Chapter 8

[English text for this chapter is available]

lopāmudrovāca |
jīviteśa kathāmetāṃ puṇyāṃ puṇyapurīśritām |
na tṛptimadhigacchāmi śrutvā tvacchrīmukheritām || 1 ||
[Analyze grammar]

māyāpuryāṃ muktipuryāṃ śivaśarmā dvijottamaḥ |
mṛtopi mokṣaṃ naivāpa brūhi tatkāraṇaṃ vibho || 2 ||
[Analyze grammar]

agastya uvāca |
sākṣanmokṣo na caitāsu purīṣu priyabhāṣiṇi |
puroddiśyāmumevārthamitihāso mayāśrutaḥ || 3 ||
[Analyze grammar]

śṛṇu kāṃte vicitrārthāṃ kathāṃ pāpapraṇāśinīm |
puṇyaśīlasuśīlābhyāṃ kathitāṃ śivaśarmaṇe || 4 ||
[Analyze grammar]

śivaśarmovāca |
ayi viṣṇugaṇau puṇyau puṃḍarīkadalekṣaṇau |
kiṃcidvijñaptukāmohaṃ pravṛddhakarasaṃpuṭaḥ || 5 ||
[Analyze grammar]

na nāma yuvayorvedmi vedmyākṛtyā ca kiṃcana |
puṇyaśīlasuśīlākhyau yuvāṃ bhavitumarhathaḥ || 6 ||
[Analyze grammar]

gaṇā vūcatuḥ |
bhagavadbhaktiyuktānāṃ kimajñātaṃ bhavādṛśām |
etadeva hi nau nāma yaduktaṃ śrīmatā tvayā || 7 ||
[Analyze grammar]

yadanyadapi te citte praṣṭavyaṃ tadaśaṃkitam |
saṃpṛcchasva mahāprājña prītyā tatprabravāvahe || 8 ||
[Analyze grammar]

iti śrutvā sa vacanaṃ bhagavadgaṇabhāṣitam |
atiprītikaraṃ hṛdyaṃ tatastau pratyuvāca ha || 9 ||
[Analyze grammar]

divya dvija uvāca |
ka eṣa loko 'lpaśrīkaḥ svalpapuṇyajanākṛtiḥ |
ka ime vikṛtākārā brūtametanmamāgrataḥ || 10 ||
[Analyze grammar]

gaṇāvūcatuḥ |
ayaṃ piśācalokotra vasaṃti piśitāśanāḥ |
dattvānutāpabhājo ye nono kṛtvā dadatyapi || 11 ||
[Analyze grammar]

śivaṃ prasaṃgatobhyarcya sakṛttvaśucicetasaḥ |
alpapuṇyālpalakṣmī kāḥ piśācāsta ime sakhe || 12 ||
[Analyze grammar]

tato gacchandadarśāgre hṛṣṭapuṣṭajanāvṛtam |
picaṃḍilaiḥ sthūlavaktrairmeghagaṃbhīraniḥsvanaiḥ || 13 ||
[Analyze grammar]

lokairapyuṣitaṃ lokaṃ śyāmalāṃgaiśca lomaśaiḥ |
gaṇau kathayatāṃ kemī ko lokaḥ puṇyataḥ kutaḥ || 14 ||
[Analyze grammar]

gaṇāvūcatuḥ |
guhyakānāmayaṃ lokastvete vai guhyakāḥ smṛtāḥ |
nyāyenopārjya vittāni gūhayaṃti ca ye bhuvi || 15 ||
[Analyze grammar]

svamārgagādhanāḍhyāśca śūdraprāyāḥ kuṭuṃbinaḥ |
saṃvibhajya ca bhoktāraḥ krodhāsūyāvivarjitāḥ || 16 ||
[Analyze grammar]

na tithiṃ naiva vāraṃ ca saṃkrātyādi na parva ca |
nādharmaṃ na ca dharmaṃ ca vidaṃtyete sadā sukhāḥ || 17 ||
[Analyze grammar]

ekameva hi jānaṃti kulapūjyo hi yo dvijaḥ |
tasmai gāḥ saṃprayacchaṃti manyaṃte tadvacaḥsphuṭam || 18 ||
[Analyze grammar]

samṛddhibhājohyatrāpi tena puṇyena guhyakāḥ |
bhuṃjate svargasaukhyāni devavaccākutobhayāḥ || 19 ||
[Analyze grammar]

tato vilokayāmāsa lokaṃ locanaśarmadam |
ke'mī janāstvasau lokaḥ kiṃnāmā vadatāṃ gaṇau || 20 ||
[Analyze grammar]

gaṇāvūcatuḥ |
gāṃdharvastveṣaloko'mī gaṃdharvāśca śubhavratāḥ |
devānāṃ gāyanādyete cāraṇāḥ stutipāṭhakāḥ || 21 ||
[Analyze grammar]

gītajñā atigītena toṣayaṃti narādhipān |
stuvaṃti ca dhanāḍhyāṃśca dhanalobhena mohitā || 22 ||
[Analyze grammar]

rājñāṃ prasādalabdhāni suvāsāṃsi dhanānyapi |
dravyāṇyapi sugaṃdhīni karpūrādīnyanekaśaḥ || 23 ||
[Analyze grammar]

brāhmaṇebhyaḥ prayacchaṃti gītaṃ gāyaṃtyaharniśam |
śrutāveva manasteṣāṃ nāṭyaśāstrakṛtaśramāḥ || 24 ||
[Analyze grammar]

tena puṇyena gāṃdharvo lokastveṣāṃ viśiṣyate |
brāhmaṇāstoṣitā yadvai gītavidyārjitairdhanaiḥ || 25 ||
[Analyze grammar]

gītavidyāprabhāvena devarṣirnārado mahān |
mānyo vaiṣṇavaloke vai śrīśaṃbhoścātivallabhaḥ || 26 ||
[Analyze grammar]

tuṃbururnā radaścobhau devānāmatidurlabhau |
nādarūpī śivaḥ sākṣānnādatattvavidau hi tau || 27 ||
[Analyze grammar]

yadi gītaṃ kvacidgītaṃ śrīmaddhariharāṃtike |
mokṣastu tatphalaṃ prāhuḥ sā nnidhyamathavā tayoḥ || 28 ||
[Analyze grammar]

gītajño yadi gītena nāpnoti paramaṃ padam |
rudrasyānucaro bhūtvā tenaiva saha modate || 29 ||
[Analyze grammar]

asmiṃlloke sadā kālaṃ smṛtire ṣā pragīyate |
tadgītamālayā pūjyau devau hariharau sadā || 30 ||
[Analyze grammar]

iti śṛṇvankṣaṇātprāpa punaranyanmanoharam |
śivaśarmātha papraccha kiṃ saṃjñaṃ nagaraṃ tvidam || 31 ||
[Analyze grammar]

gaṇāvūcatuḥ |
asau vaidyādharo loko nānā vidyā viśāradāḥ |
ete vidyārthināmannamupānadvastrakaṃbalam || 32 ||
[Analyze grammar]

auṣadhānyapi yacchaṃ ti tatpīḍāśamanāni hi |
nānākalāḥ śikṣayaṃti vidyāgarvavivarjitāḥ || 33 ||
[Analyze grammar]

śiṣyaṃ putreṇa paśyaṃti vastra tāṃbūla bhojanaiḥ |
alaṃkṛtāśca satkanyā dharmā dudvāhayaṃti ca || 34 ||
[Analyze grammar]

abhilāṣadhiyā nityaṃ pūjayaṃtīṣṭadevatāḥ |
etaḥ puṇyairvasaṃtīha vidyādhara varā ime || 35 ||
[Analyze grammar]

yāvaditthaṃ kathāṃ cakrustāvatsaṃyaminīpatiḥ |
dharmarājobhisaṃprāpto devaduṃdubhi niḥsvanaiḥ || 36 ||
[Analyze grammar]

somyamūrtirvimānastho dharmajñaiḥ parivāritaḥ |
sevākarmasu caturairbhṛtyaistricaturaiḥ saha || 37 ||
[Analyze grammar]

dharmarāja uvāca |
sādhusādhu mahābuddhe śivaśarmandvijottama |
kulocitaṃ brāhmaṇānāṃ bhavatā pratipāditam || 38 ||
[Analyze grammar]

vedābhyāsaḥ kṛtaḥ pūrvaṃ guravaścāpi toṣitāḥ |
dharmaśāstrapurāṇe ṣu dṛṣṭo dharmastvayā'dṛtaḥ || 39 ||
[Analyze grammar]

kṣālitaṃ muktipuryadbhirāśugaṃtṛśarīrakam |
kovido'sti bhavāneva jīvite jīvitetare || 40 ||
[Analyze grammar]

kalevaraṃ pūtigaṃdhi sadaivāśucibhājanam |
sutīrthapuṇya paṇyena samyagvinimitaṃ tvayā || 41 ||
[Analyze grammar]

ataevāhi pāṃḍityamādriṃyate vicakṣaṇāḥ |
ahaḥkṣepaṃ na kṣipaṃti kṣaṇamekaṃ hi te budhāḥ || 42 ||
[Analyze grammar]

nimeṣānpaṃcapānmartye prāṇaṃti prāṇino dhruvam |
tatrāpi na pravarteyuraghakarmaṇi garhite || 43 ||
[Analyze grammar]

sthirāpāyaḥ sadā kāyo na dhanaṃ nidhane'vati |
tanmūḍhaḥ prauḍhakārye kiṃ na yateta bhavāniva || 44 ||
[Analyze grammar]

satvaraṃ gatvaraṃ cāyurlokaḥ śokasamākulaḥ |
tasmāddharme matiḥ kāryā bhavateva sudhārmikaiḥ || 45 ||
[Analyze grammar]

satkarmaṇo vipāko'yaṃ tava vaṃdyau mamāpyaho |
yadetau bhagavadbhaktau sakhitvaṃ bhavato gatau || 46 ||
[Analyze grammar]

mamājñā dīyatāṃ tasmātsāhāyyaṃ karavāṇi kim |
yatkartavyaṃ mādṛśaiste tatkṛtaṃ bhavataivahi || 47 ||
[Analyze grammar]

adya dhanyatarosmīha yaddṛṣṭau bhagavadgaṇau |
sevā sadaiva me jñāpyā śrīmaccaraṇasannidhau || 48 ||
[Analyze grammar]

tataḥ prasthāpitastābhyāṃ prāviśatsvapurīṃ yamaḥ |
aprākṣīcca tato viprastau gaṇau prasthite yame || 49 ||
[Analyze grammar]

śivaśarmovāca |
sākṣādayaṃ dharmarājo nanu saumyatarākṛtiḥ |
dharmyāṇyeva vacāṃsyasya manaḥ prītikarāṇi ca || 50 ||
[Analyze grammar]

purī saṃyamanī seyamatīva śubhalakṣaṇā |
ākarṇya yasya nāmāpi pāpino'tīva bibhyati || 51 ||
[Analyze grammar]

yamarūpaṃ varṇa yaṃti martyaloke'nyathā janāḥ |
anyathā'yaṃ mayā dṛṣṭo brūtaṃ tatkāraṇaṃ gaṇau || 52 ||
[Analyze grammar]

kena paśyaṃtyamuṃ lokaṃ nivasaṃti tathātra ke |
idamevāsya kiṃ rūpaṃ kiṃ cānyacca nivedyatām || 53 ||
[Analyze grammar]

gaṇāvūcatuḥ |
śṛṇu saumya susaumyo'sau dṛśyatetra bhavādṛśaiḥ |
dharmamūrtiḥ prakṛtyaiva niḥśaṃkaiḥ puṇyarāśibhiḥ || 54 ||
[Analyze grammar]

ayameva hi piṃgākṣaḥ krodharaktāṃtalocanaḥ |
daṃṣṭrākarālavadano vidyullalanabhīṣaṇaḥ || 55 ||
[Analyze grammar]

ūrdhvakeśo'tikṛṣṇāṃgaḥ pralayāṃbudaniḥsvanaḥ |
kāladaṃḍodyatakaro bhukuṭī kuṭilānanaḥ || 56 ||
[Analyze grammar]

ānayainaṃ pātayainaṃ badhānāmuṃca durdama |
ghātayainaṃ sudurvṛttaṃ mūrdhni tīvramayoghanaiḥ || 57 ||
[Analyze grammar]

ātāḍayainaṃ durvṛttaṃ dhṛtvā pādau śilātale |
utpāṭayāsya netre tvaṃ nidhāya caraṇaṃ gale || 58 ||
[Analyze grammar]

etasya gallāvutphullau kṣureṇāśuvi pāṭaya |
pāśena kaṃṭhaṃ baddhāsya samullaṃbaya bhūruhe || 59 ||
[Analyze grammar]

vidārayāsya mūrdhānaṃ karapatreṇa dāruvat |
pārṣṇighātairghnatāsyāsyaṃ samuccūrṇaya dāruṇaiḥ || 60 ||
[Analyze grammar]

paradāraprasṛmaraṃ karaṃ chiṃdhyasya pāpinaḥ |
paradāragṛhaṃ yātuḥ pādau cāsya vikhaṃḍaya || 61 ||
[Analyze grammar]

sūcībhī romakūpeṣu tanuṃ vyadhihi sarvataḥ |
dātuḥ parakalatrāṃge nakhapaṃktī durātmanaḥ || 62 ||
[Analyze grammar]

paradāramukhāghrāturmukhe niṣṭhīvayāsya hi |
vaktuḥ parāpavādasya kīlaṃ tīkṣṇaṃ mukhe kṣipa || 63 ||
[Analyze grammar]

bharjayainaṃ caṇakavattaptavāluka karparaiḥ |
bhrāṣṭre vikaṭavaktratvaṃ parasaṃtāpakāriṇam || 64 ||
[Analyze grammar]

doṣāropaṃ sadākarturadoṣe krūralocana |
nimajjayāsya vadanaṃ pūyaśoṇitakardame || 65 ||
[Analyze grammar]

adattaparavastūnāṃ gṛhṇataḥ karapallavam |
āplutyāplutya tailena taptāṃgāre pacotkaṭa || 66 ||
[Analyze grammar]

apavādaṃ gurorvakturniṃdākartuḥ suparvaṇām |
taptalohaśalākāśca mukhe bhīṣaṇa nikṣipa || 67 ||
[Analyze grammar]

paramarma spṛśaścāsya paracchidraprakāśituḥ |
sutaptāyomayāñcchaṃkūnsarvasaṃdhiṣu ropaya || 68 ||
[Analyze grammar]

anye na dīyamāne sve niṣeddhuḥpāpakāriṇaḥ |
ācchettuḥ paravṛttīnāṃ jihvāṃ chiṃdhyasya durmukha || 69 ||
[Analyze grammar]

devasvabhoktuḥ kroḍāsya brāhmaṇasvasyabhojinaḥ |
vidāryodaramasyāśu viṭkīṭaiḥ paripūraya || 70 ||
[Analyze grammar]

na devārthe na viprārthe nātithyarthe pacetkvacit |
tamamuṃ svārthapaktāraṃ kuṃbhīpāke pacāṃdhaka || 71 ||
[Analyze grammar]

ugrāsya śiśuhaṃtāramamuṃ viśraṃbhaghātinam |
kṛtaghnaṃ naya vegena mahāraurava rauravam || 72 ||
[Analyze grammar]

brahmaghnaṃ cāṃdhatāmisre surāpaṃ pūyaśoṇite |
kālasūtre hemacauramavīcau gurutalpagam || 73 ||
[Analyze grammar]

tatsaṃsargiṇamāvarṣamasipatravane tathā |
etānmahāpātakinastaptatailakaṭāhake || 74 ||
[Analyze grammar]

āplutyāplutya durdaṃṣṭrakākolairlohatuṃḍakaiḥ |
saṃtodyamānānpāpiṣṭhānnityaṃ kalpaṃ nivāsaya || 75 ||
[Analyze grammar]

strīghnaṃ goghnaṃ ca mitraghnaṃ kūṭaśālmalipādape |
ullaṃbaya ciraṃkālamūrdhvapādamadhomukham || 76 ||
[Analyze grammar]

tvacamasya ca saṃdaṃśaistroṭaya tvaṃ mahābhuja |
āśleṣiturmitrapatnyā bhujāvutpāṭayā śuca || 77 ||
[Analyze grammar]

jvālākīle mahāghore narake'muṃ ni pātaya |
yo vahninā dāhayati parakṣetraṃ parālayam || 78 ||
[Analyze grammar]

kālakūṭe ca garadaṃ kūṭasākṣyābhivādinam |
mānakūṭaṃ tulākūṭaṃ kaṃṭhamoṭe nipātaya || 79 ||
[Analyze grammar]

lālāpibeca duṣprekṣya tīrthāsuṣṭhīvinaṃ naya |
āmapāke ca garbhaghnaṃ śūlapāke'nyatāpinam || 80 ||
[Analyze grammar]

rasavikrayiṇaṃ vipramikṣuyaṃtre prapīḍaya |
prajāpīḍākaraṃ bhūpamaṃdhakūpe nipātaya || 81 ||
[Analyze grammar]

gotilāṃśca turaṃgāṃśca vikretāraṃ dvijādhamam |
mātulānyāḥ surāyāśca vikretāraṃ halāyudha || 82 ||
[Analyze grammar]

musalolūkhale vaiśyaṃ kaṃḍayainaṃ punaḥpunaḥ |
śūdraṃ dvijāvamaṃtāraṃ dvijāgre maṃcasevinam || 83 ||
[Analyze grammar]

adhomukhe ca narake dīrghagrīvaprapīḍya || 84 ||
[Analyze grammar]

śūdraṃ brāhmaṇajetāraṃ vaiśyaṃ bāhmaṇamāninam |
kṣatriyaṃ yājakaṃ cāpi vipraṃ vedavivarjitam || 85 ||
[Analyze grammar]

lākṣālavaṇamāṃsānāṃ satailaviṣasarpiṣām |
āyudhekṣuvikārāṇāṃ vikretāraṃ dvijādhamam || 86 ||
[Analyze grammar]

pāśapāṇekaśāpāṇe baddhvaitāṃścaraṇedṛḍham |
ghātayaṃtau kaśāghātairnayataṃ taptakardame || 87 ||
[Analyze grammar]

imāṃ striyaṃ śleṣayāśu puṃścalīṃ kulakalmaṣām |
tenopapatinā sārdhaṃ taptāyasamayena ca || 88 ||
[Analyze grammar]

svayaṃ gṛhītvā niyamaṃ yastyajedajiteṃdriyaḥ |
taṃ prāpaya durādharṣaṃ bahubhramaradaṃśake || 89 ||
[Analyze grammar]

ityādijalpandurvṛttaiḥ śrūyate dūrato yamaḥ |
svakarmaśaṃkitaiḥ pāpai rdṛśyateti bhayaṃkaraḥ || 90 ||
[Analyze grammar]

ye prajāḥ pālayaṃtīha putrāneva nijaurasān |
daṃḍayaṃti ca dharmeṇa bhūpāste'sya sabhāsadaḥ || 91 ||
[Analyze grammar]

varṇāśramāśca yadrāṣṭre 'nutiṣṭhaṃti nijāṃ kriyām |
kālenāpannanidhanā bhūpāste'sya sabhāsadaḥ || 92 ||
[Analyze grammar]

naiva dīno na durvṛtto nāpadgrasto na śokabhāk |
yeṣāṃ rāṣṭre pradṛśyaṃte bhūpāste'sya sabhāsadaḥ || 93 ||
[Analyze grammar]

brāhmaṇāḥ kṣatriyā vaiśyāḥ svadharma niratāḥ sadā |
anyepi ye saṃyaminaḥ saṃyaminyāṃ vasaṃti te || 94 ||
[Analyze grammar]

uśīnaraḥ sudhanvā ca vṛṣaparvā jayadrathaḥ |
rajiḥ sahasrajitkukṣirdṛḍhadhanvā ripuṃjayaḥ || 95 ||
[Analyze grammar]

yuvanāśvo daṃtavaktro nābhāgo ripumaṃgalaḥ |
karaṃdhamo dharmasenaḥ paramardaḥ parāṃtakaḥ || 96 ||
[Analyze grammar]

ete cānye ca bahavo rājāno nītivartinaḥ |
dharmādharmavicārajñāḥ sudharmāyāṃ samāsate || 97 ||
[Analyze grammar]

anyacca te pravakṣyāvo yena paśyaṃti bhāskarim |
daṃḍapāśodyatakarāndūtānugrānanānkvacit || 9 ||
[Analyze grammar]

goviṃdamādhavamukuṃda haremurāre śaṃbho śiveśa śaśiśekhara śūlapāṇe |
dāmodarācyuta janārdana vāsudeva tyājyā bhaṭāya iti saṃtatamāmanaṃti || 99 ||
[Analyze grammar]

gaṃgādharāṃdhakaripo haranīlakaṃṭha vaikuṃṭha kaiṭabharipo kamaṭhābjapāṇe |
bhūteśakhaṃḍaparaśomṛḍacaṃḍikeśa tyājyā bhaṭāya iti saṃtatamāmanaṃti || 100 ||
[Analyze grammar]

viṣṇonṛsiṃhamadhusūdanacakrapāṇe gaurīpate giriśa śaṃkara caṃdracūḍa |
nārāyaṇāsuranibarhaṇaśārṅgapāṇe tyājyā bhaṭāya iti saṃtatamāmanaṃti || 1 ||
[Analyze grammar]

mṛtyuṃjayograviṣamekṣaṇakāmaśatro śrīkāṃtapītavasanāṃbuda nīlaśaure |
īśānakṛttivasanatridaśaikanātha tyājyā bhaṭāya iti saṃtatamāmanaṃti || 2 ||
[Analyze grammar]

lakṣmīpate madhuripo puruṣottamādyaśrīkaṃṭhadigvasana śāṃtapinākapāṇe |
ānaṃdakaṃda dharaṇīdhara padmanābha tyājyā bhaṭāya iti saṃtatamāmanati || 3 ||
[Analyze grammar]

sarveśvara tripurasūdana devadeva brahmaṇyadevagaruḍadhvaja śaṃkhapāṇe |
tryakṣoragābharaṇabālamṛgāṃkamaule tyajyā bhaṭāya iti saṃtatamāmanaṃti || 4 ||
[Analyze grammar]

śrīrāmarāghavarameśvararāvaṇāre bhūteśamanmatharipo pramathādhinātha |
cāṇūramardanahṛṣīkapatemurāre tyājyā bhaṭāya iti saṃtatamāmanati || 5 ||
[Analyze grammar]

śūlingirīśa rajanīśa kalāvataṃ sakaṃsapraṇāśana sanātanakeśināśa |
bhargatrinetrabhavabhūtapate purāre tyājyā bhaṭāya iti saṃtatamāmanaṃti || 6 ||
[Analyze grammar]

gopīpate yadupate vasudevasūno karpūragauravṛṣabhadhvajabhālanetra |
govardhanoddharaṇadharmadhurīṇagopa tyājyā bhaṭāya iti saṃtatamāmanaṃti || 7 ||
[Analyze grammar]

sthāṇo trilocana pinākadharasmarāre kṛṣṇāniruddhakamalākarakalmaṣāre |
viśveśvara tripathagārdrajaṭākalāpa tyājyā bhaṭāya iti saṃtatamāmanaṃti || 8 ||
[Analyze grammar]

aṣṭottarādhikaśatenasucārunāmnāṃ saṃdarbhitāṃ lalitaratnakadaṃbakena |
 sannāyakāṃ dṛḍhaguṇāṃ ddhijakaṃṭhagāṃ yaḥ kuryādimāṃ srajamaho sa yamaṃ na paśyet || 9 ||
[Analyze grammar]

itthaṃ dvijeṃdra nijabhṛtyagaṇānsadaiva saṃśikṣayedavanigānsa hi dharmarājaḥ |
anyepi ye hariharāṃkadharā dharāyāṃ te dūrataḥ punaraho parivarjanīyāḥ || 110 ||
[Analyze grammar]

agastiruvāca |
yo dharmarājaracitāṃ lalitaprabaṃdhāṃ nāmāvaliṃ sakalakalmaṣabījahaṃtrīm |
dhīrotra kaustubhabhṛtaḥ śaśibhūṣaṇasya nityaṃ japetstanarasaṃ sa pibenna mātuḥ || 11 ||
[Analyze grammar]

iti śṛṇvankathāṃ ramyāṃ śivaśarmāpriye'naghāma |
prahṛṣṭavaktraḥ purato dadarśāpsarasāpurīm || 112 ||
[Analyze grammar]

iti śrīskāṃde mahāpurāṇa ekāśītisāhasyā saṃhitāyāṃ caturthe kāśīkhaṃḍe pūrvārddhe yamalokavarṇanaṃnāmā'ṣṭamo'dhyāyaḥ || 8 ||
[Analyze grammar]