Chapter 35 - śobhita-avadāna

athāśoko mahārājaḥ kṛtāṃjalipuṭo mudā |
upaguptaṃ yatiṃ natvā prārthayeccaivamādarāt || 1 || {1}
[Analyze grammar]

bhadanta śrotumichāmi punaranyatsubhāṣitaṃ |
tadyathā guruṇādiṣṭaṃ tathākhyātuṃ ca me 'rhati || 2 || {2}
[Analyze grammar]

iti saṃprārthitaṃ tena śrutvā so 'rhaṃ sudhīryatiḥ |
upagupto nareṃdraṃ taṃ samālokyaivamabravīt || 3 || {3}
[Analyze grammar]

śṛṇu rājanmahābhāga yathā me gurubhāṣitaṃ |
tathātra hi pravakṣyāmi tava cittābhibodhane || 4 || {4}
[Analyze grammar]

tadyathā bhagavācchāstā śākyasiṃho munīśvaraḥ |
sarvajño 'rhañjagannātho dharmarājastathāgataḥ || 5 || {5}
[Analyze grammar]

saṃbuddhaḥ sa tathā tatra pure kapilavastuni |
nyagrodharucirārāme vijahāra sasāṃghikaḥ || 6 || {6}
[Analyze grammar]

tasmiṃśca samaye tatra pure kapilavastuni |
śākya āsīnmahāsādhuḥ śrīmānyakṣādhipopamaḥ || 7 || {7}
[Analyze grammar]

sarvalokapradhānākhyaḥ sarvadravyasamṛddhimān |
tasya bhāryā surūpākhyā suṃdarī ratisaṃnibhā || 8 || {8}
[Analyze grammar]

subhāvinī ramā kāntā svakuladharmacāriṇī |
tayā saha samāraktaḥ sa śrīmānparicārayan || 9 || {9}
[Analyze grammar]

yathākāmaṃ sukhaṃ bhuktvā rarāma saṃpramoditaḥ |
tataḥ svāpannasatvābhūtsā surūpā pragarbhitā |
kramādvṛddhodarā pāṇḍuvarṇā svalpāśinī kṛśā || 10 || {10}
[Analyze grammar]

tataḥ sā samaye sūta dārakaṃ divyasuṃdaraṃ |
darśanīyaṃ subhadrāṅgaṃ prāsādikaṃ manoharaṃ || 11 || {11}
[Analyze grammar]

tasya janmanyanekāni mahāścaryakarāṇyapi |
prādurbhūtāni taiḥ sarvaṃ nagaraṃ pariśobhitaṃ || 12 || {12}
[Analyze grammar]

tamabhiśobhitaṃ jātam śrutvā sa janako mudā |
sahasopetya saṃpaśyanstasthau citrānvitāśayaḥ || 13 || {13}
[Analyze grammar]

tataḥ sa mudito jñātīnāhūya saha vāṃdhavaiḥ |
kṛtva jātimahaṃ tasya nāmā hi khyātumabravīt || 14 || {14}
[Analyze grammar]

bhavanto jñātayaḥ sarve dṛṣṭvāsya lakṣaṇaṃ yathā |
tathā nāmaprasiddhena vyavasthāpitumarhatha || 15 || {15}
[Analyze grammar]

iti tenoditaiḥ śrutvā sarve te jñātayastathā |
tasya nimittamālokya taṃ śākyamevamabruvan || 16 || {16}
[Analyze grammar]

sādho yajjāyate ātmābhaiḥ śobhayati puraṃ tataḥ |
śobhita iti nāmāsya bhavatu prathitaṃ bhuvi || 17 || {17}
[Analyze grammar]

iti tai jñātibhiḥ sarve samākhyātaṃ niśamya saḥ |
tathā tenābhidhānena prākhyāpayattamātmajaṃ || 18 || {18}
[Analyze grammar]

tataḥ śobhito 'ṣṭābhirdhātrībhiḥ prātipālitaḥ |
paripuṣṭo 'bhivṛddho 'bhū hradāruhāmbujaṃ yathā || 19 || {19}
[Analyze grammar]

yadā so dārakaḥ prauḍhaḥ kumāratvamavāptavān |
tadā pitrā sa vidyārthī guruhaste samarppitaḥ || 20 || {20}
[Analyze grammar]

tataḥ sa guruṇā śāstrā kramāl lipiraśiṣyate |
tathābhiśiṣyamāṇaḥ sa sarvavidyāntamāyayau || 21 || {21}
[Analyze grammar]

tataḥ sa śobhito dhīmān sarvavidyāṃ vicaksaṇaḥ |
tīrthikavādasaṃrakto virakto 'bhūdgṛhāśrame || 22 || {22}
[Analyze grammar]

sadā sa tīrthikārāme gatvā sa tīrthikaiḥ saha |
śāstrasaṃcodanotsāhai reme jayanpravādinaḥ || 23 || {23}
[Analyze grammar]

tasmiṃśca samaye tatra nyagrodharucirāśramaṃ |
sa bhagavān sabhāsīno dharmamādeṣṭumārabhat || 24 || {24}
[Analyze grammar]

tadā te bhikṣavaḥ sarve bhikṣuṇyo 'pi samāgatāḥ |
vratinaścailakāścānye upāsakā upāsikāḥ || 25 || {25}
[Analyze grammar]

bodhisatvā mahāsatvāstathānye śrāvakā api |
tatsaddharmāmṛtaṃ pātuṃ sarve te samupācaran || 26 || {26}
[Analyze grammar]

tatra taṃ śrīghanaṃ natvā parivṛtya samaṃtataḥ |
puraskṛtya samālokya sarve te upatasthire || 27 || {27}
[Analyze grammar]

tadānye 'pi samāyātā brahmaśakrādayaḥ surāḥ |
catvāro lokapālāśca sarve lokādhipā api || 28 || {28}
[Analyze grammar]

siddhā vidyādharāścāpi yakṣagaṃdharvakinnarāḥ |
rakṣasā garuḍā nāgāstathānye 'pi maharddhikāḥ || 29 || {29}
[Analyze grammar]

yatayo yoginaścāpi nirgranthāstīrthikā api |
ṛṣayo brāhmaṇāścāpi tāpasā brahmacāriṇaḥ || 30 || {30}
[Analyze grammar]

rājānaḥ kṣatriyā vaiśyā amātyā maṃtriṇo janāḥ |
śreṣṭhino dhaninaḥ paurāḥ sārthavāhā mahājanāḥ || 31 || {31}
[Analyze grammar]

vaṇijaḥ śilpinaścāpi tathānyadeśavāśinaḥ |
grāmyā jānapadāścāpi tathā kārpaṭikā api || 32 || {32}
[Analyze grammar]

sarve te samupāgatya dṛṣṭvā taṃ śrīghanaṃ mudā |
yathākramaṃ samabhyarcya natvā kṛtvā pradakṣiṇāṃ || 33 || {33}
[Analyze grammar]

sāṃjalayaḥ punarnatvā parivṛtyā samaṃtataḥ |
tatsaddharmāmṛtaṃ pātumupatasthuḥ samāhitāḥ || 34 || {34}
[Analyze grammar]

tataḥ sa śobhitaścāpi tacchrutvā kauṭukānvitaḥ |
tatra tāṃ parṣadaṃ draṣṭuṃ sahasā samupācarat || 35 || {35}
[Analyze grammar]

tatra sa sahasopetya prādrakṣīttaṃ munīśvaraṃ |
sarvalokasabhāmadhyasamāsīnaṃ prabhāsvaraṃ || 36 || {36}
[Analyze grammar]

dvātriṃśallakṣaṇāśītivyaṃjanaparibhūṣitaṃ |
vyāmaprabhāsamudbhāsaṃ śatasūryādhikaprabhaṃ |
saumyaṃ śāntendriyaṃ kāntaṃ samaṃtabhadrarūpikaṃ |
dṛṣṭvā sa suprasannātmā natvā kṛtvā pradakṣiṇāṃ || 37 || {37}
[Analyze grammar]

taddharmadeśanāṃ śrotuṃ tatraikānte upāśrayat |
tadā sa bhagavāndṛṣṭvā tāṃ sarvāṃ samupasthitān || 38 || {38}
[Analyze grammar]

āryasatyaṃ samārabhya saddharmaṃ samupādiśat |
tadāryadharmamākarṇya sarve te sa surādayaḥ || 39 || {39}
[Analyze grammar]

lokā dharmaviśeṣatvamājñāya pratibodhitāḥ |
bodhicittaṃ samādhāya triratnabhajanodyatāḥ || 40 || {40}
[Analyze grammar]

sarvasatvahitārthena babhūvurbodhicāriṇaḥ |
tadā sa śobhitaścāpi śrutvāryasatyamuttamaṃ || 41 || {41}
[Analyze grammar]

prabodhitaḥ prasannātmā saṃsāravirato bhavān |
satkāyadṛṣṭibhūmīndhraṃ viṃsatiśikharodgamaṃ || 42 || {42}
[Analyze grammar]

hitvā jñānāsinā śrotaāpattiphalamāptavān || 43 || {43}
[Analyze grammar]

dṛṣṭasatyo viśuddhātmā saddharmaguṇalālasaḥ |
saṃbuddhapadasaṃprāptyai pravrajituṃ samaichata || 44 || {44}
[Analyze grammar]

tataḥ sa samupāśritya kṛtāṃjalipurogataḥ |
taṃ munīndraṃ jagannāthaṃ svaivaṃ prārthayanmudā || 45 || {45}
[Analyze grammar]

bhagavannātha sarvajña bhavatāṃ śaraṇaṃ gataḥ |
pravrajituṃ samichāmi tatkṛpayā prasīdatu || 46 || {46}
[Analyze grammar]

iti tenārthitaṃ śrutvā bhagavān sa munīśvaraḥ |
śobhitaṃ taṃ samālokya samāmaṃtryaivamādiśat || 47 || {47}
[Analyze grammar]

yadi tvaṃ śāsane bauddhe pravrajituṃ samichasi |
piturājñāṃ samāsādya prehi dāsyāmi te vrataṃ || 48 || {48}
[Analyze grammar]

ityādiṣṭaṃ munīndreṇa śrutvā sa śobhito mudā |
pādau tasya munernatvā sahasā niryayau tataḥ || 49 || {49}
[Analyze grammar]

tatra sa svagṛhe gatvā pādau natvā puraḥ sthitaḥ |
pitroretatsamākhyāya prārthayadevamādarāt || 50 || {50}
[Analyze grammar]

tātāhamadya gachāmi nyagrodharucire vane |
tatra taṃ śrīghanaṃ buddhaṃ paśyāmi parṣadāśritaṃ || 51 || {51}
[Analyze grammar]

dhanyāste śrāvakāḥ sarve bhikṣavo bhadrikāśikāḥ |
śāṃteṃdriyāḥ samācārā arhanto brahmacāriṇaḥ || 52 || {52}
[Analyze grammar]

teṣāmeva hi saṃsāre sāphalyaṃ janma mānuṣe |
ye bhajanti munīndrasya śāsane śaraṇaṃ gatāḥ || 53 || {53}
[Analyze grammar]

teṣāṃ caivaṃ susāraṃ syān saṃsāre bhavacāraṇe |
ye saddharmaṃ munīndrasya śrutvā caraṃti saṃvaraṃ || 54 || {54}
[Analyze grammar]

teṣāṃ cāpi bhave sāraṃ janmadravyaguṇārjanaṃ |
satkāraiḥ sāṃghike sevāṃ kṛtvā caranti ye vrataṃ || 55 || {55}
[Analyze grammar]

kiṃ teṣāṃ mānuṣe janma nisphalaṃ sarvasādhanaṃ |
ye dhyātvāpi jinaṃ smṛtvā bhajaṃti na kadā cana || 56 || {56}
[Analyze grammar]

teṣāṃ ca kiṃ bhave janma kevalaṃ pāpasādhanaṃ |
ye na śṛṇvaṃti saddharmaṃ saṃbuddhabhāṣitaṃ kva cit || 57 || {57}
[Analyze grammar]

teṣāṃ ca nisphalaṃ janma mānuṣye duḥkhasādhanaṃ |
ye na kurvanti satkāraṃ sāṃghikeṣu kadā cana || 58 || {58}
[Analyze grammar]

evaṃ ye paśuvadgehe bhogyaṃ bhuktvā vasaṃti vai |
teṣāṃ kiṃ janma saṃsāre pāpaduḥkhārthameva hi || 59 || {59}
[Analyze grammar]

evaṃ te prāṇinaḥ sarve bhramaṃti bhavasāgare |
yato yairdṛśyate kvāpi triratnaṃ na kadā cana || 60 || {60}
[Analyze grammar]

tathāsmākamapi cātra saṃsāre janma nisphalaṃ |
saṃpado 'pi nirarthā hi triratnabhajanaṃ vinā || 61 || {61}
[Analyze grammar]

dharmārthajanmasaṃsāre yadi dharmo na labhyate |
kimevaṃ jīvitenāpi kevalāśubhasādhinā || 62 || {62}
[Analyze grammar]

tadvaraṃ mṛtyuradyevaṃ vinā dhārmārthasādhanaṃ |
kiṃ tena jīvitenāpi yanmithyāduḥkhasādhanaṃ || 63 || {63}
[Analyze grammar]

na prāptaṃ bhagavatpūjā mahotsāhaṃ kadāpi yaiḥ |
dharmo 'pi na śrutaḥ kaścinna kārāḥ sāṃghike kṛtāḥ || 64 || {64}
[Analyze grammar]

bhītebhyo nābhayaṃ dattaṃ daridrāśā na pūritā |
duḥkhāya kevalaṃ māturgatāste garbhaśalyatāṃ || 65 || {65}
[Analyze grammar]

dhanyāste sukhino loke subhadrāḥ śubhabhāvinaḥ |
satpuruṣā mahātmānaḥ śrīmaṃtaḥ sadguṇāśrayāḥ || 66 || {66}
[Analyze grammar]

ye buddhe śaraṇaṃ gatvā dhyātvā smṛtvā samāhitāḥ |
saddharmāmṛtamāpīya carantaḥ saugataṃ vrataṃ || 67 || {67}
[Analyze grammar]

sarve satvahitārthaṃ ca dānaṃ datvā yathepsitaṃ |
dayālavaḥ susaumyāṃśāḥ sarvasatvahitāśayāḥ || 68 || {68}
[Analyze grammar]

saṃbodhisādhanotsāhasarvasatvahitodyatāḥ |
niḥkleśā vimalātmānaḥ samādhiniścalāśayāḥ || 69 || {69}
[Analyze grammar]

prajñāvaṃto mahādhīrāḥ saṃbodhiratnalābhinaḥ |
pravrajyāvratinārhanto nirvikalpā niraṃjanāḥ || 70 || {70}
[Analyze grammar]

bhikṣāhārā nirātaṃkā niḥśaṃkā damiteṃdriyāḥ |
niḥśeṣanirjitāvidyāḥ prāptavidyā viśāradāḥ || 71 || {71}
[Analyze grammar]

svachaṃdacāriṇaḥ santaḥ sarvasatvātmabhāvinaḥ |
niḥspṛhā viratotsāhā nirdainyaḥ kṣubhitāśayāḥ || 72 || {72}
[Analyze grammar]

nirmadā nirahaṃkārā āryā nirabhimāninaḥ |
nirmāyā nirmamākhaḍgā niḥsaṃgā niḥparigrahāḥ || 73 || {73}
[Analyze grammar]

muṇḍitā khikkhirīpātradadhānāścīvarāvṛtāḥ |
yatinaḥ sugatākārāstriyānamokṣadeśakāḥ || 74 || {74}
[Analyze grammar]

svaparātmahitārthena saṃbodhimārgadeśakāḥ |
vaṃdyāḥ pūjyāḥ pramānyāśca caturbrahmavihāriṇaḥ || 75 || {75}
[Analyze grammar]

te eva sugatiṃ yāṃti yāṃti cānte jinālaye |
saṃbodhiṃ ca samāsādya bhaveyuḥ sugatā api || 76 || {76}
[Analyze grammar]

iti satyaṃ munīndreṇa samādiṣṭaṃ niśamya me |
mano 'tra bhavasaṃcāre carituṃ nābhivāṃchati || 77 || {77}
[Analyze grammar]

triratnaśaraṇaṃ kṛtvā saṃbuddhaśāsane śubhe |
pravrajyāsaṃvaraṃ dhṛtvā caritumichati sāṃprataṃ || 78 || {78}
[Analyze grammar]

kiṃ ca me janmakāle yadidaṃ yuḥ śobhitāruṣā |
saṃpado 'pi pravarddhante divyābhisuṃdarāsmi ca || 79 || {79}
[Analyze grammar]

tatsarvaṃ me purā bhadrakarmadharmavipākataḥ |
saṃpadyate 'dhunā nūnaṃ viddhi mā tvanyathā pita || 80 || {80}
[Analyze grammar]

etannūnamiti matvā bhūyo 'pi me manastathā |
saddharmasādhanaṃ kartumichati saugataṃ vrataṃ || 81 || {81}
[Analyze grammar]

etaddhetorahaṃ tāta prārthayāmyevamādarāt |
tadanujñāṃ pradattaṃ me yadi vāṃchāsti vā śubhe || 82 || {82}
[Analyze grammar]

etatpuṇyavibhāgena yūyamapi surālayaṃ |
gatvā divyasukhānyeva bhuktvā ciraṃ nivatsyatha || 83 || {83}
[Analyze grammar]

tataḥ kāle divaścyutvā martyaloka ihāgatāḥ |
triratnabhajanaṃ kṛtvā cariṣyatha śubhe sadā || 84 || {84}
[Analyze grammar]

tacchubhapuṇyapākena śuddhāśayāḥ śubhāvinaḥ |
saṃbuddhaśāsane gatvā saddharmaṃ śroṣyathādarāt || 85 || {85}
[Analyze grammar]

tatastatpuṇyapākena saṃghānāṃ śaraṇaṃ gatāḥ |
satkāraiḥ samupasthitvā bhajiṣyatha samādarāt || 86 || {86}
[Analyze grammar]

tatastatpuṇyapākena bodhicittamavāpsyatha |
tato lokahitārtheṣu bodhicaryāṃ cariṣyatha || 87 || {87}
[Analyze grammar]

tataḥ pāramitāḥ sarvāḥ pūrayitvā yathākramaṃ |
tato bodhiṃ samāsādya saṃbuddhapadamāpsyatha || 88 || {88}
[Analyze grammar]

evaṃ vijñāya saṃbuddhapadasaṃpratipattaye |
tadanujñāṃ pradattaṃ me saṃbuddhapadavāṃchire || 89 || {89}
[Analyze grammar]

anityaṃ khalu samṣāraṃ jīvitaṃ kṣaṇabhaṃguraṃ |
kṣaṇabhaṃgiśarīraṃ ca sarveṣāṃ bhavacāriṇāṃ || 90 || {90}
[Analyze grammar]

saṃpado 'pi sthirā naiva satkṣaṇaṃ ca sudurlabhaṃ |
mānuṣye sarvadā janma labhyate na sudurllabhaṃ || 91 || {91}
[Analyze grammar]

tatrāpi durlabhā dharme matirjātāpi na sthirāḥ |
dharmaṃ tu saugataiḥ śreṣṭhaṃ yatsaṃbodhipadasādhanaṃ || 92 || {92}
[Analyze grammar]

tatsaṃbodhipadaprāptyai dharmaṃ ichāmi saugataṃ |
tadanujñāṃ pradatvā me mano harṣayata drutaṃ || 93 || {93}
[Analyze grammar]

dharmaṃ vinātra kiṃ sāraṃ bhogyairarthairguṇairapi |
kiṃ kāmasukhaṃ bhuktvā sthitvā ca paśuvadgṛhe || 94 || {94}
[Analyze grammar]

tadanujñāṃ na datyaśyen sthāsyāmi na gṛhe 'pyahaṃ |
sarvānparigrahānstyaktvā gamiṣyāmi tapovanaṃ || 95 || {95}
[Analyze grammar]

tatra ko nirjane sthitvā caritvā duṣkaraṃ tapaḥ |
anāhāro mariṣye 'haṃ sarvatra maraṇaṃ dhruvaṃ || 96 || {96}
[Analyze grammar]

kasya mṛtyu bhave nāsti kutra mṛtyorbhayaṃ na hi |
sarvalokān grasenmṛtyureko 'pi sa mahāvaliḥ || 97 || {97}
[Analyze grammar]

tadatra kiṃ viṣādena yaddamopāyamatra na |
avaśyaṃ bhāvino bhāvā bhavanti mahatāmapi || 98 || {98}
[Analyze grammar]

mṛtyukāle sahāyo 'pi ko 'pi nāsti sahānugaḥ |
dharma eva tadaiko hi sahāyaḥ syātsahānugaḥ || 99 || {99}
[Analyze grammar]

evaṃ matvātra saṃsāre sthātuṃ nechanti sajjanāḥ |
sarvānparigrahānstyaktvā pravrajanti śubhārthinaḥ || 100 || {100}
[Analyze grammar]

tathāhamapi tanmṛtyubhayaṃ dṛṣṭvābhiśaṃkitaḥ |
saṃbuddhaśaraṇaṃ gatvā carituṃ vratamutsahe || 101 || {1}
[Analyze grammar]

iti dharme nidheddhaṃ mā kiṃ cidvā vaktumarhatha |
suprasannādhiyānujñāṃ pradātumeva me 'rhati || 102 || {2}
[Analyze grammar]

iti tenātmajenaivaṃ saṃprārthitaṃ niśamya tau |
pitarau vismayākrāṃtacittau taṣṭhaturmūrchitau || 103 || {3}
[Analyze grammar]

tatastau dhairyamālambya tameva svātmajaṃ cirāt |
dṛṣṭvā viyogaduḥkhārttau taṣṭhaturlikhitāviva || 104 || {4}
[Analyze grammar]

tataḥ sa janakaḥ śākyastaduktaparibodhitaḥ |
galadaśrumukho dṛṣṭvā taṃ putramevamabravīt || 105 || {5}
[Analyze grammar]

hā putra kiṃ atrāhaṃ vadeya sāṃprataṃ khalu |
yattvameva sudhīrvijñaḥ paṇḍito 'si vicakṣaṇaḥ || 106 || {6}
[Analyze grammar]

yattvaṃ śāsane bauddhe pravrajituṃ samichasi |
tacchāstuḥ śaraṇaṃ kṛtvā vrataṃ cara samāhitaḥ || 107 || {7}
[Analyze grammar]

iti pitroditaṃ śrutvā sa sobhitaḥ pramoditaḥ |
pitroḥ pādānpraṇatvaiva sahasā niryayau gṛhāt || 108 || {8}
[Analyze grammar]

tataḥ sa sahasā gatvā nyagrodhatarumaṇḍite |
vihāre sugatārame praviśya samupācarat || 109 || {9}
[Analyze grammar]

yatra sa purato gatvā kṛtāṃjalipuṭo mudā |
praṇatvā taṃ jagannāthaṃ prārthayadevamādarāt || 110 || {10}
[Analyze grammar]

bhagavannātha sarvajña prāpyānujñāṃ samāvraje |
tadbhavān sāṃprataṃ mahyaṃ pravrajyāṃ dātumarhati || 111 || {11}
[Analyze grammar]

bhavatāṃ śaraṇe sthitvā pravrajya saugataṃvrataṃ |
dhṛtvā sadā samādāya cariṣye bodhicārikāṃ || 112 || {12}
[Analyze grammar]

iti saṃprārthitaṃ tena bhagavān sa munīśvaraḥ |
savyena pāṇinā tasya śiraḥ spṛṣṭvaivamādiśat || 113 || {13}
[Analyze grammar]

ehi ca vatsa samādhāya vrataṃ carasva saugataṃ |
ityuktvā sa munīndraḥ svasāṃghike taṃ samagrahīt || 114 || {14}
[Analyze grammar]

ehītyukte munīṃdreṇa śobhito 'bhūtsa muṇḍitaḥ |
khikkhirīpātravibhrāṇaḥ kākhāyacīvarī yatiḥ || 115 || {15}
[Analyze grammar]

tataḥ sa sumatirbhikṣuḥ saṃsāragatinispṛhaḥ |
bhitvāvidyāgaṇān sarvānprāptavidyā viśāradaḥ || 116 || {16}
[Analyze grammar]

sarvakleśagaṇāṃ jitvā sākṣādarhatvamāptavān || 117 || {17!}
[Analyze grammar]

tataḥ so 'rhanmahābhijñaḥ pariśuddhatrimaṇḍalaḥ |
nikleśaḥ suviśuddhātmā śuddhendriyo jināṃśabhṛt || 118 || {18}
[Analyze grammar]

nirvikalpaḥ samākāro brahmacārī niraṃjanaḥ |
saṃsāralābhasatkāraniḥspṛhaḥ khasamāśayaḥ || 119 || {19}
[Analyze grammar]

sa devāsuralokānāṃ sarveṣāṃ bhavacāriṇāṃ |
mānyaḥ pūjyo 'bhivaṃdyaśca babhūva sa jinātmajaḥ || 120 || {20}
[Analyze grammar]

taddṛṣṭvā bhikṣavaḥ sarve vismayoddhatamānasāḥ |
bhavantaṃ praṇatvaivaṃ paprachustatpurākṛtaṃ || 121 || {21}
[Analyze grammar]

bhagavan kiṃ purānena sukṛtaṃ prakṛtaṃ kuha |
yenāyaṃ sukule jāto divyakalpātisuṃdaraḥ || 122 || {22}
[Analyze grammar]

janmani vāsya jātāni mahādbhutakarāṇyapi |
yairetannagaraṃ sarvaṃ caṃdrābhairiva śobhitaṃ || 123 || {23}
[Analyze grammar]

bhavatāṃ śāsane cāpi triratnaśaraṇaṃ gataḥ |
pravrajyāsaṃvaraṃ dhṛtvā yatirarhanbhavatyapi || 124 || {24}
[Analyze grammar]

etatsarvaṃ samākhyāya bhavāṃcchāstā jagadguruḥ |
sarvānasmān sabhāṃścāpi prabodhayitumarhati || 125 || {25}
[Analyze grammar]

iti tairbhikṣubhiḥ sarvaiḥ prārthite sa munīśvaraḥ |
sarvānyatīn sabhāṃ cāpi samālokyaivamādiśat || 126 || {26}
[Analyze grammar]

śṛṇuta bhikṣavaḥ sarve yadanena purākṛtaṃ |
tatsarvaṃ samāśakhye yuṣmākaṃ paribodhane || 127 || {27}
[Analyze grammar]

tadyathābhūtpurā śāstā krakuchandastathāgataḥ |
sarvajño 'rhaṃ jagannātho dharmarājo munīśvaraḥ || 128 || {28}
[Analyze grammar]

tadā sa bhagavān loke bodhicaryāṃ prakāśayan |
saddharmaṃ samupādiśya pracacāra samaṃtataḥ || 129 || {29}
[Analyze grammar]

evaṃ sa bhagavāṃ chāstā kṛtvā sarvatra maṃgalaṃ |
śobhāvatyā mahāpūryā rājadhānyā upāśrame || 130 || {30}
[Analyze grammar]

vihāre saugatāvāse samāśritya prabhāsayan |
saddharmaṃ samupādeṣṭuṃ vijahāra sasāṃghikaḥ || 131 || {31}
[Analyze grammar]

tatrāgatya samānīnaṃ taṃ munīndraṃ sasāṃghikaṃ |
śrutvā śobho mahārājo draṣṭuṃ sa samupācarat || 132 || {32}
[Analyze grammar]

tatra sa nṛpatiḥ śobho dṛṣṭvā taṃ sugataṃ muniṃ |
krakuchaṃdaṃ samāsīnaṃ bhikṣusaṃghapuraskṛtaṃ || 133 || {33}
[Analyze grammar]

muditaḥ samupāsṛtya kṛtāṃjaliḥ purogataḥ |
praṇatvā suprasannāsyaḥ prārthayamevamādarāt || 134 || {34}
[Analyze grammar]

bhagavannātha sarvajña bhavāñchāstā jagadguruḥ |
tadasmākaṃ hitārthena dharmamādeṣṭumarhati || 135 || {35}
[Analyze grammar]

iti saṃprārthite tena rājñā sa bhagavānapi |
taṃ śobhaṃ kṣitipāleṃdraṃ samālokyaivamādiśat || 136 || {36}
[Analyze grammar]

śṛṇu rājan samādhāya satvānāṃ hitakāraṇaṃ |
saṃbodhisādhanaṃ dharmaṃ vakṣyāmi te śubhārthataḥ || 137 || {37}
[Analyze grammar]

anityaṃ khalu saṃsāre sarvaṃ śūnyamanātmakaṃ |
māyākleśasamudbhūtaṃ jagallokamaśāśvataṃ || 138 || {38}
[Analyze grammar]

tadatra kiṃ bhave sāraṃ nirarthaṃ duḥkhasādhanaṃ |
iti vijñāya rājendra kleśāñjitvā śubhe cara || 139 || {39}
[Analyze grammar]

śubhena sadgatiṃ yāyā sadgatau sarvadā sukhaṃ |
sukhena sarvadā bhadre caritavyaṃ tathā bhavaṃ || 140 || {40}
[Analyze grammar]

śubhaṃ saṃjāyate puṇyātsarvatrāpi sadā dhruvaṃ |
puṇyaṃ saṃjāyate hyādau saṃbuddhadarśanādapi || 141 || {41}
[Analyze grammar]

etatpuṇyānubhāvena saddharmaśravaṇaṃ labhet |
tatsaddharmarasāsvādasaṃsaktaśca samutsahet || 142 || {42}
[Analyze grammar]

tadutsāhātpunaḥ śrotumabhilāṣaḥ samudbhavet |
samudbhūtābhilāṣaśca satkṛtya mānayenmudā || 143 || {43}
[Analyze grammar]

sadguruṃ samupāsṛtya saddharmaṃ śṛṇuyātsadā |
tatsaddharmāmṛtasvādaguṇalabdhaḥ pramoditaḥ || 144 || {44}
[Analyze grammar]

saddharmacāraṇo bhikṣūn satkṛtya mānayenmudā |
tatastaddharmamākarṇya saṃbodhidharmavāṃchitaḥ |
triratnabhajanaṃ kṛtvā svaparārthahite caret || 145 || {45}
[Analyze grammar]

etatpuṇyavipākena sa kule śrīsamālaye |
jāto lokahitārthena dānaṃ dadyād yathepsitaṃ || 146 || {46}
[Analyze grammar]

taddānapuṇyapākena sa dātā sadgatiṃ vrajet |
sadgatisthaḥ sukhenaivaṃ suśīlaḥ saṃvaraṃ caret || 147 || {47}
[Analyze grammar]

tatsuśīlavratotpannaiḥ puṇyaiḥ sa pariśuddhadhīḥ |
sarvasatvahitārtheṣu dayālu maitravaccaret || 148 || {48}
[Analyze grammar]

tatastatpuṇyapākena sa sudhīro vicakṣaṇaḥ |
svaparātmahitārthena sarvakāryāṇi sādhayet || 149 || {49}
[Analyze grammar]

etatpuṇyaviśuddhātmā niḥkleśo vimalāśayaḥ |
samādhidharaṇīvidyāsamādhānaḥ sudhīrbhavet || 150 || {50}
[Analyze grammar]

tatastatpuṇyasaṃbhārasaṃbodhiguṇasārthabhṛt |
prajñābdhipāramāsādya bodhicittamaṇiṃ labhet || 151 || {51}
[Analyze grammar]

tanmaneranubhāvena sarvopāyavidhānavit |
sarvasatvahito dhānaṃ bodhicaryāvrataṃ caret || 152 || {52}
[Analyze grammar]

tatpuṇyaiḥ sa mahāsatvaḥ sarvasatvaśubhaṃkaraḥ |
saṃbodhipraṇidhānena saddharmābhirato bhavet || 153 || {53}
[Analyze grammar]

tatastaddharmapūtātmā duṣṭakleśān vinirjayan |
sarvahitārthasaṃbhartā mahābhijñā valī bhave || 154 || {54}
[Analyze grammar]

tato māragaṇāñjitvā pariśuddhatrimaṇḍalaḥ |
so 'rhan saṃbodhisaṃprāptaḥ saṃbuddhapadamāpnuyāt || 155 || {55}
[Analyze grammar]

tataḥ sa sugataḥ śāstā kṛtvā dharmamayaṃ jagat |
bodhimārge pratiṣṭhāpya nirvṛtaḥ svālayaṃ vrajet || 156 || {56}
[Analyze grammar]

tataḥ sa svālaye līno dharmadhātvīśvaro jinaḥ |
viśvarūpā viśuddhābhajyotirūpo niraṃjanaḥ || 157 || {57}
[Analyze grammar]

evaṃ vijñāya rājendra saṃbuddhapadavāṃchibhiḥ |
triratnabhajanaṃ kṛtvā caritavyaṃ śubhe sadā || 158 || {58}
[Analyze grammar]

tathā taṃ sarvadā bhadraṃ sarvatrāpi bhaveddhruvaṃ |
kramātsaṃbodhimāsādya saṃbuddhapadamāpsyatha || 159 || {59}
[Analyze grammar]

iti śāstrā samādiṣṭaṃ śrutvā śobhaḥ sa bhūpatiḥ |
tathā hīti pravijñapya prābhyanandatprabodhitaḥ || 160 || {60}
[Analyze grammar]

tadārabhya sa bhūmīndrastriratnaśaraṇaṃ gataḥ |
sarvasatvahitaṃ kṛtvā prācaratsarvadā śubhe || 161 || {61}
[Analyze grammar]

tadā tadviṣaye tatra sarvadābhūcchubhotsavaṃ |
sarva lokāśca saddharmāratotsāhāḥ pracerire || 162 || {62}
[Analyze grammar]

evaṃ sa nṛpatiḥ śobhastaṃ munīndraṃ sasāṃghikaṃ |
yathārhabhojanaiścāpi trimāsyaṃ samasevita || 163 || {63}
[Analyze grammar]

tataḥ sa bhūmīrājo trimāsānte sasāṃghikaṃ |
krakuchaṃdaṃ munīndraṃ taṃ natvaivaṃ prārthayanmudā || 164 || {64}
[Analyze grammar]

bhagavannātha sarvajña sarvadātra sasāṃghikaḥ |
saddharmaṃ kṛpayāsmadbhyamādeṣṭum sthātumarhati || 165 || {65}
[Analyze grammar]

iti saṃprārthite rājñā bhagavān sa jagadguruḥ |
tada śobhaṃ jagatīpālaṃ samālokyaivamādiśat || 166 || {66}
[Analyze grammar]

nāhaṃ rājaṃstavaikasya hitārthe sugato bhave |
api tu sarvasatvānāṃ śubhahetau bhave jinaḥ || 167 || {67}
[Analyze grammar]

tadevaṃ sarvalokeṣu bodhicaryāṃ prakāśayan |
saddharmaṃ samupākhyātuṃ careyaṃ saha sāṃghikaiḥ || 168 || {68}
[Analyze grammar]

yadyasti te sadā rājaṃ bhaktiśraddhāmatirmayi |
mannāmābhisamuddiśya stūpaṃ kṛtvā sadā bhaja || 169 || {69}
[Analyze grammar]

etasmiṃ yatkṛtaṃ karma tanmayi kṛtameva hi |
tiṣṭhato nirvṛtasyāpi tulyaṃ bhaktimatāṃ phalaṃ || 170 || {70}
[Analyze grammar]

tadyathā mayi rājendra śraddhayā śaraṇaṃ gataḥ |
triratnabhajanaṃ kṛtvā carasvaivaṃ śubhe mudā || 171 || {71}
[Analyze grammar]

tathāsmin sarvadā stūpe śraddhayā śaraṇaṃ gataḥ |
triratnabhajanaṃ kṛtvā śubhe cara samāhitaḥ || 172 || {72}
[Analyze grammar]

tathā te sarvadā kṣemaṃ sarvatrāpi bhaveddhruvaṃ |
kramātsaṃbodhimāsādya saṃbuddhapadamāpnuyāt || 173 || {73}
[Analyze grammar]

ityādiśya sa saṃbuddhastasmai śobhāya bhūrbhuje |
svanakhakeśamutkṛtya dadau stūpārthamādarāt || 174 || {74}
[Analyze grammar]

taṃ munīndrapradattaṃ sa bhūpatiḥ saṃpramoditaḥ |
praṇatvā samupāgṛhya sānaṃdaḥ svālayaṃ yayau || 175 || {75}
[Analyze grammar]

tatra sa nṛpatī rājā tannakhakeśamādarāt |
garbhe nidhāya sadratnairmahastūpamakārayat || 176 || {76}
[Analyze grammar]

tatastaṃ sa nṛpo rājā pratiṣṭhāpya yathāvidhiḥ |
mahotsavaiḥ sadā nityaṃ samabhyarcya bhajanmudā || 177 || {77}
[Analyze grammar]

tatraikasmindine bhadre parvaṇi pratyupasthite |
sametya goṣṭhikāḥ sarve taṃ stūpaṃ draṣṭumāgatāḥ || 178 || {78}
[Analyze grammar]

dṛṣṭvā te goṣṭhikāḥ sarve suprasannābhimoditāḥ |
nānāpuṣpaistamabhyarcya mahotsavaiḥ sahābhajat || 179 || {79}
[Analyze grammar]

tatraiko goṣṭhiko dṛṣṭvā daridro 'hamiti bruvan |
tatpūjāmahotsāhe lajjayā svagṛhaṃ yayau || 180 || {80}
[Analyze grammar]

tatastairgoṣṭhikaiḥ sarvairdṛṣṭvā sa svagṛhe tataḥ |
bahuśaḥ paribhāṣitvā goṣṭhimadhyādbahiṣkṛtaḥ || 181 || {81}
[Analyze grammar]

tataḥ sa lajjayākhinnaḥ paścāttāpāgnitāpitaḥ |
hā maṃdaḥ kathameko 'haṃ tiṣṭheyamityaciṃtayat || 182 || {82}
[Analyze grammar]

tataḥ sa sugataṃ smṛtvā daridro 'pi samaṃtataḥ |
sarvapuṣpāṇi saṃgṛhya taistaṃ stūpaṃ samarcayat || 183 || {83}
[Analyze grammar]

tataḥ pradakṣiṇīkṛtya sāṃjaliḥ sa pramoditaḥ |
tatpādayoḥ praṇatvaivaṃ praṇidhānaṃ mudākarot || 184 || {84}
[Analyze grammar]

yanmayātra munīndrasya stūpaḥ puṣpaiḥ samarcitaḥ |
etatpuṇyavipākena bhaveyaṃ śrīsamṛddhimān || 185 || {85}
[Analyze grammar]

ityevaṃ praṇidhiṃ kṛtvā tatstūpaṃ śaraṇaṃ gataḥ |
sa daridraḥ samabhyarcya prābhajan saṃpramoditaḥ || 186 || {86}
[Analyze grammar]

manyatāṃ bhikṣavo yo 'sau daridro 'yaṃ hi śobhitaḥ |
yatstūpo 'rcitaḥ puṣpaistenāyaṃ śrīsamṛddhimān || 187 || {87}
[Analyze grammar]

anyadapi yathānena sukṛtaṃ prakṛtaṃ purā |
tatsarvaṃ saṃpravakṣyāmi śṛṇudhvanyūyamādarāt || 188 || {88}
[Analyze grammar]

tathāthābhūtpurā pūryāṃ vārāṇasyāṃ gṛhādhipaḥ |
śreṣṭhī mahājanaḥ sādhurvyavahāravicakṣaṇaḥ || 189 || {89}
[Analyze grammar]

tadaikasmindine tasya gṛhāntike śanaiścaran |
pratyekasugato glāno bhikṣārthaṃ samupācaran || 190 || {90}
[Analyze grammar]

taṃ gṛhāntikamāyātaṃ dṛṣṭvā sa karuṇāhataḥ |
sahasopetya natvainamāmaṃtrya svagṛhe nayet || 191 || {91}
[Analyze grammar]

tatra śreṣṭhī sa taṃ glānaṃ pratyekabuddhamāsane |
upasthāpya samabhyarcya paṭenāchādayanmudā || 192 || {92}
[Analyze grammar]

tasmai kṣīrodanaiḥ pūrṇaṃ pātraṃ paṃcāmṛtaiḥ saha |
pradatvā sāṃjalirnatvā manasaivaṃ vyaciṃtayat || 193 || {93}
[Analyze grammar]

yadayaṃ sugato glāno 'bhyarcito mayādarāt |
etatpuṇyavipākena bhaveyaṃ kṣemavān sudhīḥ || 194 || {94}
[Analyze grammar]

ityevaṃ praṇidhānena sa śreṣṭhī pratimoditaḥ |
satkṛtya sādaraṃ tatra svāśrame samacārayat || 195 || {95}
[Analyze grammar]

manyatāṃ bhikṣavo yo 'sau śreṣṭhī śrīmānmahājanaḥ |
ayameva mahābhijñaḥ śobhito 'rhanmahāmatiḥ || 196 || {96}
[Analyze grammar]

yadanena tadā glānapratyekabuddha ādarāt |
paṭenāchādya piṃḍena pratipādya samarcitaḥ || 197 || {97}
[Analyze grammar]

etatpuṇyavipākena śobhito 'yaṃ samṛddhimān |
paṃcajanmaśatānyevaṃ babhūva sadguṇākaraḥ || 198 || {98}
[Analyze grammar]

bhūyo 'pi yatpurānena sukṛtaṃ sādhitaṃ yathā |
tatsarvaṃ saṃpravakṣyāmi śṛṇudhvaṃ yūyamādarāt || 199 || {99}
[Analyze grammar]

tadyathābhūtpurā śāstā kāśyapo 'rhanstathāgataḥ |
sarvajñaḥ sugato nātho dharmarājo munīśvaraḥ || 200 || {100}
[Analyze grammar]

vārāṇasyāṃ sa saṃbuddho mṛgadāve sasāṃghikaḥ |
sarvasatvahitārthena vyaharaddharmamādiśat || 201 || {11}
[Analyze grammar]

tasmiṃśca samaye tatra vārāṇasyāmabhūdgṛhī |
saṃbuddhabhaktimān sādhurdaridraḥ kāṣṭhahārikaḥ || 202 || {2}
[Analyze grammar]

sa ekasmindine kāṣṭhamāhartu parvaṭe vrajan |
tatraikatra mahatstūpaṃ dadarśāchāditaṃ tṛṇaiḥ || 203 || {3}
[Analyze grammar]

dṛṣṭvā sa samupāśritya tattṛṇāni samaṃtataḥ |
sarvāṇyapi samutpāṭya saṃmṛjya samaśodhayat || 204 || {4}
[Analyze grammar]

tatastaṃ śobhitaṃ dṛṣṭvā sa śreṣṭhī saṃpramoditaḥ |
natvā pradakṣiṇīkṛtya manasaivaṃ vyaciṃtayat || 205 || {5}
[Analyze grammar]

yadayaṃ saugatastūpo mayā saṃmṛjya śodhitaḥ |
etatpuṇyavipākena bhaveyaṃ divyasuṃdaraḥ || 206 || {6}
[Analyze grammar]

divyātiriktābhaiḥ śobhitaḥ syān samṛddhimān |
anāgatāṃśca saṃbuddhānārāgayeyamādarāt || 207 || {7}
[Analyze grammar]

tadā tacchāsane gatvā triratnaśaraṇaṃ gataḥ |
pravrajyārhatpadaṃ prāpya vrajeyāhaṃ sunirvṛtiṃ || 208 || {8}
[Analyze grammar]

ityevaṃ praṇidhiṃ kṛtvā praṇatvā taṃ jinālayaṃ |
satataḥ kāṣṭhamādāya svagṛhaṃ samudācarat || 209 || {9}
[Analyze grammar]

tataḥ sa sumatiḥ śrīmānabhūttatpuṇyavān kṛtiḥ |
sukhāni suciraṃ bhuktvā kāle mṛto divaṃ yayau || 210 || {10}
[Analyze grammar]

svarge sa divyabhogyāni bhuktvā reme suraiḥ saha |
paṃcajanmaśatānyevaṃ sukhaṃ bhuktvā bhramedbhave || 211 || {11}
[Analyze grammar]

atrāpi yadeyaṃ śrīmāñchāsane me samāgataḥ |
pravrajyāsaṃvaraṃ dhṛtvā carannarhanbhavatyapi || 212 || {12}
[Analyze grammar]

tatsarvaṃ hi vijānīta tatstūpasaṃmṛṣṭapuṇyataḥ |
yathā ca ciṃtitaṃ tatra tathāsya siddhyate 'dhunā || 213 || {13}
[Analyze grammar]

daridrakāṣṭhahāro yo bhavetso 'yaṃ hi śobhitaḥ |
anya iti na manyantavyaṃ yuṣmābhirnātra saṃśayaḥ || 214 || {14}
[Analyze grammar]

evaṃ sarvatra saṃsāre sarveṣāmapi prāṇināṃ |
yathaiva yatkṛtaṃ karma tathaiva tatphalaṃ dhruvaṃ || 215 || {15}
[Analyze grammar]

abhuktaṃ kṣīyate naiva karma kvāpi kadā cana |
anyathāpi bhavennaiva karmaphalaṃ kathaṃ cana || 216 || {16}
[Analyze grammar]

evaṃ matvātra saṃsāre sarvadā sukhavāṃchibhiḥ |
triratnabhajanaṃ kṛtvā caritavyaṃ śubhe sadā || 217 || {17}
[Analyze grammar]

ityādiṣṭaṃ munīndreṇa śrutvā te sarvasāṃghikāḥ |
sarve lokāśca saṃbodhiprāptuṃ dharmārthino 'bhavan || 218 || {18}
[Analyze grammar]

iti me guruṇākhyātaṃ śrutaṃ mayā tathocyate |
tvamapyevaṃ mahārāja saddharmanirato bhava || 219 || {19}
[Analyze grammar]

prajāścāpi mahāraja bodhayitvā prayatnataḥ |
bodhimārge 'bhisaṃsthāpya pātumarhati sarvadā || 220 || {20}
[Analyze grammar]

evaṃ kṛte mahārāja sarvatra vaḥ śubhaṃ bhavet |
kramātsaṃbodhimāsādya saṃbuddhapadamāpnuyāḥ || 221 || {21}
[Analyze grammar]

iti tenārhatākhyātaṃ śrutvāśokaḥ sa bhūmipaḥ |
tathā hīti pratijñapya prābhyanandatsa pārṣadaḥ || 222 || {22}
[Analyze grammar]

ye śraddhāḥ suprasannā idamapi manujāḥ śobhitasyāvadānaṃ |
śṛṇvanti śrāvayaṃti pramuditamanasā ye ca saṃbodhikāmāḥ |
te sarve bodhisatvāḥ sakalaguṇabhṛto bodhicaryāṃ caranto |
bhuktvā saukhyaṃ prakāmaṃ daśabalanilaye saṃprayānti pramuktvā || 223 || {23}
[Analyze grammar]