![Sanghabhedavastu [sanskrit] - book cover](/images/book-cover-default.png)
Sanghabhedavastu [sanskrit]
79,275 words
The Sanskrit edition of the Sanghabhedavastu: The 17th and last section of the Vinaya of the Mulasarvastivadin. The text includes descriptions of the life of the Buddha Original titles: Saṅghabhedavastu (सङ्घभेदवस्तु), Saṃghabhedavastu (संघभेदवस्तु, Samghabhedavastu)
Chapter 3 - The Buddha asks Maudgalyāyana to narrate
tatra bhagavānāyuṣmantaṃ mahāmaudgalyāyanamāmantrayate: pratibhātu te maudgalyāyana śākyānāṃ paurāṇaṃ kulavaṃśamārabhya bhikṣūṇāṃ dharmyāṃ kathāṃ kartum | pṛṣṭhaṃ me āvilāyate | tattāvadāyāmayiṣyāmīti | adhivāsayatyāyuṣmānmahāmaudgalyāyano bhagavatastūṣṇīṃbhāvena | atha bhagavānāyuṣmato mahāmaudgalyāyanasya tūṣṇīṃbhāvenādhivāsanāṃ viditvā gaṇapuṭāṃ saṃghāṭīṃ śirasyupanidhāya dakṣiṇapārśvena śayyāṃ kalpayati pāde pādamādhāyālokasaṃjñī smṛtaḥ saṃprajānannutthānasaṃjñāmeva manasikurvāṇaḥ | athāyuṣmato mahāmaudgalyāyanasyaitadabhavat | yanvahaṃ tadrūpaṃ samādhiṃ samāpadyeyaṃ (7) yathā samāhite citte śākyānāṃ paurāṇaṃ kulavaṃśamavalokayeyaṃ kuto nirjātāḥ śākyāḥ kimagraṇyāḥ kimanvayāḥ kaśca śākyānāṃ paurāṇaḥ kulavaṃśa iti | athāyuṣmānmahāmaudgalyāyanastadrūpaṃ samādhiṃ samāpanno yathā samāhite citte śākyānāṃ paurāṇaṃ kulavaṃśamavalokayati | adrākṣīdāyuṣmānmahāmaudgalyāyanaḥ śākyānāṃ paurāṇaṃ kulavaṃśamavalokya yato nirjātāḥ śākyāḥ yadagraṇyāḥ yadanvayāḥ yaśca śākyānāṃ paurāṇaḥ kulavaṃśaḥ | dṛṣṭvā ca punastasmātsamādhervyutthāya purastādbhikṣusaṃghasya prajñapta evāsane niṣaṇṇaḥ | niṣadyāyuṣmānmahāmaudgalyānaḥ kapilavāstavāṃśchākyānāmantrayate