Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 3.14
nanu ko'yaṃ dharmītyāśaṅkya dharmiṇo lakṣaṇamāha —
śāntoditāvyapadeśyadharmānupātī dharmī || vibhūti 14 ||
vṛttiḥ — śāntā ye kṛtasvasvavyāpārā atīte'dhvani anupraviṣṭāḥ | uditā ya anāgatamadhvānaṃ parityajya vartamāne'dhvani svavyāpāraṃ kurvanti | avyapadeśyā ye śaktirūpeṇa sthitā vyapadeṣṭuṃ na śakyante | teṣāṃ yathāsvaṃ sarvātmakatvamityevamādayo niyatakāryakāraṇarūpayogyatayāvacchinnā śaktireveha dharmaśabdenābhidhīyate | taṃ trividhamapi dharmaṃ yo'nupatatyanuvartate'nvayitvena svīkaroti sa śāntoditāvyapadeśyadharmānupātī dharmītyucyate | yathā — suvarṇaṃ rucakarūpadharmaparityāgena svastikarūpadharmāntaraparigrahe suvarṇarūpatayā'nuvartamānaṃ teṣu dharmeṣu kathaṃcidbhinneṣu dharmirūpatayā sāmānyātmanā dharmarūpatayā viśeṣātmanā sthitamanvayitvenāvabhāsate || 14 ||