Chapter 13

[English text for this chapter is available]

brahmovāca |
ataḥ paraṃ pravakṣyāmi pūjāvidhimanuttamam |
śrūyatāmṛṣayo devāssarvakāmasukhāvaham || 1 ||
[Analyze grammar]

brāhme muhūrte cotthāya saṃsmaretsāṃbakaṃ śivam |
kuryāttatprārthanāṃ bhaktyā sāṃjalirnatamastakaḥ || 2 ||
[Analyze grammar]

uttiṣṭhottiṣṭha deveśa uttiṣṭha hṛdayeśaya |
uttiṣṭha tvamumāsvāminbrahmāṇḍe maṃgalaṃ kuru || 3 ||
[Analyze grammar]

jānāmi dharmaṃ na ca me pravṛttirjānāmyadharmaṃ na ca me nivṛttiḥ |
tvayā mahādeva hṛdisthitena yathā niyukto'smi tathā karomi || 4 ||
[Analyze grammar]

ityuktvā vacanaṃ bhaktyā smṛtvā ca gurupādake |
bahirgaccheddakṣiṇāśāṃ tyāgārthaṃ malamūtrayoḥ || 5 ||
[Analyze grammar]

dehaśuddhiṃ tataḥ kṛtvā sa mṛjjalaviśodhanaiḥ |
hastau pādau ca prakṣālya daṃtadhāvanamācaret || 6 ||
[Analyze grammar]

divānāthe tvanudite kṛtvā vai daṃtadhāvanam |
mukhaṃ ṣoḍaśavāraṃ tu prakṣālyāṃjalibhistathā || 7 ||
[Analyze grammar]

ṣaṣṭhyādyamāśca tithayo navamyarkadine tathā |
varjyāssurarṣayo yatnādbhaktena radadhāvane || 8 ||
[Analyze grammar]

yathāvakāśaṃ susnāyānnadyādiṣvathavā gṛhe |
deśakālāviruddhaṃ ca snānaṃ kāryaṃ nareṇa ca || 9 ||
[Analyze grammar]

raverdine tathā śrāddhe saṃkrāntau grahaṇe tathā |
mahādāne tathā tīrthe hyupavāsadine tathā || 10 ||
[Analyze grammar]

aśaucepyathavā prāpte na snāyāduṣṇavāriṇā |
yathā sābhimukhaṃsnāyāttīrthādau bhaktimānnaraḥ || 11 ||
[Analyze grammar]

tailābhyaṃgaṃ ca kurvīta vārāndṛṣṭvā krameṇa ca |
nityamabhyaṃgake caiva vāsitaṃ vā na dūṣitam || 12 ||
[Analyze grammar]

śrāddhe ca grahaṇe caivopavāse pratipaddine |
athavā sārṣapaṃ tailaṃ na duṣyedgrahaṇaṃ vinā || 13 ||
[Analyze grammar]

deśaṃ kālaṃ vicāryaivaṃ snānaṃ kuryādyathā vidhi |
uttarābhimukhaścaiva prāṅmukhopyathavā punaḥ || 14 ||
[Analyze grammar]

ucchiṣṭenaiva vastreṇa na snāyātsa kadācana |
śuddhavastreṇa saṃsnāyāttaddevasmarapūrvakam || 15 ||
[Analyze grammar]

paradhāryyaṃ ca nocchiṣṭaṃ rātrau ca vidhṛtaṃ ca yat |
tena snānaṃ tathā kāryaṃ kṣālitaṃ ca parityajet || 16 ||
[Analyze grammar]

tarpaṇaṃ ca tataḥ kāryaṃ devarṣipitṛtṛptidam |
dhautavastraṃ tato dhāryaṃ punarācamanaṃ caret || 17 ||
[Analyze grammar]

śucau deśe tato gatvā gomayādyupamārjite |
āsanaṃ ca śubhaṃ tatra racanīyaṃ dvijottamāḥ || 18 ||
[Analyze grammar]

śuddhakāṣṭhasamutpannaṃ pūrṇaṃ staritameva vā |
citrāsanaṃ tathā kuryātsarvakāmaphalapra dam || 19 ||
[Analyze grammar]

yathāyogyaṃ punargrāhyaṃ mṛgacarmādikaṃ ca yat |
tatropaviśya kurvīta tripuṃḍraṃ bhasmanā sudhīḥ || 20 ||
[Analyze grammar]

japastapastathā dānaṃ tripuṇḍrātsaphalaṃ bhavet |
abhāve bhasmanastatra jalasyādi prakīrtitam || 21 ||
[Analyze grammar]

evaṃ kṛtvā tripuṃḍraṃ ca rudrākṣāndhārayennaraḥ |
saṃpādya ca svakaṃ karma punarārādhayecchivam || 22 ||
[Analyze grammar]

punarācamanaṃ kṛtvā trivāraṃ maṃtrapūrvakam |
ekaṃ vātha prakuryācca gaṃgābinduriti bruvan || 23 ||
[Analyze grammar]

annodakaṃ tathā tatra śivapūjārthamāharet |
anyadvastu ca yatkiṃcidyathāśakti samīpagam || 24 ||
[Analyze grammar]

kṛtvā stheyaṃ ca tatraiva dhairyamāsthāya vai punaḥ |
arghaṃ pātraṃ tathā caikaṃ jalagaṃdhākṣatairyutam || 25 ||
[Analyze grammar]

dakṣiṇāṃse tathā sthāpyamupacārasya klṛptaye |
gurośca smaraṇaṃ kṛtvā tadanujñāmavāpya ca || 26 ||
[Analyze grammar]

saṃkalpaṃ vidhivatkṛtvā kāmanāṃ ca niyujya vai |
pūjayetparayā bhaktyā śivaṃ saparivārakam || 27 ||
[Analyze grammar]

mudrāmekāṃ pradarśyaiva pūjayedvighnahārakam |
siṃdurādipadārthaiśca siddhibuddhisamanvitam || 28 ||
[Analyze grammar]

lakṣalābhayutaṃ tatra pūjayitvā nametpunaḥ |
caturthyaṃtairnāmapadairnamontaiḥ praṇavādibhiḥ || 29 ||
[Analyze grammar]

kṣamāpyainaṃ tadā devaṃ bhrātrā caiva samanvitam |
pūjayetparayā bhaktyā namaskuryātpunaḥ punaḥ || 30 ||
[Analyze grammar]

dvārapālaṃ sadā dvāri tiṣṭhaṃtaṃ ca mahodaram |
pūjayitvā tataḥ paścātpūjayedgirijāṃ satīm || 31 ||
[Analyze grammar]

caṃdanaiḥ kuṃkumaiścaiva dhūpairdīpairanekaśaḥ |
naivedyairvividhaiścaiva pūjayitvā tataśśivam || 32 ||
[Analyze grammar]

namaskṛtya punastatra gacchecca śivasannidhau |
yadi gehe pārthivīṃ vā haimīṃ vā rājatīṃ tathā || 33 ||
[Analyze grammar]

dhātujanyāṃ tathaivānyāṃ pāradāṃ vā prakalpayet |
namaskṛtya punastāṃ ca pūjayedbhaktitatparaḥ || 34 ||
[Analyze grammar]

tasyāṃ tu pūjitāyāṃ vai sarve syuḥ pūjitāstadā |
sthāpayecca mṛdā liṃgaṃ vidhāya vidhipūrvakam || 35 ||
[Analyze grammar]

kartavyaṃ sarvathā tatra niyamāssvagṛhe sthitaiḥ |
prāṇapratiṣṭhāṃ kurvīta bhūtaśuddhiṃ vidhāya ca || 36 ||
[Analyze grammar]

dikpālānpūjayettatra sthāpayitvā śivālaye |
gṛhe śivassadā pūjyo mūlamaṃtrābhiyogataḥ || 37 ||
[Analyze grammar]

tatra tu dvārapālānāṃ niyamo nāsti sarvathā |
gṛhe liṃgaṃ ca yatpūjyaṃ tasminsarvaṃ pratiṣṭhitam || 38 ||
[Analyze grammar]

pūjākāle ca sāṃgaṃ vai parivāreṇa saṃyutam |
āvāhya pūjayeddevaṃ niyamo'tra na vidyate || 39 ||
[Analyze grammar]

śivasya saṃnidhiṃ kṛtvā svāsanaṃ parikalpayet |
udaṅmukhastadā sthitvā punarācamanaṃ caret || 40 ||
[Analyze grammar]

prakṣālya hastau paścādvai prāṇāyāmaṃ prakalpayet |
mūlamaṃtreṇa tatraiva daśāvartaṃ nayennaraḥ || 41 ||
[Analyze grammar]

paṃcamudrāḥ prakartavyāḥ pūjāvaśyaṃ karepsitāḥ |
etā mudrāḥ pradarśyaiva caretpūjāvidhiṃ naraḥ || 42 ||
[Analyze grammar]

dīpaṃ kṛtvā tadā tatra namaskāraṃ guroratha |
badhvā padmāsanaṃ tatra bhadrāsanamathāpi vā || 43 ||
[Analyze grammar]

uttānāsanakaṃ kṛtvā paryaṃkāsanakaṃ tathā |
yathāsukhaṃ tathā sthitvā prayogaṃ punareva ca || 44 ||
[Analyze grammar]

kṛtvā pūjāṃ purājātāṃ vaṭṭakenaiva tārayet |
yadi vā svayameveha gṛhe na niyamo'sti ca || 45 ||
[Analyze grammar]

paścāccaivārghapātreṇa kṣārayelliṃgamuttamam |
ananyamānaso bhūtvā pūjādravyaṃ nidhāya ca || 46 ||
[Analyze grammar]

paścāccāvāhayeddevaṃ maṃtreṇānena vai naraḥ |
kailāsaśikharasthaṃ ca pārvatīpatimuttamam || 47 ||
[Analyze grammar]

yathoktarūpiṇaṃ śaṃbhuṃ nirguṇaṃ guṇarūpiṇam |
paṃcavaktraṃ daśabhujaṃ trinetraṃ vṛṣabhadhvajam || 48 ||
[Analyze grammar]

karpūragauraṃ divyāṃgaṃ candramauliṃ kapardinam |
vyāghracarmottarīyaṃ ca gajacarmāmbaraṃ śubham || 49 ||
[Analyze grammar]

vāsukyādiparītāṃgaṃ pinākādyāyudhānvitam || |
siddhayo'ṣṭau ca yasyāgre nṛtyaṃtīha niraṃtaram || 50 ||
[Analyze grammar]

jayajayeti śabdaśca sevitaṃ bhakta pūjakaiḥ |
tejasā duḥsahenaiva durlakṣyaṃ devasevitam || 51 ||
[Analyze grammar]

śaraṇyaṃ sarvasattvānāṃ prasannamukhapaṃkajam |
vedaiśśāstrairyathā gītaṃ viṣṇubrahmanutaṃ sadā || 52 ||
[Analyze grammar]

bhaktavatsalamānaṃdaṃ śivamāvāhayāmyaham |
evaṃ dhvātvā śivaṃ sāmbamāsanaṃ parikalpayet || 53 ||
[Analyze grammar]

caturthyaṃtapadenaiva sarvaṃ kuryādyathākramam |
tataḥ pādyaṃ pradadyādvai tatorghyaṃ śaṃkarāya ca || 54 ||
[Analyze grammar]

tataścācamanaṃ kṛtvā śaṃbhave paramātmane |
paścācca paṃcabhirdravyaiḥ snāpayecchaṃkaraṃ mudā || 55 ||
[Analyze grammar]

vedamaṃtrairyathāyogyaṃ nāmabhirvā samaṃtrakaiḥ |
caturthyaṃtapadairbhaktyā dravyāṇyevārpayettadā || 56 ||
[Analyze grammar]

tathābhilaṣitaṃ dravyamarpayecchaṃkaropari |
tataśca vāruṇaṃ snānaṃ karaṇīyaṃ śivāya vai || 57 ||
[Analyze grammar]

sugaṃdhaṃ caṃdanaṃ dadyādanyalepāni yatnataḥ |
sasugaṃdhajalenaiva jaladhārāṃ prakalpayet || 58 ||
[Analyze grammar]

vedamaṃtraiḥ ṣaḍaṃgairvā nāmabhī rudrasaṃkhyayā |
yathāvakāśaṃ tāṃ datvā vastreṇa mārjayettataḥ || 59 ||
[Analyze grammar]

paścādācamanaṃ dadyāttato vastraṃ samarpayeta |
tilāścaiva javā vāpi godhūmā mudgamāṣakāḥ || 60 ||
[Analyze grammar]

arpaṇīyāḥ śivāyaiva maṃtrairnānāvidhairapi |
tataḥ puṣpāṇi deyāni paṃcāsyāya mahātmane || 61 ||
[Analyze grammar]

prativaktraṃ yathādhyānaṃ yathāyogyābhilāṣataḥ |
kamalaiśśatapatraiśca śaṃkhapuṣpaiḥ paraistathā || 62 ||
[Analyze grammar]

kuśapuṣpaiśca dhattūrairmaṃdārairdroṇasaṃbhavaiḥ |
tathā ca tulasīpatrairbilvapatrairviśeṣataḥ || 63 ||
[Analyze grammar]

pūjayetparayā bhaktyā śaṃkaraṃ bhaktavatsalam |
sarvābhāve bilvapatramaparṇīyaṃ śivāya vai || 64 ||
[Analyze grammar]

bilvapatrārpaṇenaiva sarvapūjā prasidhyati |
tatassugaṃdhacūrṇaṃ vai vāsitaṃ tailamuttamam || 65 ||
[Analyze grammar]

arpaṇīyaṃ ca vividhaṃ śivāya parayā mudā |
tato dhūpaṃ prakartavyo guggulāgurubhirmudā || 66 ||
[Analyze grammar]

dīpo deyastatastasmai śaṃkarāya ghṛtaplutaḥ |
arghaṃ dadyātpunastasmai maṃtreṇānena bhaktitaḥ || 67 ||
[Analyze grammar]

kārayedbhāvato bhaktyā vastreṇa mukhamārjanam |
rūpaṃ dehi yaśo dehi bhogaṃ dehi ca śaṃkara || 68 ||
[Analyze grammar]

bhuktimuktiphalaṃ dehi gṛhītvārghaṃ namostu te |
tato deyaṃ śivāyaiva naivedyaṃ vividhaṃ śubham || 69 ||
[Analyze grammar]

tata ācamanaṃ prītyā kārayedvā vilambataḥ |
tataśśivāya tāmbūlaṃ sāṃgopāṅgaṃ vidhāya ca || 70 ||
[Analyze grammar]

kuryādārārtikaṃ pañcavartikāmanusaṃkhyayā |
pādayośca caturvāraṃ dviḥkṛtvo nābhimaṇḍale || 71 ||
[Analyze grammar]

ekakṛtve mukhe saptakṛtvaḥ sarvāṅgaṃ eva hi |
tato dhyānaṃ yathoktaṃ vai kṛtvā maṃtramudīrayet || 72 ||
[Analyze grammar]

yathāsaṃkhyaṃ yathājñānaṃ kuryānmaṃtravidhinnaraḥ |
gurūpadiṣṭamārgeṇa kṛtvā maṃtrajapaṃ sudhīḥ || 73 ||
[Analyze grammar]

gurūpadiṣṭamārgeṇa kṛtvā mantramudīrayet |
yathāsaṃkhyaṃ yathājñānaṃ kuryānmaṃtravidhinnaraḥ || 74 ||
[Analyze grammar]

stotrairnānāvidhaiḥ prītyā stuvīta vṛṣabhadhvajam |
tataḥ pradakṣiṇāṃ kuryācchivasya ca śanaiśśanaiḥ || 75 ||
[Analyze grammar]

namaskārāṃstataḥ kuryātsāṣṭāṃgaṃ vidhivatpumān |
tataḥ puṣpāṃjalideṃyo maṃtreṇānena bhaktitaḥ || 76 ||
[Analyze grammar]

śaṃkarāya pareśāya śivasaṃtoṣahetave |
ajñānādyadi vā jñānādyadyatpūjādikaṃ mayā || 77 ||
[Analyze grammar]

kṛtaṃ tadastu saphalaṃ kṛpayā tava śaṃkara |
tāvakastvadgataprāṇa tvaccittohaṃ sadā mṛḍa || 78 ||
[Analyze grammar]

iti vijñāya gaurīśa bhūtanātha prasīda me |
bhūmau skhalitavādānāṃ bhūmirevāvalaṃbanam || 79 ||
[Analyze grammar]

tvayi jātāparādhānāṃ tvameva śaraṇaṃ prabho |
ityādi bahu vijñaptiṃ kṛtvā samyagvidhānataḥ || 80 ||
[Analyze grammar]

puṣpāṃjaliṃ samarpyaiva punaḥ kuryānnatiṃ muhuḥ |
svasthānaṃ gaccha deveśa parivārayutaḥ prabho |
pūjākāle punarnātha tvayā gaṃtavyamādarāt |
iti saṃprārthya vahuśaśśaṃkaraṃ bhaktavatsalam || 82 ||
[Analyze grammar]

visarjayetsvahṛdaye tadapo mūrdhni vinyaset |
iti proktamaśeṣeṇa munayaḥ śivapūjanam |
bhuktimuktipradaṃ caiva kimanyacchrotumarhatha || 83 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ prathamakhaṃḍe sṛṣṭyupākhyāne śivapūjana varṇano nāma trayodaśodhyāyaḥ || 13 ||
[Analyze grammar]