Chapter 4

[English text for this chapter is available]

munaya ūcuḥ |
tātatāta mahābhāga dhanyastvaṃ hi mahāmate |
adbhuteyaṃ kathā śaṃbhoḥ śrāvitā parabhaktidā || 1 ||
[Analyze grammar]

punarbrūhi kathāṃ śaṃbhorvyāsa praśnānusārataḥ |
sarvajñastvaṃ vyāsaśiṣyaḥ śivatattvavicakṣaṇaḥ || 2 ||
[Analyze grammar]

sūta uvāca |
evameva gururvyāsaḥ pṛṣṭavānme'jasaṃbhavam |
sanatkumāraṃ sarvajñaṃ śivabhaktaṃ munīśvaram || 3 ||
[Analyze grammar]

vyāsa uvāca |
sanatkumāra sarvajña śrāviteyaṃ śubhā kadhā |
śaṃkarasya maheśasya nānālīlāvihāriṇaḥ || 4 ||
[Analyze grammar]

punarbrūhi mahādeva mahimānaṃ viśeṣataḥ |
śraddhā ca mahatī śrotuṃ mama tāta pravarddhate || 5 ||
[Analyze grammar]

mahimnā yena śaṃbhostu yeye loke vimohitāḥ |
māyayā jñānamāhṛtya nānālīlāvihāriṇaḥ || 6 ||
[Analyze grammar]

|| sanatkumāra uvāca |
śṛṇu vyāsa mahābuddhe śāṃkarīṃ sukhadāṃ kathām |
tasyāḥ śravaṇamātreṇa śive bhaktiḥ prajāyate || 7 ||
[Analyze grammar]

śivassarveśvaro devassarvātmā sarvadarśanaḥ |
mahimnā tasya sarvaṃ hi vyāptaṃ ca sakalaṃ jagat || 8 ||
[Analyze grammar]

śivasyaiva parā mūrtirbrahmaviṣṇvīśvarātmikā |
sarvabhūtātmabhūtākhyā triliṃgā liṃgarūpiṇī || 9 ||
[Analyze grammar]

devānāṃ yonayaścāṣṭau mānuṣī navamī ca yā |
tiraścāṃ yonayaḥ paṃca bhavaṃtyevaṃ caturddaśa || 10 ||
[Analyze grammar]

bhūtā vā vartamānā vā bhaviṣyāścaiva sarvaśa |
śivātsarve pravartaṃte līyaṃte vṛddhimāgatāḥ || 11 ||
[Analyze grammar]

brahmendropendracandrāṇāṃ devadānavabhoginām |
gaṃdharvāṇāṃ manuṣyāṇāmanyeṣāṃ vāpi sarvaśaḥ || 12 ||
[Analyze grammar]

baṃdhurmitramathācāryyo rakṣannetā'rthavānguruḥ |
kalpadrumo'tha vā bhrātā pitā mātā śivo mataḥ || 13 ||
[Analyze grammar]

śivassarvamayaḥ puṃsāṃ svayaṃ vedyaḥ parātparaḥ |
vaktuṃ na śakyate yaśca paraṃ cānu paraṃ ca yat || 14 ||
[Analyze grammar]

tanmāyā paramā divyā sarvatra vyāpinī mune |
tadadhīnaṃ jagatsarvaṃ sadevāsuramānuṣam || 15 ||
[Analyze grammar]

kāmena svasahāyena prabalena manobhuvā |
sarvaḥ pradharṣito vīro viṣṇvādiḥ prabalo'pi hi || 16 ||
[Analyze grammar]

śivamāyāprabhāveṇābhūddhariḥ kāmamohitaḥ |
parastrīdharṣaṇaṃ cakre bahuvāraṃ munīśvara || 17 ||
[Analyze grammar]

indrastridaśapo bhūtvā gautamastrīvimohitaḥ |
pāpaṃ cakāra duṣṭātmā śāpaṃ prāpa munestadā || 18 ||
[Analyze grammar]

pāvako'pi jagacchreṣṭho mohitaśśivamāyayā |
kāmādhīnaḥ kṛto garvāttatastenaiva coddhṛtaḥ || 19 ||
[Analyze grammar]

jagatprāṇo'pi garveṇa mohitaśśivamāyayā |
kāmena nirjito vyāsaścakre'nyastrīratiṃ purā || 20 ||
[Analyze grammar]

caṇḍaraśmistu mārtaṇḍo mohitaśśivamāyayā |
kāmākulo babhūvāśu dṛṣṭvāśvīṃ hayarūpadhṛk || 21 ||
[Analyze grammar]

candraśca mohitaśśambhormāyayā kāmasaṃkulaḥ |
gurupatnīṃ jahārātha yutastenaiva coddhṛtaḥ || 22 ||
[Analyze grammar]

pūrvaṃ tu mitrāvaruṇau ghore tapasi saṃsthitau |
mohitau tāvapi munī śivamāyāvimohitau || 23 ||
[Analyze grammar]

urvaśīṃ taruṇīṃ dṛṣṭvā kāmuko saṃbabhūvatuḥ |
mitraḥ kumbhe jahau reto varuṇo'pi tathā jale || 24 ||
[Analyze grammar]

tataḥ kumbhātsamutpanno vasiṣṭho mitrasaṃbhavaḥ |
agastyo varuṇājjāto vaḍavāgnisamadyutiḥ || 25 ||
[Analyze grammar]

dakṣaśca mohitaśśaṃbhormāyayā brahmaṇassutaḥ |
bhrātṛbhissa bhaginyāṃ vai bhoktukāmo'bhavatpurā || 26 ||
[Analyze grammar]

brahmā ca bahuvāraṃ hi mohitaśśivamāyayā |
abhavadbhoktukāmaśca svasutāyāṃ parāsu ca || 27 ||
[Analyze grammar]

cyavano'pi mahāyogī mohitaśśivamāyayā |
sukanyayā vijahre sa kāmāsakto babhūva ha || 28 ||
[Analyze grammar]

kaśyapaḥ śivamāyāto mohitaḥ kāmasaṃkulaḥ |
yayāce kanyakāṃ mohāddhanvano nṛpateḥ purā || 29 ||
[Analyze grammar]

garuḍaḥ śāṃḍilīṃ kanyāṃ netukāmassumohitaḥ |
vijñātastu tayā sadyo dagdhapakṣo babhūva ha || 30 ||
[Analyze grammar]

vibhāṃḍako munirnārīṃ dṛṣṭvā kāmavaśaṃ gataḥ |
ṛṣyaśṛṅgaḥ sutastasya mṛgyāṃ jātaśśivājñayā || 31 ||
[Analyze grammar]

gautamaśca muniśśaṃbhormāyāmohitamānasaḥ |
dṛṣṭvā śāradvatīṃ nagnāṃ rarāma kṣubhitastayā || 32 ||
[Analyze grammar]

retaḥ skannaṃ dadhāra svaṃ droṇyāṃ caiva sa tāpasaḥ |
tasmācca kalaśājjāto droṇaśśastrabhṛtāṃ varaḥ || 33 ||
[Analyze grammar]

parāśaro mahāyogī mohitaśśivamāyayā |
matsyodaryā ca cikrīḍe kumāryā dāśakanyayā || 34 ||
[Analyze grammar]

viśvamitro babhūvātha mohitaśśivamāyayā |
reme menakayā vyāsa vane kāmavaśaṃ gataḥ || 35 ||
[Analyze grammar]

vasiṣṭhena virodhaṃ tu kṛtavānnaṣṭacetanaḥ |
punaḥ śivaprāsādācca brāhmaṇo'bhūtsa eva vai || 36 ||
[Analyze grammar]

rāvaṇo vaiśravāḥ kāmī babhūva śivamāyayā |
sītāṃ jahre kubuddhistu mohito mṛtyumāpa ca || 37 ||
[Analyze grammar]

bṛhaspatirmunivaro mohitaśśivamāyayā |
bhrātṛpatnyā vaśī reme bharadvājastato'bhavat || 38 ||
[Analyze grammar]

iti māyāprabhāvo hi śaṃkarasya mahātmanaḥ |
varṇitaste mayā vyāsa kimanyacchrotumicchasi || 39 ||
[Analyze grammar]

iti śrīśivamahāpurāṇe paṃcamyāmumāsaṃhitāyāṃ śivamāyāprabhāvavarṇanaṃ nāma caturtho 'dhyāyaḥ || 4 ||
[Analyze grammar]