Chapter 46

[English text for this chapter is available]

svavirahārtagopagopīnāṃ sāntvanāya bhagavatoddhavasya prasthāpanam nandoddhavasaṃvādaśca |
śrīśuka uvāca |
vṛṣṇīnāṃ pravaro mantrī kṛṣṇasya dayitaḥ sakhā |
śiṣyo bṛhaspateḥ sākṣāduddhavo buddhisattamaḥ || 1 ||
[Analyze grammar]

tamāha bhagavānpreṣṭhaṃ bhaktamekāntinaṃ kvacit |
gṛhītvā pāṇinā pāṇiṃ prapannārtiharo hariḥ || 2 ||
[Analyze grammar]

gacchoddhava vrajaṃ saumya pitrornau prītimāvaha |
gopīnāṃ madviyogādhiṃ matsandeśairvimocaya || 3 ||
[Analyze grammar]

tā manmanaskā matprāṇā madarthe tyaktadaihikāḥ |
māmeva dayitaṃ preṣṭhamātmānaṃ manasā gatāḥ |
ye tyaktalokadharmāśca madarthe tānbibharmyaham || 4 ||
[Analyze grammar]

mayi tāḥ preyasāṃ preṣṭhe dūrasthe gokulastriyaḥ |
smarantyo'ṅga vimuhyanti virahautkaṇṭhyavihvalāḥ || 5 ||
[Analyze grammar]

dhārayantyatikṛcchreṇa prāyaḥ prāṇānkathañcana |
pratyāgamanasandeśairballavyo me madātmikāḥ || 6 ||
[Analyze grammar]

śrīśuka uvāca |
ityukta uddhavo rājansandeśaṃ bharturādṛtaḥ |
ādāya rathamāruhya prayayau nandagokulam || 7 ||
[Analyze grammar]

prāpto nandavrajaṃ śrīmānnimlocati vibhāvasau |
channayānaḥ praviśatāṃ paśūnāṃ khurareṇubhiḥ || 8 ||
[Analyze grammar]

vāsitārthe'bhiyudhyadbhirnāditaṃ śuṣmibhirvṛṣaiḥ |
dhāvantībhiśca vāsrābhirūdhobhāraiḥ svavatsakān || 9 ||
[Analyze grammar]

itastato vilaṅghadbhirgovatsairmaṇḍitaṃ sitaiḥ |
godohaśabdābhiravaṃ veṇūnāṃ niḥsvanena ca || 10 ||
[Analyze grammar]

gāyantībhiśca karmāṇi śubhāni balakṛṣṇayoḥ |
svalaṅkṛtābhirgopībhirgopaiśca suvirājitam || 11 ||
[Analyze grammar]

agnyarkātithigovipra pitṛdevārcanānvitaiḥ |
dhūpadīpaiśca mālyaiśca gopāvāsairmanoramam || 12 ||
[Analyze grammar]

sarvataḥ puṣpitavanaṃ dvijālikulanāditam |
haṃsakāraṇḍavākīrṇaiḥ padmaṣaṇḍaiśca maṇḍitam || 13 ||
[Analyze grammar]

tamāgataṃ samāgamya kṛṣṇasyānucaraṃ priyam |
nandaḥ prītaḥ pariṣvajya vāsudevadhiyārcayat || 14 ||
[Analyze grammar]

bhojitaṃ paramānnena saṃviṣṭaṃ kaśipau sukham |
gataśramaṃ paryapṛcchatpādasaṃvāhanādibhiḥ || 15 ||
[Analyze grammar]

kaccidaṅga mahābhāga sakhā naḥ śūranandanaḥ |
āste kuśalyapatyādyairyukto muktaḥ suhṛdvrataḥ || 16 ||
[Analyze grammar]

diṣṭyā kaṃso hataḥ pāpaḥ sānugaḥ svena pāpmanā |
sādhūnāṃ dharmaśīlānāṃ yadūnāṃ dveṣṭi yaḥ sadā || 17 ||
[Analyze grammar]

api smarati naḥ kṛṣṇo mātaraṃ suhṛdaḥ sakhīn |
gopānvrajaṃ cātmanāthaṃ gāvo vṛndāvanaṃ girim || 18 ||
[Analyze grammar]

apyāyāsyati govindaḥ svajanānsakṛdīkṣitum |
tarhi drakṣyāma tadvaktraṃ sunasaṃ susmitekṣaṇam || 19 ||
[Analyze grammar]

dāvāgnervātavarṣācca vṛṣasarpācca rakṣitāḥ |
duratyayebhyo mṛtyubhyaḥ kṛṣṇena sumahātmanā || 20 ||
[Analyze grammar]

smaratāṃ kṛṣṇavīryāṇi līlāpāṅganirīkṣitam |
hasitaṃ bhāṣitaṃ cāṅga sarvā naḥ śithilāḥ kriyāḥ || 21 ||
[Analyze grammar]

saricchailavanoddeśānmukundapadabhūṣitān |
ākrīḍānīkṣyamāṇānāṃ mano yāti tadātmatām || 22 ||
[Analyze grammar]

manye kṛṣṇaṃ ca rāmaṃ ca prāptāviha surottamau |
surāṇāṃ mahadarthāya gargasya vacanaṃ yathā || 23 ||
[Analyze grammar]

kaṃsaṃ nāgāyutaprāṇaṃ mallau gajapatiṃ yathā |
avadhiṣṭāṃ līlayaiva paśūniva mṛgādhipaḥ || 24 ||
[Analyze grammar]

tālatrayaṃ mahāsāraṃ dhanuryaṣṭimivebharāṭ |
babhañjaikena hastena saptāhamadadhādgirim || 25 ||
[Analyze grammar]

pralambo dhenuko'riṣṭastṛṇāvarto bakādayaḥ |
daityāḥ surāsurajito hatā yeneha līlayā || 26 ||
[Analyze grammar]

śrīśuka uvāca |
iti saṃsmṛtya saṃsmṛtya nandaḥ kṛṣṇānuraktadhīḥ |
atyutkaṇṭho'bhavattūṣṇīṃ premaprasaravihvalaḥ || 27 ||
[Analyze grammar]

yaśodā varṇyamānāni putrasya caritāni ca |
śṛṇvantyaśrūṇyavāsrākṣītsnehasnutapayodharā || 28 ||
[Analyze grammar]

tayoritthaṃ bhagavati kṛṣṇe nandayaśodayoḥ |
vīkṣyānurāgaṃ paramaṃ nandamāhoddhavo mudā || 29 ||
[Analyze grammar]

śrīuddhava uvāca |
yuvāṃ ślāghyatamau nūnaṃ dehināmiha mānada |
nārāyaṇe'khilagurau yatkṛtā matirīdṛśī || 30 ||
[Analyze grammar]

etau hi viśvasya ca bījayonī rāmo mukundaḥ puruṣaḥ pradhānam |
anvīya bhūteṣu vilakṣaṇasya jñānasya ceśāta imau purāṇau || 31 ||
[Analyze grammar]

yasminjanaḥ prāṇaviyogakāle kṣaṇaṃ samāveśya mano'viśuddham |
nirhṛtya karmāśayamāśu yāti parāṃ gatiṃ brahmamayo'rkavarṇaḥ || 32 ||
[Analyze grammar]

tasminbhavantāvakhilātmahetau nārāyaṇe kāraṇamartyamūrtau |
bhāvaṃ vidhattāṃ nitarāṃ mahātmankiṃ vāvaśiṣṭaṃ yuvayoḥ sukṛtyam || 33 ||
[Analyze grammar]

āgamiṣyatyadīrgheṇa kālena vrajamacyutaḥ |
priyaṃ vidhāsyate pitrorbhagavānsātvatāṃ patiḥ || 34 ||
[Analyze grammar]

hatvā kaṃsaṃ raṅgamadhye pratīpaṃ sarvasātvatām |
yadāha vaḥ samāgatya kṛṣṇaḥ satyaṃ karoti tat || 35 ||
[Analyze grammar]

mā khidyataṃ mahābhāgau drakṣyathaḥ kṛṣṇamantike |
antarhṛdi sa bhūtānāmāste jyotirivaidhasi || 36 ||
[Analyze grammar]

na hyasyāsti priyaḥ kaścinnāpriyo vāstyamāninaḥ |
nottamo nādhamo vāpi samānasyāsamo'pi vā || 37 ||
[Analyze grammar]

na mātā na pitā tasya na bhāryā na sutādayaḥ |
nātmīyo na paraścāpi na deho janma eva ca || 38 ||
[Analyze grammar]

na cāsya karma vā loke sadasanmiśrayoniṣu |
krīḍārthaṃ so'pi sādhūnāṃ paritrāṇāya kalpate || 39 ||
[Analyze grammar]

sattvaṃ rajastama iti bhajate nirguṇo guṇān |
krīḍannatīto'pi guṇaiḥ sṛjatyavanhantyajaḥ || 40 ||
[Analyze grammar]

yathā bhramarikādṛṣṭyā bhrāmyatīva mahīyate |
citte kartari tatrātmā kartevāhaṃdhiyā smṛtaḥ || 41 ||
[Analyze grammar]

yuvayoreva naivāyamātmajo bhagavānhariḥ |
sarveṣāmātmajo hyātmā pitā mātā sa īśvaraḥ || 42 ||
[Analyze grammar]

dṛṣṭaṃ śrutaṃ bhūtabhavadbhaviṣyat |
sthāsnuścariṣṇurmahadalpakaṃ ca |
vinācyutādvastutarāṃ na vācyaṃ |
sa eva sarvaṃ paramātmabhūtaḥ || 43 ||
[Analyze grammar]

evaṃ niśā sā bruvatorvyatītā nandasya kṛṣṇānucarasya rājan |
gopyaḥ samutthāya nirūpya dīpānvāstūnsamabhyarcya daudhīnyamanthun || 44 ||
[Analyze grammar]

tā dīpadīptairmaṇibhirvirejū rajjūrvikarṣadbhujakaṅkaṇasrajaḥ |
calannitambastanahārakuṇḍala tviṣatkapolāruṇakuṅkumānanāḥ || 45 ||
[Analyze grammar]

udgāyatīnāmaravindalocanaṃ vrajāṅganānāṃ divamaspṛśaddhvaniḥ |
dadhnaśca nirmanthanaśabdamiśrito nirasyate yena diśāmamaṅgalam || 46 ||
[Analyze grammar]

bhagavatyudite sūrye nandadvāri vrajaukasaḥ |
dṛṣṭvā rathaṃ śātakaumbhaṃ kasyāyamiti cābruvan || 47 ||
[Analyze grammar]

akrūra āgataḥ kiṃ vā yaḥ kaṃsasyārthasādhakaḥ |
yena nīto madhupurīṃ kṛṣṇaḥ kamalalocanaḥ || 48 ||
[Analyze grammar]

kiṃ sādhayiṣyatyasmābhirbhartuḥ prītasya niṣkṛtim |
tataḥ strīṇāṃ vadantīnāmuddhavo'gātkṛtāhnikaḥ || 49 ||
[Analyze grammar]