Chapter 29

[English text for this chapter is available]

prācīnabarhiruvāca |
bhagavaṃste vaco'smābhiḥ na samyak avagamyate |
kavayastadvijānanti na vayaṃ karmamohitāḥ || 1 ||
[Analyze grammar]

nārada uvāca |
puruṣaṃ purañjanaṃ vidyād yad vyanaktyātmanaḥ puram |
eka dvi tri catuṣpādaṃ bahupādamapādakam || 2 ||
[Analyze grammar]

yo'vijñātāhṛtastasya puruṣasya sakheśvaraḥ |
yanna vijñāyate pumbhiḥ nāmabhirvā kriyāguṇaiḥ || 3 ||
[Analyze grammar]

yadā jighṛkṣan puruṣaḥ kārtsnyena prakṛterguṇān |
navadvāraṃ dvihastāṅghri tatrāmanuta sādhviti || 4 ||
[Analyze grammar]

buddhiṃ tu pramadāṃ vidyān mamāhamiti yatkṛtam |
yāmadhiṣṭhāya dehe'smin pumān bhuṅkte'kṣabhirguṇān || 5 ||
[Analyze grammar]

sakhāya indriyagaṇā jñānaṃ karma ca yatkṛtam |
sakhyastadvṛttayaḥ prāṇaḥ pañcavṛttiryathoragaḥ || 6 ||
[Analyze grammar]

bṛhad‍balaṃ mano vidyād ubhayendriyanāyakam |
pañcālāḥ pañca viṣayā yanmadhye navakhaṃ puram || 7 ||
[Analyze grammar]

akṣiṇī nāsike karṇau mukhaṃ śiśnagudau iti |
dve dve dvārau bahiryāti yastad indriyasaṃyutaḥ || 8 ||
[Analyze grammar]

akṣiṇī nāsike āsyaṃ iti pañca puraḥ kṛtāḥ |
dakṣiṇā dakṣiṇaḥ karṇa uttarā cottaraḥ smṛtaḥ || 9 ||
[Analyze grammar]

paścime ityadho dvārau gudaṃ śiśnamihocyate |
khadyotā'virmukhī cātra netre ekatra nirmite |
rūpaṃ vibhrājitaṃ tābhyāṃ vicaṣṭe cakṣuṣeśvaraḥ || 10 ||
[Analyze grammar]

nalinī nālinī nāse gandhaḥ saurabha ucyate |
ghrāṇo'vadhūto mukhyāsyaṃ vipaṇo vāg rasavidrasaḥ || 11 ||
[Analyze grammar]

āpaṇo vyavahāro'tra citramandho bahūdanam |
pitṛhūrdakṣiṇaḥ karṇa uttaro devahūḥ smṛtaḥ || 12 ||
[Analyze grammar]

pravṛttaṃ ca nivṛttaṃ ca śāstraṃ pañcālasaṃjñitam |
pitṛyānaṃ devayānaṃ śrotrāt śrutadharādvrajet || 13 ||
[Analyze grammar]

āsurī meḍhramarvāgdvāḥ vyavāyo grāmiṇāṃ ratiḥ |
upastho durmadaḥ prokto nirṛtirguda ucyate || 14 ||
[Analyze grammar]

vaiśasaṃ narakaṃ pāyuḥ lubdhako'ndhau tu me śṛṇu |
hastapādau pumāṃstābhyāṃ yukto yāti karoti ca || 15 ||
[Analyze grammar]

antaḥpuraṃ ca hṛdayaṃ viṣūcirmana ucyate |
tatra mohaṃ prasādaṃ vā harṣaṃ prāpnoti tad‍guṇaiḥ || 16 ||
[Analyze grammar]

yathā yathā vikriyate guṇākto vikaroti vā |
tathā tathopadraṣṭātmā tadvṛttīranukāryate || 17 ||
[Analyze grammar]

deho rathastvindriyāśvaḥ saṃvatsararayo'gatiḥ |
dvikarmacakrastriguṇa dhvajaḥ pañcāsubandhuraḥ || 18 ||
[Analyze grammar]

manoraśmirbuddhisūto hṛnnīḍo dvandvakūbaraḥ |
pañcendriyārthaprakṣepaḥ saptadhātuvarūthakaḥ || 19 ||
[Analyze grammar]

ākūtirvikramo bāhyo mṛgatṛṣṇāṃ pradhāvati |
ekādaśendriyacamūḥ pañcasūnāvinodakṛt || 20 ||
[Analyze grammar]

saṃvatsaraścaṇḍavegaḥ kālo yenopalakṣitaḥ |
tasyāhānīha gandharvā gandharvyo rātrayaḥ smṛtāḥ |
harantyāyuḥ parikrāntyā ṣaṣṭyuttaraśatatrayam || 21 ||
[Analyze grammar]

kālakanyā jarā sākṣāt lokastāṃ nābhinandati |
svasāraṃ jagṛhe mṛtyuḥ kṣayāya yavaneśvaraḥ || 22 ||
[Analyze grammar]

ādhayo vyādhayastasya sainikā yavanāścarāḥ |
bhūtopasargāśurayaḥ prajvāro dvividho jvaraḥ || 23 ||
[Analyze grammar]

evaṃ bahuvidhairduḥkhaiḥ daivabhūtātmasambhavaiḥ |
kliśyamānaḥ śataṃ varṣaṃ dehe dehī tamovṛtaḥ || 24 ||
[Analyze grammar]

prāṇendriyamanodharmān ātmanyadhyasya nirguṇaḥ |
śete kāmalavāndhyāyan mamāhaṃ iti karmakṛt || 25 ||
[Analyze grammar]

yadā ātmānaṃ avijñāya bhagavantaṃ paraṃ gurum |
puruṣastu viṣajjeta guṇeṣu prakṛteḥ svadṛk || 26 ||
[Analyze grammar]

guṇābhimānī sa tadā karmāṇi kurute'vaśaḥ |
śuklaṃ kṛṣṇaṃ lohitaṃ vā yathākarmābhijāyate || 27 ||
[Analyze grammar]

śuklāt prakāśabhūyiṣṭhān lokān āpnoti karhicit |
duḥkhodarkān kriyāyāsān tamaḥśokotkaṭān kvacit || 28 ||
[Analyze grammar]

kvacit pumān kvacicca strī kvacid nobhayamandhadhīḥ |
devo manuṣyastiryagvā yathākarmaguṇaṃ bhavaḥ || 29 ||
[Analyze grammar]

kṣutparīto yathā dīnaḥ sārameyo gṛhaṃ gṛham |
caranvindati yaddiṣṭaṃ daṇḍamodanameva vā || 30 ||
[Analyze grammar]

tathā kāmāśayo jīva uccāvacapathā bhraman |
uparyadho vā madhye vā yāti diṣṭaṃ priyāpriyam || 31 ||
[Analyze grammar]

duḥkheṣvekatareṇāpi daivabhūtātmahetuṣu |
jīvasya na vyavacchedaḥ syāt cet tat pratikriyā || 32 ||
[Analyze grammar]

yathā hi puruṣo bhāraṃ śirasā gurumudvahan |
taṃ skandhena sa ādhatte tathā sarvāḥ pratikriyāḥ || 33 ||
[Analyze grammar]

naikāntataḥ pratīkāraḥ karmaṇāṃ karma kevalam |
dvayaṃ hyavidyopasṛtaṃ svapne svapna ivānagha || 34 ||
[Analyze grammar]

arthe hi avidyamāne'pi saṃsṛtirna nivartate |
manasā liṅgarūpeṇa svapne vicarato yathā || 35 ||
[Analyze grammar]

athātmano'rthabhūtasya yato'narthaparaṃparā |
saṃsṛtistadvyavacchedo bhaktyā paramayā gurau || 36 ||
[Analyze grammar]

vāsudeve bhagavati bhaktiyogaḥ samāhitaḥ |
sadhrīcīnena vairāgyaṃ jñānaṃ ca janayiṣyati || 37 ||
[Analyze grammar]

so'cirād eva rājarṣe syād acyutakathāśrayaḥ |
śrṛṇvataḥ śraddadhānasya nityadā syādadhīyataḥ || 38 ||
[Analyze grammar]

yatra bhāgavatā rājansādhavo viśadāśayāḥ |
bhagavad‍guṇānukathana śravaṇavyagracetasaḥ || 39 ||
[Analyze grammar]

tasminmahanmukharitā madhubhiccaritra |
pīyūṣaśeṣasaritaḥ paritaḥ sravanti |
tā ye pibantyavitṛṣo nṛpa gāḍhakarṇaiḥ |
tānna spṛśantyaśanatṛḍbhayaśokamohāḥ || 40 ||
[Analyze grammar]

etairupadruto nityaṃ jīvalokaḥ svabhāvajaiḥ |
na karoti harernūnaṃ kathāmṛtanidhau ratim || 41 ||
[Analyze grammar]

prajāpatipatiḥ sākṣād bhagavān giriśo manuḥ |
dakṣādayaḥ prajādhyakṣā naiṣṭhikāḥ sanakādayaḥ || 42 ||
[Analyze grammar]

marīciḥ atri aṅgirasau pulastyaḥ pulahaḥ kratuḥ |
bhṛgurvasiṣṭha ityete madantā brahmavādinaḥ || 43 ||
[Analyze grammar]

adyāpi vācaspatayaḥ tapovidyāsamādhibhiḥ |
paśyanto'pi na paśyanti paśyantaṃ parameśvaram || 44 ||
[Analyze grammar]

śabdabrahmaṇi duṣpāre caranta uruvistare |
mantraliṅgaiḥ vyavacchinnaṃ bhajanto na viduḥ param || 45 ||
[Analyze grammar]

yadā yasya anugṛhṇāti bhagavān ātmabhāvitaḥ |
sa jahāti matiṃ loke vede ca pariniṣṭhitām || 46 ||
[Analyze grammar]

tasmātkarmasu barhiṣman ajñānāt arthakāśiṣu |
mārthadṛṣṭiṃ kṛthāḥ śrotra sparśiṣvaspṛṣṭavastuṣu || 47 ||
[Analyze grammar]

svaṃ lokaṃ na viduste vai yatra devo janārdanaḥ |
āhurdhūmradhiyo vedaṃ sakarmakamatadvidaḥ || 48 ||
[Analyze grammar]

āstīrya darbhaiḥ prāgagraiḥ kārtsnyena kṣitimaṇḍalam |
stabdho bṛhad vadhāt mānī karma nāvaiṣi yatparam |
tatkarma haritoṣaṃ yat sā vidyā tanmatiryayā || 49 ||
[Analyze grammar]

harirdehabhṛtāmātmā svayaṃ prakṛtirīśvaraḥ |
tatpādamūlaṃ śaraṇaṃ yataḥ kṣemo nṛṇāmiha || 50 ||
[Analyze grammar]

sa vai priyatamaścātmā yato na bhayamaṇvapi |
iti veda sa vai vidvān yo vidvān sa gururhariḥ || 51 ||
[Analyze grammar]

nārada uvāca |
praśna evaṃ hi sañchinno bhavataḥ puruṣarṣabha |
atra me vadato guhyaṃ niśāmaya suniścitam || 52 ||
[Analyze grammar]

kṣudraṃ caraṃ sumanasāṃ śaraṇe mithitvā |
raktaṃ ṣaḍaṅghrigaṇasāmasu lubdhakarṇam |
agre vṛkān asutṛpo'vigaṇayya yāntaṃ |
pṛṣṭhe mṛgaṃ mṛgaya lubdhakabāṇabhinnam || 53 ||
[Analyze grammar]

asyārthaḥsumanaḥsamadharmaṇāṃ strīṇāṃ śaraṇa āśrame |
puṣpamadhu gandhavat kṣudratamaṃ | kāmyakarmavipākajaṃ |
kāmasukhalavaṃ jaihvyaupasthyādi vicinvantaṃ mithunībhūya |
tad abhiniveśita manasaṃ | ṣaḍaṅghrigaṇa sāmagītavat |
atimanohara vanitādi jana ālāpeṣu atitarāṃ ati |
pralobhita karṇamagre | vṛkayūthavadātmana āyurharato |
ahorātrān tān kāla lava viśeṣān avigaṇayya |
gṛheṣu viharantaṃ pṛṣṭhata eva | parokṣamanupravṛtto lubdhakaḥ |
kṛtānto'ntaḥ śareṇa yamiha parāvidhyati taṃ imaṃ |
ātmānamaho | rājan bhinnahṛdayaṃ draṣṭumarhasīti || 54 ||
[Analyze grammar]

sa tvaṃ vicakṣya mṛgaceṣṭitamātmano'ntaḥ |
cittaṃ niyaccha hṛdi karṇadhunīṃ ca citte |
jahyaṅganāśramamasat tamayūthagāthaṃ |
prīṇīhi haṃsaśaraṇaṃ virama krameṇa || 55 ||
[Analyze grammar]

rājovāca |
śrutamanvīkṣitaṃ brahman bhagavān yadabhāṣata |
naitajjānanti upādhyāyāḥ kiṃ na brūyurviduryadi || 56 ||
[Analyze grammar]

saṃśayo'tra tu me vipra sañchinnastatkṛto mahān |
ṛṣayo'pi hi muhyanti yatra nendriyavṛttayaḥ || 57 ||
[Analyze grammar]

karmāṇyārabhate yena pumāniha vihāya tam |
amutrānyena dehena juṣṭāni sa yadaśnute || 58 ||
[Analyze grammar]

iti vedavidāṃ vādaḥ śrūyate tatra tatra ha |
karma yatkriyate proktaṃ parokṣaṃ na prakāśate || 59 ||
[Analyze grammar]

nārada uvāca |
yenaivārabhate karma tenaivāmutra tatpumān |
bhuṅkte hi avyavadhānena liṅgena manasā svayam || 60 ||
[Analyze grammar]

śayānaṃ imaṃ utsṛjya śvasantaṃ puruṣo yathā |
karmātmanyāhitaṃ bhuṅkte tādṛśenetareṇa vā || 61 ||
[Analyze grammar]

mamaite manasā yadyad asau ahaṃ iti bruvan |
gṛhṇīyāt tatpumān rāddhaṃ karma yena punarbhavaḥ || 62 ||
[Analyze grammar]

yathānumīyate cittaṃ ubhayairindriyehitaiḥ |
evaṃ prāgdehajaṃ karma lakṣyate cittavṛttibhiḥ || 63 ||
[Analyze grammar]

nānubhūtaṃ kva cānena dehenādṛṣṭamaśrutam |
kadācid upalabhyeta yad rūpaṃ yādṛgātmani || 64 ||
[Analyze grammar]

tenāsya tādṛśaṃ rājan liṅgino dehasambhavam |
śraddhatsvānanubhūto'rtho na manaḥ spraṣṭumarhati || 65 ||
[Analyze grammar]

mana eva manuṣyasya pūrvarūpāṇi śaṃsati |
bhaviṣyataśca bhadraṃ te tathaiva na bhaviṣyataḥ || 66 ||
[Analyze grammar]

adṛṣṭamaśrutaṃ cātra kvacit manasi dṛśyate |
yathā tathānumantavyaṃ deśakālakriyāśrayam || 67 ||
[Analyze grammar]

sarve kramānurodhena manasīndriyagocarāḥ |
āyānti bahuśo yānti sarve samanaso janāḥ || 68 ||
[Analyze grammar]

sattvaikaniṣṭhe manasi bhagavatpārśvavartini |
tamaścandramasīvedaṃ uparajyāvabhāsate || 69 ||
[Analyze grammar]

nāhaṃ mameti bhāvo'yaṃ puruṣe vyavadhīyate |
yāvad‍buddhimano'kṣārtha guṇavyūho hyanādimān || 70 ||
[Analyze grammar]

suptimūrcchopatāpeṣu prāṇāyanavighātataḥ |
nehate'hamiti jñānaṃ mṛtyuprajvārayorapi || 71 ||
[Analyze grammar]

garbhe bālye'pyapauṣkalyād ekādaśavidhaṃ tadā |
liṅgaṃ na dṛśyate yūnaḥ kuhvāṃ candramaso yathā || 72 ||
[Analyze grammar]

arthe hi avidyamāne'pi saṃsṛtirna nivartate |
dhyāyato viṣayānasya svapne'narthāgamo yathā || 73 ||
[Analyze grammar]

evaṃ pañcavidhaṃ liṅgaṃ trivṛtṣoḍaśa vistṛtam |
eṣa cetanayā yukto jīva ityabhidhīyate || 74 ||
[Analyze grammar]

anena puruṣo dehān upādatte vimuñcati |
harṣaṃ śokaṃ bhayaṃ duḥkhaṃ sukhaṃ cānena vindati || 75 ||
[Analyze grammar]

yathā tṛṇajalūkeyaṃ nāpayātyapayāti ca |
na tyajenmriyamāṇo'pi prāgdehābhimatiṃ janaḥ || 76 ||
[Analyze grammar]

adṛṣṭaṃ dṛṣṭavannaṅkṣed‍bhūtaṃ svapnavadanyathā |
bhūtaṃ bhavad‍bhaviṣyacca suptaṃ sarvarahorahaḥ || 77 ||
[Analyze grammar]

yāvadanyaṃ na vindeta vyavadhānena karmaṇām |
mana eva manuṣyendra bhūtānāṃ bhavabhāvanam || 77 ||
[Analyze grammar]

yadākṣaiścaritān dhyāyan karmāṇyācinute'sakṛt |
sati karmaṇyavidyāyāṃ bandhaḥ karmaṇyanātmanaḥ || 78 ||
[Analyze grammar]

atastad apavādārthaṃ bhaja sarvātmanā harim |
paśyan tadātmakaṃ viśvaṃ sthityutpattyapyayā yataḥ || 79 ||
[Analyze grammar]

maitreya uvāca |
bhāgavatamukhyo bhagavān nārado haṃsayorgatim |
pradarśya hyamumāmantrya siddhalokaṃ tato'gamat || 80 ||
[Analyze grammar]

prācīnabarhī rājarṣiḥ prajāsargābhirakṣaṇe |
ādiśya putrānagamat tapase kapilāśramam || 81 ||
[Analyze grammar]

tatraikāgramanā dhīro govinda caraṇāmbujam |
vimuktasaṅgo'nubhajan bhaktyā tatsāmyatāmagāt || 82 ||
[Analyze grammar]

etadadhyātmapārokṣyaṃ gītaṃ devarṣiṇānagha |
yaḥ śrāvayet yaḥ śrṛṇuyāt sa liṅgena vimucyate || 83 ||
[Analyze grammar]

etanmukundayaśasā bhuvanaṃ punānaṃ |
devarṣivaryamukhaniḥsṛtamātmaśaucam |
yaḥ kīrtyamānamadhigacchati pārameṣṭhyaṃ |
nāsmin bhave bhramati muktasamastabandhaḥ || 84 ||
[Analyze grammar]

adhyātmapārokṣyamidaṃ mayādhigatamad‍bhutam |
evaṃ striyā'śramaḥ puṃsaśchinno'mutra ca saṃśayaḥ || 85 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe prācīnabarhirnāradasaṃvādo māna ekonatriṃśo'dhyāyaḥ || 29 ||
[Analyze grammar]