Chapter 12

[English text for this chapter is available]

maitreya uvāca |
dhruvaṃ nivṛttaṃ pratibuddhya vaiśasād |
apetamanyuṃ bhagavān dhaneśvaraḥ |
tatrāgataścāraṇayakṣakinnaraiḥ |
saṃstūyamāno nyavadat kṛtāñjalim || 1 ||
[Analyze grammar]

dhanada uvāca |
bho bhoḥ kṣatriyadāyāda parituṣṭo'smi te'nagha |
yattvaṃ pitāmahādeśād vairaṃ dustyajamatyajaḥ || 2 ||
[Analyze grammar]

na bhavān avadhīdyakṣān na yakṣā bhrātaraṃ tava |
kāla eva hi bhūtānāṃ prabhurapyayabhāvayoḥ || 3 ||
[Analyze grammar]

ahaṃ tvamityapārthā dhīḥ ajñānāt puruṣasya hi |
svāpnīvābhātyataddhyānād yayā bandhaviparyayau || 4 ||
[Analyze grammar]

tad‍gaccha dhruva bhadraṃ te bhagavantaṃ adhokṣajam |
sarvabhūtātmabhāvena sarvabhūtātmavigraham || 5 ||
[Analyze grammar]

bhajasva bhajanīyāṅghriṃ abhavāya bhavacchidam |
yuktaṃ virahitaṃ śaktyā guṇamayyātmamāyayā || 6 ||
[Analyze grammar]

vṛṇīhi kāmaṃ nṛpa yanmanogataṃ |
mattastvamauttānapade'viśaṅkitaḥ |
varaṃ varārho'mbujanābhapādayoḥ |
anantaraṃ tvāṃ vayamaṅga śuśruma || 7 ||
[Analyze grammar]

maitreya uvāca |
sa rājarājena varāya codito |
dhruvo mahābhāgavato mahāmatiḥ |
harau sa vavre'calitāṃ smṛtiṃ yayā |
taratyayat‍nena duratyayaṃ tamaḥ || 8 ||
[Analyze grammar]

tasya prītena manasā tāṃ dattvaiḍaviḍastataḥ |
paśyato'ntardadhe so'pi svapuraṃ pratyapadyata || 9 ||
[Analyze grammar]

athāyajata yajñeśaṃ kratubhirbhūridakṣiṇaiḥ |
dravyakriyādevatānāṃ karma karmaphalapradam || 10 ||
[Analyze grammar]

sarvātmani acyute'sarve tīvraughāṃ bhaktimudvahan |
dadarśātmani bhūteṣu taṃ eva avasthitaṃ vibhum || 11 ||
[Analyze grammar]

tamevaṃ śīlasampannaṃ brahmaṇyaṃ dīnavatsalam |
goptāraṃ dharmasetūnāṃ menire pitaraṃ prajāḥ || 12 ||
[Analyze grammar]

ṣaṭtriṃśad varṣasāhasraṃ śaśāsa kṣitimaṇḍalam |
bhogaiḥ puṇyakṣayaṃ kurvan abhogaiḥ aśubhakṣayam || 13 ||
[Analyze grammar]

evaṃ bahusavaṃ kālaṃ mahātmāvicalendriyaḥ |
trivargaupayikaṃ nītvā putrāyādān nṛpāsanam || 14 ||
[Analyze grammar]

manyamāna idaṃ viśvaṃ māyāracitamātmani |
avidyāracitasvapna gandharvanagaropamam || 15 ||
[Analyze grammar]

ātmastryapatyasuhṛdo balamṛddhakośam |
antaḥpuraṃ parivihārabhuvaśca ramyāḥ |
bhūmaṇḍalaṃ jaladhimekhalamākalayya |
kālopasṛṣṭamiti sa prayayau viśālām || 16 ||
[Analyze grammar]

tasyāṃ viśuddhakaraṇaḥ śivavārvigāhya |
baddhvā'sanaṃ jitamarunmanasā'hṛtākṣaḥ |
sthūle dadhāra bhagavatpratirūpa etad |
dhyāyan tadavyavahito vyasṛjatsamādhau || 17 ||
[Analyze grammar]

bhaktiṃ harau bhagavati pravahannajasram |
ānandabāṣpakalayā muhurardyamānaḥ |
viklidyamānahṛdayaḥ pulakācitāṅgo |
nātmānamasmaradasāviti muktaliṅgaḥ || 18 ||
[Analyze grammar]

sa dadarśa vimānāgryaṃ nabhaso'vatarad dhruvaḥ |
vibhrājayad daśa diśo rākāpatimivoditam || 19 ||
[Analyze grammar]

tatrānu devapravarau caturbhujau |
śyāmau kiśorāvaruṇāmbujekṣaṇau |
sthitāvavaṣṭabhya gadāṃ suvāsasau |
kirīṭahārāṅgadacārukuṇḍalau || 20 ||
[Analyze grammar]

vijñāya tāvuttamagāyakiṅkarau |
abhyutthitaḥ sādhvasavismṛtakramaḥ |
nanāma nāmāni gṛṇanmadhudviṣaḥ |
pārṣatpradhānau iti saṃhatāñjaliḥ || 21 ||
[Analyze grammar]

taṃ kṛṣṇapādābhiniviṣṭacetasaṃ |
baddhāñjaliṃ praśrayanamrakandharam |
sunandanandāvupasṛtya sasmitaṃ |
pratyūcatuḥ puṣkaranābhasammatau || 22 ||
[Analyze grammar]

sunandanandāvūcatuḥ |
bho bho rājan subhadraṃ te vācaṃ no'vahitaḥ śrṛṇu |
yaḥ pañcavarṣastapasā bhavān devamatītṛpat || 23 ||
[Analyze grammar]

tasyākhilajagaddhātuḥ āvāṃ devasya śārṅgiṇaḥ |
pārṣadau iha samprāptau netuṃ tvāṃ bhagavatpadam || 24 ||
[Analyze grammar]

sudurjayaṃ viṣṇupadaṃ jitaṃ tvayā |
yatsūrayo'prāpya vicakṣate param |
ātiṣṭha taccandradivākarādayo |
graharkṣatārāḥ pariyanti dakṣiṇam || 25 ||
[Analyze grammar]

anāsthitaṃ te pitṛbhiḥ anyairapyaṅga karhicit |
ātiṣṭha jagatāṃ vandyaṃ tadviṣṇoḥ paramaṃ padam || 26 ||
[Analyze grammar]

etadvimānapravaraṃ uttamaślokamaulinā |
upasthāpitamāyuṣman adhiroḍhuṃ tvamarhasi || 27 ||
[Analyze grammar]

maitreya uvāca |
niśamya vaikuṇṭhaniyojyamukhyayoḥ |
madhucyutaṃ vācamurukramapriyaḥ |
kṛtābhiṣekaḥ kṛtanityamaṅgalo |
munīn praṇamyāśiṣamabhyavādayat || 28 ||
[Analyze grammar]

parītyābhyarcya dhiṣṇyāgryaṃ pārṣadau avabhivandya ca |
iyeṣa tadadhiṣṭhātuṃ bibhradrūpaṃ hiraṇmayam || 29 ||
[Analyze grammar]

tadottānapadaḥ putro dadarśāntakamāgatam |
mṛtyormūrdhni padaṃ dattvā ārurohādbhutaṃ gṛham || 30 ||
[Analyze grammar]

tadā dundubhayo neduḥ mṛdaṅgapaṇavādayaḥ |
gandharvamukhyāḥ prajaguḥ petuḥ kusumavṛṣṭayaḥ || 31 ||
[Analyze grammar]

sa ca svarlokamārokṣyan sunītiṃ jananīṃ dhruvaḥ |
anvasmaradagaṃ hitvā dīnāṃ yāsye triviṣṭapam || 32 ||
[Analyze grammar]

iti vyavasitaṃ tasya vyavasāya surottamau |
darśayāmāsaturdevīṃ puro yānena gacchatīm || 33 ||
[Analyze grammar]

tatra tatra praśaṃsadbhiḥ pathi vaimānikaiḥ suraiḥ |
avakīryamāṇo dadṛśe kusumaiḥ kramaśo grahān || 34 ||
[Analyze grammar]

trilokīṃ devayānena so'tivrajya munīnapi |
parastādyaddhruvagatiḥ viṣṇoḥ padamathābhyagāt || 35 ||
[Analyze grammar]

yadbhrājamānaṃ svarucaiva sarvato |
lokāstrayo hyanu vibhrājanta ete |
yannāvrajanjantuṣu ye'nanugrahā |
vrajanti bhadrāṇi caranti ye'niśam || 36 ||
[Analyze grammar]

śāntāḥ samadṛśaḥ śuddhāḥ sarvabhūtānurañjanāḥ |
yāntyañjasācyutapadaṃ acyutapriyabāndhavāḥ || 37 ||
[Analyze grammar]

ityuttānapadaḥ putro dhruvaḥ kṛṣṇaparāyaṇaḥ |
abhūttrayāṇāṃ lokānāṃ cūḍāmaṇirivāmalaḥ || 38 ||
[Analyze grammar]

gambhīravego'nimiṣaṃ jyotiṣāṃ cakramāhitam |
yasmin bhramati kauravya meḍhyāmiva gavāṃ gaṇaḥ || 39 ||
[Analyze grammar]

mahimānaṃ vilokyāsya nārado bhagavān ṛṣiḥ |
ātodyaṃ vitudan ślokān satre'gāyat pracetasām || 40 ||
[Analyze grammar]

nārada uvāca |
nūnaṃ sunīteḥ patidevatāyāḥ |
tapaḥprabhāvasya sutasya tāṃ gatim |
dṛṣṭvābhyupāyānapi vedavādino |
naivādhigantuṃ prabhavanti kiṃ nṛpāḥ || 41 ||
[Analyze grammar]

yaḥ pañcavarṣo gurudāravākśaraiḥ |
bhinnena yāto hṛdayena dūyatā |
vanaṃ madādeśakaro'jitaṃ prabhuṃ |
jigāya tadbhaktaguṇaiḥ parājitam || 42 ||
[Analyze grammar]

yaḥ kṣatrabandhurbhuvi tasyādhirūḍhaṃ |
anvārurukṣedapi varṣapūgaiḥ |
ṣaṭpañcavarṣo yadahobhiralpaiḥ |
prasādya vaikuṇṭhamavāpa tatpadam || 43 ||
[Analyze grammar]

maitreya uvāca |
etatte'bhihitaṃ sarvaṃ yatpṛṣṭo'hamiha tvayā |
dhruvasyoddāmayaśasaḥ caritaṃ sammataṃ satām || 44 ||
[Analyze grammar]

dhanyaṃ yaśasyamāyuṣyaṃ puṇyaṃ svastyayanaṃ mahat |
svargyaṃ dhrauvyaṃ saumanasyaṃ praśasyamaghamarṣaṇam || 45 ||
[Analyze grammar]

śrutvaitat śraddhayābhīkṣṇaṃ acyutapriyaceṣṭitam |
bhavedbhaktirbhagavati yayā syāt kleśasaṅkṣayaḥ || 46 ||
[Analyze grammar]

mahattvamicchatāṃ tīrthaṃ śrotuḥ śīlādayo guṇāḥ |
yatra tejastadicchūnāṃ māno yatra manasvinām || 47 ||
[Analyze grammar]

prayataḥ kīrtayetprātaḥ samavāye dvijanmanām |
sāyaṃ ca puṇyaślokasya dhruvasya caritaṃ mahat || 48 ||
[Analyze grammar]

paurṇamāsyāṃ sinīvālyāṃ dvādaśyāṃ śravaṇe'thavā |
dinakṣaye vyatīpāte saṅkrame'rkadine'pi vā || 49 ||
[Analyze grammar]

śrāvayet śraddadhānānāṃ tīrthapādapadāśrayaḥ |
necchan tatrātmanātmānaṃ santuṣṭa iti sidhyati || 50 ||
[Analyze grammar]

jñānamajñātatattvāya yo dadyātsatpathe'mṛtam |
kṛpālordīnanāthasya devāstasyānugṛhṇate || 51 ||
[Analyze grammar]

idaṃ mayā te'bhihitaṃ kurūdvaha |
dhruvasya vikhyātaviśuddhakarmaṇaḥ |
hitvārbhakaḥ krīḍanakāni mātuḥ |
gṛhaṃ ca viṣṇuṃ śaraṇaṃ yo jagāma || 52 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
caturthaskandhe dhruvacarita nāma dvādaśo'dhyāyaḥ || 12 ||
[Analyze grammar]