Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 14.4
sarvayoniṣu kaunteya mūrtayaḥ saṃbhavanti yāḥ |
tāsāṃ brahma mahadyonirahaṃ bījapradaḥ pitā ||4||
The Subodhinī commentary by Śrīdhara
na kevalaṃ sṛṣṭyupakrama eva madadhiṣṭhānenābhyāṃ prakṛtipuruṣābhyāmayaṃ bhūtotpattiprakāraḥ | api tu sarvadaivetyāha sarveti | sarvāsu yoniṣu manuṣyādyāsu yā mūrtayaḥ sthāvarajaṅgamātmikā utpadyante tāsāṃ mūrtīnāṃ mahadbrahma prakṛtiryonirmātṛsthānīyā | ahaṃ ca bījapradaḥ pitā garbhādhānakartā pitā ||4||
The Gūḍhārthadīpikā commentary by Madhusūdana
nanu kathaṃ sarvabhūtānāṃ tataḥ sambhavo devādidehaviśeṣāṇāṃ kāraṇāntarasambhavādityāśaṅkyāha sarvayoniṣviti | devapitṛmanuṣyapaśumṛgādisarvayoniṣu yā mūrtayo jarāyujāṇḍodbhijjādibhedena vilakṣaṇā vividhasaṃsthānāstanavaḥ saṃbhavanti he kaunteya! tāsāṃ mūrtīnāṃ tattatkāraṇabhāvāpannaṃ mahadbrahmaiva yonirmātṛsthānīyā | ahaṃ parameśvaro bījaprado garbhādhānasya kartā pitā | tena mahato brahmaṇa evāvasthāviśeṣāḥ kāraṇāntarāṇīti yuktamuktaṃ sambhavaḥ sarvabhūtānāṃ tato bhavati [Gītā 14.3] iti ||4||
The Sārārthavarṣiṇī commentary by Viśvanātha
na kevalaṃ sṛṣṭyutpattisamaya eva sarvabhūtānāṃ prakṛtirmātā ahaṃ pitā api tu sarvadaivetyāha sarvāsu yoniṣu devādyāsu stambaparyantāsu yā mūrtayo jaṅgamasthāvarātmikā utpadyante tāsāṃ mūrtīnāṃ mahadbrahma prakṛtiḥ | yonirutpattisthānaṃ mātā | ahaṃ bījapradaḥ garbhādhānakartā pitā ||4||
The Gītābhūṣaṇa commentary by Baladeva
sarveti | he kaunteya sarvayoniṣu devādisthāvarāntāsu yoniṣu yā mūrtayastanavaḥ sambhavanti tāsāṃ mahadbrahma pradhānaṃ yonirutpattiheturmātetyarthaḥ | jīvapradastatkarmānuguṇyena paramāṇucaitanyarāśisaṃyojakaḥ pareśo'haṃ pitā bhavāmi ||4||
__________________________________________________________