Chapter 6 - Sūkarī-avadāna

punarevaṃ yatīśo 'sāv upagupto jināṃśajaḥ |
triratnasmṛtijaṃ puṇyaṃ khyātuṃ nṛpamabravīt || 1 || {1}
[Analyze grammar]

mahatpuṇyānubhāvatvaṃ triratnasmṛtisaṃbhavaṃ |
tadahaṃ te pravakṣyāmi śṛṇu rājan samāhitaḥ || 2 || {2}
[Analyze grammar]

dharmatā khalu devānāṃ svargacyavanadharmmiṇāṃ |
paṃcapūrvanimittāni prādurbhaveyurātmani || 3 || {3}
[Analyze grammar]

akliṣṭāni hi vāsāṃsi kliśyeyuścyavanāntike |
amlānāni ca mālyāni mlāyeran sahasā khalu || 4 || {4}
[Analyze grammar]

daurgandhaṃ niḥsareddehātkakṣābhyāṃ sveda udbhavet |
pracyutisamaye prāpte svāsane na dhṛtiṃ labhet || 5 || {5}
[Analyze grammar]

etatpaṃcanimittāni svargāccyavanadharmiṇāṃ |
sarveṣāṃ prodbhaveyuśca pracyutisamayāgame || 6 || {6}
[Analyze grammar]

puraikadevaputrasya tathā cyavanadharmiṇaḥ |
etatpaṃcanimittāni prādurāsaṃścyuteḥ puraḥ || 7 || {7}
[Analyze grammar]

atha cyavanadharmāsau devaputro viṣāditaḥ |
avaśyaṃ cyavanaṃ svargānmatvā rautsīdadhīritaḥ || 8 || {8}
[Analyze grammar]

āvartya svavimānasthaḥ parivarttya vimūrchitaḥ |
punaścaitanyamāsādya vilapaṃ paryadevataḥ || 9 || {9}
[Analyze grammar]

hā mandākini hemāvjavyāpte puṇyāmbuvāhini |
tvayi snātvapyahaṃ cyutvā yāsyāmi durgatiṃ kathaṃ || 10 || {10}
[Analyze grammar]

hā caitrarathamutsṛjya kva krīḍeyaṃ yathechayā |
hā nandanavanaṃ ramyaṃ tyaktvāhaṃ kva rameya ca || 11 || {11}
[Analyze grammar]

hā miśrikāvanaṃ divyaṃ tyaktvā ramye kuhādhunā |
hā pāruṣyavanaṃ tyaktvā kva ramyāmyapsarogaṇaiḥ || 12 || {12}
[Analyze grammar]

kva sukhaṃ lapsyate pāṇḍukaṃvalakaśilāṃ vinā |
hā devasamitiṃ tyaktvā kva śroṣyāmi subhāṣitāṃ || 13 || {13}
[Analyze grammar]

hā hā sudarśanaṃ ramyaṃ puraṃ tyaktvā vraje cyutaḥ |
prāsādaṃ vaijayaṃtañca kadā drakṣyāmyahaṃ punaḥ || 14 || {14}
[Analyze grammar]

hā śakrapramukhairdevaiḥ sārddhaṃ kṛdāpramoditaḥ |
adhunā me kva tatsaukhyaṃ śrotuṃ cāpi na lapsyate || 15 || {15}
[Analyze grammar]

hā devyamamṛtaṃ tyaktvā kiṃ prabhokṣyāmi sāṃprataṃ |
divyakāmasukhaṃ bhuktvā punardurgatimāśrayan || 16 || {16}
[Analyze grammar]

kiyadduḥkhaṃ ca saṃbhoktuṃ yāsyāmi narakeṣvahaṃ |
etaddivyamahotsāhādbhraṣṭo 'haṃ narake gataḥ || 17 || {17}
[Analyze grammar]

mahadduḥkhābhisaṃtaptaḥ sahiṣyāmi kathaṃ tadā |
hā hato 'smi svapāpena kiṃ pāpaṃ prakṛtaṃ mayā || 18 || {18}
[Analyze grammar]

yenetaḥ svargataścyutvā punaryāsyāmi nārakān kiṃ |
upāyaṃ kariṣyāmi na yāyāṃ yena durgatiṃ || 19 || {19}
[Analyze grammar]

ko me śāstātra vidyeta yo māṃ dharme niyojayet |
dharmeṇa rakṣyate prāṇī narake saṃsthito 'pi ca || 20 || {20}
[Analyze grammar]

dharmaṃ vinātra devo 'pi svargātprabhransyate punaḥ |
kiṃ karomi kva yāsyāmi nātropāyaṃ tu manyate || 21 || {21}
[Analyze grammar]

sarvathāhamitaścyutvā gacheyaṃ durgatiṃ khalu |
itaścyutasya me janma labdhavyaṃ bhuvane kuha || 22 || {22}
[Analyze grammar]

iti dhairyaṃ samādhāya manasaivaṃ vyalokayat |
cyutvetaḥ saukaraṃ janma prāptavyaṃ saptame dine || 23 || {23}
[Analyze grammar]

evaṃ svāptagatiṃ dṛṣṭvā papāta savimūrchitaḥ |
athādrākṣīnmahendrastaṃ patitaṃ bhuvi mūrchitaṃ || 24 || {24}
[Analyze grammar]

dṛṣṭvā ca sahasopetya sudhāsekairasiṃcayat |
tato 'sau cetanāṃ labdhvā śanairutthāya taṃ prabhuṃ || 25 || {25}
[Analyze grammar]

dṛṣṭvā pādau pariṣvajya natvaivaṃ prārthayad rudan |
hā hā nātha mahendro 'si sarvalokādhipaḥ prabhuḥ || 26 || {26}
[Analyze grammar]

māmadhaḥ patitaṃ dṛṣṭvā nopekṣāṃ kartumarhasi |
bhavān hi jagatāṃ rājā svāmī bharttā patiḥ prabhuḥ || 27 || {27}
[Analyze grammar]

nātho dharmānuśāstā ca tanmāṃ rakṣatumarhasi |
tvadṛte 'nyo na me kaścid rakṣako vidyate 'tra hi || 28 || {28}
[Analyze grammar]

tadanukaṃpayā dṛṣṭyā dhṛtvā māmuddhara prabho |
yadi māṃ rakṣituṃ nātha na śaknoti bhavānapi || 29 || {29}
[Analyze grammar]

ko māṃ samuddharedanyo hā hato narake vraje |
maṃḍākinyāṃ tvayā sārddhaṃ snātvā pūtātmako 'pyahaṃ || 30 || {30}
[Analyze grammar]

kathaṃ ca narake gatvā vaseyamaśuciṃ caran |
sahāpsarogaṇairnityaṃ caritvā naṃdane vane || 31 || {31}
[Analyze grammar]

divyasaṃgītivādyaiśca ramāmi saṃpramoditaḥ |
adyetaḥ patito pṛthvyāṃ rājagṛhopajāṃgale || 32 || {32}
[Analyze grammar]

saukaraṃ janma lapsyāmi saptame divase khalu |
tatra mūtrapuriṣādīnamedhyānapi kṛcchrataḥ || 33 || {33}
[Analyze grammar]

labdhvā bhuktvā cariṣyāmi vyādhasaṃghairupadrutaḥ |
bahuvarṣasahasrāṇi bhūtvaivaṃ sūkarātmajaḥ || 34 || {34}
[Analyze grammar]

amedhyakardame nityaṃ vatsyāmyāvartya saṃcaran |
evaṃ divyāmṛtaṃ bhuktvā ramitvā bhavatā saha || 35 || {35}
[Analyze grammar]

kathaṃ hi nārake gatvā bhokṣye 'medhyāni saṃcaraḥ |
imaṃ kalpataruṃ tyaktvā yathepsitaphalapradaṃ || 36 || {36}
[Analyze grammar]

jāṃgalaṃ vṛkṣamāśritya sthito bhokṣyāmi kiṃ tadā |
sarvathāhaṃ cyuto 'smītaḥ prerito hi svakarmaṇā || 37 || {37}
[Analyze grammar]

vividhāni ca duḥkhāni bhoktuṃ yāsyāmi nārake |
tadupāyaṃ pradātavyaṃ bhavatā me 'nukaṃpinā || 38 || {38}
[Analyze grammar]

yenāśu durgatermuktaḥ prāgacheyaṃ ca svargatiṃ |
sarvathā rakṣa māṃ nātha yadyasti te kṛpā mayi || 39 || {39}
[Analyze grammar]

bhavānmāṃ patitaṃ dṛṣṭvā nopekṣāṃ kartumarhati |
bhavāneva jagacchāstā sarvalokādhipaḥ prabhuḥ || 40 || {40}
[Analyze grammar]

tadāśu māṃ prayatnena samuddhartuṃ samarhati |
idaṃ te darśanaṃ nātha paścimaṃ me bhavetkhalu || 41 || {41}
[Analyze grammar]

janmaśatasahasraiśca durlabhaṃ syāddhi saṃgamaṃ |
ityevaṃ vilapaṃ devaputrassa taṃ surādhipaṃ || 42 || {42}
[Analyze grammar]

natvā pādau nirīkṣyaiva tasthāvaśrugalanmukhaḥ |
atha śakraḥ surendro 'sau dṛṣṭvaivaṃ pravilāpitaṃ || 43 || {43}
[Analyze grammar]

kāruṇyā krāntacittastamāśvāsayannabhāṣata |
mā kṛthā rodanaṃ bhadra samāśvasi hi dhīraya || 44 || {44}
[Analyze grammar]

kriyante kiṃ prayatnāni sarvathā maraṇaṃ dhruvaṃ |
mṛtyurmahāvaliṣṭho hi sarvasatvāntakārakaḥ || 45 || {45}
[Analyze grammar]

hrīyante mṛtyunā sarve mṛtyuḥ kena nihanyate |
anirvāyo hi sarvatra sarvatraidhātukeṣvapi || 46 || {46}
[Analyze grammar]

sarveṣāmapi jantūnāmekānte maraṇaṃ dhruvaṃ |
tasmānmā bhestathā mṛtyoḥ kiṃ viṣādena sidhyate || 47 || {47}
[Analyze grammar]

taddhairyataiḥ samālaṃvya triratnaṃ śaraṇaṃ vraja |
gatvā ca śaraṇaṃ teṣāṃ smara nityaṃ samāhitaḥ || 48 || {48}
[Analyze grammar]

tatastvaṃ durgatiṃ muktvā sadgatiṃ samavāpnuyāḥ |
etadeva hi saṃsāre mahopāyaṃ śubhāptaye || 49 || {49}
[Analyze grammar]

nānyaddhi vidyate kiṃcinmṛtyau sādhāraṇe dhruve |
tadanyaccetanāṃ hitvā triratnānyabhisaṃsmaran || 50 || {50}
[Analyze grammar]

namo buddhāya dharmāya saṃghāyeti vadanbhaja |
ye triratnasmṛtiṃ dhṛtvā mṛtāste puṇyabhāginaḥ || 51 || {51}
[Analyze grammar]

kramādbodhicarīṃ prāpya yāyuścānte sukhavatīṃ |
tvaṃ cāpi triratnānaṃ smṛtvā mṛtaḥ supuṇyadhṛk || 52 || {52}
[Analyze grammar]

kramādbodhicarīṃ prāpya saṃprayāyāḥ sukhāvatīṃ |
itīndreṇa samādiṣṭaṃ śrutvā devasuto 'tha saḥ || 53 || {53}
[Analyze grammar]

tathetyanusaṃmodya punarnatvaivamabravīt |
adyārabhya mahendrāhaṃ triratnānaṃ sadā smaran || 54 || {54}
[Analyze grammar]

gatvā ca śaraṇaṃ teṣāṃ upāsako bhave khalu |
ityuktvā sa mahendrasya puraḥ sthitvā kṛtāñjaliḥ || 55 || {55}
[Analyze grammar]

anusmṛtya triratnānāṃ namaskṛtimudāharat |
namo buddhāya bhadrāya namo dharmāya tāyine || 56 || {56}
[Analyze grammar]

namaḥ saṃghāya nāthāya sarvadāpi name bhaje |
adyārabhya triratnānāṃ sadāhaṃ śaraṇaṃ vraje || 57 || {57}
[Analyze grammar]

upāsako bhavennityaṃ namāmi satataṃ smaret |
ityuktvā devaputro 'sau kāladharmayutaścyutaḥ || 58 || {58}
[Analyze grammar]

tuṣite devaloke 'bhūdupapannaḥ supuṇyataḥ |
dharmatā khalu devānāṃ ye devāḥ svargataścyutāḥ || 59 || {59}
[Analyze grammar]

te 'dholokeṣu gacheyurna tūrddhvabhuvaneṣu hi |
atha śakro narendro 'sau dṛṣṭvā taṃ svargataścyutaṃ || 60 || {60}
[Analyze grammar]

kutrāsau labhate janma ityadhastādvyalokayat |
kimasau sūkarīgarbha utpanno vā na veti ca || 61 || {61}
[Analyze grammar]

apaśyatsarvataścainaṃ na dadarśa kuhāpi sa |
tato 'sau vismitaḥ śakro divyena cakṣuṣā punaḥ || 62 || {62}
[Analyze grammar]

kutrāsau labhate janma ityevaṃ samalokayat |
vata tiryakṣu jāto 'sau preteṣu ca prajāyate || 63 || {63}
[Analyze grammar]

atha narakeṣu vā jāta ityevaṃ samalokayat |
teṣu triṣvapyapāyeṣu nādrākṣīttaṃ samaṃtataḥ || 64 || {64}
[Analyze grammar]

tato manuṣyalokeṣu jāto veti dadarśa ca |
tatrāpi ca sa sarvatra nādrākṣīttaṃ sureśvaraḥ || 65 || {65}
[Analyze grammar]

tataścaturmahārājabhuvaneṣu prajāyate |
iti teṣu ca sarvatra vilokayandadarśa na || 66 || {66}
[Analyze grammar]

tataśca vismitaḥ śakrastrayastriṃśe vyalokayan |
tatrāpi taṃ na cādrākṣītkutrāpi ca samaṃtataḥ |
evaṃ sarvatra lokeṣu vilokayaṃstadudbhavaṃ |
adṛṣṭvā vismitaḥ śakraḥ punarevaṃ vyaciṃtayat |
aho vata mahāścaryaṃ yanmayāpi na dṛśyate || 67 || {67}
[Analyze grammar]

kutrāsau jāyate nūnaṃ na manye tatpravṛttitāṃ |
ko nu jñāsyati tadvṛttiṃ buddhādanyo na kaścana || 68 || {68}
[Analyze grammar]

buddha eva jagaddarśī ṣaḍabhijñastrikālavit |
tasmādahamito gatvā saṃbuddhe samupācaran || 69 || {69}
[Analyze grammar]

vijñapyaivaṃ ca tadvṛttiṃ praṣṭumarhāmi sāṃprātaṃ |
ityevaṃ manasā dhyātvā devendro 'sau savismayaḥ || 70 || {70}
[Analyze grammar]

sahasā jetakāraṇye jināśramamavātarat |
tatrāsau sugataṃ dṛṣṭvā saharṣavismayānvitaḥ || 71 || {71}
[Analyze grammar]

praṇamya purataḥ sthitvā kṛtāṃjalipuṭo 'vadat |
bhagavaṃstadvijānīyā yadihāhamupāgataḥ || 72 || {72}
[Analyze grammar]

tathāpi praṣṭumichāmi tatsamādeṣṭumarhasi |
ekaḥ kālagato devaputraḥ svargāccyuto gataḥ || 73 || {73}
[Analyze grammar]

ṣaṭsu lokeṣu sarvatra dṛśyate na mayā hyasau |
kutrāsau jāyate śāstarmayā na dṛśyate kvacit || 74 || {74}
[Analyze grammar]

tasyotpattiḥ kuha sthāne tatsamādeṣṭumarhasi |
itīndravacanaiḥ śrutvā sa saṃbuddho munīśvaraḥ || 75 || {75}
[Analyze grammar]

tasya puṇyātmanaḥ sthānaṃ iṃdrāya samacakṣatac |
kauśika tuṣito nāma lokadhātuḥ prasiddhitaḥ || 76 || {76}
[Analyze grammar]

tatrāsau modate devo gatvā triśaraṇaṃ cyutaḥ |
ityādiṣṭaṃa munīndreṇa śrutvā sa tridaśādhipaḥ || 77 || {77}
[Analyze grammar]

vismitaḥ suprasannātmā praṇatvaivaṃmudānayat |
aho buddhamaho dharmamaho saṃghaṃ śubhaṃkaraṃ || 78 || {78}
[Analyze grammar]

yatsaṃśaraṇamātre 'pi satvā yānti śubhālayaṃ |
ye buddhaṃ śaraṇaṃ yānti na te gachaṃti durgatiṃ || 79 || {79}
[Analyze grammar]

prahāya pātakān sarvāndivyalokamupāsate |
ye dharmaṃ śaraṇaṃ yānti na te gachaṃti durgatiṃ |
prahāya mānuṣān kāyāndivyān kāyānupāsate || 80 || {80}
[Analyze grammar]

ye saṃghaṃ śaraṇaṃ yānti na te gachanti durgatiṃ |
prahāya sarvaduḥkhāni divyasaukhyānyupāsate || 81 || {81}
[Analyze grammar]

dhanyāste puruṣā bhadrāḥ saṃbodhipadagāminaḥ |
ye saṃsmṛtvā triratnāni vrajanti maraṇaṃ dhruvaṃ || 82 || {82}
[Analyze grammar]

athāsau bhagavāñchrutvā śakreṇaivaṃ subhāṣitaṃ |
tathānuvarṇayanprāha kauśikaṃ taṃ surādhipaṃ || 83 || {83}
[Analyze grammar]

evametaddhi devendra yathaivaṃ tvaṃ prabhāṣase |
dhanyāste puruṣā bhadrā triratnaṃ bhajaṃti ye || 84 || {84}
[Analyze grammar]

ye buddhaṃ śaraṇaṃ yānti na te gachanti durgatiṃ |
kleśavairīṃ vinirjitya saṃbodhiṃ samavāpnuyuḥ || 85 || {85}
[Analyze grammar]

ye dharmaṃ śaraṇaṃ yānti na te gachanti durgatiṃ |
māradharmavinirmuktā bodhidharmānavāpnuyuḥ |
ye saṃghaṃ śaraṇaṃ yāṃti na te gachaṃti durgatiṃ |
pātakebhyo vinirmuktāḥ saṃprayānti sukhāvatīṃ || 86 || {86}
[Analyze grammar]

na bhajanti munīndraṃ ye te bhramaṃti bhavārṇave |
saṃbodhimārgato bhraṣṭā naṣṭā gachanti durgatiṃ || 87 || {87}
[Analyze grammar]

ye śṛṇvaṃti na saddharmaṃ te kleśaparidāhitāḥ |
māradharmaratā duṣṭāḥ praṇaṣṭā yāṃti durgatiṃ |
na mānayaṃti ye saṃghaṃ na te jānaṃti sadgatiṃ |
sadā duḥkhābhisaṃtaptā bhraṣṭā gachaṃti durgatiṃ |
nindanti ye triratnāni te duṣṭā mārapākṣikāḥ |
naiva caraṃti sanmārge vinaṣṭā yaṃti durgatiṃ |
tasmād ye mānavāḥ santo vāṃchanti sadgatiṃ sadā |
taiḥ saṃsmṛtvā triratnānāṃ karttavyaṃ śaraṇaṃ mudā || 88 || {88}
[Analyze grammar]

ye smaranti triratnānāṃ na te gachaṃti durgatiṃ |
prahāya pātakān sarvāñ śīghraṃ yānti sukhāvatīṃ || 89 || {89}
[Analyze grammar]

sukhāvatyāṃ jinendrasya dharmaṃ śrutvānumoditāḥ |
bodhicittaṃ samāsādya caranti bodhicārikāṃ || 90 || {90}
[Analyze grammar]

tatastāḥ kramataḥ pūrya saṃvṛttipāramāgatāḥ |
paramārthacarīṃ prāpya nirvṛttiṃ samavāpnuyuḥ || 91 || {91}
[Analyze grammar]

idaṃ hi bodhimārgānāṃ vījaṃ vijñāya kauśika |
triratnasmaraṇaṃ nityaṃ karttavyaṃ bodhivāṃchibhiḥ || 92 || {92}
[Analyze grammar]

kadāpi naiva moktavyaṃ triratnasmaraṇaṃ sadā |
gatvā ca śaraṇaṃ teṣāṃ triratnānāṃ samācara || 93 || {93}
[Analyze grammar]

evaṃ tena munīndreṇa samādiṣṭaṃ sa kauśikaḥ |
śrutvaivamityanujñāya prābhyanandatprasāditaḥ || 94 || {94}
[Analyze grammar]

tato 'sau bhagavantaṃ taṃ natvā sa racitāṃjaliḥ |
tridhā pradakṣiṇīkṛtya punarnatvā divaṃ yayau || 95 || {95}
[Analyze grammar]

tato devapure gatvā sudharmamaṃdire sthitaḥ |
devalokān samāmaṃtrya tatpravṛttaṃ samabravīt || 96 || {96}
[Analyze grammar]

bho bho devagaṇāḥ sarve śṛṇudhvaṃ tatsamāhitaḥ |
yadadbhutaṃ mahāpuṇyaṃ saṃbodhihetumucyate || 97 || {97}
[Analyze grammar]

dharmatā khalu devānāṃ ye ye devā hi nākataḥ |
cyutāste te prayāntyadho na tūrddhvaṃ yānti ke cana || 98 || {98}
[Analyze grammar]

idānīṃ tu vrajeyuste ye devāḥ svargataścyutāḥ |
triratnaśaraṇaṃ kṛtvorddhvagatiṃ na tvadhogatiṃ || 99 || {99}
[Analyze grammar]

dṛśyatāmamuko devaputrastriśaraṇaṃ gataḥ |
svargāccyutvā samutpannastuṣite 'sau pramodate || 100 || {100}
[Analyze grammar]

yūyamapi ca taddṛṣṭvā triratnānāṃ samāhitāḥ |
gatvā ca śaraṇaṃ nityaṃ smṛtvā bhajadhvamādarāt || 101 || {1}
[Analyze grammar]

tato yūyaṃ na yāyāta durgatiṣu kadā cana |
sadā divyasukhaṃ bhuktvā prayāsyatha sukhāvatīṃ || 102 || {2}
[Analyze grammar]

ye buddhe śaraṇaṃ yāṃti na te gachanti durgatiṃ |
kleśavairān vinirjitya saṃbodhipadamāpnuyuḥ || 103 || {3}
[Analyze grammar]

ye dharme śaraṇaṃ yānti na te gachanti durgatiṃ |
māradharmavinirmuktā buddhadharmāṇyavāpnuiyuḥ || 104 || {4}
[Analyze grammar]

ye saṃghe śaraṇaṃ gatvā na te gachanti durgatiṃ |
sarvapātakanirmuktā prayāsyaṃti sukhāvatīṃ || 105 || {5}
[Analyze grammar]

na bhajanti triratnaṃ ye te bhramanti bhavārṇave |
saddharmanindakā bhraṣṭā naṣṭā gachanti durgatiṃ || 106 || {6}
[Analyze grammar]

durgatiṣu bhramaṃtaste duḥkhāni vividhāni ca |
bhuktvā caranti duṣṭāṃśā naiva gachaṃti sadgatiṃ || 107 || {7}
[Analyze grammar]

tadduḥkhaṃ hātumichaṃti sukhaṃ prāptuṃ ca ye sadā |
te triratnaṃ sadā smṛtvā bhajaṃtāṃ śaraṇaṃ gatāḥ || 108 || {8}
[Analyze grammar]

tato vo maṃgalaṃ nityaṃ naiva yāyāta durgatiṃ |
sadgatimeva yāyāta saṃbodhimapi lapsyatha || 109 || {9}
[Analyze grammar]

iti tena surendreṇa samādiṣṭaṃ hitārthinā |
śru tadā sarve 'pi devāśca triratnaṃ śaraṇaṃ gatāḥ |
sarvadānusmarantaśca satkṛtyaivaṃ prabhejire || 111 || {11}
[Analyze grammar]

evaṃ devāstadā ye ye triratnaśaraṇaṃ gatāḥ |
te te svargādapi cyutvā naivāgachannadhogatiṃ || 112 || {12}
[Analyze grammar]

tata ūrddhvaṃ samudgamya prāgachaṃstuṣitālaye |
triratnaśaraṇaṃ yātā maitreyaṃ samupāśrayan || 113 || {13}
[Analyze grammar]

tathā śakraśca tān sarvānmaitreyasamupāśritān |
dṛṣṭvānumodanāṃ kurvanprābhyanandatsuraiḥ saha || 114 || {14}
[Analyze grammar]

iti me guruṇā khyātaṃ tathā te vakṣyate mayā |
evaṃ matvā mahārāja triratnaśaraṇaṃ vraja || 115 || {15}
[Analyze grammar]

tataste maṃgalaṃ nityaṃ sarvatrāpi bhaveddhruvaṃ |
kramādbodhicarīḥ prāpya saṃbodhipadamāpnuyāḥ || 116 || {16}
[Analyze grammar]

prajāścāpi mahārāja bodhayitvā prayatnataḥ |
triratnaśaraṇe sthāpya tvayā dharmapravṛddhaye || 117 || {17}
[Analyze grammar]

ityevamupaguptena samādiṣṭaṃ subhāṣitaṃ |
śrutvā rājā tathetyevaṃ prānvamodatsapārṣadaḥ || 118 || {18}
[Analyze grammar]

ye puṇyaprāptukāmāstadidamavirataṃ sūkarīkāvadānaṃ |
śṛṇvanti śravayanti pramuditamanasā durgatiṃ te na yānti |
nirjitya kleśasaṃghāṃstriguṇahitakarā bodhicaryānuraktā |
maitreyaṃ bodhisatvaṃ tuṣitabhuvanāgāḥ saṃbhajanti prakāmaṃ || 119 || {19}
[Analyze grammar]