Chapter 177

śrīkṛṣṇa uvāca |
agastyena purā gīto dānānāṃ vidhiruttamaḥ |
śṛṇu tvaṃ rājaśārdūla kathyamānaṃ mayādhunā || 1 ||
[Analyze grammar]

yena dattena rājendra sarvaṃ pāpaṃ vyapohati |
mānasaṃ vācikaṃ vāpi kāyikaṃ ca sudustaram || 2 ||
[Analyze grammar]

maṃgalyaṃ maṃgalaṃ puṇyaṃ sarvadāneṣu cottamam |
dhanyaṃ yaśasyamāyuṣyaṃ paralokabhayāpaham |
brahmāṃḍaṃ kāṃcanaṃ kṛtvā sarvalakṣaṇasaṃyutam || 3 ||
[Analyze grammar]

devāsuramanuṣyaiśca gandharvoragarākṣasaiḥ |
saṃyuktaṃ ca nadībhiśca samudraiḥ parvataistathā |
vimānaśatakoṭībhirbhūṣitaṃ cāpsarovaraiḥ || 4 ||
[Analyze grammar]

diggajāṣṭakasaṃyuktaṃ madhyasthitacaturmukham |
śivācyutārkaśikharamumālakṣmīsamanvitam || 5 ||
[Analyze grammar]

tasyāṃge kalpayedrājanbhuvanāni caturdaśa |
vitasteraṃgulaśataṃ yāvadāyāmavistaram || 6 ||
[Analyze grammar]

kuryādviṃśatpalādūrdhvamāsahasrācca bhaktitaḥ |
śakaladvayasaṃyuktaṃ puṭākāraṃ susaṃhitam || 7 ||
[Analyze grammar]

śilpinā vihitaṃ yasmādbrahmāṃḍaṃ sarvakāmadam |
ayane viṣuve caiva caṃdrādityagrahe tathā || 8 ||
[Analyze grammar]

anyeṣvapi tu kāleṣu śraddhāvittasamanvitaḥ |
puṣpamaṃḍapikāṃ kṛtvā tatra saṃsthāpayedbudhaḥ || 9 ||
[Analyze grammar]

tiladroṇoparigataṃ kaṃkumakṣodacarcitam |
vāso yugmena saṃchādya puṣpagandhādhivāsitam || 10 ||
[Analyze grammar]

tasya dikṣu ca sarvāsu pūrṇakumbhāṃśca vinyaset |
aṣṭādaśaiva cānyāni droṇamātrāṇyathāharet || 11 ||
[Analyze grammar]

gṛhe vā maṃḍape vāpi sthāpayettadvicakṣaṇaḥ |
pādukopānahacchatrabhājanāsanadarpaṇaiḥ || 12 ||
[Analyze grammar]

saṃyuktaṃ kārayettatra payasvinyā tathaiva ca |
kārayetkuṇḍamekaṃ tu hastamātraṃ vidhānataḥ || 13 ||
[Analyze grammar]

catuścāraṇikāstatra homaṃ kuryurdvijottamāḥ |
sarvābharaṇasampannā susnātāhatavāsasaḥ || 14 ||
[Analyze grammar]

pracareyurdvijāstatra upādhyāyasamanvitāḥ |
tathā purohitaścaiva rājñā ṣaṣṭho vidhīyate || 15 ||
[Analyze grammar]

itareṣāṃ tu pañcaiva kuryuryajñamataṃdritāḥ |
grahayajñavidhānena grahāṇāṃ yajña iṣyate || 16 ||
[Analyze grammar]

brahmaviṣṇuśivānāṃ ca tannāmnā juhuyāttilān |
ayutaṃ homayetpaścānmahāvyāhṛtibhirnṛpa || 17 ||
[Analyze grammar]

rudrajāpastu kartavyastasyaivānaṃtaraṃ dvijaiḥ |
tataḥ sarvasamāptau tu snātvā śuklāṃbaraḥ śuciḥ || 18 ||
[Analyze grammar]

brahmāṃḍaṃ pūjayedbhaktyā gṛhītakusumāṃjaliḥ |
namo jagatpratiṣṭhāya viśvadhāmne namo'stu te || 19 ||
[Analyze grammar]

vāṅmayāṃta nimagnāya brahmāṃḍa śubhakṛdbhava |
brahmāṃḍodaravartīni yāni sattvāni kānicit || 20 ||
[Analyze grammar]

tāni sarvāṇi me tuṣṭiṃ prayacchatvatulāṃ sadā |
brahmā viṣṇuśca rudraśca lokapālāstathā grahāḥ || 21 ||
[Analyze grammar]

nakṣatrāṇi tathā nāgā ṛṣayo marutastathā |
sarve bhavaṃtu saṃtuṣṭāḥ saptajanmāṃtarāṇi me || 22 ||
[Analyze grammar]

ityuccārya tato dadyādbrahmāṃḍaṃ sarvakāmadam |
sadakṣiṇaṃ ca taṃ kṛtvā vasu saṃpādayeddvijān || 23 ||
[Analyze grammar]

anena vidhinā dattvā yatpuṇyaṃ syānnarottama |
tatte'haṃ saṃpravakṣyāmi śṛṇuṣva gadato mama || 24 ||
[Analyze grammar]

āsīdādiyuge rājā sudyumno nāma bhārata |
nāgāyutabalaḥ śrīmānbahubhṛtyaparicchadaḥ || 25 ||
[Analyze grammar]

triṃśadvarṣasahasrāṇi kṛtvā rājyamakaṃṭakam |
tataḥ saṃsthāpya tanayaṃ rājā rājye vanaṃ yayau || 26 ||
[Analyze grammar]

praviśya ca vanaṃ ghoraṃ tapastīvraṃ cacāra ha |
adhyātmagatitattvajñaḥ karmakāṃḍaṃ visṛjya ca || 27 ||
[Analyze grammar]

kālena mahatā rājā diṣṭāṃtamagamatpurā |
divyaṃ vimānamāruhya nānā vādyaravākulam || 28 ||
[Analyze grammar]

atītya śakralokādīnbrahmalokamito gataḥ |
tasyāsanaṃ dideśātha brahmāsuragaṇairvṛtaḥ || 29 ||
[Analyze grammar]

divyaṃ kanakacitrāṃgaṃ ratnālaṃkṛtavigraham |
evaṃ lokavare tasminramamāṇo nṛpottama || 30 ||
[Analyze grammar]

āste cānudinaṃ so'tha divyabhogavivarjitaḥ |
vasatastasya rājñastu śarīraṃ paritapyate || 31 ||
[Analyze grammar]

bubhukṣayā naraśreṣṭha tathātyaṃtapipāsayā |
sa pīḍyamāno brahmāṇaṃ kṛtāṃjalirabhāṣata || 32 ||
[Analyze grammar]

bhagavanbrahmaloko'yaṃ sarvadoṣavivarjitaḥ |
atra sthitaṃ ca māṃ deva kṣuttṛṣṇā ca prabādhate || 33 ||
[Analyze grammar]

kena karma vipākena kṣudhā me nāpasarpati |
brahmaloke gatasyāpi saṃśayaṃ chettumarhasi || 34 ||
[Analyze grammar]

brahmovāca |
tvayā hi kurvatā rājyaṃ puṣṭānyaṃgāni pārthiva |
naiva dattaṃ tu bahulamātmavādaratena vai || 35 ||
[Analyze grammar]

dānaṃ baṃdhātmakaṃ matvā tasmāddattaṃ tvayā na hi |
jñānādbrahmapadaṃ prāptamadānātkṣutprabādhate || 36 ||
[Analyze grammar]

rājovāca |
bhagavaṃstṛṣāpanuttiḥ syātkathaṃ me parameśvara |
upadeśapradānena prasādaṃ kartumarhasi || 37 ||
[Analyze grammar]

brahmovāca |
bhūyo gatvā mahīṃ rājanbrahmāṃḍaṃ sārvakāmikam |
prayaccha dvijamukhyānāṃ tena tṛptimavāpsyasi || 38 ||
[Analyze grammar]

ityuktaḥ samyagāgatya martyalokaṃ mahīpatiḥ |
brahmāṃḍaṃ tu vidhānena brāhmaṇebhyaḥ pradattavān || 39 ||
[Analyze grammar]

sa jagāma punaḥ svargaṃ lebhe tṛptiṃ ca śāśvatīm |
etatte sarvamākhyātaṃ mahādānasya yatphalam || 40 ||
[Analyze grammar]

brahmāṃḍaṃ yaḥ prayaccheta tena dattaṃ carācaram |
saptāvarānsapta parānsapta caiva parāvarān || 41 ||
[Analyze grammar]

tārayetkulajāndattvā bhaviṣyāṃśca na saṃśayaḥ |
manvaṃtarāṇi ṣaṭtriśadbrahmaloke mahīyate || 42 ||
[Analyze grammar]

punarmānuṣyamabhyetya dhārmiko jāyate kule |
na dāridyaṃ na ca vyādhiṃ viyogaṃ naiva paśyati || 43 ||
[Analyze grammar]

nārī vā puruṣo vāpi dānasyāsya prabhāvataḥ |
yaścaitacchṛṇuyādbhaktyā bhaktānāṃ śrāvayecca yaḥ || 44 ||
[Analyze grammar]

so'pi sadgatimāpnoti kiṃ punaryaḥ prayacchati || 45 ||
[Analyze grammar]

brahmāṃḍakhaṃḍayugalaṃ sakulācalaṃ ca digbhāgasāgarasarovarasiddhajuṣṭam |
diksaṃkhyayā guṇavatāṃ dvijasattamānāṃ dattvā pumānpadamupaiti pitāmahasya || 46 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhisaṃvāde brahmāṃḍadānavidhivarṇanaṃ nāma saptasaptatyuttaraśatatamo'dhyāyaḥ || 177 ||
[Analyze grammar]