Chapter 16

[English text for this chapter is available]

kāliyadamanamnāgapat‍nīkṛtaṃ nāgakartṛkaṃ ca |
bhagavataḥ stavanaṃ nāgadvārā hradaparityāgaśca |
śrīśuka uvāca |
vilokya dūṣitāṃ kṛṣṇāṃ kṛṣṇaḥ kṛṣṇāhinā vibhuḥ |
tasyā viśuddhimanvicchansarpaṃ tamudavāsayat || 1 ||
[Analyze grammar]

śrīrājovāca |
kathamantarjale'gādhe nyagṛhṇād bhagavānahim |
sa vai bahuyugāvāsaṃ yathā'sīd vipra kathyatām || 2 ||
[Analyze grammar]

brahmanbhagavatastasya bhūmnaḥ svacchandavartinaḥ |
gopālodāracaritaṃ kastṛpyetāmṛtaṃ juṣan || 3 ||
[Analyze grammar]

śrīśuka uvāca |
kālindyāṃ kāliyasyāsīd hradaḥ kaścid viṣāgninā |
śrapyamāṇapayā yasmin patantyuparigāḥ khagāḥ || 4 ||
[Analyze grammar]

vipruṣmatā viṣadormi mārutenābhimarśitāḥ |
mriyante tīragā yasya prāṇinaḥ sthirajaṅgamāḥ || 5 ||
[Analyze grammar]

taṃ caṇḍavegaviṣavīryamavekṣya tena |
duṣṭāṃ nadīṃ ca khalasaṃyamanāvatāraḥ |
kṛṣṇaḥ kadambamadhiruhya tato'tituṅgam |
āsphoṭya gāḍharaśano nyapatad viṣode || 6 ||
[Analyze grammar]

sarpahradaḥ puruṣasāranipātavega |
saṃkṣobhitoragaviṣocchvasitāmburāśiḥ |
paryakpluto viṣakaṣāyabibhīṣaṇormiḥ |
dhāvan dhanuḥśatamanantabalasya kiṃ tat || 7 ||
[Analyze grammar]

tasya hrade viharato bhujadaṇḍaghūrṇa |
vārghoṣamaṅga varavāraṇavikramasya |
āśrutya tat svasadanābhibhavaṃ nirīkṣya |
cakṣuḥśravāḥ samasarat tadamṛṣyamāṇaḥ || 8 ||
[Analyze grammar]

taṃ prekṣaṇīyasukumāraghanāvadātaṃ |
śrīvatsapītavasanaṃ smitasundarāsyam |
krīḍantamapratibhayaṃ kamalodarāṅghriṃ |
sandaśya marmasu ruṣā bhujayā cachāda || 9 ||
[Analyze grammar]

taṃ nāgabhogaparivītamadṛṣṭaceṣṭam |
ālokya tatpriyasakhāḥ paśupā bhṛśārtāḥ |
kṛṣṇe'rpitātmasuhṛdarthakalatrakāmā |
duḥkhānuśokabhayamūḍhadhiyo nipetuḥ || 10 ||
[Analyze grammar]

gāvo vṛṣā vatsataryaḥ krandamānāḥ suduḥkhitāḥ |
kṛṣṇe nyastekṣaṇā bhītā rudatya iva tasthire || 11 ||
[Analyze grammar]

atha vraje mahotpātāḥ trividhā hyatidāruṇāḥ |
utpeturbhuvi divyātman yāsannabhayaśaṃsinaḥ || 12 ||
[Analyze grammar]

tānālakṣya bhayodvignā gopā nandapurogamāḥ |
vinā rāmeṇa gāḥ kṛṣṇaṃ jñātvā cārayituṃ gatam || 13 ||
[Analyze grammar]

tairdurnimittairnidhanaṃ matvā prāptamatad vidaḥ |
tat prāṇāstanmanaskāste duḥkhaśokabhayāturāḥ || 14 ||
[Analyze grammar]

ābālavṛddhavanitāḥ sarve'ṅga paśuvṛttayaḥ |
nirjagmurgokulād dīnāḥ kṛṣṇadarśanalālasāḥ || 15 ||
[Analyze grammar]

tāṃstathā kātarān vīkṣya bhagavān mādhavo balaḥ |
prahasya kiñcinnovāca prabhāvajño'nujasya saḥ |
te'nveṣamāṇā dayitaṃ kṛṣṇaṃ sūcitayā padaiḥ |
bhagavat lakṣaṇairjagmuḥ padavyā yamunātaṭam || 17 ||
[Analyze grammar]

te tatra tatrābjayavāṅkuśāśani |
dhvajopapannāni padāni viśpateḥ |
mārge gavāmanyapadāntarāntare |
nirīkṣamāṇā yayuraṅga satvarāḥ || 18 ||
[Analyze grammar]

antarhrade bhujagabhogaparītamārāt |
kṛṣṇaṃ nirīhamupalabhya jalāśayānte |
gopāṃśca mūḍhadhiṣaṇān paritaḥ paśūṃśca |
saṃkrandataḥ paramakaśmalamāpurārtāḥ || 19 ||
[Analyze grammar]

gopyo'nuraktamanaso bhagavatyanante |
tatsauhṛdasmitavilokagiraḥ smarantyaḥ |
graste'hinā priyatame bhṛśaduḥkhataptāḥ |
śūnyaṃ priyavyatihṛtaṃ dadṛśustrilokam || 20 ||
[Analyze grammar]

tāḥ kṛṣṇamātaramapatyamanupraviṣṭāṃ |
tulyavyathāḥ samanugṛhya śucaḥ sravantyaḥ |
tāstā vrajapriyakathāḥ kathayantya āsan |
kṛṣṇānane'rpitadṛśo mṛtakapratīkāḥ || 21 ||
[Analyze grammar]

kṛṣṇaprāṇān nirviśato nandādīn vīkṣya taṃ hradam |
pratyaṣedhat sa bhagavān rāmaḥ kṛṣṇānubhāvavit || 22 ||
[Analyze grammar]

itthaṃ svagokulamananyagatiṃ nirīkṣya |
sastrīkumāramatiduḥkhitamātmahetoḥ |
ājñāya martyapadavīmanuvartamānaḥ |
sthitvā muhūrtamudatiṣṭhaduraṅgabandhāt || 23 ||
[Analyze grammar]

tatprathyamānavapuṣā vyathitātmabhogaḥ |
tyaktvonnamayya kupitaḥ svaphaṇānbhujaṅgaḥ |
tasthau śvasan śvasanarandhraviṣāmbarīṣa |
stabdhekṣaṇolmukamukho harimīkṣamāṇaḥ || 24 ||
[Analyze grammar]

taṃ jihvayā dviśikhayā parilelihānaṃ |
dve sṛkkiṇī hyatikarālaviṣāgnidṛṣṭim |
krīḍannamuṃ parisasāra yathā khagendro |
babhrāma so'pyavasaraṃ prasamīkṣamāṇaḥ || 25 ||
[Analyze grammar]

evaṃ paribhramahataujasamunnatāṃsam |
ānamya tatpṛthuśiraḥsvadhirūḍha ādyaḥ |
tanmūrdharat‍nanikarasparśātitāmra |
pādāmbujo'khilakalādigururnanarta || 26 ||
[Analyze grammar]

taṃ nartumudyatamavekṣya tadā tadīya |
gandharvasiddhamunicāraṇadevavadhvaḥ |
prītyā mṛdaṅgapaṇavānakavādyagīta |
puṣpopahāranutibhiḥ sahasopaseduḥ || 27 ||
[Analyze grammar]

yad yad śiro na namate'ṅga śataikaśīrṣṇaḥ |
tattanmamarda kharadaṇḍadharo'ṅghripātaiḥ |
kṣīṇāyuṣo bhramata ulbaṇamāsyato'sṛṅ |
nasto vaman paramakaśmalamāpa nāgaḥ || 28 ||
[Analyze grammar]

tasyākṣibhirgaralamudvamataḥ śiraḥsu |
yad yat samunnamati niḥśvasato ruṣoccaiḥ |
nṛtyan padānunamayan damayāṃ babhūva |
puṣpaiḥ prapūjita iveha pumānpurāṇaḥ || 29 ||
[Analyze grammar]

taccitratāṇḍavavirugṇaphaṇātapatro |
raktaṃ mukhairuru vaman nṛpa bhagnagātraḥ |
smṛtvā carācaraguruṃ puruṣaṃ purāṇaṃ |
nārāyaṇaṃ tamaraṇaṃ manasā jagāma || 30 ||
[Analyze grammar]

kṛṣṇasya garbhajagato'tibharāvasannaṃ |
pārṣṇiprahāraparirugṇaphaṇātapatram |
dṛṣṭvāhimādyamupaseduramuṣya pat‍nya |
ārtāḥ ślathadvasana bhūṣaṇakeśabandhāḥ || 31 ||
[Analyze grammar]

tāstaṃ suvignamanaso'tha puraskṛtārbhāḥ |
kāyaṃ nidhāya bhuvi bhūtapatiṃ praṇemuḥ |
sādhvyaḥ kṛtāñjalipuṭāḥ śamalasya bhartuḥ |
mokṣepsavaḥ śaraṇadaṃ śaraṇaṃ prapannāḥ || 32 ||
[Analyze grammar]

nāgapat‍nya ūcuḥ |
nyāyyo hi daṇḍaḥ kṛtakilbiṣe'smin |
tavāvatāraḥ khalanigrahāya |
ripoḥ sutānāmapi tulyadṛṣṭeḥ |
dhatse damaṃ phalamevānuśaṃsan || 33 ||
[Analyze grammar]

anugraho'yaṃ bhavataḥ kṛto hi no |
daṇḍo'satāṃ te khalu kalmaṣāpahaḥ |
yad dandaśūkatvamamuṣya dehinaḥ |
krodho'pi te'nugraha eva sammataḥ || 34 ||
[Analyze grammar]

tapaḥ sutaptaṃ kimanena pūrvaṃ |
nirastamānena ca mānadena |
dharmo'tha vā sarvajanānukampayā |
yato bhavāṃstuṣyati sarvajīvaḥ || 35 ||
[Analyze grammar]

kasyānubhāvo'sya na deva vidmahe |
tavāṅghrireṇu sparśādhikāraḥ |
yadvāñchayā śrīrlalanācarattapo |
vihāya kāmān suciraṃ dhṛtavratā || 36 ||
[Analyze grammar]

na nākapṛṣṭhaṃ na ca sārvabhaumaṃ |
na pārameṣṭhyaṃ na rasādhipatyam |
na yogasiddhīrapunarbhavaṃ vā |
vāñchanti yatpādarajaḥprapannāḥ || 37 ||
[Analyze grammar]

tadeṣa nāthāpa durāpamanyaiḥ |
tamojaniḥ krodhavaśo'pyahīśaḥ |
saṃsāracakre bhramataḥ śarīriṇo |
yadicchataḥ syād vibhavaḥ samakṣaḥ || 38 ||
[Analyze grammar]

namastubhyaṃ bhagavate puruṣāya mahātmane |
bhūtāvāsāya bhūtāya parāya paramātmane || 39 ||
[Analyze grammar]

jñānavijñānanidhaye brahmaṇe'nantaśaktaye |
aguṇāyāvikārāya namaste'prākṛtāya ca || 40 ||
[Analyze grammar]

kālāya kālanābhāya kālāvayavasākṣiṇe |
viśvāya tadupadraṣṭre tatkartre viśvahetave || 41 ||
[Analyze grammar]

bhūtamātrendriyaprāṇa manobuddhyāśayātmane |
triguṇenābhimānena gūḍhasvātmānubhūtaye || 42 ||
[Analyze grammar]

namo'nantāya sūkṣmāya kūṭasthāya vipaścite |
nānāvādānurodhāya vācyavācaka śaktaye || 43 ||
[Analyze grammar]

namaḥ pramāṇamūlāya kavaye śāstrayonaye |
pravṛttāya nivṛttāya nigamāya namo namaḥ || 44 ||
[Analyze grammar]

namaḥ kṛṣṇāya rāmāya vasudevasutāya ca |
pradyumnāyāniruddhāya sātvatāṃ pataye namaḥ || 45 ||
[Analyze grammar]

namo guṇapradīpāya guṇātmacchādanāya ca |
guṇavṛttyupalakṣyāya guṇadraṣṭe svasaṃvide || 46 ||
[Analyze grammar]

avyākṛtavihārāya sarvavyākṛtasiddhaye |
hṛṣīkeśa namaste'stu munaye maunaśīline || 47 ||
[Analyze grammar]

parāvaragatijñāya sarvādhyakṣāya te namaḥ |
aviśvāya ca viśvāya taddraṣṭe'sya ca hetave || 48 ||
[Analyze grammar]

tvaṃ hyasya janmasthitisaṃyamān prabho |
guṇairanīho'kṛta kālaśaktidhṛk |
tattat svabhāvān pratibodhayan sataḥ |
samīkṣayāmoghavihāra īhase || 49 ||
[Analyze grammar]

tasyaiva te'mūstanavastrilokyāṃ |
śāntā aśāntā uta mūḍhayonayaḥ |
śāntāḥ priyāste hyadhunāvituṃ satāṃ |
sthātuśca te dharmaparīpsayehataḥ || 50 ||
[Analyze grammar]

aparādhaḥ sakṛd bhartrā soḍhavyaḥ svaprajākṛtaḥ |
kṣantumarhasi śāntātmam mūḍhasya tvāmajānataḥ || 51 ||
[Analyze grammar]

anugṛhṇīṣva bhagavan prāṇāṃstyajati pannagaḥ |
strīṇāṃ naḥ sādhuśocyānāṃ patiḥ prāṇaḥ pradīyatām || 52 ||
[Analyze grammar]

vidhehi te kiṅkarīṇāṃ anuṣṭheyaṃ tavājñayā |
yacchraddhayānutiṣṭhan vai mucyate sarvato bhayāt || 53 ||
[Analyze grammar]

śrīśuka uvāca |
itthaṃ sa nāgapat‍nībhiḥ bhagavān samabhiṣṭutaḥ |
mūrcchitaṃ bhagnaśirasaṃ visasarjāṅghrikuṭṭanaiḥ || 54 ||
[Analyze grammar]

pratilabdhendriyaprāṇaḥ kāliyaḥ śanakairharim |
kṛcchrāt samucchvasan dīnaḥ kṛṣṇaṃ prāha kṛtāñjaliḥ || 55 ||
[Analyze grammar]

kāliya uvāca |
vayaṃ khalāḥ sahotpattyā tamasā dīrghamanyavaḥ |
svabhāvo dustyajo nātha lokānāṃ yadasad‍grahaḥ || 56 ||
[Analyze grammar]

tvayā sṛṣṭamidaṃ viśvaṃ dhātarguṇavisarjanam |
nānāsvabhāvavīryaujo yonibījāśayākṛti || 57 ||
[Analyze grammar]

vayaṃ ca tatra bhagavan sarpā jātyurumanyavaḥ |
kathaṃ tyajāmastvanmāyāṃ dustyajāṃ mohitāḥ svayam || 58 ||
[Analyze grammar]

bhavān hi kāraṇaṃ tatra sarvajño jagadīśvaraḥ |
anugrahaṃ nigrahaṃ vā manyase tad vidhehi naḥ || 59 ||
[Analyze grammar]

śrīśuka uvāca |
ityākarṇya vacaḥ prāha bhagavān kāryamānuṣaḥ |
nātra stheyaṃ tvayā sarpa samudraṃ yāhi mā ciram |
svajñātyapatyadārāḍhyo gonṛbhirbhujyatāṃ nadī || 60 ||
[Analyze grammar]

ya etat saṃsmaren martyaḥ tubhyaṃ madanuśāsanam |
kīrtayan ubhayoḥ sandhyoḥ na yuṣmad bhayamāpnuyāt || 61 ||
[Analyze grammar]

yo'smin snātvā madākrīḍe devādīn tarpayejjalaiḥ |
upoṣya māṃ smarannarcet sarvapāpaiḥ pramucyate || 62 ||
[Analyze grammar]

dvīpaṃ ramaṇakaṃ hitvā hradametamupāśritaḥ |
yad bhayātsa suparṇastvāṃ nādyānmatpāda lāñchitam || 63 ||
[Analyze grammar]

śrīṛṣiruvāca |
evamukto bhagavatā kṛṣṇenādbhutakarmaṇā |
taṃ pūjayāmāsa mudā nāgapat‍nyaśca sādaram || 64 ||
[Analyze grammar]

divyāmbarasraṅ maṇibhiḥ parārdhyairapi bhūṣaṇaiḥ |
divyagandhānulepaiśca mahatyotpalamālayā || 65 ||
[Analyze grammar]

pūjayitvā jagannāthaṃ prasādya garuḍadhvajam |
tataḥ prīto'bhyanujñātaḥ parikramyābhivandya tam || 66 ||
[Analyze grammar]

sakalatrasuhṛtputro dvīpamabdherjagāma ha |
tadaiva sāmṛtajalā yamunā nirviṣābhavat |
anugrahād bhagavataḥ krīḍāmānuṣarūpiṇaḥ || 67 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe ṣoḍaśo'dhyāyaḥ || 16 ||
[Analyze grammar]