![Bhagavad-gita with four Commentaries [sanskrit] - book cover](/uploads/a/Gita-Bhushana.jpg)
Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 4.16
kiṃ karma kimakarmeti kavayo'pyatra mohitāḥ |
tatte karma pravakṣyāmi yajjñātvā mokṣyase'śubhāt ||16||
The Subodhinī commentary by Śrīdhara
tacca tattvavidbhiḥ saha vicārya kartavyam | na lokaparamparāmātreṇetyāha kiṃ karmeti | kiṃ karma ? kīdṛśaṃ karmakaraṇam | kimakarma ? kīdṛśaṃ karmākaraṇam | ityasminnarthe vivekino'pi mohitāḥ | ato yajjñātā yadanuṣṭhāyāśubhātsaṃsārānmokṣyase mukto bhaviṣyasi tatkarmākarma ca tubhyamahaṃ pravakṣyāmi tacchṛṇu ||16||
The Gūḍhārthadīpikā commentary by Madhusūdana
nanu karmaviṣaye kiṃ kaścitsaṃśayo'pyasti yena pūrvaiḥ pūrvataraṃ kṛtamityatinirbadhnāsi ? astyevetyāha kiṃ karmeti | nausthasya niṣkriyeṣvapi taṭasthavṛkṣeṣu gamanabhramadarśanāttathā dūrāccakṣuḥsaṃnikṛṣṭeṣu gacchatsvapi puruṣeṣvagamanabhramadarśanātparamārthataḥ kiṃ karma kiṃ vā paramārthato'karmeti kavayo medhāvino'pyatrāsmin viṣaye mohitā mohaṃ nirṇayāsāmarthyaṃ prāptā atyantadurnirūpatvādityarthaḥ | tattasmātte tubhyamahaṃ karma, akārapraśleṣeṇa cchedādakarma
ca pravakṣyāmi prakarṣeṇa sandehocchedena vakṣyāmi | yatkarmākarmasvarūpaṃ jñātvā mokṣyase mukto bhaviṣyasyaśubhātsaṃsārāt ||16||
The Sārārthavarṣiṇī commentary by Viśvanātha
kiṃ ca karmāpi na gatānugatikanyāyenaiva kevalaṃ vivekinā kartavyam | kintu tasya prakāraviśeṣaṃ jñātvaivetyatastasya prathamaṃ durjñeyatvamāha ||16||
The Gītābhūṣaṇa commentary by Baladeva
nanu kiṃ karmaviṣayakaḥ kaścitsandeho'pyasti yataḥ pūrvaiḥ pūrvataraṃ kṛtamityatinirbandhādbravīṣīti cedastyevetyāha kiṃ karmeti | mumukṣubhiranuṣṭheyaṃ karma kiṃ rūpaṃ syādakarma ca karmānyattadantargataṃ jñānaṃ ca kiṃ rūpamityarthaḥ | tadanyatve enaṃ ca | atrārthe kavayo dhīmanto'pi mohitāstadyāthātmyanirṇayāsāmarthyānmohaṃ prāpuḥ | ahaṃ sarveśaḥ sarvajñaste tubhyaṃ tatkarma akārapraśleṣādakarma ca pravakṣyāmi yajjñātvānuṣṭhāya prāpya cāśubhātsaṃsārān
mokṣyase ||16||
__________________________________________________________