Ratnamalavadana [sanskrit]

83,177 words | ISBN-10: 8172702957 | ISBN-13: 9788172702953

The Sanskrit edition of the Ratnamalavadana: a collection of Buddhist stories (avadana) belonging to the Mahayana tradition. Literally, “a garland of precious gems” or “a collection of edifying tales”, these 38 stories revolve around king Ashoka and the monk Upagupta. Original titles: Ratnamālāvadāna (रत्नमालावदान), Ratnamālā-āvadāna (रत्नमाला-आवदान, Ratnamala-avadana)

Chapter 5 - Śālapuṣpa-avadāna

athāśoko mahīpālo bhūyaḥ śrotuṃ subhāsitaiḥ |
upaguptaṃ guruṃ natvā kṛtāṃjaliravocat || 1 || {1}
[Analyze grammar]

bhadanta śrotumichāmi punaranyatsubhāṣitaṃ |
tadarhasi samādeṣṭuṃ lokānāṃ puṇyavṛddhaye || 2 || {2}
[Analyze grammar]

iti vijñāpite tena nṛpendreṇa prasādinā |
upagupto yatiścāpi taṃ nṛpaṃ pratyabhāṣata || 3 || {3}
[Analyze grammar]

śṛṇu rājanmahābhāga sarvalokahitārthabhṛt |
yathā me guruṇādiṣṭaṃ vakṣye 'haṃ te tathā khalu || 4 || {4}
[Analyze grammar]

puraikasamaye buddho bhagavāñchrīghano jinaḥ |
śrāvastyāṃ jetakāraṇye vihāre maṇimaṇḍite || 5 || {5}
[Analyze grammar]

śrāvakairbhikṣubhiḥ saṃghairbodhisatvagaṇaiḥ saha |
saddharmadeśanāṃ kartuṃ vyaharal lokaśāsituṃ || 6 || {6}
[Analyze grammar]

taddharmadeśanāṃ śrotuṃ sarve satvāḥ samāgatāḥ |
brāhmaṇāḥ kṣatriyāścāpi rājāno rājamātrikāḥ || 7 || {7}
[Analyze grammar]

vaiśyāḥ śūdrā amātyāśca maṃtriṇaḥ sādhavo janāḥ |
śreṣṭhinaḥ sārthavāhāśca dhaninaśca vaṇiggaṇāḥ || 8 || {8}
[Analyze grammar]

paurājānapadāścāpi nānādeśasamāgatāḥ |
devā daityāśca gandharvā yakṣakinnararākṣasāḥ || 9 || {9}
[Analyze grammar]

siddhāvidyādharāḥ sādhyā vasavaśca grahādhipāḥ |
nāgeṃdrā garuḍāścaivamṛṣayo brahmacāriṇāḥ || 10 || {10}
[Analyze grammar]

yogino yatayaścāpi lokapālāḥ sasainyakāḥ |
sarve taṃ sugataṃ natvā dharmaṃ śrotumupāgatāḥ || 11 || {11}
[Analyze grammar]

satkṛtya pūjayitvā ca kṛtāṃjalipuṭo mudā |
parivṛtya puraskṛtya dṛṣṭvā tasthuḥ samāhitāḥ || 12 || {12}
[Analyze grammar]

athāsau bhagavāndṛṣṭvā tān sarvāndharmavāṃchinaḥ |
ādimadhyāntakalyāṇaṃ dideśa dharmamuttamaṃ || 13 || {13}
[Analyze grammar]

tatra devādayaḥ sarve tatsaddharmāmṛtaṃ mudā |
pītvā cābhyanumodantaḥ prāpurjñānaviśeṣatāṃ || 14 || {14}
[Analyze grammar]

śrāvasteyāttadāneke dārikā dārakāśca te |
kusumānyācitaṃ śālabhaṃjikākhyaṃ giriṃ yayuḥ || 15 || {15}
[Analyze grammar]

tatra te sahasā gatvā dṛṣṭvā puṣpāṇyanekaśaḥ |
prādāya samupāgatvā śrāvastyāmacaranmudā || 16 || {16}
[Analyze grammar]

tatraikā dārikā vālā śreṣṭhiputrī pramoditā |
śanaiḥ sā śālapuṣpāṇi prādāya pṛṣṭhato 'carat || 17 || {17}
[Analyze grammar]

tadā ca bhagāvānbuddho bhikṣusaṃghasamanvitaḥ |
śrāvastyāṃ bhojanaṃ bhuktvā tato bahirviniryayau || 18 || {18}
[Analyze grammar]

tatra sā dārikādrākṣīdbhagavantaṃ tamāgataṃ |
dvātriṃśal lakṣaṇāśītivyaṃjanaṃ samalaṃkṛtaṃ || 19 || {19}
[Analyze grammar]

vyāmaprabhāvirājantaṃ sahasreṇādhikaprabhaṃ |
jaṃgamamiva ratnāṅgaṃ samantabhadrarūpikaṃ || 20 || {20}
[Analyze grammar]

dṛṣṭvaivaṃ śrīghanaṃ nāthaṃ dārikā sā pramoditā |
śraddhayārcayituṃ puṣpairmanasaivaṃ vyaciṃtayat || 21 || {21}
[Analyze grammar]

aho puṇyaṃ mayā labdhaṃ yatsaṃbuddho dṛśyate 'dhunā |
evaṃ kadā kathaṃ kutra drakṣyate 'yaṃ munīśvaraḥ || 22 || {22}
[Analyze grammar]

bhāgyenaivaṃ mayā labdhaṃ saṃbuddhadarśanaṃ tathā |
nūnaṃ bhāgyavatī cāsmi yatpuṇyanidhirāpyate || 23 || {23}
[Analyze grammar]

tasmātpuṇyaṃ mahāratnaṃ prāptumupetya sādaraṃ |
etaiśca kusumaiḥ sarvairarhāmyetaṃ samarcituṃ || 24 || {24}
[Analyze grammar]

kadāyaṃ lapsyate bhūyaḥ paravaśyā striyā mayā |
tadahaṃ sahasopetya puṣpāṇyasmāyupākire || 25 || {25}
[Analyze grammar]

sadā notpadyate nātra saṃbuddho hi kadā cana |
atisudurllabhaṃ hyasya darśanaṃ ca sadā na hi || 26 || {26}
[Analyze grammar]

mānuṣyaṃ durllabhaṃ janma vinā puṇyairna labhyate |
mānuṣye 'labhyamāne 'pi saṃbuddhe sevyate kathaṃ || 27 || {27}
[Analyze grammar]

mānuṣye labhyamāne 'pi kṣaṇaṃ saṃpatsudurllabhā |
narairapyakṣaṇaprāptaiḥ kathaṃ buddhe 'nusevyate || 28 || {28}
[Analyze grammar]

tadadya mānuṣī bhūtvā prāpyaivaṃ sukṛtau kṣaṇaṃ |
yadyatra kusumairebhiḥ saṃbuddhaṃ nārcayāmyahaṃ || 29 || {29}
[Analyze grammar]

tato me niṣphalaṃ janma mānuṣye vyarthameva hi |
kiṃ mamānena dehena sarvathaikāntanāśinā || 30 || {30}
[Analyze grammar]

kimanenāpi jīvena mṛtyau nityaṃ puraḥsthite |
kiyatkālaṃ ca jīveyaṃ gacheyaṃ maraṇaṃ dhruvaṃ || 31 || {31}
[Analyze grammar]

ciraṃ sthitvāpi kiṃ sāraṃ saṃbuddhabhajanaṃ vinā |
varaṃ prāṇaparityāgaṃ kṛtvā saṃbuddhadarśanaṃ || 32 || {32}
[Analyze grammar]

anityaṃ khalu saṃsāraṃ sarvadehādikaṃ dhanaṃ |
etadeva tu satsāraṃ yadbuddhe bhajanaṃ sadā || 33 || {33}
[Analyze grammar]

tadaitaiḥ kusumaiḥ sarvaiḥ pūjayāmi munīśvaraṃ |
kathaṃ na pūjayisyāmi saṃbuddhaṃ trijagadguruṃ || 34 || {34}
[Analyze grammar]

iti niścitya sā vālā dṛṣṭvā taṃ sugataṃ mudā |
sahasopetya taiḥ sarvaiḥ sālapuṣpairavākiran || 35 || {35}
[Analyze grammar]

tataḥ pradakṣiṇīkṛtya praṇamya taṃ praharṣitā |
kiṃ ciddūre parāvṛtya tasthau dṛṣṭvā muniṃ mudā || 36 || {36}
[Analyze grammar]

tato 'sau bhagavānbuddhastasyā āyurvihīnatāṃ |
matvā tāṃ saṃnrīksyaivaṃ svaṃ vihāraṃ samāyayau || 37 || {37}
[Analyze grammar]

atha sā dārikā bhūyastathānyatkusumāni ca |
gṛhasyārthe samādātuṃ tataḥ śālavanaṃ yayau || 38 || {38}
[Analyze grammar]

tatra śālataruṃ dṛṣṭvā praphullakusumānvitaṃ |
tatpuṣpāṇi samācetuṃ sahasā sā ruroha taṃ || 39 || {39}
[Analyze grammar]

tatrāvaruhya puṣpāṇi cinvantī sā pramodataḥ |
agraśākhāsamārūḍhā papāta sahasā tataḥ || 40 || {40}
[Analyze grammar]

patitā sā virugnāṅgā tīvrātivedanāturā |
hā hatāsmīti niścitya saṃbuddhasmaraṇaṃ vyadhāt || 41 || {41}
[Analyze grammar]

namo buddhāya dharmāya saṃghāya sugatāya ca |
iti proktvaiva saṃbuddhaṃ smaranti maraṇaṃ yayau || 42 || {42}
[Analyze grammar]

tataḥ svargopapannā sā vismitaivaṃ vyacintayat |
kutaścyutvā kuhotpannā kena vā kuśalena ca || 43 || {43}
[Analyze grammar]

iti cintāparītā sā sahasaivaṃ vyabuddhyata |
martyāccyutvāgatā svarge buddhe puṣpapradānataḥ || 44 || {44}
[Analyze grammar]

iti buddhvā ca sā bhadrā suprasāditamānasī |
tameva sugataṃ nāthaṃ smṛtvā natvābhyanandata || 45 || {45}
[Analyze grammar]

tato devairupanītaṃ divyapuṣpasvalaṃkṛtaṃ |
vimānaṃ sā samāruhya devasabhāmupāyayau || 46 || {46}
[Analyze grammar]

tasmiṃśca samaye śakraḥ sudharmāyāṃ suraiḥ saha |
saṃbuddhavarṇanāṃ kṛtvā tasthau devānpramodayan || 47 || {47}
[Analyze grammar]

tathā tāṃ samupāyātāṃ śālapuṣpābhyalaṃkṛtāṃ |
dṛṣṭvā divyātivarṇābhāṃ papracha vismito hariḥ || 48 || {48}
[Analyze grammar]

gātraṃ kena vimṛṣṭakāṃcananibhaṃ padmotpalābhaṃ tava |
divyaśrīratulākṛteyamiha te kena prabhā niḥsṛtā |
vaktraṃ kena vibuddhapadmasadṛśaṃ cāmīkarābhaṃ tava |
kasya tvaṃ varadevate phalamidaṃ yatkarmajaṃ bhujyate || 49 || {49}
[Analyze grammar]

iti prokte surendreṇa sā bhadrā devakanyakā |
taṃ devādhipatiṃ natvā kṛtāṃjalipuṭo 'bravīt || 50 || {50}
[Analyze grammar]

saśrāvakā narāditya ākīrṇaśālapuṣpakaiḥ |
tatkarmakuśalaṃ kṛtvā rājate me 'dhikaṃ tanuḥ || 51 || {51}
[Analyze grammar]

jalajenduviśuddhābhaṃ vadanaṃ me 'bhirocate |
etatkarmānubhāvena vijānīyāḥ sureśvara || 52 || {52}
[Analyze grammar]

tayeti proditaṃ śrutvā devendro 'sau suvismitaḥ |
dṛṣṭvā caināṃ subhadrāṅgīṃ praharṣayannabhāṣata || 53 || {53}
[Analyze grammar]

aho guṇamayaṃ kṣetraṃ sarvadoṣavivarjitaṃ |
yatra nyastaṃ tvayā vījamitthaṃ svargopapattaye || 54 || {54}
[Analyze grammar]

ko nārcayetpravarakāṃcanarāśigauraṃ buddhaṃ vibuddhakamalāyatapatranetraṃ |
yatrādhikārajanitāni viśobhitāni kāṃtāmukhāni kamalāyatalocanāni || 55 || {55}
[Analyze grammar]

dhanyo 'si tvaṃ subhadrāṃgi saṃbuddhaguṇabhāvini |
sarvathā hi sa saṃbuddhaḥ sevitavyaḥ sadāpi ca || 56 || {56}
[Analyze grammar]

yasya puṇyaprasādāttvaṃ sadyaḥ svarge samāgatā |
sa eva bhagavānnāthaḥ saṃsmṛtvā sevyatāṃ sadā || 57 || {57}
[Analyze grammar]

tataste sarvadā nityaṃ maṃgalaṃ syātsamaṃtataḥ |
ciraṃ divyasukhaṃ bhuktvā yāyāścānte sukhāvatīṃ || 58 || {158}
[Analyze grammar]

ityādiṣṭaṃ surendreṇa sā devakanyakā sudhīḥ |
anumodya ca taṃ śakraṃ natvā svamālayaṃ yayau || 59 || {59}
[Analyze grammar]

tataḥ sā saṃsthitā devīprāsāde divyamaṇḍite |
divyabhogyasukhaprāptā moditvaivaṃ vyacintayet || 60 || {60}
[Analyze grammar]

yaccyutvāhaṃ manuṣyebhyo 'dhunā svargasamāgatā |
tatsaṃbuddhaprasādena jānāmi nānyathā khalu || 61 || {61}
[Analyze grammar]

yanmayā pūjito buddhaḥ śālapuṣpairvanodbhāvaiḥ |
tatpuṇyaphalabhogyārthe āgatāhaṃ surālayaṃ || 62 || {62}
[Analyze grammar]

yaddivyasukhasaṃprāptaṃ tatsaṃbuddhaprasādataḥ |
tena tamevaṃ saṃbuddhaṃ punargacheya vaṃdituṃ || 63 || {63}
[Analyze grammar]

na yuktaṃ saugate gantuṃ paryuṣitena vāsasā |
yuktaṃ tu saugate gaṃtumaparyuṣitavāsasā || 64 || {64}
[Analyze grammar]

iti sā manasā matvā devakanyā subhadrikā |
snātvā saurabhyaliptāṃgā divyaśuddhāmvarāvṛtā || 65 || {65}
[Analyze grammar]

divyālaṃkāramālādimaulīkuṇḍalamaṃḍitā |
anekadevakanyābhirapsarobhiḥ samanvitā || 66 || {66}
[Analyze grammar]

divyapūjopacārāṇi gṛhītvā sahasā yayau |
tasyāmeva niśi svarddhyā bhāsayantī samaṃtataḥ || 67 || {67}
[Analyze grammar]

jetavanamupetyāsau praviveśa jinālayaṃ |
tataḥ pradakṣiṇaṃ kṛtvā praṇamya caraṇau muneḥ || 68 || {68}
[Analyze grammar]

paṃcopahārapūjābhiḥ pūjayitvā kṛtāṃjaliḥ |
natvā ca purataḥ tasthau saddharmaśravaṇotsukā || 69 || {69}
[Analyze grammar]

athāsau bhagavāṃstasyā jñātvāśayaviśuddhatāṃ |
ādimadhyāntakalyāṇaṃ dideśa dharmamuttamaṃ || 70 || {70}
[Analyze grammar]

catvāri cāryasatyāni niḥkleśapuṇyalabdhaye |
daśakuśalamūlāni samyaksatvaviśuddhaye || 71 || {71}
[Analyze grammar]

āryāṣṭāṅgikamārgāṃśca saṃbodhimārgalabdhaye |
bodhipākṣikadharmāṃśca saṃbuddhaguṇalabdhaye || 72 || {72}
[Analyze grammar]

athāsau devakanyā tāṃ saddharmadeśaṇaṃ muneḥ |
śrutvānumoditā cāpi prāpya dharmaviśeṣatāṃ || 73 || {73}
[Analyze grammar]

jñānavajreṇa satkāyadṛṣṭiśailaṃ vibheda sā |
śrotāpattiphalaṃ prāptā dṛṣṭasatyābhavattadā || 74 || {74}
[Analyze grammar]

tato bhūyaḥ praṇamyaivaṃ bhagavantaṃ kṛtāṃjaliḥ |
suprasannamukhāmbhojo trirudānamudāharat || 75 || {75}
[Analyze grammar]

bhagavannidamasmākaṃ mahāpuṇyasukhodayaṃ |
jananyāpi kṛtaṃ nāpi na pitrā na ca vaṃdhubhiḥ || 76 || {76}
[Analyze grammar]

na jñātibhirna mitraiśca na sahāyasuhṛjjanaiḥ |
nāpi sālohitaiścāpi pitṛlokairna cāparaiḥ || 77 || {77}
[Analyze grammar]

na rājñā na cāmātyairna maṃtribhirna ca paurikaiḥ |
na gurubhirna vipraiśca na yatibhirna tāpasaiḥ || 78 || {78}
[Analyze grammar]

na devairnāpi daityaiśca nāpi lokādhipairapi |
tathānyaiśca kṛtaṃ naiva yadidaṃ bhavatā kṛtaṃ || 79 || {79}
[Analyze grammar]

uchoṣito yadasmākaṃ rudhirāśrusaritpatiḥ |
asthimayo mahāchailo yadasmābhiśca laṃghitaḥ || 80 || {80}
[Analyze grammar]

tavānubhāvātpihitaḥ sughoro hyapāyamārgo bahudoṣayuktaḥ |
apāvṛtā svargagatiḥ supuṇyā nirvāṇamārgaśca mayopalabdhaḥ || 81 || {81}
[Analyze grammar]

bhavatprasādānnirupetadoṣaṃ mayādya labdhaṃ suviśuddhacakṣuḥ |
prāptaṃ ca śāntaṃ padamāryakāntaṃ tīrṇaśca duḥkhārṇavapāramasmi || 82 || {82}
[Analyze grammar]

naravarendrasurāsurapūjite vigatajanmajarāmaraṇādayaḥ |
bhavasahasrasudullabhadarśane saphalamadya mune tava darśanaṃ || 83 || {83}
[Analyze grammar]

tataḥ praṇatvā caraṇāraviṃdau muneḥ prakṛtvā tṛpradakṣiṇāṃ ca |
prajātaharṣā sugataṃ jineṃdraṃ smṛtvā ca bhūyo divamāyayau sā || 84 || {84}
[Analyze grammar]

tathā svargasamāyātā devakanyā mumoda sā |
yathā vaṇig labdhalābho rogamukto yathāturaḥ || 85 || {85}
[Analyze grammar]

samyagniṣpannaśasyāpto yathā ca kṛṣikārmikaḥ |
siddhayātrāpralabdhārthaḥ sārthavāho vaṇig yathā || 86 || {86}
[Analyze grammar]

atha te bhikṣavaḥ sarve dṛṣṭvaivamavabhāsitaṃ |
saṃdigdhavismitāścaivaṃ paprachustaṃ munīśvarāṃ || 87 || {87}
[Analyze grammar]

bhagavannadya rātrau ko bhavato 'ntikamāgataḥ |
brahmā vā surarājo vā lokapālagaṇā api || 88 || {88}
[Analyze grammar]

asmābhirjñāyate nāyaṃ yo 'dya rātrāvihāgataḥ |
tadasmān vismitān sarvānbodhayituṃ samarhasi || 89 || {89}
[Analyze grammar]

iti tairbhikṣubhiḥ pṛṣṭo bhagavān sa munīśvaraḥ |
tāṃśca bhikṣugaṇān sarvān samāmaṃtryābravīttathā || 90 || {90}
[Analyze grammar]

na hi sa bhikṣavo brahmā nāpi vāsau surādhipaḥ |
naiva lokādhipālāśca yādya rātrāvihāgatā || 91 || {91}
[Analyze grammar]

api tu dārikā dṛṣṭā yuṣmābhiḥ sagatā pathi |
yayāhaṃ sālapuṣpaiśca prāvakīryābhitoṣitaḥ || 92 || {92}
[Analyze grammar]

sā māṃ puṣpairavākīrya gṛhasyārthe punarvanaṃ |
gatā puṣpāṇyupāhartuṃ vṛkṣārūḍhāpatattaroḥ || 93 || {93}
[Analyze grammar]

tato 'sau patanodvignā vedanākrāṃtacetasā |
triratnāni smarantyeva dehaṃ tyaktvā divaṃ yayau || 94 || {94}
[Analyze grammar]

tatra svarge samāsādya smṛtva māṃ sugataṃ punaḥ |
draṣṭuṃ dharmaṃ ca me śrotumihāsau samupāgatā || 95 || {95}
[Analyze grammar]

tanmayā deśitaṃ tasyai saṃbodhidharmamuttamaṃ |
śrutvā sā cānumodyaivaṃ saṃharṣitā divaṃ yayau || 96 || {96}
[Analyze grammar]

ityevaṃ bhikṣavo matvā triratnāni śubhārthibhiḥ |
sevitavyāni saṃsmṛtvā gatvā ca śaraṇaṃ sadā || 97 || {97}
[Analyze grammar]

ye bhajanti triratnāni saṃsmṛtvā śaraṇaṃ gatāḥ |
durgatiṃ te na gachaṃti vrajanti sadgatiṃ sadā || 98 || {98}
[Analyze grammar]

ye nindanti triratnāni pratikṣipya pramādataḥ |
sadgatiṃ te na gachanti vasanti narake sadā || 99 || {99}
[Analyze grammar]

tasmānnityāṃ triratnāni saṃsmṛtvā śaraṇaṃ gatāḥ |
satkṛtya bhāvayitvā ca bhajadhvaṃ bodhivāṃchayā || 100 || {100}
[Analyze grammar]

tathā vo maṅgalaṃ nityaṃ sarvatra sarvadā bhavet |
kramādbodhicarīṃ pūrya saṃbodhimapi lapsyatha || 101 || {1}
[Analyze grammar]

ityādiṣṭaṃ munīndreṇa śrutvā te bhikṣavo mudā |
tathetyabhyanumodantastriratnāni sadābhajan || 102 || {2}
[Analyze grammar]

ityevaṃ guruṇādiṣṭaṃ mayaivaṃ te pracakṣyate |
śrutvaitacchrāvayitvā ca triratnāni sadā bhaja || 103 || {3}
[Analyze grammar]

tatastvaṃ kramaśaścaiva bodhicaryāṃ samācaran |
sarvapāpavinirmuktaḥ sukhāvatīṃ samāvrajeḥ || 104 || {3*}
[Analyze grammar]

ityetadguruṇādiṣṭaṃ upaguptena bhikṣuṇā |
śrutvā rājā tathetyevamabhyanandatsapārṣadaḥ || 105 || {4}
[Analyze grammar]

tatsaṃbuddhānubhāvaṃ munivarakathitaṃ śālapuṣpāvadānaṃ |
ye śrutvā śrāvayanti pramuditamanasaḥ śraddhayā bodhikāmāḥ |
te sarvakleśamuktāḥ sakalaguṇadharā bodhicaryānuraktāḥ |
kṛtvā loke hitārthaṃ jinavaravasatiṃ saṃprayaṃti praharṣaiḥ || 106 || {5}
[Analyze grammar]

Other print editions:

Also see the following print editions of the Sanskrit text or (alternative) English translations of the Ratnamalavadana Śālapuṣpa-avadāna

Cover of edition (2005)

Ratnamalavadana
by Prof. Ramesh Kumar Dwivedi (2005)

Avadana in Sanskrit Literature

Buy now!
Like what you read? Consider supporting this website: