Chapter 47 - saptacatvāriṃśaḥ paṭalavisaraḥ

Atha saptacatvāriṃśaḥ paṭalavisaraḥ /

athakhalu bhagavāṃ śākyamuniḥ punarapi śuddhāvāsabhavanamavalokya taṃ ca mahāparṣanmaṇḍalaṃ anantavyūhālaṅkārasarvajyotiprabhāsvaravikurvāṇānantaguhyatamaṃ sarvaguhyatamaṃ sarvamantrānucaritaṃ nāma samādhiṃ samāpadyate / samanantarasamāpannasya bhagavataḥ ūrṇākośād raśmayo niścaranti sma / sarvataśca samantā daśasu dikṣu rityūrdhvamadhastiryak mahatāvabhāsenāvabhāsya sarvamantrāṃ sañcodya punarapi bhagavataḥ ūrṇākośāntarhitā / samanantarāntarhite raśmibhiḥ caturdikṣu ca ādhaścordhvaṃ catvāraḥ kumāryo bhrātṛsahitā tasminneva mahāparṣanmaṇḍale adhaḥ sumeruparvatarājasamīpe buddhādhiṣṭhānenādhiṣṭhito'bhūt / sannipatitā sanniṣaṇṇā mahābodhisattvakumārabhūtaṃ riddhyā vikrīḍanasandaśarnārthaṃ mahāmantracaryānirhārārthaṃ sarvalokottaralaukikamantracaryākrīḍāsamanupraveśavaśamākarṣasamāśvāsanacaryāsamanupraveśanārtham //

atha khalu bhagavāṃ śākyamunirvajrapāṇiṃ bodhisattvaṃ mahāsattvaṃ tasminneva parṣadi sannipatitam īṣinnirīkṣya sarvaṃ ca bodhisattvagaṇam //

atha sā sarvāvatī parṣadiha mahāpṛthivī ca devatāgaṇaparivṛtā mahābhūtaikamantrālayaṃ oṣadhyo mahājyotīṃṣi nagāṃ sañcālya pracalitā raṇitā praraṇitā kṣubhitā samprakṣubhitā dakṣiṇā digunnamati, uttarā digavannamati, paścimadigunnamati pūrvā digavanamati, antādavanamati, madhyādunnamatī, antādunnamati, mahatasya cāvabhāsasya loke prādurbhāvo'bhūt / anyāni cāprameyāni asaṅkhyeyāniścaryādbhutāni prātihāryāṇi sandṛśyante sma / tāśca devasaṅghā niḥprapañcamahatālambanajñānaśāntipadaṃ nāma samādhiṃ samāpadyate sma / yanna śakyaṃ sarvapratyekabuddhārhattvamahābodhisattvairapi jñātum / kaḥ punarvādaḥ samāpadyetuṃ anyeṣāṃ sarvalaukikalokottarāṇāṃ tīrthāyatanānāṃ abhibhavanārthaṃ sarvamantratantrānupraveśanārthaṃ sarvavimokṣadharmaparipūraṇārthaṃ sarvasattvānāṃ ca śāntipadamanuprāpaṇārthaṃ sarvabhūtamanukampābhūtakoṭitathatācintyabodhimaṇḍavajrāsanamākramaṇatiṣṭhapadamanuprāpaṇārthaṃ ca bhagavāṃ śākyamuniḥ dhyāyantaḥ sthito'bhūt //

atha khalu mañjuśrīḥ kumārabhūto bodhisattvo vajrapāṇiṃ bodhisattvaṃ mahāyakṣasenāpati āmantrayate sma - bhāṣa bhāṣa tvaṃ bho jinaputra sarvamantracaryānupraveśaṃ sarvalaukikamantrāṇāṃ sārabhūtaṃ tamaṃ paramarahasyaṃ sarvabhūtasattvānāṃ samayānupraveśaṃ yathāśayamanorathasarvapāripūrakaṃ anujñātastvaṃ bho jinaputra sarvabuddhairbhagavadbhiḥ atītānāgatapratyutpannaistathāgatamantrakośasarvajñatāparipūraṇārthaṃ iha kalparājapaṭalavisare sarvavikrīḍālīlācintyāścaryādbhutavikurvaṇasandarśanārthaṃ sarvajñajñānamudbhāvanārtham //

atha khalu vajrapāṇiḥ bodhisattvo mahāsattvaḥ mañjuśriyaṃ kumārabhūtamāmantrayate sma / śṛṇvantu bho dharmadhara sarvatathāgatānāṃ samatānurakṣaṇadakṣakathāyāsyahaṃ catuḥkumārīṇāṃ bhrātṛsahitānāṃ sarahasyaṃ paṭavidhānahomajāpakālakriyāniyamaḥ pratimāvidhānamaṇḍalasamaya āhvānanavisarjanāpūjanārghadīpagandhadhūpamālyavilepanacūrṇavastranivedanadhvajapatākaghaṇṭāmālapradīpasragvidhisādhanasādhyopāyaniyamakramaḥ (Vaidya 403) śāntikapauṣṭikābhicāruka antarddhānākāśagamanapādapracārikavaśīkaraṇāveśanavidveṣaṇotsādanaśoṣaṇamohanastambhanamāraṇa vividhasattvākārakaraṇapīḍanatarjanabhartsanabahupadāpadakaraṇakriyo mārgasandarśanayatheṣṭakarmaphalaḥ bandhanarohaṇāvandhyakaraṇasarvakarmamantratantrasādhanopayikeṣu sthāneṣu niyojanaḥ siddhiparipūraṇā / tachrūyatāṃ bho jinaputra //

atha vajrapāṇiḥ śrīmāṃ praṇipatya sugataṃ vibhum /
uvāca madhurāṃ vāṇiṃ śabdārthabhūṣitām // verse 47.1 //
anarthāṃ karṇasukhāṃ caiva madhurārthasukūjitām /
bahvārthakarīmiṣṭāṃ sarvamantrāspadakarī brahmasvaraninādinīm // verse 47.2 //
kalaviṅkarutāghoṣā spaṣṭagambhīrasaṃyamī /
+ + + + sūkṣmārthatattvāvacodanīm // verse 47.3 //
sarvamantreśvarīṃ ścaiva vācaṃ bhāṣe'tha vajradhṛk /
śṛṇotha bhūtagaṇāḥ sarve devasaṅghā maharddhikā // verse 47.4 //
vakṣyamāṇāṃ tathā kalpaṃ savistaraṃ sarvakarmikam /
caturmūrtirmahaujaska caturdikṣu samāgamam /
caturvarṇasamāyuktaṃ caturakṣarabhūṣitam // verse 47.5 //
caturmantrasamopetaṃ sa pumāṃ pañcamāśṛtām /
caturthagatimāhātmyaṃ caturbhūtasamāgamam // verse 47.6 //
sabhrātṛpañcamaṃ jyeṣṭhaṃ mahābhūtākāśamudbhavam /
sarvatrāpratihataṃ śreṣṭhaṃ sarvamantrārthasādhanam // verse 47.7 //
sarvakarmakaraṃ pūjyaṃ jyeṣṭhaṃ maṅgalyamaghanāśanam /
pravṛttaṃ sarvabhūtānāṃ mantrarūpeṇa śreyasām // verse 47.8 //
catuḥkumāryeti vikhyātā kumārā pañcamātmakā /
vāyvambujyotiṣiṃ pṛthivīṃ khapañcamātmakām // verse 47.9 //
teṣāṃ mantrarūpiṇyāṃ vipāko bhavati dehinām /
pañcamo śreyaso mukhyo bhrātṛrūpeṇa mantrarāṭ /
teṣāṃ mantrāṃ pravakṣyāmi aparākhya śṛṇotha me // verse 47.10 //
atha te sarvabhūtā vai prahṛṣṭamanasā abhūt /
niṣaṇṇā dharmatāṃ jñātvā saumyacittā samāhitā /
śrotukāmā hi vai sarvo niścalāyatalocanā // verse 47.11 //
atha mañjuvaraḥ śrīmāṃ ūrdhvakṣya sugatātmajam /
vajrapāṇiṃ mahāyakṣaṃ sarvamantreśvarālayam // verse 47.12 //
(Vaidya 404)
kṛpāvakṛṣṭahṛdayo aparo'bhūt tadantare /
.... sarvabuddhā vai pratyekārhaśrāvakā // verse 47.13 //
bodhisattvā mahāsattvā daśabhūmisamāśṛtā /
sarvasattvā tathā loke mukhyā agratamāśca ye // verse 47.14 //
niṣaṇṇā sarvataḥ sarva gatipañcasuyojitāḥ /
janmino varamukhyāśca parāḥ parapūjitā // verse 47.15 //
bhavāgrā hyāvīciparyantāṃ anantāṃ dhātumāśṛtām /
trijanmādhyakṣaparyantā daśabhūmādhipā parā /
śrotukāmā hi vai sarve nipetustaṃ samāgamam // verse 47.16 //
atha vajradharādhyakṣo viditvā sarvamāgatām /
sattvāṃ bodhisattvāṃśca sarvamantreśvarālayām /
surajyeṣṭhāṃ tathā devāṃ daśabhūmyeśvarām // verse 47.17 //
sarvasattvāṃ vidittvaināṃ prasannāṃ buddhaśāsane /
mantraṃ pratyāhareddhīmāṃ mantranātheśvarastadā // verse 47.18 //

namaḥ sarvabuddhānāmapratihataśāsanānām acintyādbhutarūpiṇām / om turu turu hulu hulu mā vilamba samayamanusmara mama kāryaṃ sādhaya hūṃ hūṃ phaṭ phaṭ svāhā // sarvakarmiko'yaṃ mantraḥ / hṛdayo'yaṃ sarvabuddhabodhisattvānāṃ sarvalaukikalokottarāṇāṃ sarvavyādhirājādhipatīnāṃ ca mūlamantro'yam anena sarvakarmāṇi kārayet //

sarvadravyāṇi sādhayet sarvakarmakaro vibhuḥ /
anena tu sadā karma kuryāt kṣiprārthasādhane /
tatra mantraṃ pravakṣyāmi devasaṅghā śṛṇotha me // verse 47.19 //

om deva svāhā / sārtthavāhāyastumburermantraḥ / om jaye svāhā / om ajite svāhā / om parājite svāhā / ete mūlamantrā sabhrātṛsahitānāṃ caturbhaginīnāṃ lokapūjitānāṃ hṛdayāni bhavanti / tāsām om rūpiṇī om virūpiṇī viśvātmane / ete hṛdayodbhavā mantrāstumburerhṛdaye mantrā bhavanti / om deveśāya svāhā / upahṛdayāni bhavanti / om vāmani piśāci om mahārākṣasi svāhā / om vikṛtarūpiṇi svāhā / om prakīrṇakeśī kṛtāntarūpiṇi svāhā / om vajrarūpiṇi kṛtāntarātri bhayānaki svāhā / tumbureḥ sārthavāhasyopahṛdayaṃ bhavati / om caturvaktravibhūṣitamūrti trinetrā lambodara bahurūpi svāhā / om dhu dhu jvalaya sarvadiśāṃ svāhā / sarveṣāṃ bhaginīnāṃ bhrātṛsahitānāṃ divyastu mantro'yam / om hūṃ sarveṣāṃ śikhā / om hrīḥ jaḥ sarveṣāṃ śiraḥ / om dhyāyini svāhā / sarveṣāṃ mantraḥ / om dṛk sarveṣāṃ netraḥ / om bhaginīnāṃ bhrātṛsahitānāṃ candanakuṅkumānuliptānāṃ samayā ca rakṣitānāṃ himavantasasāgaracāriṇāṃ dṛḍhavratānāṃ buddhadharmasaṅghānujñātānāṃ śrīḥ / hrīḥ / rīm / vrīḥ / bhujaḥ / eṣa sarvabhaginīnāṃ (Vaidya 405) sarvabhrātṛsahitānāṃ gātre mahāmantraḥ / sarvakarmikaḥ prasiddhaḥ sarvakarmasu / paramaguhyatamaḥ / om āyāhi mahādeva viśvarūpiṇe svāhā / om tumbure sārthavāhasyāhvānanamantrā / om gacchagaccha mahādeva viśvātmane svāhā / tambureḥ sārthavāhasya visarjanamantrā / om āyāhi devi kumārike kiṃ cirāyasisamayamanusmara / mama kāryaṃ sampādaya svāhā / jayāyāhvānanamantrā / om āyāhi mahābhogini kāryaṃ me sādhaya samayamanusmara svāhā / om mahāyogāndhari vistīrṇadhanapriye svāhā / ajitāyā āhvānanamantrā / om śmaśānavāsini rūpaparivartini dehānucare svāhā / aparājitāyā āhvānanamantrā punareva sarvamaṇḍalāṃ laukikalokottarāmālikhet / sarvakarmeṣu ca yojayet / parakalpavidhānenāpi īpsitamarthaṃ sādhayet / asminneva kalpavisare mūlakalparājapaṭalasamatāsammataścatuḥkumāriṇāṃ kumārasahitānāmādimākhyāyate mantro'yaṃ buddhātmajo yamicchati /

sarvakarmikamityāhuḥ buddhapūtrā maharddhikā /
kulāgrā mantramukhyāśca sarvamantreśvaro vibhuḥ // verse 47.20 //
karoti vividhāṃ karmāṃ vicitrāṃ sādhuvarṇitām /
prasahyaṃ cāpi bhūtānāṃ cittaṃ harati tṛjanminām // verse 47.21 //
gatyarthavaśyatāhetunāpatyārthasamudbhavam /
prasahyaṃ kurute karma gatiyonivinirgataḥ // verse 47.22 //
caturbhaginyeti vikhyātā ............ /
sabhrātṛsahitā nityaṃ mahodadhinivāsinaḥ // verse 47.23 //
nauyānasamārūḍhā sabhrātṛsahapañcamā /
karṇadhāro'tha cittāsāṃ tumbururnāma saṃjñitaḥ // verse 47.24 //
vicaranti mahīṃ kṛtsnāṃ sattvānugrahatatparām /
vicitrarūpadhāriṇyo vicitrābharaṇabhūṣitāḥ // verse 47.25 //
vicitraiva phalaṃ tāsāṃ vicitropakaraṇapūjitām /
paryaṭanti mahīṃ sarvāṃ saśailasahasāgarām // verse 47.26 //
tāsāṃ mantro mahājyeṣṭhaḥ tumbururnāma iṣyate /
sārthavāhasya mantro vai tryambakasya janādhipe /
caturakṣarasaṃyogā oṅkārasapañjakaḥ // verse 47.27 //

prathamaḥ sarvamantrāṇāṃ cārcanaṃ kuryāt gandhadhūpadīpamālyopahāraviśeṣaiḥ balividhānaṃ datvā japaṃ kuryāt / anākulapadākṣaraiḥ / guhyapradeśe eṣāmanyatamaṃ śreṣṭhaṃ mantraṃ gṛhītvā triḥkālamaṣṭasahasraṃ japet / āgatāyā arghaṃ datvā sarvakarmāṇi kārayet / arghamantraṃ cātra bhavati / om pravigṛhṇatu bhaginyaḥ sabhrātṛsahitā cārghamayamadhitiṣṭhantu svāhā / arghamantrā sarveṣāṃ bhrātṛsahitānāṃ sarvopacāramantrāṇi bhavanti / om jvala jvala mahāhutāśārci mahādyutīnāṃ (Vaidya 406) svāhā / sarveṣāṃ pradīpamantrā / om dhūṃ dhūṃ / aritavāsini dhūpaśikhe surabhigandhamanohare pratigṛhṇatu devyaḥ bhrātusahitāḥ dhyāyantāṃ svāhā / dhūpamantraḥ sarveṣām / om kusumavāsini kusumāḍhye surabhimāle sugandhimanohare vane kusumā jātāḥ sukumārāḥ sugandhinaḥ / tāṃ nivedito bhaktyā pratigṛhṇadhvaṃ manojavā svāhā / puṣpamantrā / anena pūjāṃ kurvīta / om gandhagandhādhivāse svāhā / gandhamantrā / om balite balini svāhā / balimantrā / om lālāvati svāhā / nivedyamantrā / om sū / vastramantrā / om phaṭ / ghaṇṭāmantrā / om svaravyañjanamantrā / om chādaya chatramantrā / om dodhūyate dhūyate svāhā / camaramantrā / om kelimahokalihṛdayaṅgame svāhā / sarvadravyopakaraṇāñjanarocanādarśaprasādhanamantrā / om samastavyāpini svāhā / sarvadigbandhavajraprākāramantrā / om maṇḍaline svāhā / ityūrdhvamadhaḥ bandhamantrā / sarvataśca samantāśeṣabandhaṃ bhavati / om namaḥ sarvabuddhānāmapratihataśāsanānām / om hūṃ haḥ / sarvakarmiko'yaṃ mahāvidyārājā śāsano nāma / vaśitā sarvabhūtānāṃ catuḥkumārīṇāṃ sabhrātṛsahitānāṃ pīḍano śoṣaṇo rodhano bandhanaḥ vaśayitā nigrahānugrahe rataḥ sarvabhūtagrahamātara sarvakarmeṣu apratihataśāsanaḥ guhye pradeśe avavarake vā japyamānaścaturbhaginīnāṃ sabhrātṛsahitānāṃ yaṃ rocate taṃ kārayati / yācyamānastu yaṃ baraṃ rocate taṃ varaṃ yācayitavyā śīghraṃ varamanuprayacchati / evaṃ bandhanatāḍanatarjanatarjanamāraṇādīni karmāṇi kurvanti / anenaiva vidyārājenopatapyamānā saha japyamānā sarvakarmāṇi kurvanti / āsāṃ mantrāṇi bhavanti / visarjanādhyeṣaṇādīni kāryāṇi kurvanti // om rūpiṇī gaccha gaccha samayamanusmara svāhā / jayāyā visarjanamantrā / om vāmane piśāci prakīrṇakeśi viśvarūpiṇi gaccha gaccha mama kāryaṃ sādhaya svāhā / vijayāyā visarjanamantraḥ / om lahu lahu rūpiṇi gaccha gaccha samayamanusmara mama kāryaṃ samādāya svāhā / ajitāyā visarjanamantrā / om viśvarūpiṇi vikṛte vikṛtānane sarvaduṣṭanivāraṇi gaccha gaccha mamārthaṃ sādhaya svāhā / aparājitāyā / visarjanamantrā ete visarjanādhyeṣaṇamantrā / yanmanīṣitaṃ kāryaṃ / vicitrakusumairañjaliṃ pūrayitvā yācayitvā prasādya ca devīnāmagrataḥ sabhrātṛsahitānāṃ kṣeptavyāḥ / tatastā muktā bhavanti / sabhrātṛsahitā sānnidhyaṃ ca kalpayante / yatheṣṭaṃ ca varamanuprayacchanti vicaranti yathāsukhamiti / vācā vaktavyā pratidinaṃ ca kartavyamevamuparudhyamānā mokṣaṇācca sānnidhyaṃ na parityajanti / satatakriyā anyathā uparudhyamānā nāvatiṣṭhante kartavyam //

atha te bhaginyaḥ sabhrātṛsahitāḥ tharatharāyamānāḥ pīḍyamānāśca vepathurupajātaśaṅkā bodhisattvānubhāvena caturdikṣu rāgatya evaṃ vācamudīrayante - paritrāyasva bhagavaṃ vajrapāṇi paritrāyasva / pīḍitāḥ sma bhagavaṃ supīḍitāḥ sma / gatiranyā na vidyate / tvameva bhagavaṃ śaraṇam / tvameva trāṇamiti //

atrāntare vidyārājena śāsane suśāsitā sarvadevanāgayakṣagandharvāsuragaruḍakinnaramahoragamanuṣyāmanuṣyā sarvasattvāśca sarvagatisaṅgṛhītāśca suvinītāśca suśāsitā mahāvidyārājena (Vaidya 407) vajrādhipatinānubhāvena tāḥ bhaginyaḥ bhrātṛsahitāḥ bhītāḥ suvinītā ārtasvaraṃ krandamānāḥ avatiṣṭhante / atha khalu mañjuśrīḥ bodhisattvo mahāsattvaḥ tāṃ devatāṃ bhrātṛsahitānāmantrayate sma / mā bhaiṣṭata bhaginyaḥ mā bhaiṣṭatha / buddhaṃ śaraṇaṃ gacchadhvam / dvipadānāmagraṃ dharmaṃ śaraṇaṃ gacchadhvam / virāgāṇāmagraṃ saṅghaṃ śaraṇaṃ gacchadhvam / gaṇānāmagryam //

atha tā bhaginyaḥ sabhrātṛpañcamāḥ buddhaṃ śaraṇaṃ gacchanti / evaṃ śaraṇaṃ gacchanti / saṅghaṃ śaraṇaṃ gacchanti sma / tatastāḥ sukhasaumanasyāḥ parameṇa sukhasaumanasyena samanvāgatā abhūvan / muktagāḍhabandhanātmānaṃ sañjānate sma / prītīsukhasamarpitāḥ labdhaprasādaparamasañjātahṛṣṭaromakūpāḥ idamudānamudānayanti sma -

aho āścaryamidaṃ prāpto ratnatrayodbhave /
sukhitāḥ sma kṣaṇāllabdhāt sarvadurgatighahitāḥ /
sugatau svargamokṣo ca sadā buddhiniveśitā // verse 47.28 //
tatastāṃ tuṣṭamanaso mañjughoṣaṃ nirīkṣa ca /
praṇipatya caraṇau mūrdhnā idaṃ vācamudīrayam /
trātastvaṃ sarvaduḥkhebhyaḥ gatistvaṃ bho mahādyuteḥ // verse 47.29 //
yastvaṃ sarvadharmāṇāṃ gabhīrapadamakṣarā /
tvaṃ deśayase nātha bandhubhūta namo'stu te // verse 47.30 //
ājñāpaya mahāvīra mantranāthaṃ jinātmajam /
kimānītāḥ sma devena ājñāṃ kiṃ karavāni ha // verse 47.31 //
evamuktāstu vīro vai sarvabuddhātmajo vibhuḥ /
uvāca madhurāṃ vāṇīṃ devatābhiḥ sa coditaḥ // verse 47.32 //
gaccha tvaṃ śaraṇaṃ bhūyaḥ vajrapāṇijinātmaje /
avaivartikasaṅgho vai bodhisattvāgrajodbhavet // verse 47.33 //
tṛratnamādau kṛtvā vai vaṃśajaṃ jinavarātmajam /
cittaṃ ca bodho īradhvaṃ maitracittā bhavotsukā /
tato vā sarvataḥ kṛtvā jaghnuḥ svasthatāspadam // verse 47.34 //
tatastā devatāḥ sarve praṇipatya jinātmajam /
ājñāṃ sampādya sarvaṃ vai yena vajrī tadonmukhā // verse 47.35 //
namaskṛtvā tu tāṃ kṣipraṃ vajrapāṇiṃ mahādyutim /
abhiṣṭutya tataḥ sarve sthitāḥ tanmukhodbhavāḥ // verse 47.36 //
prasamīkṣya tadā kanyā sabhrātṛsahapañcamā /
vajrapāṇiṃ ca yakṣeśaṃ nirīkṣamāṇāḥ sthitāḥ /
abhūvaṃ nityārthamāspadā devyaḥ anityārthārthabhūṣitāḥ // verse 47.37 //
(Vaidya 408)
praṇemamadhurāṃ vācāmātmamantrārtthaśobhanām /
namaste sarvabuddhānāṃ bodhisattvāṃ maharddhikām // verse 47.38 //
pratyekārhasaṅghaṃ ca asatāṃścaiva yoginām /
ātmamantrārthavistāraṃ kathayāmo mahādyute // verse 47.39 //
yathātattvāvabodhārtthaṃ janānāṃ tu mahītale /
sarahasyaṃ guhyamantrāṇāṃ tvadvakṣānnisṛtātmanām /
anurakṣārthamantrāṇāṃ āspadārthārtthabhūṣaṇām // verse 47.40 //
evamukte tu mantreśaḥ vajrapāṇirmahādyutiḥ /
īṣismitamukho bhūtvā vilokya vikasanmukhaḥ // verse 47.41 //
pūjāyāmāsa tāṃ kanyāṃ sabhrātṛsakhījanām /
anujñātaṃ mayā yūyaṃ nirviśaṅka bhaviṣyatha // verse 47.42 //
saṃśrāvya kalpavistāraṃ sarahasyaṃ samaṇḍalam /
jantubhiḥ pūjitāḥ nityaṃ varaṃ vo dāsyatha sarvadā // verse 47.43 //
ṛṣibhiḥ pūjitā yūyaṃ yakṣarākṣasakinnaraiḥ /
garuḍairdevagandharvaiḥ asuraiścāpi maharddhikaiḥ // verse 47.44 //
kūṣmāṇḍaiḥ mātaraiścāpi samagraiḥ somabhāskaraiḥ /
lokapālaiḥ dhanādhyakṣaiḥ patadbhiḥ vasavaistathā // verse 47.45 //
tairiveyaṃ surādhyakṣaiḥ piśācoragamānuṣaiḥ /
bhūtādhyakṣaiḥ niśādhyakṣaiḥ piśitāśanavyantaraiḥ /
rākṣasādhipamukhyaiśca raudracittairviheṭhakaiḥ // verse 47.46 //
daityadānavasaṅghaiśca yamaiḥ pretamaharddhikaiḥ /
mānuṣāmānuṣaiścāpi brahmaviṣṇūmaheśvaraiḥ // verse 47.47 //
suramukhyairmahājyeṣṭhaiḥ siddhacāraṇapūtanaiḥ /
yogibhirjinaputraiśca pūjitā vo bhaviṣyatha // verse 47.48 //
+ + + + na sandeho prabhāvā varakramā /
jayāyā mantramityāhuḥ kalpavistāravistarā // verse 47.49 //
nava koṭyastu mantrāṇāṃ tantrakalpasavistarā /
vijayā caiva mantrāṇāṃ ṣaṣṭirlabdhā prakīrtitā // verse 47.50 //
ajitāyā tu bhavenmātra lakṣaṣoḍaśakodbhavā /
aparājitāyā tu kanyāyā catuḥkoṭyaḥ udāhṛtāḥ // verse 47.51 //
tumbureḥ sārthavāhasya navakoṭyo'tha gāyataḥ /
tatpramāṇā bhavet kalpā nṛsurāsurapūjitāḥ // verse 47.52 //
(Vaidya 409)
sarvaṃ śaivamiti khyātaṃ sarvairbhūtalavāsibhiḥ /
mayaiva nigaditaṃ pūrvaṃ kalpe masmiṃ savistare // verse 47.53 //
paścādanyo janaḥ prāhuḥ kalpamantrāṃ pṛthak pṛthak /
tumburuḥ sārthavāhasya tryambakasya tu dhīmateḥ // verse 47.54 //
anantā kalpavistārā śarvasyāsya kapardine /
yatprabhāvārtthaṃ mantrāṇāṃ siddhiṃ yāsyanti bhūtale // verse 47.55 //
anujñātātha vai yūyaṃ kalarāje'tha vai sadā /
bhāṣadhvaṃ mantratantrāṇāṃ sarahasyaṃ savistaram /
saguhyaṃ guhyatamaṃ cāpi sarvasattvasukhodayam // verse 47.56 //
ityuktvā vajradhṛk śrīmāṃ vajramāśṛtya līlayā /
tūṣṇīmbhūta tadā tasthau ratnapaṅkajamucchṛte // verse 47.57 //
atha tāḥ kanyakāḥ kṣipraṃ sabhrātṛmathapañcamāḥ /
praṇipatya mantranāthaṃ vai yakṣeśaṃ jinavarātmajam // verse 47.58 //
vajrapāṇiṃ mahāvīraṃ mantranātheśvaraṃ vibhum /
uvāca madhurāṃ vācāṃ ekaikāmanupūrvataḥ // verse 47.59 //
maṇḍalaṃ tu samāsena vakṣye'haṃ bhujayodayam /
jyeṣṭhamaṇḍalamityāhuḥ jayā jyeṣṭhamagāyata // verse 47.60 //
vijane rahasi sampāte vigate caiva mahājane /
pracchanne'graprasambādhe sarittīre śiloccaye // verse 47.61 //
vivikte kānane ramye buddhādhyuṣitamandire /
śūnye devakule cāpi śūnye veśmamu śodhite // verse 47.62 //
ekavṛkṣe śubhe ramye mahodadhisamāśraye /
ekaliṅge śmaśāne ca vigate dhūmapāṃsubhiḥ /
vajrāsanamahāpuṇye dharmacakre suśobhane // verse 47.63 //
yatra śāntiṃ gato buddhaḥ yatra jāto mahāmuniḥ /
ete sthānā bhavenmukhyā maṇḍalālikhane śubhā /
gaṅgātīre'tha sarvatra sadvīpapulināśraye // verse 47.64 //
saridvarāśca mukhyā ye kīrttitā lokaviśrutā /
teṣu tīreṣu sarvatra nityaṃ maṇḍalamālikhet // verse 47.65 //
samantāt sarvatoyāntā mahodadhisamaplavā /
himavantavindhyā toyāntā prasthitā nimnagāmbudheḥ /
saridvariṣṭheṣu tīreṣu yukto maṇḍalamālikhet // verse 47.66 //
(Vaidya 410)
anye vā rahasi bhūbhāge uḍaye vā suśobhite /
devāyatanaramyeṣu stūpe cāpi mahocchrite /
dhātugarbhe tathā caitye vāpīkūpāsu vīthikaiḥ // verse 47.67 //
teṣu tīreṣu sarvatra madhye cāpi suśobhitai /
goṣṭhe padmasaratsarvāṃ kvacit toyāśrayodbhavaiḥ /
anyairvā sthānāgrairnityaṃ vihārārāmabhūpitaiḥ // verse 47.68 //
yathiṣṭamanaso tuṣṭiḥ munijuṣṭe mahītale /
parvatāgrairgrahaiścāpi kandaraiḥ sānucihnitaḥ // verse 47.69 //
śāntairāvasathairdivyaiḥ grahaiścāpi vijantubhiḥ /
dhyānānukūlaiḥ praśastaiśca ṛṣimukhyairniṣevitaiḥ // verse 47.70 //
yatra vā manaso tuṣṭiḥ tatra maṇḍalamālikhet /
eṣu sthāneṣu vai nityaṃ yathodiṣṭaiḥ supūjitaiḥ // verse 47.71 //
nipeturdevatāḥ kṣipraṃ sānnidhyaṃ cāpi kalpayet /
tatra sthāne tadā nityaṃ japahomakramo vidhiḥ // verse 47.72 //
ye sādhyā mantramukhyāśca uttamādhamamadhyamāḥ /
siddhyanti mantrāḥ sarve vai siddhakṣetreṣvihodite // verse 47.73 //
siddhyanti sarvamantrā sarve vai jyeṣṭhamadhyamakanyasā /
vividhā hi bhave siddhiḥ trividhaiva kriyāvidhiḥ // verse 47.74 //
triprakārastu mantrāṇāṃ tridhā kālaprabhedataḥ /
trisandhyaṃ sarvamantrāṇāṃ tridhā karmaphalonmukhāḥ // verse 47.75 //
śāntikaṃ karma nirdiṣṭaṃ jayākhye maṇḍale śubhe /
vijayākhye tu pauṣṭyarthaṃ ajitākhye cābhicārukam // verse 47.76 //
aparājitākhye tathā nityaṃ nirdiṣṭaṃ kṣudrakarmasu /
sarvakarmasu mantrajñaḥ tumburākhyaṃ samālikhet // verse 47.77 //
pañcaiva maṇḍalā jñeyā ambhodhe tu nivāsinām /
samantāccaturasraṃ vai uktimātraṃ khaned bhuvi // verse 47.78 //
caturhastāṣṭahastaṃ vā saṃśodhya pāṇinā punaḥ /
kaṭhaṇṇaḥ śarkarāṅgāraḥ tuṣakeśamavaskarām // verse 47.79 //
kapālāsthiśakṛduṣṭāṃ saṃśodhya pāṇinā tataḥ /
svayaṃ cāpi paraistatra sarvāvaskaratāṃ japet // verse 47.80 //
kṛmijantusamākīrṇāḥ saṃśodhyaḥ yatnato vratī /
āpūryāranyamṛttikaiḥ śucibhiśca sugandhibhiḥ // verse 47.81 //
(Vaidya 411)
nadīkūlodbhavairmedhyaistathā valmīkāgrasambhavaiḥ /
goṣṭhabhūtalayormadhye tadanyairvā pārthivodbhavaiḥ // verse 47.82 //
sikatābhiḥ samantād vai sañchādya prasannadhīḥ /
athavā gomayamiśrairvā mṛttikābhiḥ samantataḥ // verse 47.83 //
samantamālepayet kṣipraṃ pañcagavyasamāsṛtaiḥ /
kuṅkumāktaistathā snigdhaiḥ vividhaiḥ gandhamiśritaiḥ // verse 47.84 //
mṛttikābhiḥ samantād vai maṇḍalaṃ tu samantataḥ /
ālepya bhuvi yatnā vai mantravinmantratantravit // verse 47.85 //
pañcāṅgikacūrṇaistu vividhaiḥ dhūpavāsitaiḥ /
ālikhenmaṇḍalaṃ divyaṃ samantā caturhastakam // verse 47.86 //
aṣṭahastapramāṇaṃ vā jyeṣṭhaṃ maṇḍalamucyate /
caturhasto'tha kaniṣṭhaṃ madhyamaṃ parikīrtyate // verse 47.87 //
pañcahasto'tha vikhyātaḥ ṣaṭ hasto'tha muktavām /
sarveṣāṃ tu devīnāṃ sabhrātṛsahitātmanām /
maṇḍalapramāṇamityuktaḥ samantā ccaturaśritam // verse 47.88 //
caturdvāraṃ catuḥkoṇaṃ catustoraṇabhūṣitam /
ālikhenmaṇḍalaṃ divyaṃ praśastaṃ cārurūpiṇam // verse 47.89 //
madhye kumāramālikhya bālarūpasubhūṣaṇam /
kuṅkumākāravarṇābhaṃ vāmamadhye'tha saṃsthitam /
nīlotpalaṃ samantādyakaralagnopaśobhitam // verse 47.90 //
dakṣiṇe karavinyastaṃ śrīmālaṃ phalamāyatam /
kiñcidvaradaṃ devaṃ mañjughoṣaṃ mahāprabhum // verse 47.91 //
kiṃcidunmīlitākṣaṃ tu īṣitprekṣaṇadevatām /
dakṣiṇena samantād vai mahodadhi samālikhet // verse 47.92 //
tatrasthā nāvārūḍhaṃ devyāṃ bhrātṛpañcamām /
ālikhenmantravidyānāṃ suveṣāṃ cārurūpiṇām // verse 47.93 //
vicitrābharaṇavinyastāṃ vicitrapraharaṇodyatām /
kumāryākāraceṣṭānāṃ sabhrātṛkumāravikramām // verse 47.94 //
nauyānasamārūḍhāṃ sabhrātṛsahapañcamām /
karṇadhārasamopetāṃ tumburuḥ sārthavāhikām // verse 47.95 //
mahodadhi samantād vai maṇḍalābhyantaraṃ sthitam /
ṛṣādyai prāṇibhiryuktaṃ sphoṭakaṃ vāripūjitam // verse 47.96 //
(Vaidya 412)
ālikhenmaṇḍalaṃ dhīmāṃ gupte rahasi sarvataḥ /
yathā hi vidhinirdiṣṭaṃ tattvaṃ cāpi kīrttitam // verse 47.97 //
tat sarvaṃ kārayet kṣipraṃ laukikeṣveva yojayet /
yāvanti śaivatantre'smiṃ ye tantre cāpi gāruḍe // verse 47.98 //
brahmādyairṛṣimukhyaiśca bhṛgvāṅgirasakāśyapaiḥ /
mārkaṇḍamunivaraiścāpi pulastyāgastisambhavaiḥ // verse 47.99 //
vāsavaiḥ śakradevaiśca rudrendrasabhāskaraiḥ /
vividhaiḥ sattvamukhyaiśca yamādyaiḥ pretamaharddhikaiḥ // verse 47.100 //
grahamātarakūṣmāṇḍaiḥ yakṣarākṣasapūjitaiḥ /
mānuṣāmānuṣe loke cittanāthairmaharddhikaiḥ // verse 47.101 //
pūjitā kalpavistārā viṣṇurudrasavāsavaiḥ /
kathitā kalpamahātmyaṃ nikhilāścaiva bhūtale // verse 47.102 //
tasmiṃ maṇḍale yojyā siddhyantīha na saṃśayaḥ /
vividhā yonimukhyaistu vividhākāraceṣṭitaiḥ // verse 47.103 //
kathitā kathayiṣyanti devīnāṃ kalpavistarām /
tasmiṃ samaye niyoktavyā jayākhye maṇḍale bhuviriti // verse 47.104 //

bodhisattvapiṭakāvataṃsakānmahāyānavaipulyasūtrādāryamañjuśrīmūlakalpāt pañcacatvāriṃśatamaḥ paṭalavisarāt prathamaḥ caturbhaginīmaṇḍalamanupraveśasamayaguhyatamapaṭalavisaraḥ parisamāpta iti //


__________________________________________________________



(Vaidya 413)