![Bhagavad-gita with four Commentaries [sanskrit] - book cover](/uploads/a/Gita-Bhushana.jpg)
Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 11.12
divi sūryasahasrasya bhavedyugapadutthitā |
yadi bhāḥ sadṛśī sā syādbhāsastasya mahātmanaḥ ||12||
The Subodhinī commentary by Śrīdhara
viśvarūpadīpternirupamatvamāha divīti | divyākāśe | sūryasahasrasya yugapadutthitasya yadi yugapadutthitā bhāḥ prabhā bhavettarhi sā tadā mahātmano viśvarūpasya bhāsaḥ prabhāyā kathañcitsadṛśī syāt | anyopamā nāstyevetyarthaḥ | tathādbhutaṃ rūpaṃ darśayāmāseti pūrveṇaivānvayaḥ ||12||
The Gūḍhārthadīpikā commentary by Madhusūdana
devamityuktaṃ vivṛṇoti divīti | divi antarikṣe sūryāṇāṃ sahasrasyāparimitasūryasamūhasya yugapaduditasya yugapadutthitā bhāḥ prabhā yadi bhavettadā sā tasya mahātmano viśvarūpasya bhāso dīpteḥ sadṛśī tulyā yadi syādyadi vā na syāttato'pi nūnaṃ viśvarūpasyaiva bhā atiricyetetyahaṃ manye | anyā tūpamā nāstyevetyarthaḥ | atrāvidyamānādhyavasāyāttadabhāvenopamābhāvaparādbhūtopamārūpamārūpeyamatiśayoktirutprekṣā vyañjayantī sarvathā nirupamatvameva vyanakti ubhau yadi vyomni pṛthakpravāhāvityādivat ||12||
The Sārārthavarṣiṇī commentary by Viśvanātha
ekadaiva yadi bhāḥ kāntirutthitā bhavettadā tasya mahātmano viśvarūpapuruṣasya bhāsaḥ prabhāyāḥ kānteḥ kathañcitsadṛśī bhavet ||12||
The Gītābhūṣaṇa commentary by Baladeva
taddīpternairupamyamāha divīti | divi ākāśe yugapadutthitasya sūryasahasrasya bhāḥ kāntiścedyugapadutthitā bhavettarhi sā tasya mahātmano viśvarūpasya harerbhāsa ekasyāḥ kānteḥ sadṛśī syāttadeti | sambhāvanāyāṃ laṭ | adbhūtopameyamucyate tayotprekṣā | vyaṅgā satī sarvathā tatkānternairupamyaṃ vyañjayati | tādṛgrūpaṃ darśayāmāseti pūrveṇānvayaḥ ||12||
__________________________________________________________