![Bhagavad-gita with four Commentaries [sanskrit] - book cover](/uploads/a/Gita-Bhushana.jpg)
Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 5.12
yuktaḥ karmaphalaṃ tyaktvā śāntimāpnoti naiṣṭhikīm |
ayuktaḥ kāmakāreṇa phale sakto nibadhyate ||12||
The Subodhinī commentary by Śrīdhara
nanu kathaṃ tenaiva karmaṇā kaścinmucyate kaścidbadhyate iti vyavasthā ? ata āha yukta iti | yuktaḥ parameśvaraikaniṣṭhaḥ san karmaṇaḥ phalaṃ tyaktvā karmaṇi kurvannātyantikīṃ śāntiṃ mokṣaṃ prāpnoti | ayuktastu bahirmukhaḥ kāmakāreṇa kāmataḥ pravṛttyā phala āsakto nitarāṃ bandhaṃ prāpnoti ||12||
The Gūḍhārthadīpikā commentary by Madhusūdana
kartṛtvābhimānasāmye'pi tenaiva karmaṇā kaścinmucyate kaścittu badhyata iti vaiṣamye ko heturiti tatrāha yukta iti | yukta īśvarāyaivaitāni karmāṇi na mama phalāyetyevamabhiprāyavān karmaphalaṃ tyaktvā karmāṇi kurvan śāntiṃ mokṣākhyāmāpnoti naiṣṭhikīṃ sattvaśuddhinityavastuvivekasaṃnyāsajñānaniṣṭhākrameṇa jātāmiti yāvat | yastu punarayukta īśvarāyaivaitāni karmāṇi na mama phalāyetyabhiprāyaśūnyaḥ sa kāmakāreṇa kāmataḥ pravṛttyā mama phalāyaivedaṃ karma karomīti phale sakto nibadhyate karmabhirnitarāṃ saṃsārabandhaṃ prāpnoti | yasmādevaṃ tasmāttvamapi yuktaḥ san karmāṇi kurviti vākyaśeṣaḥ
||12||
The Sārārthavarṣiṇī commentary by Viśvanātha
karmakaraṇe anāsaktyāsaktī eva mokṣabandhahetū ityāha yukto yogī niṣkāmakarmītityarthaḥ | naiṣṭhikīṃ niṣṭhāprāptāṃ śāntiṃ mokṣamityarthaḥ | ayuktaḥ sakāmakarmītyarthaḥ | kāmakāreṇa kāmapravṛttyā ||12||
The Gītābhūṣaṇa commentary by Baladeva
yukta ātmārpitamanāḥ karmaphalaṃ tyaktvā kurvannnaiṣṭhikīṃ sthirāṃ śāntimātmāvalokalakṣaṇāmāpnoti | ayukta ātmānarpitamanāḥ karmaphale saktaḥ kāmakāreṇa kāmataḥ karmaṇi pravṛttyā nibadhyate saṃsarati ||12||
__________________________________________________________