Chapter 15

[English text for this chapter is available]

ṛcīkajamadagniparaśurāmacaritaṃ sahasrārjuna vadhaśca |
śrīśuka uvāca |
ailasya ca urvaśīgarbhāt ṣaḍāsannātmajā nṛpa |
āyuḥ śrutāyuḥ satyāyū rayo'tha vijayo jayaḥ || 1 ||
[Analyze grammar]

śrutāyorvasumānputraḥ satyāyośca śrutañjayaḥ |
rayasya suta ekaśca jayasya tanayo'mitaḥ || 2 ||
[Analyze grammar]

bhīmastu vijayasyātha kāñcano hotrakastataḥ |
tasya jahnuḥ suto gaṃgāṃ gaṇḍūṣīkṛtya yo'pibat |
jahnostu pūrustasyātha balākaścātmajo'jakaḥ || 3 ||
[Analyze grammar]

tataḥ kuśaḥ kuśasyāpi kuśāmbustanayo vasuḥ |
kuśanābhaśca catvāro gādhirāsīt kuśāmbujaḥ || 4 ||
[Analyze grammar]

tasya satyavatīṃ kanyāṃ ṛcīko'yācata dvijaḥ |
varaṃ visadṛśaṃ matvā gādhirbhārgavamabravīt || 5 ||
[Analyze grammar]

ekataḥ śyāmakarṇānāṃ hayānāṃ candravarcasām |
sahasraṃ dīyatāṃ śulkaṃ kanyāyāḥ kuśikā vayam || 6 ||
[Analyze grammar]

ityuktastanmataṃ jñātvā gataḥ sa varuṇāntikam |
ānīya dattvā tān aśvān upayeme varānanām || 7 ||
[Analyze grammar]

sa ṛṣiḥ prārthitaḥ pat‍nyā śvaśrvā cāpatyakāmyayā |
śrapayitvobhayairmantraiḥ caruṃ snātuṃ gato muniḥ || 8 ||
[Analyze grammar]

tāvat satyavatī mātrā svacaruṃ yācitā satī |
śreṣṭhaṃ matvā tayāyacchan mātre māturadat svayam || 9 ||
[Analyze grammar]

tad vijñāya muniḥ prāha pat‍nīṃ kaṣṭamakāraṣīḥ |
ghoro daṇḍadharaḥ putro bhrātā te brahmavittamaḥ || 10 ||
[Analyze grammar]

prasāditaḥ satyavatyā maivaṃ bhūriti bhārgavaḥ |
atha tarhi bhavet pautro jamadagnistato'bhavat || 11 ||
[Analyze grammar]

sā cābhūt sumahapuṇyā kauśikī lokapāvanī |
reṇoḥ sutāṃ reṇukāṃ vai jamadagniruvāha yām || 12 ||
[Analyze grammar]

tasyāṃ vai bhārgavaṛṣeḥ sutā vasumadādayaḥ |
yavīyānjajña eteṣāṃ rāma ityabhiviśrutaḥ || 13 ||
[Analyze grammar]

yamāhurvāsudevāṃśaṃ haihayānāṃ kulāntakam |
triḥsaptakṛtvo ya imāṃ cakre niḥkṣatriyāṃ mahīm || 14 ||
[Analyze grammar]

duṣṭaṃ kṣatraṃ bhuvo bhāraṃ abrahmaṇyaṃ anīnaśat |
rajastamovṛtamahan phalgunyapi kṛteṃ'hasi || 15 ||
[Analyze grammar]

śrīrājovāca |
kiṃ tadaṃho bhagavato rājanyairajitātmabhiḥ |
kṛtaṃ yena kulaṃ naṣṭaṃ kṣatriyāṇāṃ abhīkṣṇaśaḥ || 16 ||
[Analyze grammar]

śrīśuka uvāca |
haihayānāṃ adhipatiḥ arjunaḥ kṣatriyarṣabhaḥ |
dattaṃ nārāyaṇa aṃśāṃśaṃ ārādhya parikarmabhiḥ || 17 ||
[Analyze grammar]

bāhūn daśaśataṃ lebhe durdharṣatvamarātiṣu |
avyāhatendriyaujaḥ śrī tejovīryayaśobalam || 18 ||
[Analyze grammar]

yogeśvaratvaṃ aiśvaryaṃ guṇā yatrāṇimādayaḥ |
cacāra avyāhatagatiḥ lokeṣu pavano yathā || 19 ||
[Analyze grammar]

strīrat‍naiḥ āvṛtaḥ krīḍan revāmbhasi madotkaṭaḥ |
vaijayantīṃ srajaṃ bibhrad rurodha saritaṃ bhujaiḥ || 20 ||
[Analyze grammar]

viplāvitaṃ svaśibiraṃ pratisrotaḥsarijjalaiḥ |
nāmṛṣyat tasya tad vīryaṃ vīramānī daśānanaḥ || 21 ||
[Analyze grammar]

gṛhīto līlayā strīṇāṃ samakṣaṃ kṛtakilbiṣaḥ |
māhiṣmatyāṃ sanniruddho mukto yena kapiryathā || 22 ||
[Analyze grammar]

sa ekadā tu mṛgayāṃ vicaran vijane vane |
yadṛcchayā'śramapadaṃ jamadagnerupāviśat || 23 ||
[Analyze grammar]

tasmai sa naradevāya munirarhaṇamāharat |
sasainyāmātyavāhāya haviṣmatyā tapodhanaḥ || 24 ||
[Analyze grammar]

sa vai rat‍naṃ tu tad dṛṣṭvā ātmaiśvaryātiśāyanam |
tannādriyatāgnihotryāṃ sābhilāṣaḥ sa haihayaḥ || 25 ||
[Analyze grammar]

havirdhānīṃ ṛṣerdarpān narān hartumacodayat |
te ca māhiṣmatīṃ ninyuḥ savatsāṃ krandatīṃ balāt || 26 ||
[Analyze grammar]

atha rājani niryāte rāma āśrama āgataḥ |
śrutvā tat tasya daurātmyaṃ cukrodhāhirivāhataḥ || 27 ||
[Analyze grammar]

ghoramādāya paraśuṃ satūṇaṃ carma kārmukam |
anvadhāvata durdharṣo mṛgendra iva yūthapam || 28 ||
[Analyze grammar]

taṃ āpatantaṃ bhṛguvaryamojasā |
dhanurdharaṃ bāṇaparaśvadhāyudham |
aiṇeyacarmāmbaramarkadhāmabhiḥ |
yutaṃ jaṭābhirdadṛśe purīṃ viśan || 29 ||
[Analyze grammar]

acodayaddhastirathāśvapattibhiḥ |
gadāsibāṇarṣṭiśataghniśaktibhiḥ |
akṣauhiṇīḥ saptadaśātibhīṣaṇāḥ |
tā rāma eko bhagavānasūdayat || 30 ||
[Analyze grammar]

yato yato'sau praharatparaśvadho |
mano'nilaujāḥ paracakrasūdanaḥ |
tatastataśchinnabhujorukandharā |
nipetururvyāṃ hatasūtavāhanāḥ || 31 ||
[Analyze grammar]

dṛṣṭvā svasainyaṃ rudhiraughakardame |
raṇājire rāmakuṭhārasāyakaiḥ |
vivṛkṇacarmadhvajacāpavigrahaṃ |
nipātitaṃ haihaya āpatad ruṣā || 32 ||
[Analyze grammar]

athārjunaḥ pañcaśateṣu bāhubhiḥ |
dhanuḥṣu bāṇān yugapat sa sandadhe |
rāmāya rāmo'strabhṛtāṃ samagraṇīḥ |
tānyekadhanveṣubhirācchinat samam || 33 ||
[Analyze grammar]

punaḥ svahastairacalānmṛdheṅghripān |
utkṣipya vegād abhidhāvato yudhi |
bhujān kuṭhāreṇa kaṭhoraneminā |
ciccheda rāmaḥ prasabhaṃ tvaheriva || 34 ||
[Analyze grammar]

kṛttabāhoḥ śirastasya gireḥ śrṛṅamivāharat |
hate pitari tatputrā ayutaṃ dudruvurbhayāt || 35 ||
[Analyze grammar]

agnihotrīṃ upāvartya savatsāṃ paravīrahā |
samupetyāśramaṃ pitre parikliṣṭāṃ samarpayat || 36 ||
[Analyze grammar]

svakarma tatkṛtaṃ rāmaḥ pitre bhrātṛbhya eva ca |
varṇayāmāsa tat śrutvā jamadagnirabhāṣata || 37 ||
[Analyze grammar]

rāma rāma mahābāho bhavān pāpamakāraṣīt |
avadhīt naradevaṃ yat sarvadevamayaṃ vṛthā || 38 ||
[Analyze grammar]

vayaṃ hi brāhmaṇāstāta kṣamayārhaṇatāṃ gatāḥ |
yayā lokagururdevaḥ pārameṣṭhyamagāt padam || 39 ||
[Analyze grammar]

kṣamayā rocate lakṣmīḥ brāhmī saurī yathā prabhā |
kṣamiṇāmāśu bhagavān tuṣyate harirīśvaraḥ || 40 ||
[Analyze grammar]

rājño mūrdhābhiṣiktasya vadho brahmavadhād guruḥ |
tīrthasaṃsevayā cāṃho jahyaṅgācyutacetanaḥ || 41 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ navamaskandhe pañcadaśo'dhyāyaḥ || 15 ||
[Analyze grammar]