Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 4.42
tasmādajñānasaṃbhūtaṃ hṛtsthaṃ jñānāsinātmanaḥ |
chittvainaṃ saṃśayaṃ yogamātiṣṭhottiṣṭha bhārata ||42||
The Subodhinī commentary by Śrīdhara
tasmāditi | yasmādevaṃ tasmādātmano'jñānena saṃbhūtaṃ hṛdisthitamenaṃ saṃśayaṃ śokādinimittaṃ dehātmavivekakhaḍgena chittvā paramātmajñānopāyabhūtaṃ karmayogamātiṣṭhāśraya | tatra ca prathamaṃ prastutāya yuddhāyottiṣṭha | he bhārateti kṣatriyatvena yuddhasya dharmatvaṃ darśitam ||42||
pumavasthādibhedena karmajñānamayī dvidhā |
niṣṭhoktā yena taṃ vande śauriṃ saṃśayasaṃchidam ||
iti śrīdharasvāmikṛtāyāṃ bhagavadgītāṭīkāyāṃ subodhinyāṃ
jñānayogo nāma caturtho'dhyāyaḥ ||4||
The Gūḍhārthadīpikā commentary by Madhusūdana
tasmādajñānasaṃbhūtaṃ hṛtsthaṃ jñānāsinātmanaḥ chittvainaṃ saṃśayaṃ yogamātiṣṭhottiṣṭha bhārata ||42||
iti śrīmatparamahaṃsaparivrājakācāryaśrīviśveśvarasarasvatīpādaśiṣyaśrīmadhusūdanasarasvatīviracitāyāṃ śrīmadbhagavadgītāgūḍhārthadīpikāyāṃ jñānayogo nāma
caturtho'dhyāyaḥ ||4||
The Sārārthavarṣiṇī commentary by Viśvanātha
upasaṃharati tasmāditi | hṛtsthaṃ hṛdgataṃ saṃśayaṃ chittvā yogaṃ niṣkāmakarmayogamātiṣṭhāśraya | uttiṣṭha yuddhaṃ kartumiti bhāvaḥ ||42||
ukteṣu muktyupāyeṣu jñānamatra praśasyate |
jñānopāyaṃ tu karmaivetyadhyāyārtho nirūpitaḥ ||
iti sārārthadarśinyāṃ harṣiṇyāṃ bhaktacetasām |
gītāsvayaṃ caturtho hi saṅgataḥ saṅgataḥ satām ||4||
The Gītābhūṣaṇa commentary by Baladeva
tasmāditi | hṛtsthaṃ hṛdgatamātmaviṣayakaṃ saṃśayaṃ madupadiṣṭena jñānāsinā chittvā yogaṃ niṣkāmaṃ karma mayopadiṣṭamātiṣṭha | tadarthamuttiṣṭheti ||42||
dvyaṃśakaṃ dhānyavatkarma tuṣāṃśādiva taṇḍulaḥ |
śreṣṭhaṃ dravyāṃśato jñānamiti turyasya nirṇayaḥ ||4||
iti śrīmadbhagavadgītopaniṣadbhāṣye caturtho'dhyāyaḥ
||4||
caturtho'dhyāyaḥ brahmārpaṇayogaḥ
**********************************************************