sarvato rajastamaḥsattvaguṇānubandhanāḥ |
nirañjanaṃ nirguṇamadvayaṃ paraṃ tvāṃ jñāptimātraṃ puruṣaṃ vrajāmyaham || 56 ||
[Analyze grammar]

ciramiha vṛjinārtastapyamāno'nutāpair |
avitṛṣaṣaḍamitro'labdhaśāntiḥ kathañcit |
śaraṇada samupetastvatpadābjaṃ parātman |
abhayamṛtamaśokaṃ pāhi māpannamīśa || 57 ||
[Analyze grammar]

śrībhagavānuvāca |
sārvabhauma mahārāja matiste vimalorjitā |
varaiḥ pralobhitasyāpi na kāmairvihatā yataḥ || 58 ||
[Analyze grammar]

pralobhito varairyattvamapramādāya viddhi tat |
na dhīrekāntabhaktānāmāśīrbhirbhidyate kvacit || 59 ||
[Analyze grammar]

yuñjānānāmabhaktānāṃ prāṇāyāmādibhirmanaḥ |
akṣīṇavāsanaṃ rājandṛśyate punarutthitam || 60 ||
[Analyze grammar]

vicarasva mahīṃ kāmaṃ mayyāveśitamānasaḥ |
astvevaṃ nityadā tubhyaṃ bhaktirmayyanapāyinī || 61 ||
[Analyze grammar]

kṣātradharmasthito jantūnnyavadhīrmṛgayādibhiḥ |
samāhitastattapasā jahyaghaṃ madupāśritaḥ || 62 ||
[Analyze grammar]

janmanyanantare rājansarvabhūtasuhṛttamaḥ |
bhūtvā dvijavarastvaṃ vai māmupaiṣyasi kevalam || 63 ||
[Analyze grammar]