Chapter 36 - Mukta-avadāna

athāśoko mahīpālaḥ sāṃjaliḥ samupāśritaḥ |
upaguptaṃ yatiṃ natvā punarevamabhāṣata || 1 || {1}
[Analyze grammar]

bhadanta śrotumichāmi punaranyatsubhāṣitaṃ |
tadyathā guruṇākhyātaṃ tathādeṣṭuṃ ca me 'rhati || 2 || {2}
[Analyze grammar]

iti saṃprārthitaṃ rājñā śrutvā so 'rhan sudhīryatiḥ |
tamaśokaṃ mahārājaṃ samālokyaivamabravīt || 3 || {3}
[Analyze grammar]

śṛṇu sādhu mahārāja yathā me gurubhāṣitaṃ |
tathātrāhaṃ pravakṣyāmi tava cittaviśuddhaye || 4 || {4}
[Analyze grammar]

tadyathābhūnmahāpūryāṃ śrāvastyāṃ śrīdasaṃnibhaḥ |
śreṣṭhī mahādhanaḥ sādhuḥ puṣyābhidho mahājanaḥ || 5 || {5}
[Analyze grammar]

tasya bhāryā subhadrāṃgī rāmākhyā śrīsamānikā |
kuladharmasamācarā svāmicaryānucāriṇī || 6 || {6}
[Analyze grammar]

yayā patnyā subhāvinyā sārddhaṃ puṣyaḥ sa sanmatiḥ |
yathākāmaḥ sukhaṃ bhuktvā reme samupacārayan || 7 || {7}
[Analyze grammar]

tataḥ sā samaye kāṃtā garbhiṇī varddhitodarā |
svalpāhāraratā pāṇḍuvarṇā kṛśābhavatkramāt || 8 || {8}
[Analyze grammar]

tataḥ sā samaye 'sūta dārikāṃ divyasuṃdarīṃ |
śironivaddhamuktā srakkohitāmabhirocinīṃ || 9 || {9}
[Analyze grammar]

tāṃ saṃjātāṃ śirovaddhamuktāmālāṃ praśobhitāṃ |
dārikāṃ sā prasū dṛṣṭvā sacitrānaṃdito 'bhavat || 10 || {10}
[Analyze grammar]

tacchrutvā sa pitā puṣyo vismayoddhatamānasaḥ |
upetya tāṃ sutāṃ dṛṣṭvā tasthau paśyan savismayaḥ || 11 || {11}
[Analyze grammar]

tataste jñātayaḥ sarve vaṃdhumitrasuhṛjjanāḥ |
tāṃ saṃjātāṃ niśamyāśu draṣṭumājagmurādarāt || 12 || {12}
[Analyze grammar]

tatra tāṃ dārikāṃ kāṃtāṃ śiromuktāsraganvitāṃ |
darśanīyāṃ subhadrāṃgīṃ prādrākṣuste ciraṃ mudā || 13 || {13}
[Analyze grammar]

ahosviddevakanyeyaṃ nūnaṃ mānyā na mānavī |
yadiyaṃ jātamātrāpi bhābhiḥ śobhate puraṃ || 14 || {14}
[Analyze grammar]

iti saṃbhāṣya te sarve jñātivaṃdhū suhṛjjanāḥ |
suciraṃ tāṃ samālokya vismitā niryayustataḥ || 15 || {15}
[Analyze grammar]

tataḥ sa janakastasyāḥ kṛtvā jatimahaṃ mudā |
sarvāñjñātīn samāmaṃtrya pura evamabhāṣata || 16 || {16}
[Analyze grammar]

bhavanto 'syāḥ sutāyā me dṛṣṭvā saṃpannimittamāṃ |
yathā loke prasiddhaṃ syāttathā nāmābhidhīyatāṃ || 17 || {17}
[Analyze grammar]

iti tenoditaṃ śrutvā sarve te jñātivāṃdhavāḥ |
tannimittaṃ samālokya taṃ puṣyamevamabruvan || 18 || {18}
[Analyze grammar]

sādho yatsaṃprajāteyaṃ muktāmālāśiroruhā |
tadasyā nāma mukteti prasiddhaṃ bhavatu dhruvaṃ || 19 || {19}
[Analyze grammar]

evaṃ taiḥ jñātibhiḥ sarvaiḥ samākhyātaṃ niśamya saḥ |
puṣyastasyāḥ sutāyāstannāmaprasiddhamacārayat || 20 || {20}
[Analyze grammar]

tataḥ sā dārikā muktā dhātrībhiḥ pratipālitā |
aṣṭābhirabhipuṣyāṃgā pravṛddhābhūd hradābjavat || 21 || {21}
[Analyze grammar]

tataḥ sā dārikā kāntā pravṛddhābhūtkumārikā |
guruṇāṃ samupāśritya kramādvidyā aśikṣate || 22 || {21*}
[Analyze grammar]

tatra sā sumatīrmuktā lipipāraṃ gatā kramāt |
sarvaśāstrakalāvidyāpāraṃ yayau vicakṣaṇā || 23 || {22}
[Analyze grammar]

tataḥ sā dānasaṃraktā sarvārthibhyo yathepsitaṃ |
saddharmapraṇidhānena dadau nityaṃ prasāditā || 24 || {23}
[Analyze grammar]

sarve 'pi yācakāstasyā gṛhaṃ dṛṣṭvā samāgatāḥ |
taddattaṃ dravyamādāya prayayuḥ saṃpramoditāḥ || 25 || {24}
[Analyze grammar]

tadaiko brāhmaṇastasyā muktāmālāṃ śiroruhāṃ |
dṛṣṭvā lobhākulātmā sa gṛhaṃ gatvā samāśrayat || 26 || {25}
[Analyze grammar]

tatra sa brāhmaṇo dṛṣṭvā tāṃ kanyāṃ saṃpradāyanīṃ |
upetyāśīrvacoddatvā prārthayadevamādarāt || 27 || {26}
[Analyze grammar]

jayo 'stu te sadā bhadre ciraṃ jivyāḥ sukhānvitā |
yathā te vāṃchate cittaṃ tathā sarvaṃ prasiddhyatu || 28 || {27}
[Analyze grammar]

bhadre 'haṃ te guṇācchrutvā dūrato yadihāvraje |
tadarthaṃ śṛṇu te vakṣye tacchrutvā me prasīdatu || 29 || {28}
[Analyze grammar]

yadiyaṃ te śirobaddhā muktāmālā praśobhitā |
tadimāṃ me pradatvātra mano mama vinodaya || 30 || {29}
[Analyze grammar]

iti saṃprārthite tena sā muktā saṃpradānikā |
tāṃ pradātuṃ samichantī taṃ vipramevamabravīt || 31 || {30}
[Analyze grammar]

sādhu vipra kṣaṇaṃ tiṣṭha mā vrajasvānyataḥ kvacit |
pitrorājñāṃ samāyācya dāsyāmi te imāmapi || 32 || {31}
[Analyze grammar]

ityuktvā sa samāśvāsya brāhmaṇaṃ taṃ pralobhitaṃ |
sahasā purato gatvā pitrorevamabhāṣata || 33 || {32}
[Analyze grammar]

pitaramba gṛhe 'smākaṃ brāhmaṇo 'rthī samāgataḥ |
sa mamemāṃ śirorūḍhāṃ muktāmālāṃ prayācate || 34 || {33}
[Analyze grammar]

tadimāṃ dātumichāmi tasmai viprāya sādhave |
tadanujñāṃ pradattaṃ me yadyasti vāṃ dayāmapi || 35 || {34}
[Analyze grammar]

iti putryoditaṃ śrutvā sa pitā vismayāhataḥ |
tāṃ putrīṃ suciraṃ dṛṣṭvā paribhāṣyaivamabravīt || 36 || {35}
[Analyze grammar]

bho vatsa kiṃ samīkṣyaivaṃ svamastaka samudbhavāṃ |
netravatkathamutkṛtya pradadyādarthine sute || 37 || {36}
[Analyze grammar]

yadi dātuṃ samichā te brāhmaṇāyārthine sute |
tadanyatprārthitaṃ dravyaṃ pradadasva yathepsitaṃ || 38 || {37}
[Analyze grammar]

iti pitroditaṃ śrutvā sā muktā duhitā sudhīḥ |
janakaṃ taṃ samālokya praṇatvā caivamabravīt || 39 || {38}
[Analyze grammar]

śṛṇu tāta yadarthe 'haṃ svaśiraḥsaṃbhavāmapi |
muktāmālaṃ samuddhṛtya ditsāmi tatpravakṣyate || 40 || {39}
[Analyze grammar]

anityaṃ khalu saṃsāre mānuṣye janma durlabhaṃ |
kṣaṇadhvaṃsi śarīraṃ ca jīvitaṃ ca tṛṇāmbuvat || 41 || {40}
[Analyze grammar]

tatrāpi bahavo rogāḥ saṃpado 'pyaticaṃcalaḥ |
durlabhā kṣaṇasaṃpacca dharmamatiśca durlabhā || 42 || {41}
[Analyze grammar]

kiṃ nityamatra saṃsāre ko hi nityasthito bhave |
ityanityāmimāṃ muktāmālāṃ ditsāmyahaṃ pita || 43 || {42}
[Analyze grammar]

ko 'nyatra mānuṣā dehāddānaṃ kartuṃ praśaknuyāt |
ityāpyahaṃ samīkṣyātra dātumiche kajāmapi || 44 || {43}
[Analyze grammar]

kasyātra vigrahe mṛtyorviśvāsaṃ vidyate khalu |
iti matvāpi tātemāṃ ditsāmi muktakāsrajaṃ || 45 || {44}
[Analyze grammar]

kasyātra jīvitaṃ kāye svechayā samavasthitaṃ |
evaṃ vijñāya tātemaṃ mālāṃ ditsāmi puṣpavat || 46 || {45}
[Analyze grammar]

ko nātra pīḍyate rogaiḥ sakleśairdevasaṃbhavaiḥ |
ityevaṃ samīkṣyaimāṃ dātumichāmi muktikāṃ || 47 || {46}
[Analyze grammar]

kasya saṃpatsthirā gehe astāścapi sthitirna hi |
evaṃ vijñāya tatemaṃ ditsāmi kusumākṛtiṃ || 48 || {47}
[Analyze grammar]

kasya cātra śubhe dṛṣṭirjāyāttiṣṭhecca sarvadā |
evaṃ vāpi parijñāya ditsāmīmāṃ kajāmapi || 49 || {48}
[Analyze grammar]

sadā na jāyate naivaṃ dharme matiḥ kathaṃ cana |
iti dṛṣṭvāpi me cittamimāṃ ditsati puṣpavat || 50 || {49}
[Analyze grammar]

imāṃ me daivasaṃjātāṃ śiraḥsthāṃ keśasādṛśīṃ |
dātumichāmyahaṃ tāta saddharmaratnalabdhaye || 51 || {50}
[Analyze grammar]

kiyatkālaṃ ca jīveyaṃ sarveṣāṃ maraṇaṃ dhruvaṃ |
yāvadjīvitamuktāyāmiyaṃ muktāpi nakṣyati || 52 || {51}
[Analyze grammar]

yadiyaṃ me śirojāpi prāṇena saha nakṣyati |
taddattā vāpyadattāpi sarvathāpi vinakṣyati || 53 || {52}
[Analyze grammar]

etaddevaṃ samīkṣye māṃ muktāṃ puṣpasrajaṃ yathā |
kajāmapi samuddhṛtya dātumichāmyahaṃ pita || 54 || {53}
[Analyze grammar]

tadatra mā kṛthā vighnaṃ mama saddharmasādhane |
tadanujñāṃ pradatvā me prārthitaṃ saphalaṃ kuru || 55 || {54}
[Analyze grammar]

yadi na dīyate 'nujñāṃ dānavighnaphalaṃ lābheḥ |
tato te duṣkṛtirjāyāttato hi durgatiṃ vrajeḥ || 56 || {55}
[Analyze grammar]

yadyanujñāṃ pradānena satyaṃ pūrayase mama |
tataste sukṛtirjāyāttena yāyāddhi sadgatiṃ || 57 || {56}
[Analyze grammar]

sadgatau sarvadā saukhyaṃ bhuktvā careḥ śubheṣvapi |
tataḥ krameṇa saṃbodhiṃ prāpya buddhatvamāpnuyāḥ || 58 || {57}
[Analyze grammar]

evaṃ vījñāya tātātra vārayituṃ na me 'rhati |
tadanujñapya me satyaṃ saṃpūrayitumarhati || 59 || {58}
[Analyze grammar]

iti putryā tayākhyātaṃ śrutvā pitā sa bodhitaḥ |
tāṃ muktāṃ sumātiḥ putrīṃ samālokyaivamabravīt || 60 || {59}
[Analyze grammar]

yattvayaivaṃ samākhyātaṃ tatsarvaṃ satyameva hi |
yadi śraddhāsti te dātuṃ pradehi kiṃ nivāraye || 61 || {60}
[Analyze grammar]

iti pitrābhyanujñāte sā muktā parimoditā |
tāṃ śiraḥsadbhavāṃ muktāṃ mālāmutkartumaichata || 62 || {61}
[Analyze grammar]

tadā sā jananī dṛṣṭvā tāṃ muktāṃ svātmajāṃ priyāṃ |
śirojāmapi tāṃ muktāṃ mālāmutkartu vāṃchinīṃ || 63 || {62}
[Analyze grammar]

sahasā gāḍhamāliṃgya vārayituṃ samudyatā |
galadaśruviliptākṣā vilapaṃtyaivamabravīt || 64 || {63}
[Analyze grammar]

hā priye svātmaje putrī kathamajñāsi sāṃprataṃ |
indriyavattanūdbhūtāmapi dātuṃ yadīchasi || 65 || {64}
[Analyze grammar]

yacchirojāṃ samutkṛtya muktāmālāṃ svadaivajāṃ |
kimanyadiha paśyanti viprāya dātumichasi || 66 || {65}
[Analyze grammar]

yadi dāne 'tivāṃchā te pradehi tad yadipsitaṃ |
imāmeva śirojatāṃ mā dāḥ kasmai cidarthine || 67 || {66}
[Analyze grammar]

damiyaṃ svatanūdbhūtā sahajā jīvitendraiḥ |
tadiyaṃ kathamutkṛtya dātavyeti vicāraya || 68 || {67}
[Analyze grammar]

yadīmaṃ svaśirorūḍhāṃ balenotkṛtya dāsyasi |
tadeyaṃ nakṣyate nūnaṃ jīvitena saha dhruvaṃ || 69 || {68}
[Analyze grammar]

vinaṣṭe jīvite kāye ko dharmaṃ sādhayetpunaḥ |
dharmaṃ vinātra saṃsāre nirarthaṃ sarvasādhanaṃ || 70 || {69}
[Analyze grammar]

dharmamūlaṃ hi saṃsāre satkāyajīvitaṃ kila |
tajjīvitāśrayaḥ kāyo rakṣitavyaḥ prayatnataḥ || 71 || {70}
[Analyze grammar]

yatkāyaprāṇarakṣārthaṃ saṃsāre dharmasādhanaṃ |
kāyaprāṇaṃ vinā ko 'rthaḥ saṃsāre dharmasādhane || 72 || {71}
[Analyze grammar]

dharmārthakāmamokṣādi sādhanaṃ sukhakāraṇaṃ |
abhāve jīvite kāye kasyārthe sukhasādhanaṃ || 73 || {72}
[Analyze grammar]

yatsvajīve na pakṣyaivaṃ kimarthe dātumichasi |
svakāyajīvarakṣārthaṃ dānādi puṇyasādhanaṃ || 74 || {73}
[Analyze grammar]

svakāyajīvitaṃ tyaktvā kimarthe puṇyasādhanaṃ |
svakāyajīva bhadrārthe guṇadravyavṛṣārjanaṃ || 75 || {74}
[Analyze grammar]

iti satyaṃ mayākhyātaṃ hitārthaṃ te priyātmaje |
śrutvemaṃ netravad rakṣyā mā dāḥ kasmai cidarthine || 76 || {75}
[Analyze grammar]

yadi te 'sti vṛṣe vāṃchā datveto 'nyad yathepsitaṃ |
gṛhe vrataṃ caratyevaṃ sukhena puṇyamarjaya || 77 || {76}
[Analyze grammar]

etatpuṇyavipākena sarvatra te śubhaṃ bhavet |
sarvadā durgatiṃ naiva yāyātsadā tu sadgatiṃ || 78 || {77}
[Analyze grammar]

evaṃ matvātmaje śrutvā saddharmaṃ saugatoditaṃ |
triratnabhajanaṃ kṛtvā gṛhe vrataṃ sukhaṃ cara || 79 || {78}
[Analyze grammar]

etatpuṇyaviśuddhā tvaṃ sarvadā śubhabhāvinī |
kramātsaṃbodhimāsādya saṃbuddhapadamāpnuyāḥ || 80 || {79}
[Analyze grammar]

iti mātrā samākhyātaṃ śrutvā muktātmajāpi sā |
utthāyāśruvirukṣā yayau śokālaye śanaiḥ || 81 || {80}
[Analyze grammar]

tatra śayātalāsīnā muktādānacintayā |
saṃbuddhasmaraṇaṃ kṛtvā tasthau dhyānasamāhitā || 82 || {81}
[Analyze grammar]

tatra taddhyānasaṃmūḍhā nidrāsuptendriyāpi sā |
tameva śrīghanaṃ smṛtvā tasthau niścaritāśayāḥ || 83 || {82}
[Analyze grammar]

tāmevāṃ saṃsthitāṃ dṛṣṭvā bhagavān sa munīśvaraḥ |
svapna iva samābhāṣya muktāmevaṃ vyabodhayat || 84 || {83}
[Analyze grammar]

vatse mātra viṣīda tvaṃ pradeyeyaṃ kajāpi te |
pradīyatāṃ samuddhṛtya punaḥ prādurbhaviṣyati || 85 || {84}
[Analyze grammar]

iti saṃbhāṣitaṃ śrutvā svapne iva samutthitā |
sā muktā vismayākrāntacittā tasthau suniśalā || 86 || {85}
[Analyze grammar]

tataḥ sā taṃ jagannāthaṃ smṛtvā taccintayākulā |
kimetatsatyamevaṃ syāditi jñātuṃ samaichata || 87 || {86}
[Analyze grammar]

tataḥ sā svayamuddhṛtya svaśiraḥsthāṃ svapāṇinā |
muktāmālāṃ mudālokya tāṃ śāstre samakalpayat || 88 || {87}
[Analyze grammar]

tato 'naṃtaramevaṃ sā muktāmālābhiśobhitā |
tasyāḥ śirasamubhūtā rarāja tatsamānikā || 89 || {88}
[Analyze grammar]

tāṃ samālokya sā muktā kanyātivismayānvitā |
sahasā purato gatvā māturevaṃ nyavedayat || 90 || {89}
[Analyze grammar]

mātaradya munīndrasya kṛpādṛṣṭiprasādataḥ |
yathā mayā pratijñātaṃ pūryeta me tathā dhruvaṃ || 91 || {90}
[Analyze grammar]

ityuktvā sā mudā muktā samuddhṛtāṃ śiroruhāṃ |
ye ubhe darśayitvāgre māturevamabhāṣata || 92 || {91}
[Analyze grammar]

mātarahaṃ vipannāśā śayā talasamāśritā |
saṃbuddhaṃ manasā dhyātvā tiṣṭhāmi dānaciṃtayā || 93 || {92}
[Analyze grammar]

yadā me dhyānasuptāyā hṛdi nidropasarpate |
tadaivaṃ sarvanāthena samādiṣṭaṃ śrutaṃ mayā || 94 || {93}
[Analyze grammar]

pradeyeyaṃ śirojātā muktāmālā tvayā mudā |
punaḥ prādurbhavedbhūyo 'pyetatsamānikā dhruvaṃ || 95 || {94}
[Analyze grammar]

iti śrutvā prabuddhāhaṃ kimetatsūnṛtaṃ bhavet |
iti kṛtvā samuddhṛtya paśyāmīmāṃ pramoditā || 96 || {95}
[Analyze grammar]

tato 'naṃtaramevaṃ me śirasyaitatsamānikā |
muktāmālā samudbhūtā dṛśyatāmiyamambike || 97 || {96}
[Analyze grammar]

ityuktvā sā sutā muktā tasyā mātuḥ puro mudā |
muktāṃ mālāṃ upasthāpya darśayantyevamāha ca || 98 || {97}
[Analyze grammar]

imāṃ māturjagacchāstre mudā saṃkalpayāmyahaṃ |
tadenāṃ trijagacchāstre saṃpradātuṃ vrajeya hi || 99 || {98}
[Analyze grammar]

iti putryā samākhyātaṃ śrutvā sā jananī mudā |
tāṃ muktāsrajamālokya tacchirojāṃ ca harṣitā || 100 || {99}
[Analyze grammar]

muhurmuhuḥ samīkṣantī tāṃ sutāmevamabravīt |
dhanyāsi bhadrikā putri tvayā yathā samīhitaṃ || 101 || {100}
[Analyze grammar]

tathā te siddhyate nūnaṃ saṃbuddhasyānubhāvātaḥ |
tadimāṃ tvaṃ samādāyā yathā saṃkalpitaṃ tvayā || 102 || {1}
[Analyze grammar]

tathā tasmai munīndrāya prābhyarcya dātumarhasi |
tathā te 'ṅgīkṛtaṃ putri tatsatyaṃ setsyate dhruvaṃ || 103 || {2}
[Analyze grammar]

etatpuṇyānubhāvaiśca sarvadā sadgatiṃ vrajeḥ |
iti matvā jagacchāsturupahṛtya bhajādarāt || 104 || {3}
[Analyze grammar]

tathā cāsmai dvijāyaivamādāya dātumarhati |
tathā te 'ṅgī kṛte siddhe sarvatra maṃgalaṃ bhavet || 105 || {4}
[Analyze grammar]

saphalaṃ mānuṣe janma sadā ca sadgatau sthitiḥ || 106 || {5}
[Analyze grammar]

iti mātroditaṃ śrutvā pratisaṃmoditāśayā |
sā tatheti pratiśrutya tathā kartuṃ samaichata || 107 || {6}
[Analyze grammar]

tathā saitatpravṛttāṃtaṃ bhartturagre nyavedayat |
śrutvā bharttāpi puṣyaḥ samuditābhyanvamodata || 108 || {7}
[Analyze grammar]

tasminnavasare tatra śrāvastyāṃ jetakāśrame |
vihāre bhagavān so 'rhan vijahāra sasāṃghikaḥ || 109 || {8}
[Analyze grammar]

tatra sa trijagacchāstā bodhicaryāṃ prakāśayan |
sarvasatvasahitārthena dharmamādeṣṭumārabhat || 110 || {9}
[Analyze grammar]

tadā te bhikṣavaḥ sarve śrāvakāścailakādayaḥ |
bhikṣuṇyo vratinaścāpi bodhisatvagaṇā api || 111 || {10}
[Analyze grammar]

upāsakagaṇāścāpi tathā copāsikā api |
sarve te samupāśritya samātasthuḥ samāhitāḥ || 112 || {11}
[Analyze grammar]

tathā śakrādayo devā brahmādyā brahmacāriṇaḥ |
dānavā lokapālāśca yakṣagaṃdharvakinnarāḥ || 113 || {11!}
[Analyze grammar]

rākṣasā garuḍā nāgāḥ siddhavidyādharādayaḥ |
yatayo yoginaścāpi nirgranthāstīrthikā api || 114 || {12}
[Analyze grammar]

ṛṣayo brāhmaṇāścāpi tapaśvino maharddhikāḥ |
rājānaḥ kṣatriyāścāpi vaiśyā rājakumārakāḥ || 115 || {}
[Analyze grammar]

śreṣṭhino maṃtriṇo 'mātyā gṛhasthāśca mahājanāḥ |
vaṇijaḥ sārthavāhāśca paurikāḥ śilpino 'pi ca || 116 || {24}
[Analyze grammar]

grāmyā jānapadāścāpi tathānyaddeśavāsinaḥ |
sarve te samupāgatya dṛṣṭvā taṃ śrīghanaṃ mudā || 117 || {15}
[Analyze grammar]

natvā pradakṣiṇīkṛtya samabhyarcya yathākramaṃ |
kṛtāñjalipuṭā natvā parivṛtya samaṃtataḥ || 118 || {16}
[Analyze grammar]

tatsaddharmāmṛtaṃ pātumupatasthuḥ samāhitāḥ |
tadā sa bhagavāndṛṣṭvā tān sarvān samupasthitān |
ādimadhyāṃtakalyāṇaṃ saddharmaṃ samupādiśat || 119 || {17}
[Analyze grammar]

tatsaddharmaṃ samākarṇya sarve lokāḥ [prabodhikāh] prabodhitāḥ |
sarvasatvahitārtheṣu babhūvuḥ bodhicāriṇaḥ || 120 || {18}
[Analyze grammar]

tadā sā kanyakā muktā sakhībhiḥ saha moditā[ḥ] |
muktāmālāṃ samādāya dharmaṃ śrotumupācarat || 121 || {19}
[Analyze grammar]

tatra taṃ śrīghanaṃ dṛṣṭvā natvā sā sāṃjalirmudā |
tridhā pradakṣiṇīkṛtya tasya śāstuḥ purogatā || 122 || {20}
[Analyze grammar]

tatrāgre tāmupasthapya muktāmālāṃ kṛtāṃjaliḥ |
pādau natvā prasannāsyā dharmaṃ śrotumupāśrayat || 123 || {21}
[Analyze grammar]

tataḥ sa bhagavāṃstasyā dṛṣṭvāśayaṃ viśuddhitaṃ |
āryasatyaṃ samārabhya saddharmaṃ samupādiśat || 124 || {22}
[Analyze grammar]

tatsaddharmaṃ samākarṇya sā muktā paribodhitā |
dharmaviśeṣamājñāya babhūva bodhivāñchinī || 125 || {23}
[Analyze grammar]

tatra sā kanyakā muktā satkāyadṛṣṭiparvataṃ |
hitvā jñānāsinā śrotaāpattiphalamāyayau || 126 || {24}
[Analyze grammar]

tataḥ sā bhadrikā muktā dṛṣṭasatyā pramoditā |
sāṃjaliścaraṇau śāsturnatvā svagṛhamāyayau || 127 || {25}
[Analyze grammar]

tataḥ sā ca samādāya muktāmālaṃ svamūrddhajaṃ |
suprasannāśayā tasmai dvijāya pradadau mudā || 128 || {26}
[Analyze grammar]

tāṃ muktāsrajamādāya brāhmaṇaḥ saṃpramoditaḥ |
tasyai bhadrāśiṣaṃ datvā sahasā svagṛhe 'vrajat || 129 || {27}
[Analyze grammar]

tathā sā muditā gatvā sarvārthibhyo yathepsitaṃ |
triratnabhajanaṃ kṛtvā śubhadharme samācarat || 130 || {28}
[Analyze grammar]

tadā tasyā guṇāñchrutvā bahavaḥ kāmarāgiṇaḥ |
saratnaprābhṛtaṃ datvā tāṃ prārthayitumīchire || 131 || {29}
[Analyze grammar]

kumārā bhurbhujā tasyāḥ pitaraṃ puṣyamādarāt |
svasvadūtaiḥ saratnāni datvā saṃprārthayanmudā || 132 || {30}
[Analyze grammar]

tathā dvijakumārāśca maṃtriputrāśca kāminaḥ |
vaiśyaputrāstathānye na dhanino vaṇigātmajāḥ || 133 || {31}
[Analyze grammar]

sārthavāhasutāścāpi tathā śilpisutā api |
mahājanasutāścaivamanye 'pi kāmamohitāḥ || 134 || {32}
[Analyze grammar]

sarve te tāṃ subhadrāṃgīṃ muktāṃ muktābhyalaṃkṛtāṃ |
dṛṣṭvā rāgāgnisaṃtaptāstanmukhāmṛtavāṃchinaḥ || 135 || {33}
[Analyze grammar]

savastrālaṃkāraratnāni datva dūtaiḥ pṛthakpṛthak |
tasyāstaṃ janakaṃ puṣyaṃ prārthayannevamādarāt || 136 || {34}
[Analyze grammar]

tathā taiḥ prārthyamāno 'sau puṣyo dūtaiḥ pṛthakpṛthak |
taddattaṃ prābhṛtaṃ dṛṣṭvā tasthau taṃ kṣubhitāśayaḥ || 137 || {35}
[Analyze grammar]

tata utthāya puṣyaḥ sa śokāgāre viṣaṇṇadhīḥ |
gatvā śayātalāsīno manasaivaṃ vyaciṃtayat || 138 || {36}
[Analyze grammar]

hāre duḥkhaṃ prajātaṃ me kiṃ kariṣyāmi sāṃprataṃ |
ekaiva duhitā me 'sti yācakā bahavo 'pi me || 139 || {37}
[Analyze grammar]

yadyekasmai pradāsyāmi sarve 'nye syurmama dviṣaḥ |
atrāhaṃ kiṃ kariṣyāmi yadupāyaṃ na manyate || 140 || {38}
[Analyze grammar]

iti cintāviṣaṇṇāsyastasthau mohaviṣārditaḥ || 141 || {39!}
[Analyze grammar]

tatraivaṃ saṃsthitaṃ dṛṣṭvā janakaṃ taṃ samohitaṃ |
sametya sātmajā muktā natvaivaṃ paryapṛchata || 142 || {40}
[Analyze grammar]

tāta kiṃ te mano duḥkhaṃ yadevaṃ tiṣṭhase 'dhumā |
tatsatyaṃ samupākhyā prabodhayātmajāmimāṃ || 143 || {41}
[Analyze grammar]

iti saṃprārthite putryā tayā sa janakaḥ sudhīḥ |
taṃ muktāṃ svātmajaṃ dṛṣṭvā sucirādevamabravīt || 144 || {42}
[Analyze grammar]

ayi putri subhadrāṃgī kimatrāhaṃ vadeya hi |
yattvamekā sutā me 'sti yācakā bahavāstava || 145 || {43}
[Analyze grammar]

yadyekasmai pradāsyāmi tvāmekaṃ divyasuṃdarīṃ |
te sarve 'nye bhaveyurme śatravo hyapakāriṇaḥ || 146 || {44}
[Analyze grammar]

iti cintāvidagdhātmā tiṣṭhāmyevaṃ hi nānyathā |
tadupāyaṃ na paśyāmi yato me jāyate bhayaṃ || 147 || {45}
[Analyze grammar]

iti pitroditaṃ śrutvā sā muktā duhitā punaḥ |
janakaṃ taṃ samālokya bodhayantyevamabravīt || 148 || {46}
[Analyze grammar]

nāhaṃ kāmārthinī tāta saṃbuddhaśāsane gatā |
pravrajya saṃvaraṃ dhṛtvā cariṣyāmi śubhāṃ cariṃ || 149 || {47}
[Analyze grammar]

iti me niścitaṃ cittamanyathā na karomi hi |
tadatra mā viṣīda tvaṃ tadanujñāṃ pradehi me || 150 || {48}
[Analyze grammar]

iti putryā tathākhyātaṃ sa puṣyo janakaḥ sudhīḥ |
svātmajāṃ tāṃ samālokya punarevamabhāṣata || 151 || {49}
[Analyze grammar]

ayi putri kathaṃ tāvatpravrajyāṃ carituṃ saheḥ |
tvaṃ hi bālā subhadrāṅgī kumārī sukhamedhinī || 152 || {50}
[Analyze grammar]

tasmād yāvatkumārī tvaṃ tāvadgehe samāśritā |
triratnabhajanaṃ kṛtvā caropāsakasaṃvaraṃ || 153 || {51}
[Analyze grammar]

iti pitryoditaṃ śrutvā sā muktā duhitā sudhīḥ |
tathā hīti pratiśrutya prabodhitānvamoditaḥ || 154 || {52}
[Analyze grammar]

tathā sā bhadrikā muktā śuddhaśīlā subhāvinī |
triratnabhajanaṃ kṛtvā cere upāsikāvrataṃ || 155 || {53}
[Analyze grammar]

yadā sā yauvanī kāṃtā muktā muktātiśobhitā |
tadā kaniṣṭhaputreṇa dṛṣṭānāthānnasaṃstṛtaḥ || 156 || {54}
[Analyze grammar]

tataḥ so 'nāthabhṛtputraḥ supriyākhyo 'bhimoditaḥ |
kāmarāgāgnisaṃtapto rogī vābhūdviṣaṇṇadhīḥ || 157 || {55}
[Analyze grammar]

taṃ putraṃ kāmarāgārttaṃ dṛṣṭvā so 'nāthapiṇḍadaḥ |
tannimittaṃ samālokya samāśvāsyaivamabravīt || 158 || {56}
[Analyze grammar]

bho putraivaṃ kimarthe tvaṃ rogīva tiṣṭhase 'dhunā |
tadvadasva mamāgre 'pi yadichati manastava || 159 || {57}
[Analyze grammar]

iti pitroditam śrutvā supriyaḥ sa viniḥśvasan |
pitaraṃ taṃ samālokya śanairevamabhāṣata || 160 || {58}
[Analyze grammar]

tāta yo 'sau subhadrāṅgī muktā muktātiśobhitā |
dṛṣṭvā mayānurūpeti mano me harate 'pi sā || 161 || {59}
[Analyze grammar]

tadabhilāṣarāgāgnidāhasaṃtoṣitaṃ manaḥ |
tad rāgāgniśamopāyaṃ kartumarhati me 'dhunā || 162 || {60}
[Analyze grammar]

iti putroditaṃ śrutvā so 'nāthapiṇḍadaḥ pitā |
putrasya prāṇarakṣārthaṃ yācituṃ tāṃ samaihata || 163 || {61}
[Analyze grammar]

tataḥ sa dūtamāhūya pura evamabhāṣata |
sādho gacha gṛhasthasya puṣyasyaiva paro vada || 164 || {62}
[Analyze grammar]

sādho tadduhitā bhadrā taddīyatāṃ sutāya me |
evaṃ kṛte 'pi saṃbaṃdhaṃ yāvajjīvaṃ sukhāya nau || 165 || {63}
[Analyze grammar]

ityuktvā tasya puṣyasya tāṃ muktākhyāṃ subhāvinīṃ |
prārthayitvā sutāyāsmai dātuṃ me 'rhati sarvathā || 166 || {64}
[Analyze grammar]

iti tenoditaṃ śrutvā tatheti pratibhāṣya saḥ |
dūtaḥ prābhṛtamādāya puṣyasya samupācarat || 167 || {65}
[Analyze grammar]

tatra tasya puraḥ sthāpya prābhṛtaṃ saṃvinodayan |
yathānāthabhṛtādiṣṭaṃ tathā sarvaṃ nyavedayat || 168 || {66}
[Analyze grammar]

taduktaṃ sarvamākarṇya sa puṣyaḥ paribodhitaḥ |
muktāṃ tāṃ svātmajāṃ putrīṃ samāmaṃtryaivamabravīt || 169 || {67}
[Analyze grammar]

ayi priyātmaje putri tvamanāthabhṛtā satā |
supriyāya svaputrāya prārthitā tvaṃ prasīda tat || 170 || {68}
[Analyze grammar]

iti pitroditaṃ śrutvā muktā sā duhitā satī |
pitaraṃ taṃ samālokya praṇatvaivamabhāṣata || 171 || {69}
[Analyze grammar]

nāhaṃ kāmārthinī tāta saṃbuddhaśaraṇaṃ gatā |
pravrajyāsaṃvaraṃ dhṛtvā cariṣyāmi śubhāṃ carīṃ || 172 || {70}
[Analyze grammar]

iti putryoditaṃ śrutvā sa puṣyo 'bhihatāśayaḥ |
duhitāṃ tāṃ ciraṃ dṛṣṭvā punarevamabhāṣata || 173 || {71}
[Analyze grammar]

he sute kathameva tvaṃ vadethāḥ kiṃ na manyase |
yadasau gṛhabhṛnnāthastadvacaḥ śrūyate na kaiḥ || 174 || {72}
[Analyze grammar]

tad yāvad yauvanī bhūtā tāvadbharttā sahānugāḥ |
triratnabhajanaṃ kṛtvā cara vrataṃ gṛhe sukhaṃ || 175 || {73}
[Analyze grammar]

yadā vṛddhā vyavasthāsyai tadā tvaṃ saugatāśrame |
pravrajyāsaṃvaraṃ dhṛtvā pracarasva śubhāṃ carīṃ || 176 || {74}
[Analyze grammar]

iti pitrā samādiṣṭaṃ śrutvā sā duhitā sudhīḥ |
pitro vākyaṃ kathaṃ laṃghyamiti matvaivamabravīt || 177 || {75}
[Analyze grammar]

nāhaṃ kāmarthinī tāta saddharmasādhanārthinī |
tathāpi tvadvaco 'laṃghyamiti śroṣyāmi te vacaḥ || 178 || {76}
[Analyze grammar]

yadi me samayaṃ dhṛtvā satyavākyaṃ dadāti me |
vṛṇuyāṃ taṃ patiṃ nanumiti me vacanaṃ dhruvaṃ || 179 || {77}
[Analyze grammar]

iti putryoditaṃ śrutva sa puṣyaḥ paribodhitaḥ |
etatsarvaṃ pravṛttāṃtaṃ dūtasyāgre nyavedayat || 180 || {78}
[Analyze grammar]

dūtāpi tatpravṛttāṃtaṃ śrutvā tatheti satvarāḥ |
anāthapiṇḍadasyāgre vistareṇa nyavedayat || 181 || {79}
[Analyze grammar]

so 'nāthapiṇḍadaścāpi śrutvā sa pratimoditaḥ |
sarvametatpravṛttāṃtaṃ putrasyāgre nyavedayat || 182 || {80}
[Analyze grammar]

etatpitrā samākhyātaṃ śrutvā sa supriyaḥ sudhīḥ |
tathā hīti pratijñāya dūtasyāgre nyavedayat || 183 || {81}
[Analyze grammar]

dūtaśca tadvacaḥ śrutvā puṣyasya purato gataḥ |
sarvametatpravṛttāṃtaṃ vistareṇa nyavedayat || 184 || {82}
[Analyze grammar]

puṣyo 'pi tatsamākhyātaṃ śrutvā patnyāḥ puro 'vadat |
sāpi tajjananī śrutvā putryā agre nyavedayat || 185 || {83}
[Analyze grammar]

tanmātrā samupādiṣṭaṃ śrutvā sā duhitā satī |
tathā hīti pratiśrutya tūṣṇībhūtvādhyuvāsa tat || 186 || {84}
[Analyze grammar]

tataḥ sa janakaḥ puṣyo matvā putryādhivāsitaṃ |
tasyā vivāhasāmagrīṃ sahasā samasādhayat || 187 || {85}
[Analyze grammar]

tataḥ sa janakaḥ puṣyo 'pyanāthapiṇḍadātmajaṃ |
supriyaṃ taṃ samānīya satkṛtya samamānayat || 188 || {86}
[Analyze grammar]

tatastāmātmajāṃ muktāṃ supriyāya subhāvine |
saṃkalpya pradadau puṣyo janakaḥ sa yathāvidhiḥ || 189 || {87}
[Analyze grammar]

tataḥ sa supriyo bharttā tāṃmuktāṃ ramaṇīṃ priyāṃ |
bhāryāṃ svagṛhe ānīya reme bhuktvā yathāsukhaṃ || 190 || {88}
[Analyze grammar]

evaṃ sā bhāvinī muktā kāñcitkālaṃ gṛhe mudā |
bharttrā saha yathākāmaṃ bhuktvā reme pramoditā || 191 || {89}
[Analyze grammar]

tatastau daṃpatī dehe vṛddhatva samupākrame |
pitroḥ pādānpraṇatvaivaṃ prārthayataṃ samādarāt || 192 || {90}
[Analyze grammar]

pitarau yatkṛtaṃ satyamāvābhyāṃ tatsusiddhaye |
pūrayituṃ samichāvastadājñāṃ dātumarhatha || 193 || {91}
[Analyze grammar]

iti saṃprārthitaṃ tābhyāṃ śrutvā pitā sa sā prasūḥ |
dṛṣṭvā tau daṃpatī śrāddhāyuktāvevaṃ samūcatuḥ || 194 || {92}
[Analyze grammar]

yadi vāṃ vidyate vāṃchā carituṃ saugataṃ vrataṃ |
tatsatyapūraye tasmātpracarata samāhitau || 195 || {93}
[Analyze grammar]

iti tābhyāmanujñāte daṃpatī tau pramoditau |
pitroḥ pādānpraṇatvaiva pratasthuḥ sahasā gṛhāt || 196 || {94}
[Analyze grammar]

tatastau jetakodyāne vihāre samupāgatau |
bhagavantaṃ tamānamya pravrajyāṃ samayācatāṃ || 197 || {95}
[Analyze grammar]

bhagavannātha sarvajña vijānāti yadāvayoḥ |
satyaṃ tatpūrayiṣyāvastatpravrajyāṃ dadātu vāṃ || 198 || {96}
[Analyze grammar]

iti saṃprārthite tābhyaṃ bhagavāṃ dakṣapāṇinā |
spṛṣṭvā tacchirasordṛṣṭvā samāmaṃtryaivamādiśat || 199 || {97}
[Analyze grammar]

evaṃ caratamādāya pravrajyāvratamuttamaṃ |
svaparātmahitārtheṣu brahmacaryaṃ samāhitau || 200 || {98}
[Analyze grammar]

ityādiṣṭe munīndreṇa tāv ubhāvapi muṃḍitau |
khikkhirīpātravibhrāṇau ca bhartuścīvarāvṛtau || 201 || {99}
[Analyze grammar]

tato 'vidyāgaṇaṃ bhitvā prāptavidyāviśāradau |
sarvakleśagaṇāñjitvā sākṣādarhatvamāvatuḥ || 202 || {100}
[Analyze grammar]

tatastau vimalātmānau priśuddhatrimaṇḍalau |
jitendriyāū samācārau nirvikalpau niraṃjanau || 203 || {1}
[Analyze grammar]

sarveṣāmapi lokānāṃ traidhātukanivāsināṃ |
pūjyau mānyau ca vaṃdyau tāvabhūtaṃ brahmacāriṇau || 204 || {2}
[Analyze grammar]

taddṛṣṭvā te bhikṣavaḥ sarve vismayoddhatamānasā |
bhagavaṃtaṃ tamānamya paprachustatpurākṛtaṃ || 205 || {3}
[Analyze grammar]

bhagavan kiṃ kṛtaṃ karma purābhyāṃ sukṛtaṃ kuha |
tatsarvaṃ samupādiśya sarvānnaḥ paribodhaya || 206 || {4}
[Analyze grammar]

iti saṃprārthite sarvairbhikṣubhiḥ sa munīśvaraḥ |
sarvāṃstāṃ śrāvakānbhikṣūn samālokyaivamādiśat || 207 || {5}
[Analyze grammar]

śṛṇuta bhikṣavaḥ karma yadābhyāṃ prakṛtaṃ purā |
tatsarvaṃ vaḥ pravakṣyāmi śrutvā cābhyanumodata || 208 || {6}
[Analyze grammar]

tad yathābhūtpurā śāstā kāśyapākhyamunīśvaraḥ |
sarvajño 'rhaṃ jagannātho dharmarājastathāgataḥ || 209 || {7}
[Analyze grammar]

bhagavān sa mṛgāraṇye vārāṇasyāṃ jinārame |
sarvasatvahitārthena vijahāra sasāṃghikaḥ || 210 || {8}
[Analyze grammar]

tadā tatra mahān sādhuḥ śrīmāñchrīdopamaḥ sudhīḥ |
sadā tasya munīndrasya saddharmaśrāvako 'bhajat || 211 || {9}
[Analyze grammar]

tataḥ sa buddhimāndātā sarvalokahitārthataḥ |
chandakabhikṣaṇaṃ tatra yācitvā paṃcavārṣikaṃ || 212 || {10}
[Analyze grammar]

kāśyapasya munīndrasya sasaṃghaya niraṃtaraṃ |
sapūjābhojanairnityamupasthātuṃ samaichata || 213 || {11}
[Analyze grammar]

tataḥ sa nṛpaterājñāṃ samāsādya pramoditaḥ |
hastiskandhe samāruhya ghaṇṭāvādyaṃ pravādayan || 214 || {12}
[Analyze grammar]

sarvatra viṣaye tatra vārāṇasyāḥ samaṃtataḥ |
chaṃdakabhikṣaṇaṃ sārddhaṃ yācituṃ prācarajjanaiḥ || 215 || {13}
[Analyze grammar]

taṃ dṛṣṭvā sārthavāhasya bhāryā bhadrā subhāvinī |
sā tasyai śiraso mucya muktāhāraṃ dadau mudā || 216 || {14}
[Analyze grammar]

tatastasyāḥ śiraskaṃ tanmuktāhāravyapohitaṃ |
dṣṭvā sa vismito hāryaṃ tāmeva paryapṛchata || 217 || {15}
[Analyze grammar]

kvāsau bhadre śirasthaste muktāhāro na vidyate |
kasyai dattastvayā kena hṛto vā tadvadasva me || 218 || {16}
[Analyze grammar]

iti bhartrābhipṛṣṭe sā muditā racitāṃjaliḥ |
bharttāraṃ taṃ praṇatvaivaṃ vinodayitumabravīt || 219 || {17}
[Analyze grammar]

āryaputra prasīdātra mā kṛthā roṣatāmiha |
yanmayā śraddhayā dattaśchaṃdakabhikṣaṇe 'pyasau || 220 || {18}
[Analyze grammar]

iti bhāryoditaṃ śrutvā sārthavāhastataścaran |
niṣkrīya bahumūlyena tasyai patnyai dadau punaḥ || 221 || {19}
[Analyze grammar]

taṃ muktāhāramālokya sārthabhṛtaḥ priyāpi sā |
saṃpradattaṃ mayā śāstu iti taṃ nāgrahīdapi || 222 || {20}
[Analyze grammar]

tataḥ sa sārthabhṛtsvāmī tāṃ bhāryāṃ ramaṇīṃ priyāṃ |
snehārdacakṣuṣā dṛṣṭvā punarevamabhāṣata || 223 || {21}
[Analyze grammar]

bahumūlyena bhadre yaṃ mayā krītastu dīyate |
tatkasmānnechasīdaṃ madgrahītuṃ kathameva hi || 224 || {22}
[Analyze grammar]

iti bhartroditam śrutvā sā dattaṃ svāminā punaḥ |
taṃ muktāhāramādāya bharttuścittaṃ vyanodayat || 225 || {23}
[Analyze grammar]

tataḥ sā viṣayāraktā saddharmaguṇavāṃchinī |
taṃ saṃpūjāṃgamādāya yayau śāsturmudāśrame || 226 || {24}
[Analyze grammar]

tatraitadgandhakuṭyāṃ sā kṛtvā sugaṃdhilepanaṃ |
supuṣpaiśca samākīrya natvā kṛtvā pradakṣiṇāṃ || 227 || {25}
[Analyze grammar]

tataḥ sā muditā tasya kāśyapasya jagadguroḥ |
muktāhāraṃ puraḥ kṣiptvā praṇanāma kṛtāṃjaliḥ || 228 || {26}
[Analyze grammar]

tato buddhānubhavena muktāhāraḥ sa tatkṣaṇaṃ |
tasya śāstuḥ śiraḥ saṃstho rarāja saṃprabhāsayan || 229 || {27}
[Analyze grammar]

taddṛṣṭvā sā suprasannāsyāḥ saṃbodhiguṇalālasāḥ |
śāstuḥ pādau praṇatvaivaṃ praṇidhānaṃ vyadhānmudā || 230 || {28}
[Analyze grammar]

etatpuṇyavipākena śāstāramīdṛśaṃ jinaṃ |
ārāgyedṛgguṇānāṃ ca lābhī syāṃ sarvathā bhave || 231 || {29}
[Analyze grammar]

evaṃ sā bhāvinī kāṃtā tasya śāstu jagadguroḥ |
praṇidhānaṃ sadā kṛtvā prabheje saṃprasāditā || 232 || {30}
[Analyze grammar]

yo 'sau sārthapaterbhāryā mukteyaṃ sā subhāvinī |
manyatāmiti yuṣmābhirnānyathā tu hi bhikṣavaḥ || 233 || {31}
[Analyze grammar]

yadanayā tadā tasya kāśyapasya jagadguroḥ |
pūjāṅgaiḥ śraddhayābhyarcya muktāhāraḥ praḍhokitaḥ || 234 || {32}
[Analyze grammar]

etatpuṇyavipākena jāteyaṃ sukule 'dhunā |
śirasyasyāśca saṃrūḍho muktāmālā sahodbhavā || 235 || {33}
[Analyze grammar]

yathānayā kṛtaṃ tatra praṇidhānaṃ tathā 'dhunā |
māṃ śāstāramāgamya sākṣādarhatvamāpyate || 236 || {34}
[Analyze grammar]

evaṃ hi yatkṛtaṃ yena tenaiva bhujyate phalaṃ |
abhuktaṃ kṣīyate naiva karma na cānyathā kvacit || 237 || {35}
[Analyze grammar]

evaṃ matvātra saṃsāre sarvadā śubhavāṃchibhiḥ |
saddharmaṃ samupāśritya caritavyaṃ śubhe sadā || 238 || {36}
[Analyze grammar]

śubhe caranti ye nityaṃ na te gachaṃti durgatīṃ |
sadgatimeva saṃyānti bodhiṃ ca samavāpnuyuḥ || 239 || {37}
[Analyze grammar]

ityādiṣṭaṃ munīndreṇa śrutvā te sāṃghikā api |
sarve tatheti vijñapya prābhyanaṃdanprabodhitāḥ || 240 || {38}
[Analyze grammar]

ityādiṣṭaṃ hi me śāstrā śrutaṃ mayā tathocyate |
śrutvāpyevaṃ tathā rājaṃ caritavyaṃ śubhe sadā || 241 || {39}
[Analyze grammar]

prajāścāpi mahārāja bodhayitvā prayatnataḥ |
bodhimārge pratisthāpya pālayasva samāhitaḥ || 242 || {40}
[Analyze grammar]

tathā hi te sadā bhadraṃ sarvatrāpi bhaveddhruvaṃ |
kramādbodhiṃ ca saṃprāpya saṃbuddhapadamāpnuyāḥ || 243 || {41}
[Analyze grammar]

iti tenārhatādiṣṭaṃ śrutvāśokaḥ sa bhūpatiḥ |
tathā hīti pratijñapya prābhyanaṃdatsapārṣadaḥ || 244 || {42}
[Analyze grammar]

muktāvadānaṃ manujā idaṃ ye śṛṇvaṃti ye cāpi niśāmayanti |
te sarva evaṃ sukhitā śubhāni kṛtvā prayānti sugatālayante || 245 || {43}
[Analyze grammar]