![Bhagavad-gita with four Commentaries [sanskrit] - book cover](/uploads/a/Gita-Bhushana.jpg)
Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 10.36
dyūtaṃ chalayatāmasmi tejastejasvināmaham |
jayo'smi vyavasāyo'smi sattvaṃ sattvavatāmaham ||36||
The Subodhinī commentary by Śrīdhara
dyūtamiti | chalayatāṃ anyonyavañcanaparāṇāṃ sambandhi dyūtam asmi | tejasvināṃ prabhāvavatāṃ tejaḥ prabhāvo'smi | jetṝṇāṃ jayo'smi | vyavasāyināmudyamavatāṃ vyavasāya udyamo'smi | sattvavatāṃ sāttvikānāṃ sattvamaham ||36||
The Gūḍhārthadīpikā commentary by Madhusūdana
chalayatāṃ chalasya paravañcanasya kartṝṇāṃ sambandhi dyūtamakṣadevanādilakṣaṇaṃ sarvasvāpahārakāraṇamahamasmi | tejasvināmatyugraprabhāvavatāṃ sambandhi tejo'pratihatājñatvamahamasmi | jetṝṇāṃ parājitāpekṣayotkarṣalakṣaṇo jayo'smi | vyavasāyināṃ vyavasāyaḥ phalāvyabhicāryudyamo'hamasmi | sattvavatāṃ sāttvikānāṃ dharmajñānavairāgyaiśvaryalakṣaṇaṃ sattvakāryamevātra sattvamaham ||36||
The Sārārthavarṣiṇī commentary by Viśvanātha
chalayatāmanyo'nyavañcanaparāṇāṃ sambandhi dyūtamasmi | jetṝṇāṃ jayo'smi | vyavasāyināmudyamavatāṃ vyavasāyo'smi | sattvavatāṃ balavatāṃ sattvaṃ balamasmi ||36||
The Gītābhūṣaṇa commentary by Baladeva
chalatāṃ mitho vañcanāṃ kurvatāṃ sambandhi dyūtaṃ sarvasvaharamakṣadevanādyaham | tejasvināṃ prabhāvatāṃ sambandhi tejaḥ prabhāvo'ham | asmi | jetṝṇāṃ parājitāpekṣayotkarṣalakṣaṇo jayo'smi | jetṝṇāṃ sambandhi jayo'ham | vyavasāyināmudyamināṃ sambandhī vyavasāyaḥ | phalavānudyamo'ham | sattvavatāṃ balināṃ sambandhī sattvaṃ balamaham ||36||
__________________________________________________________