![Bhagavad-gita with four Commentaries [sanskrit] - book cover](/uploads/a/Gita-Bhushana.jpg)
Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 15.10
utkrāmantaṃ sthitaṃ vāpi bhuñjānaṃ vā guṇānvitam |
vimūḍhā nānupaśyanti paśyanti jñānacakṣuṣaḥ ||10||
The Subodhinī commentary by Śrīdhara
nanu kāryakāraṇasaṅghātavyatirekeṇa evambhūtamātmānaṃ sarve'pi kiṃ na paśyanti | tatrāha utkrāmantamiti | utkrāmantaṃ dehāddehāntaraṃ gacchantaṃ tasminneva dehe sthitaṃ vā viṣayān bhuñjānaṃ vā guṇānvitamindriyādiyuktaṃ jīvaṃ vimūḍhā nānupaśyanti nālokayanti | jñānameva cakṣuryeṣāṃ te vivekinaḥ paśyanti ||10||
The Gūḍhārthadīpikā commentary by Madhusūdana
evaṃ dehagataṃ darśanayogayamapi dehātutkrāmantamiti | utkrāmantaṃ dehāntaraṃ gacchantaṃ pūrvasmāt, sthitaṃ vāpi tasminneva dehe, bhuñjānaṃ vā śabdādīn viṣayān | guṇānvitaṃ sukhaduḥkhamohātmakairguṇairanvitam | evaṃ sarvāsvavasthāsu darśanayogyamapyenaṃ vimūḍhā dṛṣṭādṛṣṭaviṣayabhogavāsanākṛṣṭacetastayātmānātmavivekāyogyā nānupaśyanti | aho kaṣṭaṃ vartata ityajñānanukrośati bhagavān | ye tu pramāṇajanitajñānacakṣuṣo vivekinasta eva paśyanti ||10||
The Sārārthavarṣiṇī commentary by Viśvanātha
nanu yamāddehānniṣkrāmati yasmin dehe vā tiṣṭhati tatra sthitvā vā yathā bhogān bhuṅkte ityevaṃ viśeṣaṃ nopalabhāmahe | tatrāha utkrāmantaṃ dehānnniṣkrāmantaṃ, sthitaṃ dehāntare vartamānaṃ ca viṣayān bhuñjānaṃ ca guṇānvitamindiryādisahitaṃ vimūḍhā avivekinaḥ jñānacakṣuṣo vivekinaḥ ||10||
The Gītābhūṣaṇa commentary by Baladeva
evaṃ śarīrasthatvenānubhavayogyamavivekinastamātmānaṃ nānubhavantītyāha uditi | śarīrādutkrāmantaṃ tatraiva sthitaṃ vā sthitvā viṣayān bhuñjānaṃ vā guṇānvitaṃ sukhaduḥkhamohairindiryādibhirvānvitaṃ yuktamanubhavayogyamapyātmānaṃ vimūḍhāścirantanajñānacakṣuṣo vivekajñānanetrāstu taṃ paśyanti | śarīrādiviviktamanubhavanti ||10||
__________________________________________________________