Chapter 3 - A Parable

āścaryaprāpto 'smi mahāvināyaka audbilyajāto imu ghoṣa śrutvā |
kathaṃkathā mahya na bhūya kācit paripācito 'haṃ iha agrayāne || 1 ||
[Analyze grammar]

āścaryabhūtaḥ sugatāna ghoṣaḥ kāṅkṣāṃ ca śokaṃ ca jahāti prāṇinām |
kṣīṇāsravasyo mama yaśca śoko vigato 'sti sarvaṃ śruṇiyāna ghoṣam || 2 ||
[Analyze grammar]

divāvihāramanucaṃkramanto vanaṣaṇḍa ārāmatha vṛkṣamūlam |
girikandarāṃścāupyupasevamāno anucintayāmī imameva cintām || 3 ||
[Analyze grammar]

aho 'smi parivañcitu pāpacittaistulyeṣu dharmeṣu anāsraveṣu |
yannāma traidhātuki agradharmaṃ na deśayiṣyāmi anāgate 'dhve || 4 ||
[Analyze grammar]

dvātriṃśatī lakṣaṇa mahya bhraṣṭā suvarṇavarṇacchavitā ca bhraṣṭā |
balā vimokṣāścimi sarvi riñcitā tulyeṣu dharmeṣu aho 'smi mūḍhaḥ || 5 ||
[Analyze grammar]

anuvyañjanā ye ca mahāmunīnāmaśīti pūrṇāḥ pravarā viśiṣṭāḥ |
aṣṭādaśāveṇika ye ca dharmāste cāpi bhraṣṭā ahu vañcito 'smi || 6 ||
[Analyze grammar]

dṛṣṭvā ca tvāṃ lokahitānukampī divāvihāraṃ parigamya caikaḥ |
hā vañcito 'smīti vicintayāmi asaṅgajñānātu acintiyātaḥ || 7 ||
[Analyze grammar]

rātriṃdivāni kṣapayāmi nātha bhūyiṣṭha so eva vicintayantaḥ |
pṛcchāmi tāvad bhagavantameva bhraṣṭo 'hamasmītyatha vā na veti || 8 ||
[Analyze grammar]

evaṃ ca me cintayato jinendra gacchanti rātriṃdiva nityakālam |
dṛṣṭvā ca anyān bahubodhisattvān saṃvarṇitāṃllokavināyakena || 9 ||
[Analyze grammar]

śrutvā ca so 'haṃ imu buddhadharmaṃ saṃghāya etatkila bhāṣitaṃ ti |
atarkikaṃ sūkṣmamanāsravaṃ ca jñānaṃ praṇetī jina bodhimaṇḍe || 10 ||
[Analyze grammar]

dṛṣṭīvilagno hyahamāsi pūrvaṃ parivrājakastīrthikasaṃmataśca |
tato mamā āśayu jñātva nātho dṛṣṭīvimokṣāya bravīti nirvṛtim || 11 ||
[Analyze grammar]

vimucya tā dṛṣṭikṛtāni sarvaśaḥ śūnyāṃśca dharmānahu sparśayitvā |
tato vijānāmyahu nirvṛto 'smi na cāpi nirvāṇamidaṃ pravucyati || 12 ||
[Analyze grammar]

yadā tu buddho bhavate 'grasattvaḥ puraskṛto naramaruyakṣarākṣasaiḥ |
dvātriṃśatīlakṣaṇarūpadhārī aśeṣato nirvṛtu bhoti tatra || 13 ||
[Analyze grammar]

vyapanīta sarvāṇi mi manyitāni śrutvā ca ghoṣaṃ ahamadya nirvṛtaḥ |
yadāpi vyākurvasi agrabodhau purato hi lokasya sadevakasya || 14 ||
[Analyze grammar]

balavacca āsīnmama chambhitatvaṃ prathamaṃ giraṃ śrutva vināyakasya |
mā haiva māro sa bhavedviheṭhako abhinirmiṇitvā bhuvi buddhaveṣam || 15 ||
[Analyze grammar]

yadā tu hetūhi ca kāraṇaiśca dṛṣṭāntakoṭīnayutaiśca darśitā |
suparisthitā sā varabuddhabodhistato 'smi niṣkāṅkṣu śruṇitva dharmam || 16 ||
[Analyze grammar]

yadā ca me buddhasahasrakoṭyaḥ kīrteṣyatī tān parinirvṛtān jinān |
yathā ca tairdeśitu eṣa dharma upāyakauśalya pratiṣṭhihitvā || 17 ||
[Analyze grammar]

anāgatāśco bahu buddha loke tiṣṭhanti ye co paramārthadarśinaḥ |
upāyakauśalyaśataiśca dharmaṃ nidarśayiṣyantyatha deśayanti ca || 18 ||
[Analyze grammar]

tathā ca te ātmana yādṛśī carī abhiniṣkramitvā prabhṛtīya saṃstutā |
buddhaṃ ca te yādṛśu dharmacakraṃ tathā ca te 'vasthita dharmadeśanā || 19 ||
[Analyze grammar]

tataśca jānāmi na eṣa māro bhūtāṃ cariṃ darśayi lokanāthaḥ |
na hyatra mārāṇa gatī hi vidyate mamaiva cittaṃ vicikitsaprāptam || 20 ||
[Analyze grammar]

yadā tu madhureṇa gabhīravalgunā saṃharṣito buddhasvareṇa cāham |
tadā mi vidhvaṃsita sarvasaṃśayā vicikitsa naṣṭā ca sthito 'smi jñāne || 21 ||
[Analyze grammar]

niḥsaṃśayaṃ bheṣyi tathāgato 'haṃ puraskṛto loki sadevake 'smin |
saṃghāya vakṣye imu buddhabodhiṃ samādapento bahubodhisattvān || 22 ||
[Analyze grammar]

bhaviṣyase śārisutā tuhaṃ pi anāgate 'dhvāni jinastathāgataḥ |
padmaprabho nāma samantacakṣurvineṣyase prāṇisahasrakoṭyaḥ || 23 ||
[Analyze grammar]

bahubuddhakoṭīṣu karitva satkriyāṃ caryābalaṃ tatra upārjayitvā |
utpādayitvā ca daśo balāni spṛśiṣyase uttamamagrabodhim || 24 ||
[Analyze grammar]

acintiye aparimitasmi kalpe prabhūtaratnastada kalpu bheṣyati |
virajā ca nāmnā tada lokadhātuḥ kṣetraṃ viśuddhaṃ dvipadottamasya || 25 ||
[Analyze grammar]

vaidūryasaṃstīrṇa tathaiva bhūmiḥ suvarṇasūtrapratimaṇḍitā ca |
ratnāmayairvṛkṣaśatairupetā sudarśanīyaiḥ phalapuṣpamaṇḍitaiḥ || 26 ||
[Analyze grammar]

smṛtimanta tasmin bahubodhisattvāḥ caryābhinirhārasukovidāśca |
ye śikṣitā buddhaśateṣu caryāṃ te tatra kṣetre upapadya santi || 27 ||
[Analyze grammar]

so cejjinaḥ paścimake samucchraye kumārabhūmīmatināmayitvā |
jahitva kāmānabhiniṣkamitvā spṛśiṣyate uttamamagrabodhim || 28 ||
[Analyze grammar]

sama dvādaśā antarakalpa tasya bhaviṣyate āyu tadā jinasya |
manujānapī antarakalpa aṣṭa āyuṣpramāṇaṃ tahi teṣa bheṣyati || 29 ||
[Analyze grammar]

parinirvṛtasyāpi jinasya tasya dvātriṃśatiṃ antarakalpa pūrṇām |
saddharma saṃsthāsyati tasmi kāle hitāya lokasya sadevakasya || 30 ||
[Analyze grammar]

saddharmi kṣīṇe pratirūpako 'sya dvātriṃśatī antarakalpa sthāsyati |
śarīravaistārika tasya tāyinaḥ susatkṛto naramarutaiśca nityam || 31 ||
[Analyze grammar]

etādṛśaḥ so bhagavān bhaviṣyati prahṛṣṭa tvaṃ śārisutā bhavasva |
tvameva so tādṛśako bhaviṣyasi anābhibhūto dvipadānamuttamaḥ || 32 ||
[Analyze grammar]

dharmacakraṃ pravartesi loke apratipudgala |
vārāṇasyāṃ mahāvīra skandhānāmudayaṃ vyayam || 33 ||
[Analyze grammar]

prathamaṃ pravartitaṃ tatra dvitīyamiha nāyaka |
duḥśraddadheya yasteṣāṃ deśito 'dya vināyaka || 34 ||
[Analyze grammar]

bahu dharmaḥ śruto 'smābhiarlokanāthasya saṃmukham |
na cāyamīdṛśo dharmaḥ śrutapūrvaḥ kadācana || 35 ||
[Analyze grammar]

anumodāma mahāvīra saṃdhābhāṣyaṃ maharṣiṇaḥ |
yathārtho vyākṛto hyeṣa śāriputro viśāradaḥ || 36 ||
[Analyze grammar]

vayamapyedṛśāḥ syāmo buddhā loke anuttarāḥ |
saṃdhābhāṣyeṇa deśento buddhabodhimanuttarām || 37 ||
[Analyze grammar]

yacchrutaṃ kṛtamasmābhirasmiṃlloke paratra vā |
ārāgitaśca yadbuddhaḥ prārthanā bhotu bodhaye || 38 ||
[Analyze grammar]

yathā hi puruṣasya bhavedagāraṃ jīrṇaṃ mahantaṃ ca sudurbalaṃ ca |
viśīrṇa prāsādu tathā bhaveta stambhāśca mūleṣu bhaveyu pūtikāḥ || 39 ||
[Analyze grammar]

gavākṣaharmyā galitaikadeśā viśīrṇa kuḍayaṃ kaṭalepanaṃ ca |
jīrṇu pravṛddhoddhṛtavedikaṃ ca tṛṇacchadaṃ sarvata opatantam || 40 ||
[Analyze grammar]

śatāna pañcāna anūnakānāṃ āvāsu so tatra bhaveta prāṇinām |
bahūni cā niṣkuṭasaṃkaṭāni uccārapūrṇāni jugupsitāni || 41 ||
[Analyze grammar]

gopānasī vigalita tatra sarvā kuḍayāśca bhittīśca tathaiva srastāḥ |
gṛdhrāṇa koṭyo nivasanti tatra pārāvatolūka tathānyapakṣiṇaḥ || 42 ||
[Analyze grammar]

āśīviṣā dāruṇa tatra santi deśapradeśeṣu mahāviṣogrāḥ |
vicitrikā vṛścikamūṣikāśca etāna āvāsu suduṣṭaprāṇinām || 43 ||
[Analyze grammar]

deśe ca deśe amanuṣya bhūyo uccāraprasrāvavināśitaṃ ca |
kṛmikīṭakhadyotakapūritaṃ ca śvabhiḥ śṛgālaiśca nināditaṃ ca || 44 ||
[Analyze grammar]

bheruṇḍakā dāruṇā tatra santi manuṣyakuṇapāni ca bhakṣayantaḥ |
teṣāṃ ca niryāṇu pratīkṣamāṇāḥ śvānāḥ śṛgālāśca vasantyaneke || 45 ||
[Analyze grammar]

te durbalā nitya kṣudhābhibhūtā deśeṣu deśeṣu vikhādamānāḥ |
kalahaṃ karontāśca ninādayanti subhairavaṃ tadgṛhamevarūpam || 46 ||
[Analyze grammar]

suraudracittā pi vasanti yakṣā manuṣyakuṇapāni vikaḍḍhamānāḥ |
deśeṣu deśeṣu vasanti tatra śatāpadī gonasakāśca vyālāḥ || 47 ||
[Analyze grammar]

deśeṣu deśeṣu ca nikṣipanti te potakānyālayanāni kṛtvā |
nyastāni nyastāni ca tāni teṣāṃ te yakṣa bhūyo paribhakṣayanti || 48 ||
[Analyze grammar]

yadā ca te yakṣa bhavanti tṛptāḥ parasattva khāditva suraudracittāḥ |
parasattvamāṃsaiḥ paritṛptagātrāḥ kalahaṃ tadā tatra karonti tīvram || 49 ||
[Analyze grammar]

vidhvastaleneṣu vasanti tatra kumbhāṇḍakā dārūṇaraudracittāḥ |
vitastimātrāstatha hastamātrā dvihastamātrāścanucaṃkramanti || 50 ||
[Analyze grammar]

te cāpi śvānān parigṛhya pādairuttānakān kṛtva tathaiva bhūmau |
grīvāsu cotpīḍya vibhartsayanto vyābādhayantaśca ramanti tatra || 51 ||
[Analyze grammar]

nānāśca kṛṣṇāśca tathaiva durbalā uccā mahantāśca vasanti pretāḥ |
jighatsitā bhojana mārgamāṇā ārtasvaraṃ krandiṣu tatra tatra || 52 ||
[Analyze grammar]

sūcīmukhā goṇamukhāśca kecit manuṣyamātrāstatha śvānamātrāḥ |
prakīrṇakeśāśca karonti śabdamāhāratṛṣṇāparidahyamānāḥ || 53 ||
[Analyze grammar]

caturdiśaṃ cātra vilokayanti gavākṣa-ullokanakehi nityam |
te yakṣa pretāśca piśācakāśca gṛdhrāśca āhāra gaveṣamāṇāḥ || 54 ||
[Analyze grammar]

etādṛśaṃ bhairavu tad gṛhaṃ bhavet mahantamuccaṃ ca sudurbalaṃ ca |
vijarjaraṃ durbalamitvaraṃ ca puruṣasya ekasya parigrahaṃ bhavet || 55 ||
[Analyze grammar]

sa ca bāhyataḥ syātpuruṣo gṛhasya niveśanaṃ tacca bhavetpradīptam |
sahasā samantena caturdiśaṃ ca jvālāsahasraiḥ paridīpyamānam || 56 ||
[Analyze grammar]

vaṃśāśca dārūṇi ca agnitāpitāḥ karonti śabdaṃ gurukaṃ subhairavam |
pradīpta stambhāśca tathaiva bhittayo yakṣāśca pretāśca mucanti nādam || 57 ||
[Analyze grammar]

jvālūṣitā gṛdhraśatāśca bhūyaḥ kumbhāṇḍakāḥ ploṣṭamukhā bhramanti |
samantato vyālaśatāśca tatra nadanti krośanti ca dahyamānāḥ || 58 ||
[Analyze grammar]

piśācakāstatra bahū bhramanti saṃtāpitā agnina mandapuṇyāḥ |
dantehi pāṭitva ti anyamanyaṃ rudhireṇa siñcanti ca dahyamānāḥ || 59 ||
[Analyze grammar]

bherūṇḍakāḥ kālagatāśca tatra khādanti sattvāśca ti anyamanyam |
uccāra dahyatyamanojñagandhaḥ pravāyate loki caturdiśāsu || 60 ||
[Analyze grammar]

śatāpadīyo prapalāyamānāḥ kumbhāṇḍakāstāḥ paribhakṣayanti |
pradīptakeśāśca bhramanti pretāḥ kṣudhāya dāhena ca dahyamānāḥ || 61 ||
[Analyze grammar]

etādṛśaṃ bhairava tanniveśanaṃ jvālāsahasrairhi viniścaradbhiḥ |
puruṣaśca so tasya gṛhasya svāmī dvārasmi asthāsi vipaśyamānaḥ || 62 ||
[Analyze grammar]

śṛṇoti cāsau svake atra putrān krīḍāpanaiḥ krīḍanasaktabuddhīn |
ramanti te krīḍanakapramattā yathāpi bālā avijānamānāḥ || 63 ||
[Analyze grammar]

śrutvā ca so tatra praviṣṭu kṣipraṃ pramocanārthāya tadātmajānām |
mā mahya bālā imi sarva dārakā dahyeyu naśyeyu ca kṣiprameva || 64 ||
[Analyze grammar]

sa bhāṣate teṣamagāradoṣān duḥkhaṃ idaṃ bhoḥ kulaputra dāruṇam |
vividhāśca sattveha ayaṃ ca agni mahantikā duḥkhaparaṃparā tu || 65 ||
[Analyze grammar]

āśīviṣā yakṣa suraudracittāḥ kumbhāṇḍa pretā bahavo vasanti |
bheruṇḍakāḥ śvānaśṛgālasaṃghā gṛdhrāśca āhāra gaveṣamāṇāḥ || 66 ||
[Analyze grammar]

etādṛśāsmin bahavo vasanti vināpi cāgneḥ paramaṃ subhairavam |
duḥkhaṃ idaṃ kevalamevarūpaṃ samantataścāgnirayaṃ pradīptaḥ || 67 ||
[Analyze grammar]

te codyamānāstatha bālabuddhayaḥ kumārakāḥ krīḍanake pramattāḥ |
na cintayante pitaraṃ bhaṇantaṃ na cāpi teṣāṃ manasīkaronti || 68 ||
[Analyze grammar]

puruṣaśca so tatra tadā vicintayet suduḥkhito 'smī iha putracintayā |
kiṃ mahya putrehi aputrakasya mā nāma dahyeyurihāgninā ime || 69 ||
[Analyze grammar]

upāyu so cintayi tasmi kāle lubdhā ime krīḍanakeṣu bālāḥ |
na cātra krīḍā ca ratī ca kācid bālāna ho yādṛśu mūḍhabhāvaḥ || 70 ||
[Analyze grammar]

sa tānavocachṛṇuthā kumārakā nānāvidhā yānaka yā mamāsti |
mṛgairajairgoṇavaraiśca yuktā uccā mahantā samalaṃkṛtā ca || 71 ||
[Analyze grammar]

tā bāhyato asya niveśanasya nirdhāvathā tehi karotha kāryam |
yuṣmākamarthe maya kāritāni niryātha taistuṣṭamanāḥ sametya || 72 ||
[Analyze grammar]

te yāna etādṛśakā niśāmya ārabdhavīryāstvaritā hi bhūtvā |
nirdhāvitāstatkṣaṇameva sarve ākāśi tiṣṭhanti dukhena muktāḥ || 73 ||
[Analyze grammar]

puruṣaśca so nirgata dṛṣṭva dārakān grāmasya madhye sthitu catvarasmin |
upaviśya siṃhāsani tānuvāca aho ahaṃ nirvṛtu adya mārṣāḥ || 74 ||
[Analyze grammar]

ye duḥkhalabdhā mama te tapasvinaḥ putrā priyā orasa viṃśa bālāḥ |
te dārūṇe durgagṛhe abhūvan bahūjantūpūrṇe ca subhairave ca || 75 ||
[Analyze grammar]

ādīptake jvālasahasrapūrṇe ratā ca te krīḍaratīṣu āsan |
mayā ca te mocita adya sarve yenāhu nirvāṇu samāgato 'dya || 76 ||
[Analyze grammar]

sukhasthitaṃ taṃ pitaraṃ viditvā upagamya te dāraka evamāhuḥ |
dadāhi nastāta yathābhibhāṣitaṃ trividhāni yānāni manoramāṇi || 77 ||
[Analyze grammar]

sacettava satyaka tāta sarvaṃ yadbhāṣitaṃ tatra niveśane te |
trividhāni yānāni ha saṃpradāsye dadasva kālo 'yamihādya teṣām || 78 ||
[Analyze grammar]

puruṣaśca so kośabalī bhaveta suvarṇarūpyāmaṇimuktakasya |
hiraṇya dāsāśca analpakāḥ syurupasthape ekavidhā sa yānā || 79 ||
[Analyze grammar]

ratnāmayā goṇarathā viśiṣṭā savedikāḥ kiṅkiṇijālanaddhāḥ |
chatradhvajebhiḥ samalaṃkṛtāśca muktāmaṇījālikachāditāśca || 80 ||
[Analyze grammar]

suvarṇapuṣpāṇa kṛtaiśca dāmairdeśeṣu deśeṣu pralambamānaiḥ |
bastrairudāraiḥ parisaṃvṛtāśca pratyāstṛtā dūṣyavaraiśca śuklaiḥ || 81 ||
[Analyze grammar]

mṛdukān paṭṭāna tathaiva tatra varatūlikāsaṃstṛta ye 'pi te rathāḥ |
pratyāstṛtāḥ koṭisahasramūlyairvaraiśca kockairbakahaṃsalakṣaṇaiḥ || 82 ||
[Analyze grammar]

śvetāḥ supuṣṭā balavanta goṇā mahāpramāṇā abhidarśanīyāḥ |
ye yojitā ratnaratheṣu teṣu parigṛhītāḥ puruṣairanekaiḥ || 83 ||
[Analyze grammar]

etādṛśān so puruṣo dadāti putrāṇa sarvāṇa varān viśiṣṭān |
te cāpi tuṣṭāttamanāśca tehi diśāśca vidiśāśca vrajanti krīḍakāḥ || 84 ||
[Analyze grammar]

emeva haṃ śārisutā maharṣī sattvāna trāṇaṃ ca pitā ca bhomi |
putrāśca te prāṇina sarvi mahyaṃ traidhātuke kāmavilagna bālāḥ || 85 ||
[Analyze grammar]

traidhātukaṃ co yatha tanniveśanaṃ subhairavaṃ duḥkhaśatābhikīrṇam |
aśeṣataḥ prajvalitaṃ samantājjātījarāvyādhiśatairanekaiḥ || 86 ||
[Analyze grammar]

ahaṃ ca traidhātukamukta śānto ekāntasthāyī pavane vasāmi |
traidhātukaṃ co mamidaṃ parigraho ye hyatra dahyanti mamaiti putrāḥ || 87 ||
[Analyze grammar]

ahaṃ ca ādīnava tatra darśayī viditva trāṇaṃ ahameva caiṣām |
na caiva me te śruṇi sarvi bālā yathāpi kāmeṣu vilagnabuddhayaḥ || 88 ||
[Analyze grammar]

upāyakauśalyamahaṃ prayojayī yānāni trīṇi pravadāmi caiṣām |
jñātvā ca traidhātuki nekadoṣān nirdhāvanārthāya vadāmyupāyam || 89 ||
[Analyze grammar]

māṃ caiva ye niśrita bhonti putrāḥ ṣaḍabhijña traividya mahānubhāvāḥ |
pratyekabuddhāśca bhavanti ye 'tra avivartikā ye ciha bodhisattvāḥ || 90 ||
[Analyze grammar]

samāna putrāṇa hu teṣa tatkṣaṇamimena dṛṣṭāntavareṇa paṇḍita |
vadāmi ekaṃ imu buddhayānaṃ parigṛhṇathā sarvi jinā bhaviṣyatha || 91 ||
[Analyze grammar]

taccā variṣṭhaṃ sumanoramaṃ ca viśiṣṭarūpaṃ ciha sarvaloke |
buddhāna jñānaṃ dvipadottamānāmudārarūpaṃ tatha vandanīyam || 92 ||
[Analyze grammar]

balāni dhyānāni tathā vimokṣāḥ samādhināṃ koṭiśatā ca nekā |
ayaṃ ratho īdṛśako variṣṭho ramanti yeno sada buddhaputrāḥ || 93 ||
[Analyze grammar]

krīḍanta etena kṣapenti rātrayo divasāṃśca pakṣānṛtavo 'tha māsān |
saṃvatsarānantarakalpameva ca kṣapenti kalpāna sahasrakoṭyaḥ || 94 ||
[Analyze grammar]

ratnāmayaṃ yānamidaṃ variṣṭhaṃ gacchanti yeno iha bodhimaṇḍe |
vikrīḍamānā bahubodhisattvā ye co śṛṇonti sugatasya śrāvakāḥ || 95 ||
[Analyze grammar]

evaṃ prajānāhi tvamadya tiṣya nāstīha yānaṃ dvitiyaṃ kahiṃcit |
diśo daśā sarva gaveṣayitvā sthāpetvupāyaṃ puruṣottamānām || 96 ||
[Analyze grammar]

putrā mamā yūyamahaṃ pitā vo mayā ca niṣkāsita yūya duḥkhāt |
paridahyamānā bahukalpakoṭayastraidhātukāto bhayabhairavātaḥ || 97 ||
[Analyze grammar]

evaṃ ca haṃ tatra vadāmi nirvṛtimanirvṛtā yūya tathaiva cādya |
saṃsāraduḥkhādiha yūya muktā bauddhaṃ tu yānaṃ va gaveṣitavyam || 98 ||
[Analyze grammar]

ye bodhisattvāśca ihāsti kecicchṛṇvanti sarve mama buddhanetrīm |
upāyakauśalyamidaṃ jinasya yeno vinetī bahubodhisattvān || 99 ||
[Analyze grammar]

hīneṣu kāmeṣu jugupsiteṣu ratā yadā bhontimi atra sattvāḥ |
duḥkhaṃ tadā bhāṣati lokanāyako ananyathāvādirihāryasatyam || 100 ||
[Analyze grammar]

ye cāpi duḥkhasya ajānamānā mūlaṃ na paśyantiha bālabuddhayaḥ |
mārgaṃ hi teṣāmanudarśayāmi samudāgamastṛṣṇa dukhasya saṃbhavaḥ || 101 ||
[Analyze grammar]

tṛṣṇānirodho 'tha sadā aniśritā nirodhasatyaṃ tṛtiyaṃ idaṃ me |
ananyathā yena ca mucyate naro mārgaṃ hi bhāvitva vimukta bhoti || 102 ||
[Analyze grammar]

kutaśca te śārisutā vimuktā asantagrāhātu vimukta bhonti |
na ca tāva te sarvata mukta bhonti anirvṛtāṃstān vadatīha nāyakaḥ || 103 ||
[Analyze grammar]

kikāraṇaṃ nāsya vadāmi mokṣamaprāpyimāmuttamamagrabodhim |
mamaiṣa chando ahu dharmarājā sukhāpanārthāyiha loki jātaḥ || 104 ||
[Analyze grammar]

iya śāriputrā mama dharmamudrā yā paścime kāli mayādya bhāṣitā |
hitāya lokasya sadevakasya diśāsu vidiśāsu ca deśayasva || 105 ||
[Analyze grammar]

yaścāpi te bhāṣati kaści sattvo anumodayāmīti vadeta vācam |
mūrdhnena cedaṃ pratigṛhya sūtraṃ avivartikaṃ taṃ naru dhārayestvam || 106 ||
[Analyze grammar]

dṛṣṭāśca teno purimāstathāgatāḥ satkāru teṣāṃ ca kṛto abhūṣi |
śrutaśca dharmo ayamevarūpo ya eta sūtraṃ abhiśraddadheta || 107 ||
[Analyze grammar]

ahaṃ ca tvaṃ caiva bhaveta dṛṣṭo ayaṃ ca sarvo mama bhikṣusaṃghaḥ |
dṛṣṭāśca sarve imi bodhisattvā ye śraddadhe bhāṣitameta mahyam || 108 ||
[Analyze grammar]

sūtraṃ imaṃ bālajanapramohanamabhijñajñānāna mi etu bhāṣitam |
viṣayo hi naivāstiha śrāvakāṇāṃ pratyekabuddhāna gatirna cātra || 109 ||
[Analyze grammar]

adhimuktisārastuva śāriputra kiṃ vā punarmahya ime 'nyaśrāvakāḥ |
ete 'pi śraddhāya mamaiva yānti pratyātmikaṃ jñānu na caiva vidyate || 110 ||
[Analyze grammar]

mā caiva tvaṃ stambhiṣu mā ca māniṣu māyuktayogīna vadesi etat |
bālā hi kāmeṣu sadā pramattā ajānakā dharmu kṣipeyu bhāṣitam || 111 ||
[Analyze grammar]

upāyakauśalya kṣipitva mahyaṃ yā buddhanetrī sada loki saṃsthitā |
bhṛkuṭiṃ karitvāna kṣipitva yānaṃ vipāku tasyeha śṛṇohi tīvram || 112 ||
[Analyze grammar]

kṣipitva sūtraṃ idamevarūpaṃ mayi tiṣṭhamāne parinirvṛte vā |
bhikṣūṣu vā teṣu khilāni kṛtvā teṣāṃ vipākaṃ mamihaṃ śṛṇohi || 113 ||
[Analyze grammar]

cyutvā manuṣyeṣu avīci teṣāṃ pratiṣṭha bhotī paripūrṇakalpāt |
tataśca bhūyo 'ntarakalpa nekāṃścyutāścyutāstatra patanti bālāḥ || 114 ||
[Analyze grammar]

yadā ca narakeṣu cyutā bhavanti tataśca tiryakṣu vrajanti bhūyaḥ |
sudurbalāḥ śvānaśṛgālabhūtāḥ pareṣa krīḍāpanakā bhavanti || 115 ||
[Analyze grammar]

varṇena te kālaka tatra bhonti kalmāṣakā vrāṇika kaṇḍulāśca |
nirlomakā durbala bhonti bhūyo vidveṣamāṇā mama agrabodhim || 116 ||
[Analyze grammar]

jugupsitā prāṇiṣu nitya bhonti loṣṭaprahārābhihatā rudantaḥ |
daṇḍena saṃtrāsita tatra tatra kṣudhāpipāsāhata śuṣkagātrāḥ || 117 ||
[Analyze grammar]

uṣṭrātha vā gardabha bhonti bhūyo bhāraṃ vahantaḥ kaśadaṇḍatāḍitāḥ |
āhāracintāmanucintayanto ye buddhanetrī kṣipi bālabuddhayaḥ || 118 ||
[Analyze grammar]

punaśca te kroṣṭuka bhonti tatra bībhatsakāḥ kāṇaka kuṇṭhakāśca |
utpīḍitā grāmakumārakehi loṣṭaprahārābhihatāśca bālāḥ || 119 ||
[Analyze grammar]

tataścyavitvāna ca bhūyu bālāḥ pañcāśatīnāṃ sama yojanānām |
dīrghātmabhāvā hi bhavanti prāṇino jaḍāśca mūḍhāḥ parivartamānāḥ || 120 ||
[Analyze grammar]

apādakā bhonti ca kroḍasakkino vikhādyamānā bahuprāṇikoṭibhiḥ |
sudāruṇāṃ te anubhonti vedanāṃ kṣipitva sūtraṃ idamevarūpam || 121 ||
[Analyze grammar]

puruṣātmabhāvaṃ ca yada labhante te kuṇṭhakā laṅgaka bhonti tatra |
kubjātha kāṇā ca jaḍā jaghanyā aśraddadhantā ima sūtra mahyam || 122 ||
[Analyze grammar]

apratyanīyāśca bhavanti loke pūtī mukhātteṣa pravāti gandhaḥ |
yakṣagraho ukrami teṣa kāye aśraddadhantānima buddhabodhim || 123 ||
[Analyze grammar]

daridrakā peṣaṇakārakāśca upasthāyakā nitya parasya durbalāḥ |
ābādha teṣāṃ bahukāśca bhonti anāthabhūtā viharanti loke || 124 ||
[Analyze grammar]

yasyaiva te tatra karonti sevanāmadātukāmo bhavatī sa teṣām |
dattaṃ pi co naśyati kṣiprameva phalaṃ hi pāpasya imevarūpam || 125 ||
[Analyze grammar]

yaccāpi te tatra labhanti auṣadhaṃ suyuktarūpaṃ kuśalehi dattam |
tenāpi teṣāṃ ruja bhūyu vardhate so vyādhirantaṃ na kadāci gacchati || 126 ||
[Analyze grammar]

anyehi cauryāṇi kṛtāni bhonti ḍamarātha ḍimbāstatha vigrahāśca |
dravyāpahārāśca kṛtāstathānyairnipatanti tasyopari pāpakarmaṇaḥ || 127 ||
[Analyze grammar]

na jātu so paśyati lokanāthaṃ narendrarājaṃ mahi śāsamānam |
tasyākṣaṇeṣveva hi vāsu bhoti imāṃ kṣipitvā mama buddhanetrīm || 128 ||
[Analyze grammar]

na cāpi so dharma śṛṇoti bālo badhiraśca so bhoti acetanaśca |
kṣipitva bodhīmimamevarūpāmupaśānti tasyo na kadāci bhoti || 129 ||
[Analyze grammar]

sahasra nekā nayutāṃśca bhūyaḥ kalpāna koṭyo yatha gaṅgavālikāḥ |
jaḍātmabhāvo vikalaśca bhoti kṣipitva sūtraṃ imu pāpakaṃ phalam || 130 ||
[Analyze grammar]

udyānabhūmī narako 'sya bhoti niveśanaṃ tasya apāyabhūmiḥ |
kharasūkarā kroṣṭuka bhūmisūcakāḥ pratiṣṭhitasyeha bhavanti nityam || 131 ||
[Analyze grammar]

manuṣyabhāvatvamupetya cāpi andhatva badhiratva jaḍatvameti |
parapreṣya so bhoti daridra nityaṃ tatkāli tasyābharaṇānimāni || 132 ||
[Analyze grammar]

vastrāṇi co vyādhayu bhonti tasya vraṇāna koṭīnayutāśca kāye |
vicarcikā kaṇḍu tathaiva pāmā kuṣṭhaṃ kilāsaṃ tatha āmagandhaḥ || 133 ||
[Analyze grammar]

satkāyadṛṣṭiśca ghanāsya bhoti udīryate krodhabalaṃ ca tasya |
saṃrāgu tasyātibhṛśaṃ ca bhoti tiryāṇa yonīṣu ca so sadā ramī || 134 ||
[Analyze grammar]

sacedahaṃ śārisutādya tasya paripūrṇakalpaṃ pravadeya doṣān |
yo hī mamā etu kṣipeta sūtraṃ paryantu doṣāṇa na śakya gantum || 135 ||
[Analyze grammar]

saṃpaśyamāno idameva cārthaṃ tvāṃ saṃdiśāmī ahu śāriputra |
mā haiva tvaṃ bālajanasya agrato bhāṣiṣyase sūtramimevarūpam || 136 ||
[Analyze grammar]

ye tū iha vyakta bahuśrutāśca smṛtimanta ye paṇḍita jñānavantaḥ |
ye prasthitā uttamamagrabodhiṃ tān śrāvayestvaṃ paramārthametat || 137 ||
[Analyze grammar]

dṛṣṭāśca yehī bahubuddhakoṭyaḥ kuśalaṃ ca yai ropitamaprameyam |
adhyāśayāścā dṛḍha yeṣa co syāttān śrāvayestvaṃ paramārthametat || 138 ||
[Analyze grammar]

ye vīryavantaḥ sada maitracittā bhāventi maitrīmiha dīrgharātram |
utsṛṣṭakāyā tatha jīvite ca teṣāmidaṃ sūtra bhaṇeḥ samakṣam || 139 ||
[Analyze grammar]

anyonyasaṃkalpa sagauravāśca teṣāṃ ca bālehi na saṃstavo 'sti |
ye cāpi tuṣṭā girikandareṣu tān śrāvayestvaṃ ida sūtra bhadrakam || 140 ||
[Analyze grammar]

kalyāṇamitrāṃśca niṣevamāṇāḥ pāpāṃśca mitrān parivarjayantaḥ |
yānīdṛśān paśyasi buddhaputrāṃsteṣāmidaṃ sūtra prakāśayesi || 141 ||
[Analyze grammar]

acchidraśīlā maṇiratnasādṛśā vaipulyasūtrāṇa parigrahe sthitāḥ |
paśyesi yānīdṛśa buddhaputrāṃsteṣāgrataḥ sūtramidaṃ vadesi || 142 ||
[Analyze grammar]

akrodhanā ye sada ārjavāśca kṛpāsamanvāgata sarvaprāṇiṣu |
sagauravā ye sugatasya antike teṣāgrataḥ sūtramidaṃ vadesi || 143 ||
[Analyze grammar]

yo dharmu bhāṣe pariṣāya madhye asaṅgaprāpto vadi yuktamānasaḥ |
dṛṣṭāntakoṭīnayutairanekaistasyeda sūtraṃ upadarśayesi || 144 ||
[Analyze grammar]

mūrdhnāñjaliṃ yaśca karoti baddhvā sarvajñabhāvaṃ parimārgamāṇaḥ |
daśo diśo yo 'pi ca caṃkrameta subhāṣitaṃ bhikṣu gaveṣamāṇaḥ || 145 ||
[Analyze grammar]

vaipulyasūtrāṇi ca dhārayeta na cāsya rucyanti kadācidanye |
ekāṃ pi gāthāṃ na ca dhāraye 'nyatastaṃ śrāvayestvaṃ varasūtrametat || 146 ||
[Analyze grammar]

tathāgatasyo yatha dhātu dhārayettathaiva yo mārgati koci taṃ naraḥ |
emeva yo mārgati sūtramīdṛśaṃ labhitva yo mūrdhani dhārayeta || 147 ||
[Analyze grammar]

anyeṣu sūtreṣu na kāci cintā lokāyatairanyataraiśca śāstraiḥ |
bālāna etādṛśa bhonti gocarāstāṃstvaṃ vivarjitva prakāśayeridam || 148 ||
[Analyze grammar]

pūrṇaṃ pi kalpaṃ ahu śāriputra vadeyamākāra sahasrakoṭyaḥ |
ye prasthitā uttamamagrabodhiṃ teṣāgrataḥ sūtramidaṃ vadesi || 149 ||
[Analyze grammar]