Chapter 209

[English text for this chapter is available]

dānaparibhāṣākathanaṃ |
agniruvāca |
dānadharmān pravakṣyāmi bhuktimuktidān śṛṇu |
dānamiṣṭaṃ tathā pūrtaṃ dharmaṃ kurvan hi sarvabhāk || 1 ||
[Analyze grammar]

vāpīkūpataḍāgāni devatāyatanāni ca |
annapradānamārāmāḥ pūrtaṃ dharmaṃ ca muktidaṃ || 2 ||
[Analyze grammar]

agnihotraṃ tapaḥ satyaṃ vedānāñcānupālanaṃ |
ātithyaṃ vaiśvadevañca prāhuriṣṭañca nākadaṃ || 3 ||
[Analyze grammar]

grahoparāge yaddānaṃ sūryasaṅkramaṇeṣu ca |
dvādaśyādau ca yaddānaṃ pūrtaṃ tadapi nākadaṃ || 4 ||
[Analyze grammar]

deśe kāle ca pātre ca dānaṃ koṭiguṇaṃ bhavet |
ayane viṣuve puṇye vyatīpāte dinakṣaye || 5 ||
[Analyze grammar]

yugādiṣu ca saṅkrāntau caturdaśyaṣṭamīṣu ca |
sitapañcadaśīsarvadvādaśīṣvaṣṭakāsu ca || 6 ||
[Analyze grammar]

yajñotsavavivāheṣu tathā manvantarādiṣu |
vaidhṛtau dṛṣṭaduḥsvapne dravyabrāhmaṇalābhataḥ || 7 ||
[Analyze grammar]

śraddhā vā yaddine tatra sadā vā dānamiṣyate |
ayane dve viṣuve dve catasraḥ ṣaḍaśītayaḥ || 8 ||
[Analyze grammar]

catasro viṣṇupadyaśca saṅkrātyo dvādaśottamāḥ |
kanyāyāṃ mithune mīne dhanuṣyapi ravergatiḥ || 9 ||
[Analyze grammar]

ṣaḍaśītimukhāḥ proktāḥ ṣaḍaśītiguṇāḥ phalaiḥ |
atītānāgate puṇye dve udagdakṣiṇāyane || 10 ||
[Analyze grammar]

triṃśatkarkaṭake nāḍyo makare viṃśatiḥ smṛtāḥ |
vartamāne tulāmeṣe nāḍyāstubhayato daśa || 11 ||
[Analyze grammar]

ṣaḍaśītyāṃ vyatītāyāṃ ṣaṣṭiruktāstu nāḍikāḥ |
puṇyākhyā viṣṇupādyāñca prākpaścādapi ṣoḍaśa || 12 ||
[Analyze grammar]

śravaṇāśvidhaniṣṭhāsu nāgadaivatamastake |
yadā syādravivāreṇa vyatīpātaḥ sa ucyate || 13 ||
[Analyze grammar]

navamyāṃ śuklapakṣasya kārttike niragātkṛtaṃ |
tretā sitatṛtīyāyāṃ vaiśākhe dvāparaṃ yugaṃ || 14 ||
[Analyze grammar]

darśe vai māghamāsasya trayodaśyāṃ nabhasyake |
kṛṣṇe kaliṃ vijānīyājjñeyā manvantarādayaḥ || 15 ||
[Analyze grammar]

aśvayukacchuklanavamī dvādaśī kārttike tathā |
tṛtīyā caiva māghasya tathā bhādrapadasya ca || 16 ||
[Analyze grammar]

phālgunasyāpyamāvāsyā pauṣasyaikādaśī tathā |
āṣāḍhasyāpi daśamī māghamāsasya saptamī || 17 ||
[Analyze grammar]

śrāvaṇe cāṣṭamī kṛṣṇā tathāṣāḍhe ca pūrṇimā |
kārttike phālgune tadvajjyaiṣṭhe pañcadaśī tathā || 18 ||
[Analyze grammar]

ūrdhve caivāgrahāyaṇyā aṣṭakāstisra īritāḥ |
aṣṭakākhyā cāṣṭamī syādāsu dānāni cākṣyayaṃ || 19 ||
[Analyze grammar]

gayāgaṅgāprayāgādau tīrthe devālayādiṣu |
aprārthitāni dānāni vidyārthaṃ kanyakā na hi || 20 ||
[Analyze grammar]

dadyātpūrvamukho dānaṃ gṛhṇīyāduttarāmukhaḥ |
āyurvivardhate dāturgrahītuḥ kṣīyate na tat || 21 ||
[Analyze grammar]

nāma gotraṃ samuccārya sampradānasya cātmanaḥ |
sampradeyaṃ prayacchanti kanyādāne punastrayaṃ || 22 ||
[Analyze grammar]

snātvābhyarcya vyāhṛtibhirdadyāddānantu sodakaṃ |
kanakāśvatilā nāgā dāsīrathamahīgṛhāḥ || 23 ||
[Analyze grammar]

kanyā ca kapilā dhenurmahādānāni vai daśa |
śrutaśauryatapaḥkanyāyājyaśiṣyādupagataṃ || 24 ||
[Analyze grammar]

śulkaṃ dhanaṃ hi sakalaṃ śulkaṃ śilpānuvṛttitaḥ |
kuśīdakṛṣivāṇijyaprāptaṃ yadupakārataḥ || 25 ||
[Analyze grammar]

pāśakadyūtacauryādipratirūpakasāhasaiḥ |
vyājenopāvarjitaṃ kṛtsnaṃ trividhaṃ trividhaṃ phalaṃ || 26 ||
[Analyze grammar]

adhyagnyadhyāvāhanikaṃ dattañca prītikarmaṇi |
bhrātṛmātṛpitṛprāptaṃ ṣaḍvidhaṃ strīdhanaṃ smṛtaṃ || 27 ||
[Analyze grammar]

brahmakṣatraviśāṃ dravyaṃ śūdrasyaiṣāmanugrahāt |
bahubhyo na pradeyāni gaurgṛhaṃ śayanaṃ stryiyaḥ || 28 ||
[Analyze grammar]

kulānāntu śataṃ hanyādaprayacchan pratiśrutaṃ |
devānāñca gurūṇāñca mātāpitrostathaiva ca || 29 ||
[Analyze grammar]

puṇyaṃ deyaṃ prayatnena yatpuṇyañcārjitaṃ kvacit |
pratilābhecchayā dattaṃ yaddhanaṃ tadapārthakaṃ || 30 ||
[Analyze grammar]

śraddhayā sādhyate dharmo dattaṃ vāryapi cākṣayaṃ |
jñānaśīlaguṇopetaḥ parapīḍāvahiṣkṛtaḥ || 31 ||
[Analyze grammar]

ajñānāṃ pālanāttrāṇāttatpātraṃ paramaṃ smṛtaṃ |
mātuḥ śataguṇaṃ dānaṃ sahasraṃ piturucyate || 32 ||
[Analyze grammar]

anantaṃ duhiturdānaṃ sodarye dattamakṣayaṃ |
amanuṣye samaṃ dānaṃ pāpe jñeyaṃ mahāphalaṃ || 33 ||
[Analyze grammar]

varṇasaṅkare dviguṇaṃ śūdre dānaṃ caturguṇaṃ |
vaiśye cāṣṭaguṇaṃ kṣatre ṣoḍaśatvaṃ dvijavruve || 34 ||
[Analyze grammar]

vedādhyāye śataguṇamantaṃ vedabodhake |
purohite yājakādau dānamakṣayamucyate || 35 ||
[Analyze grammar]

śrīvihīneṣu yaddattaṃ tadanantaṃ ca yajavani |
atapasvyanadhīyānaḥ pratigraharucirdvijaḥ || 36 ||
[Analyze grammar]

ambhasyaśmaplavenaiva saha tenaiva majjati |
snātaḥ samyagupaspṛśya gṛhṇīyātprayataḥ śuciḥ || 37 ||
[Analyze grammar]

pratigrahītā sāvitrīṃ sarvadaiva prakīrtayet |
tatastu kīrtayetsārdhaṃ dravyeṇa saha daivataṃ || 38 ||
[Analyze grammar]

pratigrāhī paṭheduccaiḥ pratigṛhya dvijottamāt |
mandaṃ paṭhetkṣatriyāttu upāṃśu ca tathā viśaḥ || 39 ||
[Analyze grammar]

manasā ca tathā śūdrātsvastivācanakaṃ tathā |
abhayaṃ sarvadaivatyaṃ bhūmirvai viṣṇudevatā || 40 ||
[Analyze grammar]

kanyā dāsastathā dāsī prājāpatyāḥ prakīrtitāḥ |
prājāpatyo gajaḥ proktasturago yamadaivataḥ || 41 ||
[Analyze grammar]

tathā caikaśaphaṃ sarvaṃ yāmyaśca mahiṣastathā |
uṣṭraśca nairṛto dhenū raudrī chāgo'nalastathā || 42 ||
[Analyze grammar]

āpyo meṣo hariḥ krīḍa āraṇyāḥ paśavo'nilāḥ |
jalāśayaṃ vāruṇaṃ syādvāridhānīghaṭādayaḥ || 43 ||
[Analyze grammar]

samudrajāni ratnāni hemalauhāni cānalaḥ |
prājāpatyāni śasyāni pakvānnamapi sattama || 44 ||
[Analyze grammar]

gāndharvaṃ gandhamityāhurvastraṃ vārhaspataṃ smṛtaṃ |
vāyavyāḥ pakṣiṇaḥ sarve vidyā brāhmī tathāṅgakaṃ || 45 ||
[Analyze grammar]

sārasvataṃ pustakādi viśvakarmā tu śilapke |
vanaspatirdrumādīnāṃ dravyadevā harestanuḥ || 46 ||
[Analyze grammar]

chatraṃ kṛṣṇājinaṃ śayyā ratha āsanameva ca |
upānahau tathā yānamuttānāṅgira īritaṃ || 47 ||
[Analyze grammar]

raṇopakaraṇaṃ śastraṃ dhvajādyaṃ sarvadaivataṃ |
gṛhañca sarvadaivatyaṃ sarveṣāṃ viṣṇudevatā || 48 ||
[Analyze grammar]

śivo vā na tato dravyaṃ vyatiriktaṃ yato'sti hi |
dravyasya nāma gṛhṇīyāddadānīti tathā vadet || 49 ||
[Analyze grammar]

toyaṃ dadyāttato haste dāne vidhirayaṃ smṛtaḥ |
viṣṇurdātā viṣṇurdravyaṃ pratigṛhṇāmi vai vadet || 50 ||
[Analyze grammar]

svasti pratigrahaṃ dharmaṃ bhuktimuktī phaladvayaṃ |
gurūn bhṛtyānna jihīrṣurarciṣyan devatāḥ pitṝn || 51 ||
[Analyze grammar]

sarvataḥ pratigṛhṇīyānna tu tṛpyetsvayantataḥ |
śūdrīyanna tu yajñārthaṃ dhanaṃ śūdrasya tatphalaṃ || 52 ||
[Analyze grammar]

guḍatakrarasādyāśca śūdrādgrāhyā nivartinā |
sarvataḥ pratigṛhṇīyādavṛtyākarṣito dvijaḥ || 53 ||
[Analyze grammar]

nādhyāpanādyājanādvā garhitādvā pratigrahāt |
doṣo bhavati viprāṇāṃ jvalanārkasamā hi te || 54 ||
[Analyze grammar]

kṛte tu dīyate gatvā tretāsvānīya dīyate |
dvāpāre yācamānāya kalau tvanugamānvite || 55 ||
[Analyze grammar]

manasā pātramuddiśya jalaṃ bhūmau vinikṣipet |
vidyate sāgarasyānto nānto dānasya vidyate || 56 ||
[Analyze grammar]

adya somārkagrahaṇasaṅkrāntyādau ca kālake |
gaṅgāgayāprayāgādau tīrthadeśe mahāguṇe || 57 ||
[Analyze grammar]

tathā cāmukagotrāya tathā cāmukaśarmaṇe |
vedavedāṅgayuktāya pātrāya sumahātmane || 58 ||
[Analyze grammar]

yathānāma mahādravyaṃ viṣṇurudrādidaivataṃ |
putrapautragṛhaiśvaryapatnīdharmārthasadguṇā || 59 ||
[Analyze grammar]

kīttividyāmahākāmasaubhāgyārogyavṛddhaye |
sarvapāpopaśāntyarthaṃ svargārthaṃ bhuktimuktaye || 60 ||
[Analyze grammar]

etattubhyaṃ sampradade prīyatāṃ me hariḥ śivaḥ |
divyāntarīkṣabhaumādisamutpātaughaghātakṛt || 61 ||
[Analyze grammar]

dharmārthakāmamokṣāptyai brahmalokaprado'stu me |
yathānāmasagotrāya viprāyāmukaśarmaṇe || 62 ||
[Analyze grammar]

etaddānapratiṣṭhārthaṃ suvarṇaṃ dakṣiṇāṃ dade |
anena dānavākyena sarvadānāni vai dadet || 63 ||
[Analyze grammar]