Chapter 31

[English text for this chapter is available]

maitreya uvāca |
tata utpannavijñānā āśvadhokṣajabhāṣitam |
smaranta ātmaje bhāryāṃ visṛjya prāvrajan gṛhāt || 1 ||
[Analyze grammar]

dīkṣitā brahmasatreṇa sarvabhūtātmamedhasā |
pratīcyāṃ diśi velāyāṃ siddho'bhūd yatra jājaliḥ || 2 ||
[Analyze grammar]

tānnirjitaprāṇamanovacodṛśo |
jitāsanān śāntasamānavigrahān |
pare'male brahmaṇi yojitātmanaḥ |
surāsureḍyo dadṛśe sma nāradaḥ || 3 ||
[Analyze grammar]

tamāgataṃ ta utthāya praṇipatyābhinandya ca |
pūjayitvā yathādeśaṃ sukhāsīnaṃ athābruvan || 4 ||
[Analyze grammar]

pracetasa ūcuḥ |
svāgataṃ te surarṣe'dya diṣṭyā no darśanaṃ gataḥ |
tava caṅkramaṇaṃ brahman abhayāya yathā raveḥ || 5 ||
[Analyze grammar]

yadādiṣṭaṃ bhagavatā śivenādhokṣajena ca |
tad‍gṛheṣu prasaktānāṃ prāyaśaḥ kṣapitaṃ prabho || 6 ||
[Analyze grammar]

tannaḥ pradyotayādhyātma jñānaṃ tattvārthadarśanam |
yenāñjasā tariṣyāmo dustaraṃ bhavasāgaram || 7 ||
[Analyze grammar]

maitreya uvāca |
iti pracetasāṃ pṛṣṭo bhagavān nārado muniḥ |
bhagavati uttamaśloka āviṣṭātmābravīn nṛpān || 8 ||
[Analyze grammar]

nārada uvāca |
tajjanma tāni karmāṇi tadāyustanmano vacaḥ |
nṛṇāṃ yena hi viśvātmā sevyate harirīśvaraḥ || 9 ||
[Analyze grammar]

kiṃ janmabhiḥ tribhirveha śaukrasāvitrayājñikaiḥ |
karmabhirvā trayīproktaiḥ puṃso'pi vibudhāyuṣā || 10 ||
[Analyze grammar]

śrutena tapasā vā kiṃ vacobhiścittavṛttibhiḥ |
buddhyā vā kiṃ nipuṇayā balenendriyarādhasā || 11 ||
[Analyze grammar]

kiṃ vā yogena sāṅkhyena nyāsasvādhyāyayorapi |
kiṃ vā śreyobhiranyaiśca na yatrātmaprado hariḥ || 12 ||
[Analyze grammar]

śreyasāmapi sarveṣāṃ ātmā hyavadhirarthataḥ |
sarveṣāmapi bhūtānāṃ harirātmā'tmadaḥ priyaḥ || 13 ||
[Analyze grammar]

yathā tarormūlaniṣecanena |
tṛpyanti tatskandhabhujopaśākhāḥ |
prāṇopahārācca yathendriyāṇāṃ |
tathaiva sarvārhaṇamacyutejyā || 14 ||
[Analyze grammar]

yathaiva sūryātprabhavanti vāraḥ |
punaśca tasmin praviśanti kāle |
bhūtāni bhūmau sthirajaṅgamāni |
tathā harāveva guṇapravāhaḥ || 15 ||
[Analyze grammar]

etatpadaṃ tajjagadātmanaḥ paraṃ |
sakṛdvibhātaṃ savituryathā prabhā |
yathāsavo jāgrati suptaśaktayo |
dravyakriyājñānabhidābhramātyayaḥ || 16 ||
[Analyze grammar]

yathā nabhasyabhratamaḥprakāśā |
bhavanti bhūpā na bhavantyanukramāt |
evaṃ pare brahmaṇi śaktayastvamū |
rajastamaḥ sattvamiti pravāhaḥ || 17 ||
[Analyze grammar]

tenaikamātmānamaśeṣadehināṃ |
kālaṃ pradhānaṃ puruṣaṃ pareśam |
svatejasā dhvastaguṇapravāhaṃ |
ātmaikabhāvena bhajadhvamaddhā || 18 ||
[Analyze grammar]

dayayā sarvabhūteṣu santuṣṭyā yena kena vā |
sarvendriyopaśāntyā ca tuṣyatyāśu janārdanaḥ || 19 ||
[Analyze grammar]

apahatasakalaiṣaṇāmalātmani |
aviratamedhitabhāvanopahūtaḥ |
nijajanavaśagatvamātmano'yan |
na sarati chidravadakṣaraḥ satāṃ hi || 20 ||
[Analyze grammar]

na bhajati kumanīṣiṇāṃ sa ijyāṃ |
hariradhanātmadhanapriyo rasajñaḥ |
śrutadhanakulakarmaṇāṃ madairye |
vidadhati pāpamakiñcaneṣu satsu || 21 ||
[Analyze grammar]

śriyamanucaratīṃ tadarthinaśca |
dvipadapatīn vibudhāṃśca yatsvapūrṇaḥ |
na bhajati nijabhṛtyavargatantraḥ |
kathamamumudvisṛjetpumān kṛtajñaḥ || 22 ||
[Analyze grammar]

maitreya uvāca |
iti pracetaso rājan anyāśca bhagavatkathāḥ |
śrāvayitvā brahmalokaṃ yayau svāyambhuvo muniḥ || 23 ||
[Analyze grammar]

te'pi tanmukhaniryātaṃ yaśo lokamalāpaham |
harerniśamya tatpādaṃ dhyāyantastad‍gatiṃ yayuḥ || 24 ||
[Analyze grammar]

etatte'bhihitaṃ kṣattaḥ yanmāṃ tvaṃ paripṛṣṭavān |
pracetasāṃ nāradasya saṃvādaṃ harikīrtanam || 25 ||
[Analyze grammar]

śrīśuka uvāca |
ya eṣa uttānapado mānavasyānuvarṇitaḥ |
vaṃśaḥ priyavratasyāpi nibodha nṛpasattama || 26 ||
[Analyze grammar]

yo nāradādāt ātmavidyāṃ adhigamya punarmahīm |
bhuktvā vibhajya putrebhya aiśvaraṃ samagātpadam || 27 ||
[Analyze grammar]

imāṃ tu kauṣāraviṇopavarṇitāṃ |
kṣattā niśamyājitavādasatkathām |
pravṛddhabhāvo'śrukalākulo muneḥ |
dadhāra mūrdhnā caraṇaṃ hṛdā hareḥ || 28 ||
[Analyze grammar]

vidura uvāca |
so'yamadya mahāyogin bhavatā karuṇātmanā |
darśitastamasaḥ pāro yatrākiñcanago hariḥ || 29 ||
[Analyze grammar]

śrīśuka uvāca |
ityānamya tamāmantrya viduro gajasāhvayam |
svānāṃ didṛkṣuḥ prayayau jñātīnāṃ nirvṛtāśayaḥ || 30 ||
[Analyze grammar]

etad yaḥ śṛṇuyād rājan rājñāṃ haryarpitātmanām |
āyurdhanaṃ yaśaḥ svasti gatimaiśvaryamāpnuyāt || 31 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe pracetaupākhyānaṃ nāma ekayastriṃśo'dhyāyaḥ || 31 ||
[Analyze grammar]