Chapter 28 - Pāñcālarāja-avadāna

śṛṇvantīdaṃ mudā ye jinavarakathitaṃ mālikasyāvadānaṃ ye cāpi śrāvayanti pramuditamanasaḥ śraddhayā bhadrakāmāḥ |
te sarve lokanāthāstrimalakalijitā bodhisatvā maheśā bhuktvā saukhyaṃ sadānte jinavaranilaye saṃprayānti prasannāḥ |
athāśoko mahīpālaḥ kṛtāṃjalipuṭo mudā |
upaguptaṃ guruṃ bhikṣuṃ natvaivaṃ punarabravīt || 1 || {1}
[Analyze grammar]

bhadanta śrotumichāmi punaranyatsubhāṣitaṃ |
tadyathā guruṇākhyātaṃ tathādeṣṭuṃ ca me 'rhati || 2 || {2}
[Analyze grammar]

iti saṃprārthite rājñā sa upagupta ātmavit |
tamaśokaṃ mahīpālaṃ samāmaṃtryaivamabravīt || 3 || {3}
[Analyze grammar]

sādhu śṛṇu mahārāja yathā me guruṇoditaṃ |
tathāhaṃ te pravakṣyāmi śrutvānumodanāṃ kuru || 4 || {4}
[Analyze grammar]

tadyathāsau jagacchāstā śākyasiṃhastathāgataḥ |
sarvajñaḥ sugato nātho dharmarājā munīśvaraḥ || 5 || {5}
[Analyze grammar]

ekasmin samaye tatra śrāvastyā bahirāśrame |
vihāre jetakodyāne vijahāra sasāṃghikaḥ || 6 || {6}
[Analyze grammar]

tadā sa bhagavāṃstatra bhikṣusaṃghaiḥ puraskṛtaḥ |
sabhāmadhyāsanāsīno dharmamādeṣṭumārabhat || 7 || {7}
[Analyze grammar]

taddharmadeśanāṃ śrotuṃ sarve lokāḥ samāgatāḥ |
devā daityāśca nāgāśca yakṣagaṃdharvakinnarāḥ || 8 || {8}
[Analyze grammar]

siddhā vidyādharāścāpi garuḍā rākṣasā api |
ṛṣayo brāhmaṇā vijñā rājānaḥ kṣatriyā api || 9 || {9}
[Analyze grammar]

vaiśyā rājakumārāśca maṃtriṇaśca mahājanāḥ |
vaṇijaḥ sārthavāhāśca gṛhasthāḥ śilpino 'pi ca || 10 || {10}
[Analyze grammar]

grāmyā jānapadāścāpi kārpaṭikādayo 'pi ca |
tīrthikā api te sarve jetārāme upāgatāḥ || 11 || {11}
[Analyze grammar]

vihāre taṃ jagannāthaṃ dṛṣṭvā sāṃjalayo mudā |
natvā pradakṣiṇīkṛtya samabhyarcya yathākramaṃ || 12 || {12}
[Analyze grammar]

tataste muditāḥ sarve parivṛtya samaṃtataḥ |
tatsaddharmāmṛtaṃ patumupatasthuḥ samāhitāḥ || 13 || {13}
[Analyze grammar]

tadā sa bhagavāndṛṣṭvā sarvānstān samupasthitān |
ādimadhyāntakalyāṇaṃ dideśa dharmamuttamaṃ || 14 || {14}
[Analyze grammar]

tatsaddharmāmṛtaṃ pītvā sarve lokāḥ prabodhitāḥ |
saṃbuddhaṃ śaraṇaṃ kṛtvā pracerurbodhisaṃvaraṃ || 15 || {15}
[Analyze grammar]

tasminnavasare tatra paṃcāla uttarādhipaḥ |
dakṣiṇādhipapaṃcālaṃ parājetumupākramat || 16 || {16}
[Analyze grammar]

tayoḥ paṃcālayo rājño viruddhāsyabhimāninoḥ |
mahāyuddhamabhūnnityaṃ parasparavighātanaṃ || 17 || {17}
[Analyze grammar]

pravarttite sadā yuddhe tayo rājño hi māninoḥ |
durbhikṣamapi tatrābhūdbahulokavighātanaṃ || 18 || {18}
[Analyze grammar]

tadā tau kṣatriyau krūrau parasparavighātinau |
viruddhamānasau vīrau vairaśāmyaṃ na jagmataḥ || 19 || {19}
[Analyze grammar]

taddṛṣṭvā nṛpatī rājā prasenajin sa kauśalaḥ |
tadvairaśamanopāyaṃ ciraṃ dhyātvā vyaciṃtayat || 20 || {20}
[Analyze grammar]

yadetau nṛpatī vīrau nityaṃ yuddhābhikāṃkṣiṇau |
saṃbodhisādhanaṃ dharmaṃ śrotuṃ naivābhivāṃchata || 21 || {21}
[Analyze grammar]

sarve 'pi maṃtriṇo 'mātyāḥ sarve lokāśca yodhinaḥ |
saṃbuddhadarśane cāpi nātrāgachanti ke cana || 22 || {22}
[Analyze grammar]

evaṃ teṣāṃ sadā nityaṃ hiṃsākarmābhirāgiṇāṃ |
saddharme śravaṇe vāpi gocaraṃ naiva vidyate || 23 || {23}
[Analyze grammar]

dharmaṃ vinātra saṃsāre kiṃ sāraṃ janma mānuṣe |
parasparaṃ nihatyaiva yāsyaṃti narake dhruvaṃ || 24 || {24}
[Analyze grammar]

dhigjanma mānuṣe teṣāṃ kevalaṃ pāpasādhanaṃ |
ye kleśamānadarpyāndhā na paśyaṃti munīśvaraṃ || 25 || {25}
[Analyze grammar]

ye cātra saugataṃ dharmaṃ na śṛṇvanti kadā cana |
kathaṃ te bhadracaryāyāṃ gocaraṃ samavāpnuyuḥ || 26 || {26}
[Analyze grammar]

sadā te māracaryāyāṃ sthitvā kleśābhimāninaḥ |
bodhicaryāṃ pratikṣipya careyuḥ kāmacāriṇaḥ || 27 || {27}
[Analyze grammar]

tataḥ svayaṃ paribhraṣṭā bhraṃśayantaḥ parānapi |
yathechayā carantaste cinuyurbahupātakaṃ || 28 || {28}
[Analyze grammar]

tataste kleśasaṃtaptāḥ svaparārthābhighātinaḥ |
tīvraduḥkhāgnisaṃtaptāḥ pateyurnarake dhruvaṃ || 29 || {29}
[Analyze grammar]

narakeṣu bhramantaste sadā duḥkhābhibhojinaḥ |
paścāttāpāgnisaṃtaptāścareyurābhavaṃ tathā || 30 || {30}
[Analyze grammar]

tadeṣāṃ sarvalokānāṃ bhadrārthaṃ hitakāraṇaṃ |
sarvathopāyamādhātumarhāmi sāṃprataṃ drutaṃ || 31 || {31}
[Analyze grammar]

yāvadetau nṛpau vīrau viruddhau nopaśāmyataḥ |
tāvadatra bhuvi kvāpi maṃgalaṃ na bhavetsadā || 32 || {32}
[Analyze grammar]

tadetau nṛpatī tāvadbodhayitvā prayatnataḥ |
maitrasnehasaṃbaddhau kuryāṃ nirvairabhāvinau || 33 || {33}
[Analyze grammar]

etau hi kṣatriyau vīrau pāṃcālau mānagarvitau |
anayormitravaṃdhaṃ ko bodhayitvā kariṣyati || 34 || {34}
[Analyze grammar]

buddha eva jagacchāstā dharmarājaḥ prabodhayan |
anayościravairyāgniṃ śamayituṃ praśaknuyāt || 35 || {35}
[Analyze grammar]

tadatra sahasā gatvā prārthayeyaṃ munīśvaraṃ |
nūnaṃ buddhānubhāvāttau nṛpau mitratvamāpsyataḥ || 36 || {36}
[Analyze grammar]

iti niścitya rājā sa prasenajitsamutthitaḥ |
vihāre sahasā gatvā nanāma taṃ munīśvaraṃ || 37 || {37}
[Analyze grammar]

tatra sa purato gatvā sāṃjaliḥ samupāśrayan |
etatsarvapravṛttāṃtaṃ nivedyaivamabhāṣata || 38 || {38}
[Analyze grammar]

bhagavannātha sarvajña vijānīyādbhavānapi |
yattau pāṃcālabhūpālau viruddhau bhavato 'dhunā || 39 || {39}
[Analyze grammar]

yadetayorviruddhe ta sarve lokā virodhitāḥ |
tadatra sarvadā yuddhaṃ pravarttate divāniśaṃ || 40 || {40}
[Analyze grammar]

tattesāṃ sarvalokānāṃ saddharme gocaraṃ kadā |
sadā yuddhābhisaktāste sādhayeyuḥ śubhaṃ kathaṃ || 41 || {41}
[Analyze grammar]

tadatra bhagavāñcchāstā bodhayaṃstau narādhipau |
saṃbodhimārgamādiśya śubhe cārayitumarhati || 42 || {42}
[Analyze grammar]

iti saṃprārthite tena rājñā sa bhagavānmuniḥ |
tasya rājñe nareṃdrasya tūṣṇībhūtvādhyuvāsa tat || 43 || {43}
[Analyze grammar]

tataḥ sa nṛpatī rājā matvā śāstrādhivāsitaṃ |
sāṃjalistaṃ muniṃ natvā muditaḥ svālayaṃ yayau || 44 || {44}
[Analyze grammar]

tataḥ sa bhagavānpātramādāya cīvarāvṛtaḥ |
bhāsayanbhadratāṃ kurvanpratasthe saha sāṃghikaiḥ || 45 || {45}
[Analyze grammar]

evaṃ sarvatra mārgeṣu bhāsayaṃ sa munīśvaraḥ |
kṛtvā bhadraṃ krameṇaivaṃ vārāṇasīmupācarat || 46 || {46}
[Analyze grammar]

tatra sa bhagavāṃ prāpto bhābhiḥ saṃbhāsayan kramāt |
caraṃ kṛtvā subhadratvaṃ mṛgadāve upācarat || 47 || {47}
[Analyze grammar]

tatra sa bhagavānprātaḥ sasaṃghaḥ saugatāśrame |
sabhāmadhyāsanāsīnaḥ saddharmaṃ samupādiśat || 48 || {48}
[Analyze grammar]

tatsaddharmāmṛtaṃ pītvā sarve lokāḥ pramoditāḥ |
triratnaṃ śaraṇaṃ kṛtvā prabhejire samādarāt || 49 || {49}
[Analyze grammar]

tadā dakṣiṇapāṃcālanṛpatiḥ sa pramoditaḥ |
saṃbuddhadarśanaṃ kartuṃ mṛgadāve upācarat || 50 || {50}
[Analyze grammar]

tatra taṃ śrīghanaṃ dṛṣṭvā nṛpatiḥ sa pramoditaḥ |
sāṃjaliḥ purato gatvā natvaikānte upāśrayat || 51 || {51}
[Analyze grammar]

tasminnavasare tatra mṛgadāve samāśritaḥ |
bhagavānniti śuśrāva pāṃcālauttarādhipaḥ || 52 || {52}
[Analyze grammar]

sa uttarapāṃcālo nṛpatiḥ pratiroṣitaḥ |
taṃ nṛpaṃ yāmyapāṃcālaṃ parājetumupācarat || 53 || {53}
[Analyze grammar]

tatra sa nṛpatirvīraścaturaṃgavalaiḥ saha |
jayavādyamahotsāhaiḥ sahasā samupācarat || 54 || {54}
[Analyze grammar]

tatra sa yāmyapāṃcālarājā taṃ ripumāgataṃ |
niśamya sahasotthāya natvā ha taṃ munīśvaraṃ || 55 || {55}
[Analyze grammar]

bhagavannātha sarvajña sa me vairā ihāgataḥ |
tadatra kiṃ kariṣyāmi tadanujñāṃ dadātu me || 56 || {56}
[Analyze grammar]

iti tena narendreṇa prārthite sa jineśvaraḥ |
dṛṣṭvā taṃ yāmyapāṃcālaṃ samāśvāsyaivamādiśat || 57 || {57}
[Analyze grammar]

nṛpate mā vibheṣī tvaṃ dhairyamālambya tiṣṭhata |
tadupāyaṃ kariṣyāmi yenāsau te vaśe caret || 58 || {58}
[Analyze grammar]

ityādiśya sa sarvajñaścaturaṅgabalānvitaṃ |
mahatsainyādhipaṃ vīraṃ nirmāya 'preṣayattataḥ || 59 || {59}
[Analyze grammar]

sa sainyādhipatirvīraścaturaṅgabalaiḥ saha |
carannuttarapāṃcālamabhiyoddhumupācarat || 60 || {60}
[Analyze grammar]

tanmahatsainyaṃ āyātaṃ samālokyābhyupadrutaṃ |
sarva uttarapāṃcālasainyā bhītāḥ parāyayuḥ || 61 || {61}
[Analyze grammar]

taddṛṣṭvottarapāṃcālanṛpatiścāpi kheṭitaḥ |
ekākī rathamāruhya bhagavatsaṃmukhe 'carat || 62 || {62}
[Analyze grammar]

tatra sa dūrato dṛṣṭvā śrīghanaṃ taṃ sabhāśritaṃ |
avatīrya rathāttatra mṛgadāve upācarat || 63 || {63}
[Analyze grammar]

tatra sa nṛpati rājā samupetya kṛtāṃjaliḥ |
tridhā pradakṣiṇīkṛtya nanāma śaraṇaṃ gataḥ || 64 || {64}
[Analyze grammar]

tataścirātsamutthāpya sa pāṃcalo narādhipaḥ |
tatsaddharmāmṛtaṃ pātuṃ tatraikānte samāśrayat || 65 || {65}
[Analyze grammar]

tadā sa bhagavāndṛṣṭvā nṛpatiṃ taṃ samāśritaṃ |
āryasatyaṃ samārabhya dideśa dharmamuttamaṃ || 66 || {66}
[Analyze grammar]

tadāryasatyamākarṇya nṛpatiḥ so 'bhibodhitaḥ |
saṃsārasādhanaṃ dharmaṃ punaḥ śrotuṃ samaichata || 67 || {67}
[Analyze grammar]

tataḥ sa nṛpatī rājā samutthāya kṛtāṃjaliḥ |
praṇatvā bhagavaṃtaṃ taṃ prārthayadevamādarāt || 68 || {68}
[Analyze grammar]

bhagavannātha sarvajña bhavatāṃ śaraṇaṃ vraje |
tanme 'trānugrahaṃ kṛtvā samyagādeṣṭumarhati || 69 || {69}
[Analyze grammar]

yadatra bhagavan satvāḥ pravarttanto bhavodadhau |
sukhaduḥkhābhibhuṃjāno bhramaṃte ṣaḍgatau kathaṃ || 70 || {70}
[Analyze grammar]

karmaṇā kena devāḥ syurmānuṣāḥ kena karmaṇā |
daityāśca karmaṇā kena tatsamyaksamupādiśa || 71 || {71}
[Analyze grammar]

tiryañcaḥ karmaṇā kena pretāśca kena karmaṇā |
nārakāḥ karmaṇā kena tatsarvaṃ samupādiśa || 72 || {72}
[Analyze grammar]

tatrāpyanekarūpāśca sarve bhinnāśayā api |
nihīnamadhyamotkṛṣṭāḥ sukhaduḥkhānvitā api || 73 || {73}
[Analyze grammar]

etatsarvaṃ samākhyāya bhavāñchāstā jagadguruḥ |
saṃsāragatisaṃcāraṃ prabodhayitumarhati || 74 || {74}
[Analyze grammar]

iti saṃprārthite tena rājñā sa bhagavān sudhīḥ |
taṃ viśuddhāśayaṃ bhūpaṃ dṛṣṭvaivaṃ samupādiśat || 75 || {75}
[Analyze grammar]

sādhu śṛṇu mahārāja saṃsāragaticāraṇaṃ |
samyagdharmaṃ pravakṣyāmi yuṣmākaṃ paribodhane || 76 || {76}
[Analyze grammar]

kāyavāgmānasaṃ karmakṛtaṃ yacca śubhāśubhaṃ |
lokastasya phalaṃ bhukte karttā nānyo 'sti kasya cit || 77 || {77}
[Analyze grammar]

iti sarve kṛpāviṣṭāstrailokye guravo jināḥ |
uktavantastathā taddhi karmaṇo yasya yatphalaṃ || 78 || {78}
[Analyze grammar]

karmaṃ kartuṃ vihātuṃ ca sadasadgatihetukaṃ |
lobhamohabhayakrodhā ye narā naraghātinaḥ || 79 || {79}
[Analyze grammar]

saṃvaddhyānyāñca hi santi saṃjīvaṃ yānti te dhruvaṃ |
saṃvatsarasahasrāṇi bahūnyapi hatāhatāḥ || 80 || {80}
[Analyze grammar]

saṃjīvanti yatastatra tena saṃjīva ucyate || 81 || {81!}
[Analyze grammar]

mātāpitṛsuhṛdvaṃdhumitradrohakarāśca ye |
paiśunyānṛtavattāraḥ kālasūtrābhigāminaḥ || 82 || {82}
[Analyze grammar]

kālasūtreṇa saṃsūḍya pāṭyante dāruvad yataḥ |
jvaladbhiḥ krakacaistatra kālasūtrastataḥ smṛtaḥ || 83 || {83}
[Analyze grammar]

dāvādau dahanairdāhaṃ dehināṃ vidadhāti ye |
sa tīvrajvalanairjantustapyate tapane raṭan || 84 || {84}
[Analyze grammar]

tīvraṃ tapanasaṃtāpaṃ tanotyeva niraṃtaraṃ |
yattato 'nvarthamāloke khyātastapanasaṃjñayā || 85 || {85}
[Analyze grammar]

dharmādharmaviparyāsaṃ nāstiko yaḥ prakāśayan |
saṃtāpayati cānyāṃśca tapyate sa pratāpane || 86 || {86}
[Analyze grammar]

pratāpayati tatrasthān satvānstīvreṇa vahninā |
tapanātiśayano 'sau proktastasmātpratāpanaḥ || 87 || {87}
[Analyze grammar]

ajaiḍakaśṛgālāṃśca śaśākhumṛgāsukarān |
anyāṃśca prāṇino ghnaṃti saṃghātaṃ yānti te narāḥ || 88 || {88}
[Analyze grammar]

saṃhatāstatra ghātyaṃte samyagvāhaiva vaṃyayaḥ |
tasmātsaṃghāta ityevaṃ vikhyāto 'nvarthasaṃjñayā || 89 || {89}
[Analyze grammar]

kāyavāgmānasaṃ tāpaṃ ye kurvantīha dehināṃ |
kaṭukyapaṭikā ye ca rauravaṃ yānti te nārāḥ || 90 || {90}
[Analyze grammar]

tīvreṇa vahninā tatra dahyamānā niraṃtaraṃ |
raudraṃ ravaṃ vimuṃcanti yatastasmātsa rauravaṃ || 91 || {91}
[Analyze grammar]

devadvijagurordravyaṃ hṛtaṃ yairduḥkhināmiha |
te mahārauravaṃ yānti ye cānyasvāpahāriṇaḥ || 92 || {92}
[Analyze grammar]

raudratvādvahnidāhasya ravasya ca mahattayā |
rauravo hi mahāṃstasya mantva rauravādapi || 93 || {93}
[Analyze grammar]

kṛtvā guṇādhike tīvramapakāraṃ nihatya ca |
mātāpitṛgurun kalpamavīcau pacyate dhruvaṃ || 94 || {94}
[Analyze grammar]

asthīnyapi viśīryante raudrāgnau tatra dehināṃ |
yato na vīciḥ saukhyasya nāvīcirudāhṛtaḥ || 95 || {95}
[Analyze grammar]

mithodroharatā ye traṇe ghnantīva dehinaḥ |
pāpādasinakhāste tu jāyante duḥkhabhāginaḥ || 96 || {96}
[Analyze grammar]

nakhā evāsayasteṣāmāyasā jvalitāḥ kharāḥ |
tairanyonyaṃ nikṛntanti yattenāsinakhāḥ smṛtāḥ || 97 || {97}
[Analyze grammar]

lohajvalitatīkṣṇāgrāḥ ṣoḍaśāṅgulakaṇṭakāḥ |
balādārohyata hraṃdan śālmalīḥ pāladārikaḥ || 98 || {98}
[Analyze grammar]

lohadamṣṭrā mahākāyā jvalitāstīvrabhairavāḥ |
aśliṣya bhakṣayantyenaṃ paradāropahāriṇaṃ || 99 || {99}
[Analyze grammar]

āraṭanto 'pi khādyante śvagṛdhrolūkavāyasaiḥ |
aśivaṃ kurvate chinnā viśvāsaghāṭino narāḥ || 100 || {100}
[Analyze grammar]

ayoguḍāni bhujyante prataptāni punaḥ punaḥ |
yāpyante kvathitaṃ tāmraṃ ye parasvāpahāriṇaḥ || 101 || {1}
[Analyze grammar]

krūraiḥ śvabhirayodraṃṣṭraiḥ kṛtyante vivaśā bhṛśaṃ |
varṣakoṭi raṭanto 'pi ye narāḥ kheṭake ratāḥ || 102 || {2}
[Analyze grammar]

matsyādīñjalajān hatvā jvalantyamradravodakāṃ |
yāti vaitaraṇīṃ śaśvadvahninā dahyate naraḥ || 103 || {3}
[Analyze grammar]

ye svārthalavasaṃmūḍho vyavahāramadhārmikaṃ |
karoti narake kradan sa cakreṇābhipīḍyate || 104 || {4}
[Analyze grammar]

pīḍā vahubhirākāraiḥ kṛtā yairduḥkhināmiha |
pīḍyante te ciraṃ taptairyatra mudgaraparvataiḥ || 105 || {5}
[Analyze grammar]

bhedakā dharmasetūnāṃ ye cāsanmārgavāhinaḥ |
kṣuradhārācitaṃ mārgaṃ gatvā krāmanti te narāḥ || 106 || {6}
[Analyze grammar]

nakhaiḥ saṃcūrṇya yūkādīñcūrṇyante meṣaparvatai |
bhūyo bhūyo mahākāyāḥ krandantaste śaracchataṃ || 107 || {7}
[Analyze grammar]

vrataṃ yastu samāśritya saṃpanno parirakṣati |
śīryamānamānsāsthiḥ kukuṃle pacyate dhruvaṃ || 108 || {8}
[Analyze grammar]

aṇunāpi hi yaḥ kaścinmithyājīvena jīvati |
bhakṣyate krimibhiścaṇḍaiḥ saṃmagno gūthamṛttike || 109 || {9}
[Analyze grammar]

dṛṣṭvāpi vrīhimadhyasthānprāṇinaścūrṇayanti ye |
āyasai mukhalaistaptaiḥ kṣobhyante te punaḥ punaḥ || 110 || {10}
[Analyze grammar]

atyantakrodhanāḥ krūrāḥ śaṭhāḥ pāpābhikāṃkṣiṇaḥ |
paravyasanakṛṣṭvā ca jāyante yamarākṣasāḥ || 111 || {11}
[Analyze grammar]

sarveṣāmeva duḥkhānāṃ vījaṃ mṛdvābhibhedataḥ |
kāyavāgmānasaṃ karma pāpaṃ yattadaṇvapi varttayet |
haṃsapārāvatādīnaṃ kharāṇāmapi rāgiṇāṃ |
yena rāgeṇa jāyante mūḍhāḥ kīṭādiyoniṣu || 112 || {1}
[Analyze grammar]

sarppāḥ krodhopanāhābhyāṃ mārastabdhā mṛgādhipāḥ |
abhimānena jāyante gadāmāśvādiyoniṣu || 113 || {2}
[Analyze grammar]

mātsaryerṣyādi doṣeṇa vānarāḥ pretadehinaḥ |
jāyante mukharā dhṛṣṭāścapalātmānaśca vāyasāḥ || 114 || {3}
[Analyze grammar]

vadhavaṃdhanamātsaryairgavāśvādiṣu dehinaḥ |
jāyante krūrakarmāṇo lūtāḥ kharjjūravṛścikaḥ || 115 || {4}
[Analyze grammar]

vyāghramārjāragomāyuṛkṣagṛdhravṛgādāyaḥ |
jāyante pretamansādoḥ krodhanā matsarā narāḥ || 116 || {5}
[Analyze grammar]

dātāraḥ krodhanāḥ krūrā narā nāgamaharddhikāḥ |
bhavāntatyāgino darppātkrodhācca garuḍeśvarāḥ || 117 || {6}
[Analyze grammar]

kṛtaṃ yatpāpakaṃ karma svayaṃ vākkāyamānasaṃ |
tiryañcastena jāyante tanmanogatimākṛthāḥ || 118 || {7}
[Analyze grammar]

bhakṣyabhojyāpahartāro ye kṣudrā dānavarji |
bhavanti kuṇapāhārāḥ pretāste kaṭapūtanāḥ || 119 || {1}
[Analyze grammar]

viheṭhayanti ye bālā vaṃcayantyapi tṛṣṇayā |
te 'pi garbhamalāhārā jāyante kaṭapūtanāḥ || 120 || {2}
[Analyze grammar]

hīnācārātidīnāśca matsarā nityakāṃkṣiṇaḥ |
jāyaṃte ye narāḥ pretā 'ṣṭāste galagaṇḍakāḥ || 121 || {3}
[Analyze grammar]

dānaṃ nivārayatyeva na hi kiṃ tiddadāti yaḥ |
kṣutkṣāmāsau mahākukṣiḥ pretaḥ śūcimukho bhavet || 122 || {4}
[Analyze grammar]

dhanaṃ rakṣati vaṃśārthe na bhuṃkte na dadāti yaḥ |
dattādāyī tataḥ pretaḥ śrāddhabhoktā sa jāyate || 123 || {5}
[Analyze grammar]

yaḥ parasvāpahārepsurdatvā caivānutapyate |
bhoktā viṭśleṣmavāntānāṃ pretya pretaḥ sa jāyate || 124 || {6}
[Analyze grammar]

apriyaṃ vakti yaḥ krodhādvākyaṃ marmavibhedataṃ |
bbavantyulkāmukhaḥ pretaḥ suciraṃ tena karmaṇā || 125 || {7}
[Analyze grammar]

kurute kalahaṃ yastu niṣkṛpaḥ krūramānasaḥ |
krimikīṭapataṅgādeḥ prete 'sau jyotiko bhavet || 126 || {8}
[Analyze grammar]

grāmakūṭau dadātyeva yo janaṃ pīḍayantyapi |
kumbhāṇḍo vikṛtākāraḥ pūyāhāraśca jāyate || 127 || {9}
[Analyze grammar]

nirdayāḥ prāṇino ghnanti bhakṣyārthaṃ ye dadantyapi |
māṃsāhārāśca te 'vaśyaṃ bhavanti pretarākṣasāḥ || 128 || {10}
[Analyze grammar]

gaṃdhamālāratā nityaṃ maṃdakrodhāḥ pradāyakāḥ |
gaṃdharvāḥ pretya jāyante devānāṃ ratihetavaḥ || 129 || {11}
[Analyze grammar]

krodhanāḥ piśunaḥ kiñcidarthārthaṃ yaḥ prayachati |
sa piśācaṃ praduṣṭātmā jāyate vikṛtānanaḥ || 130 || {12}
[Analyze grammar]

nityapraduṣṭāścapalāḥ parapīḍākarā narāḥ |
saṃpradānaratā nityaṃ bhūtāḥ pretya bhavanti te || 131 || {13}
[Analyze grammar]

krūrāḥ krūddhāḥ pradātāraḥ priyā sarvasurā ca ye |
jāyante pretya yakṣāstu krūrātmānaḥ surāpriyāḥ || 132 || {14}
[Analyze grammar]

mātāpitṛgurūnyānairye nayanti yathepsitaṃ |
vimānacāriṇo yakṣā jāyaṃte susukhānvitāḥ || 133 || {15}
[Analyze grammar]

tṛṣṇāmātsaryadoṣeṇa pretā bhavantyamī sadā |
yakṣādayaḥ śubhaiḥ kliṣṭairatastānparivarjayet || 134 || {16}
[Analyze grammar]

devāsuramanuṣyeṣu dīrghamāyurahiṃsayā |
jāyate hinsayā svalpāmato hiṃsāṃ vivarjayet || 135 || {1}
[Analyze grammar]

kuṣṭharogajvaronmādā ye cānye vyādhayo nṛṇāṃ |
bhavanti bhūtaprayukteste vadhavaṃdhanatāḍanaiḥ || 136 || {2}
[Analyze grammar]

yo na harttā parasvānāṃ na vañcavitprayachati |
mahatāpi prayatnena sa dravyaṃ nādhigachati || 137 || {3}
[Analyze grammar]

adattaṃ vittamādāya dānāni ca dadāti yaḥ |
sa pretya dravyavānbhūtvā bhūyo bhavati nirdhanaḥ || 138 || {4}
[Analyze grammar]

yo na harttā na dātā ca na cātikṛpaṇo naraḥ |
kṛtsnena mahatā dravyaṃ sthiraṃ sa labhate dhruvaṃ || 139 || {5}
[Analyze grammar]

na harttā yaḥ parasvānāṃ tyāgavān vītamatsaraḥ |
ahāryaṃ vipulaṃ vittamiṣṭam ca labhate naraḥ || 140 || {6}
[Analyze grammar]

āyurvarṇavalopetaḥ śrīmān rogavivarjitaḥ |
sukhī ca sa labhennityaṃ yo dadātīha bhojanaṃ || 141 || {7}
[Analyze grammar]

salajjo rūpavānbhogī suchāyaḥ prāṇināṃ priyaḥ |
sa bhavedvastralābhī ca yo vāsānsi prayachati || 142 || {8}
[Analyze grammar]

āvāsaṃ yo dadātīha suprasannena cetasā |
prāsādāḥ sarvakāmāśca jāyante tasya dehinaḥ || 143 || {9}
[Analyze grammar]

upānatsaṃkramādīni ye prayachanti mānavāḥ |
bhavanti sukhino nityaṃ yānāni ca labhanti te || 144 || {10}
[Analyze grammar]

vāpīkūpataḍāgādīn kārayitvā jalāśrayān |
sukhinastyaktasaṃtāpā niḥpipāsā bhavanti te || 145 || {11}
[Analyze grammar]

puṣpairabhyarcitaḥ śrīmān śaraṇyaḥ sarvadehināṃ |
samṛddhitaḥ sa syādārāmaṃ yaḥ prayachati || 146 || {12}
[Analyze grammar]

vidyādānena paṇḍityaṃ prajñābhyāsena cāpyate |
bhaiṣajyābhayadānena rogamuktastu jāyate || 147 || {13}
[Analyze grammar]

dīpadānena cakṣuṣmān vādyadānena susvaraḥ |
śayanāsanadānena sukhī bhavati mānavaḥ || 148 || {14}
[Analyze grammar]

gavādīnnyo dadātīha bhojyaṃ rasasamanvitaṃ |
balavān varṇavānbhogī dīrghāyuḥ sa bhavennaraḥ || 149 || {15}
[Analyze grammar]

kanyādānena samānyāṃ lābhī syātparivāravān |
dhanadhānyasamṛddhastu bhūmidānena jāyate || 150 || {16}
[Analyze grammar]

patraṃ puṣpaṃ phalaṃ toyamabhayaṃ vacanaṃ priyaṃ |
yad yadevepsitaṃ śaktyā dātavyaṃ tattadarthinaḥ || 151 || {17}
[Analyze grammar]

kleśayitvā dadātīha svakārthaṃ vā ha yena vā |
yaśaḥsaukhyābhilākhādvā sa kliṣṭaṃ labhate phalaṃ || 152 || {18}
[Analyze grammar]

svakāryaṃ nirapekṣeṇa kṛpāviṣṭena cetasā |
parārthaṃ yo dadātīha so 'kliṣṭaṃ phalamaśnute || 153 || {19}
[Analyze grammar]

yatkiñciddīyate 'nyasmai yathākālaṃ yathāvidhiṃ |
tena tena prakāreṇa tatsarvamupatiṣṭhate || 154 || {20}
[Analyze grammar]

parānanvapahatyevaṃ sarvakālaṃ yathepsitaṃ |
akleśayitvā dātavyaṃ hitaṃ dharmāvirodhiyat || 155 || {21}
[Analyze grammar]

evaṃ hi dīyamānasya dānasyaiva phalādayaḥ |
dānaṃ hi sarvasaukhyānāmananyatkāraṇaṃ mataṃ || 156 || {22}
[Analyze grammar]

virajaḥ paradārebhyo dārāniṣṭānavāpnuyāt |
svebhyo 'pyadeśakālau ca varjayetpuṃstvamarchati || 157 || {23}
[Analyze grammar]

paradāreṣu saṃsaktaṃ cittaṃ yo na niyachati |
anaṃgeṣu cakṣyeta sa pumāṃ strītvamarchati || 158 || {24}
[Analyze grammar]

strītvaṃ jugupsate yā tu suśīlamandarāgiṇī |
puṃstvamākāṃkṣate nityaṃ sā nārī naratāṃ vrajet || 159 || {25}
[Analyze grammar]

yastu samyagnirātaṅkaṃ brahmacaryaṃ niṣevate |
tejasvī sadguṇaḥ śrīmāndevairapi sa lakṣyate || 160 || {26}
[Analyze grammar]

dṛḍhasmṛtirasaṃmūḍho maghavāno niṣevanāt |
jāyate satyavādī ca yaśaḥsaukhyānvitaḥ pumān || 161 || {27}
[Analyze grammar]

bhinnānāmapi satvānāṃ bhedaṃ naiva karoti yaḥ |
abhedyaparivāro 'sau jāyate sthiramānasaḥ || 162 || {28}
[Analyze grammar]

yastvājñāṃ kurute nityaṃ gurūṇāṃ hṛṣṭamānasaḥ |
hitāhitābhidhāyī ca sa syādādeyavākkṛtī || 163 || {29}
[Analyze grammar]

nīcāparāyamānena viparyāsena codgataḥ |
bhavanti sukhinaḥ saukhyaṃ duḥkhaṃ datvā ca duḥkhinaḥ || 164 || {30}
[Analyze grammar]

paraprapañcābhiratāḥ śaṭhāścānṛtavādinaḥ |
kubjavāmanatāṃ yānti ye ca rūpābhimāninaḥ || 165 || {31}
[Analyze grammar]

jaḍo vijñānamātsaryādbhavenmūkaḥ priyāpriyaḥ |
vādhiryaṃ yāti mūḍhātmā hitavākyābhigūḍhakaḥ || 166 || {32}
[Analyze grammar]

duḥkham pāpasya puṇyasya sukhaṃ miśrasya miśritaṃ |
sarvaṃ sādṛśyaniḥsyandamabhyuhyaṃ karmaṇaḥ phalaṃ || 167 || {33}
[Analyze grammar]

śaṭhyena māyayā nityaṃ caratyakṛtakilbiṣaḥ |
kalipriyaḥ pradātā ca sa bhavedasureśvaraḥ || 168 || {1}
[Analyze grammar]

nātmanā yaḥ sukhākāṃkṣī na ca kṛvyeta parigrahaṃ |
grahāṇāmagraṇī cāsau mahārājikatāṃ vrajet || 169 || {1}
[Analyze grammar]

mātāpitṛkulajyeṣṭhapūjakasyāgavān kṛtī |
hṛṣyame yo na kalahaistridaśeṣu sa jāyate || 170 || {2}
[Analyze grammar]

na vigrahe ratā naiva kalahe hṛṣṭamānasāḥ |
ekāntakuśalodyuktā ye ca moyāpagāstu te || 171 || {3}
[Analyze grammar]

bahuśrutā dharmadharāḥ suprajñā mokṣakāṃkṣiṇaḥ guṇair |
ye parihṛṣṇāśca narāste tuṣitopagāḥ || 172 || {4}
[Analyze grammar]

śīlapradānavinaye pravṛttā ye svayaṃ narāḥ |
mahotsāhāśca te 'vaśyaṃ nirmāṇaratigāminaḥ || 173 || {5}
[Analyze grammar]

adīnasatvā me śreṣṭhāḥ pradāne damasaṃyamaiḥ |
guṇādhikāśca ye yānti paranirmitatāṃ dhruvaṃ || 174 || {6}
[Analyze grammar]

śīlena svargamāpnoti dhyānena ca viśeṣataḥ |
yathābhūtaparijñānātparyante vo punarbhavaḥ || 175 || {7}
[Analyze grammar]

śubhāśubhaphalaṃ karma yadetatkathitaṃ sphuṭaṃ |
śubhena labhyate saukhyaṃ duḥkhaṃ tvaśubhasaṃbhavaṃ || 176 || {8}
[Analyze grammar]

mṛtyurvyādhirjarā caiva cintanīyamidaṃ trayaṃ |
viprayogā priyaiḥ sārddhaṃ karmaṇāṃ ca svakaṃ phalaṃ || 177 || {9}
[Analyze grammar]

evaṃ virāgamāpnoti viviktaḥ puṇyamarchati |
pāpaṃ ca nārjayedevaṃ tacca saṃkṣepataḥ śṛṇu || 178 || {10}
[Analyze grammar]

samyakparārthakaraṇaṃ parānarthavivarjanaṃ |
puṇyaṃ viparyayātpāpabhuktameva munīśvaraiḥ || 179 || {11}
[Analyze grammar]

evaṃ matvā mahārāja ṣaḍgatikārikāṃ bhave |
saṃbodhidharmamādhāya caritavyaṃ sadā śubhe || 180 || {1}
[Analyze grammar]

ye saṃbodhivrataṃ dhṛtvā pracaranti samāhitāḥ |
sarvasatvahitārthena bodhisatvā bhavanti te || 181 || {2}
[Analyze grammar]

evaṃ vijñāya rājendra sadā bhadraṃ yadīchasi |
triratnaṃ śaraṇaṃ kṛtvā bhaja nityaṃ samādarāt || 182 || {3}
[Analyze grammar]

etatpuṇyavipākena sarvakleśan vinirjayan |
kramādbodhiṃ samāsādya saṃbuddhapadamāpnuyāḥ || 183 || {4}
[Analyze grammar]

iti tena munīndreṇa samākhyātaṃ niśamya saḥ |
rājāpyuttarapāṃcālaḥ pravrajituṃ samaichata || 184 || {5}
[Analyze grammar]

tataḥ sa nṛpatī rājā samutthāya kṛtāṃjaliḥ |
bhagavantamānatvā prārthayadevamādarāt || 185 || {6}
[Analyze grammar]

bhagavannātha sarvajña bhavatāṃ śaraṇaṃ gataḥ |
saṃbodhivratamādhāya prechāmi carituṃ sadā || 186 || {7}
[Analyze grammar]

yadbhavāñjagatāṃ śāstā saṃbodhidharmadeśikaḥ |
tanme 'nugrahatāṃ kṛtvā pravrajyāṃ dātumarhati || 187 || {8}
[Analyze grammar]

iti saṃprārthite tena rājñā sa bhagavān sudhīḥ |
tasya rājño manaḥśuddhaṃ vijñāyaivamupādiśat || 188 || {9}
[Analyze grammar]

sādhu rājanmahābhāga yadīchasi śubhāṃ gatiṃ |
ehi cara samādhāya cara me śāsane vrataṃ || 189 || {10}
[Analyze grammar]

ityādiśya munīndro 'sau pāṇinā tacchiraḥ spṛśan |
saṃbuddhe śāsane dharme taṃ nareṃdraṃ samagrahīt || 190 || {11}
[Analyze grammar]

ehīti tena śāstrokte nṛpatiḥ sa prabodhitaḥ |
khikkhirīpātradharo bhikṣu 'bhūccīvarāvṛtaḥ || 191 || {12}
[Analyze grammar]

tataḥ sa bhūpatiścāpi virakto bhogyanispṛhaḥ |
niḥkleśaḥ pariśuddhātmā babhūva vijiteṃdriyaḥ || 192 || {13}
[Analyze grammar]

sākṣādarhatvamāsādya brahmacārī niraṃjanaḥ |
saṃbodhipadamāsādya saṃbuddhaḥ śrāvako 'bhavat || 193 || {14}
[Analyze grammar]

tataḥ sa brahmavid yogī traidhātuvāsināmapi |
sadevāsuralokānāṃ vandyo mānyo 'bhavadguruḥ || 194 || {15}
[Analyze grammar]

tato dakṣiṇapāṃcālarājā sa pratimoditaḥ |
utthāya sāṃjalirnatvā prārthyattaṃ munīśvaraṃ || 195 || {16}
[Analyze grammar]

bhagavannātha sarvajña kṛpayā me prasīdatu |
traimāsyaṃ bhaktumichāmi tatkurutāmanugrahaṃ || 196 || {17}
[Analyze grammar]

iti saṃprārthite rājñā bhagavān sa munīśvaraḥ |
nṛpatiṃ taṃ samālokya tūṣṇībhūtvādhyuvāsa tat || 197 || {18}
[Analyze grammar]

tataḥ sa nṛpatī rājā bhagavatādhyuvāsitaṃ |
viditvā sarvasāmagrīṃ sahasā samasādhayat || 198 || {19}
[Analyze grammar]

tataḥ sa rājā bhagavaṃtaṃ sasāṃghikaṃ |
yathārhabhojanairnityaṃ samabhyarcya 'bhyatoṣayat || 199 || {20}
[Analyze grammar]

vicitracīvaraiścāpi śrīghanaṃ taṃ sasāṃghikaṃ |
āchādya sāṃjalirnatvā praṇidhānaṃ mudā vyadhāt || 200 || {21}
[Analyze grammar]

etatpuṇyavipākena loke 'ṃdhe 'parināyake |
saddharmabhāskaraḥ śāstā saṃbuddho 'rhaṃ bhaveya hi || 201 || {22}
[Analyze grammar]

evaṃ tena narendreṇa praṇidhānaṃ kṛtaṃ mudā |
matvā sa bhagavān smitaṃ prāmuñcacchubharociṣaṃ || 202 || {23}
[Analyze grammar]

tatsmitasamutpannāḥ paṃcavarṇāḥ suraśmayaḥ |
prasāritāstrilokeṣu bhāsayantyaḥ pracerire || 203 || {24}
[Analyze grammar]

tadrasmisaṃparispṛṣṭāḥ sarve 'pi nārakāśritāḥ |
nirmuktavedanākhedā mahatsaukhyaṃ pralebhire || 204 || {25}
[Analyze grammar]

tadā te vismitāḥ sarve nārakīyāḥ pramoditāḥ |
kimevaṃ jāyate saukhyamiti dhyātvā niṣedire || 205 || {26}
[Analyze grammar]

tataḥ sa bhagavāṃsteṣāṃ vismayākrāṃtacetasāṃ |
manāṃsi paribodhārthaṃ praiṣayattatra nairmitaṃ || 206 || {27}
[Analyze grammar]

tadā te nārakāḥ sarve dṛṣṭvā taṃ sugataṃ mudā |
upetya praṇatiṃ kṛtvā prābhajañcharaṇaṃ gatāḥ || 207 || {28}
[Analyze grammar]

tatastatpuṇyaliptāste sarve vimuktapāpakāḥ |
pariśuddhāḥ śubhātmānaḥ sadgatiṃ samupāyayuḥ || 208 || {29}
[Analyze grammar]

tatastā raśmayaḥ sarvā avabhāsya samaṃtataḥ |
akaniṣṭhālayaṃ yāvatprasṛtāḥ samabhāsayan || 209 || {30}
[Analyze grammar]

gāthāghoṣaiśca sarvatra sarvāndevānpramodinaḥ |
bodhayitvā śubhe dharme pratiṣṭhāpya pacerire || 210 || {31}
[Analyze grammar]

tatastā raśmayaḥ sarvā piṇḍībhūtā muneḥ puraḥ |
tridhā pradakṣiṇīkṛtvā mahoṣṇīṣe samāviśat || 211 || {32}
[Analyze grammar]

taddṛṣṭvā te sabhālokāḥ sarve 'tivismayoddhatāḥ |
śāstā kimādiśeddharmamiti dhyātvā niṣedire || 212 || {33}
[Analyze grammar]

iti teṣāṃ manastarkaṃ matvānaṃdaḥ samutthitaḥ |
upetya sāṃjalirnatvā prārthayettaṃ munīśvaraṃ || 213 || {34}
[Analyze grammar]

bhagavan hetunā kena smitaṃ muṃcati sāṃprataṃ |
nāhetvapratyayaṃ smitaṃ na muṃcaṃti munīśvarāḥ || 214 || {35}
[Analyze grammar]

tad yadarthe bhavān smitaṃ muṃcatīme sabhājanāḥ |
śrotumichaṃti sarve tadarthamādeṣṭumarhati || 215 || {36}
[Analyze grammar]

ityānaṃdoditaṃ śrutvā bhagavān sa jagadguruḥ |
sarvāṃl lokān samālokya tamānaṃdaṃ samabravīt || 216 || {37}
[Analyze grammar]

evameva sadānaṃda sarve buddhā munīśvarāḥ |
nāhetupratyayaṃ smitaṃ vimuṃcanti kadā cana || 217 || {38}
[Analyze grammar]

paśyatāmayamānaṃda rājātisaṃprasāditaḥ |
satkṛtya śraddhayāsmākaṃ traimāsyaṃ bhajate mudā || 218 || {39}
[Analyze grammar]

etatpuṇyavipākena rājāyaṃ sadguṇākaraḥ |
kramātpāramitāḥ sarvāḥ paripūrya balānvitaḥ || 219 || {40}
[Analyze grammar]

sarvakleśagaṇāñjitvā mārāñcāpi vinirjayan |
bodhimāsādya sarvajñastathāgato munīśvaraḥ || 220 || {41}
[Analyze grammar]

sarvavidyādhipaḥ śāstā dharmarājo vināyakaḥ |
vijayo nāma saṃbuddho bhaviṣyati bhavāntare || 221 || {42}
[Analyze grammar]

evamānaṃda vijñāya buddhakṣetraśubhaṃkṛtaṃ |
tadvipāke mahatsaukhyaṃ bhadraṃ saṃbodhisādhanaṃ || 222 || {43}
[Analyze grammar]

triratnaśaraṇaṃ kṛtvā satkāraiḥ śraddhayā sadā |
saṃbodhivāñchibhirlokaiścaritavyaṃ śubhe mudā || 223 || {44}
[Analyze grammar]

ityādiṣṭaṃ munīndreṇa śrutvānaṃdādayo 'pi te |
sarve lokāstathetyuktvā prābhyanandanprasāditāḥ || 224 || {45}
[Analyze grammar]

so 'pi dakṣiṇapāṃcālo rājā śrutvā pramoditaḥ |
triratnabhajanaṃ kṛtvā pracacāra śubhe sadā || 225 || {46}
[Analyze grammar]

tadārabhya sadā tatra maṃgalaṃ nirupadravaṃ |
samaṃtato mahotsāhaṃ kṛtayuga ivābhavat || 226 || {47}
[Analyze grammar]

iti me guruṇākhyātaṃ śrutaṃ mayā tathā 'dhunā |
kathyate 'tra tvayāpyevaṃ caritavyaṃ śubhe sadā || 227 || {48}
[Analyze grammar]

prajāścāpi mahārāja bodhayitvā prayatnataḥ |
bodhimārge pratiṣṭhāpya pālanīyāḥ sadā tvayā || 228 || {49}
[Analyze grammar]

tathā te sarvadā bhadraṃ sarvatrāpi bhaveddhruvaṃ |
kramādbodhiṃ samāsādya saṃbuddhapadamāpnuyāḥ || 229 || {50}
[Analyze grammar]

iti tenārhatādiṣṭaṃ śrutvāśokaḥ sa bhūmipaḥ |
tathetyabhyanumoditvā prābhyanandatsapārṣadaḥ || 230 || {51}
[Analyze grammar]

rājño pāñcālayoryanmunikathitamidaṃ tatprasiddhāvadānaṃ |
śṛṇvanti śrāvayanti pramuditamanasaḥ śraddhayā ye prasannāḥ |
sarve te bodhisatvāḥ sakalaguṇadharāḥ sarvasaṃpatsukhāḍhyāḥ |
kṛtvā lokeṣu bhaddraṃ munivaranilaye saṃprayānti pramodāḥ || 231 || {52}
[Analyze grammar]