Chapter 128

yudhiṣṭhira uvāca |
vṛkṣāropaṇamāhātmyaṃ vada devakinandana |
udyāpanavidhiṃ caiva sarahasyaṃ samāsataḥ || 1 ||
[Analyze grammar]

śrīkṛṣṇa uvāca |
varaṃ bhūmiruhāḥ pañca nagakāṣṭharuhā daśa |
patraiḥ puṣpaiḥ phalairmūlaiḥ kurvaṃti pitṛtarpaṇam || 2 ||
[Analyze grammar]

bahubhirmṛtakiñjātaiḥ putrairdharmārthavarjitaiḥ |
varameke pathitaruryatra viśramate janaḥ || 3 ||
[Analyze grammar]

prāṇinaḥ prīṇayaṃti sma cchāyāvalkalapallavaiḥ |
ghanacchadāḥ sutaravaḥ puṣpairdevānphalaiḥ pitṝn || 4 ||
[Analyze grammar]

puṣpapatraphalacchāyāmūlavalkaladārubhiḥ |
dhanyā mahīruhā yeṣāṃ viphalā yāṃti nārthinaḥ || 5 ||
[Analyze grammar]

putrāḥ saṃvatsarasyāṃte śrāddhaṃ kurvaṃti vā na vā |
pratyahaṃ pādapāḥ puṣṭiṃ śreyo'rthaṃ janayaṃti hi || 6 ||
[Analyze grammar]

na tatkarotyagnihotraṃ sukhaṃ yadyoṣitaḥ sutaḥ |
yatkaroti ghanacchāyaḥ pādapaḥ pathi ropitaḥ || 7 ||
[Analyze grammar]

sacchāyā ca sapuṣpā ca saphalā vṛkṣavāṭikā |
kulayoṣeva bhavati bhartṛlokadvayānugā || 8 ||
[Analyze grammar]

aśokaphalāvakarā tilakālaṃkṛtānanā |
sarvopabhoga veśyeva vāṭikā rasikā sadā || 9 ||
[Analyze grammar]

sadā sa tīrthī bhavati sadā dānaṃ prayacchati |
sadā yajñaṃ sa yajate yo ropayati pādapam || 10 ||
[Analyze grammar]

aśvatthamekaṃ picumaṃdamekaṃ nyagrodhamekaṃ daśa ciñciṇīkān |
kapitthabilvāmalakītrayaṃ ca pañcāmravāpī narakaṃ na paśyet || 11 ||
[Analyze grammar]

puṣpopagaṃdhāḍhyaphalopagandhaṃ yaḥ pādapaṃ sparśayate dvijāya |
sa strīsamṛddhaṃ vahuratnapūrṇaṃ labhedvimānapratimaṃ gṛhaṃ vai || 12 ||
[Analyze grammar]

pratiśrayāśrānta samāśrayatvātsamīhitaṃ tatra phalaṃ bubhukṣoḥ |
apatyamekaṃ paralokahetorvimṛśyatāṃ kiṃ taravo na ropitāḥ || 13 ||
[Analyze grammar]

na khānitāḥ puṣkariṇyo ropitā na mahīruhāḥ |
māturyauvanacaureṇa tena jātena kiṃ kṛtam || 14 ||
[Analyze grammar]

chāyāmanyasya kurvaṃti tiṣṭhaṃti svayamātape |
phalaṃti ca parārtheṣu na svārtheṣu mahādrumāḥ || 15 ||
[Analyze grammar]

ataḥ paraṃ pravakṣyāmi vṛkṣasyodyāpane vidhim |
sarvapāpapraśamanaṃ sarvakīrtivivarddhanam || 16 ||
[Analyze grammar]

aputrayā purā pārtha pārvatyā mandarācale |
aśokaḥ śokaśamanaḥ putratve parikalpitaḥ || 17 ||
[Analyze grammar]

jātakarmādikāstasya yāḥ kriyāḥ kila buddhiman |
carakātripurāṇoktāstāḥ śṛṇuṣva yudhiṣṭhira || 18 ||
[Analyze grammar]

tato mūle ghanadalo valgucchāyāṃgapallavaḥ |
śītavātātapasahaḥ saṃskāryastaruṇastaruḥ || 19 ||
[Analyze grammar]

strīnāmakaṃṭakīkubjakīṭavṛścikakoṭaraḥ |
nodyāpyaḥ pādapaḥ pārtha śiṣṭānāṃ yo na saṃmataḥ || 20 ||
[Analyze grammar]

ālavāle suvihite śubhe baddhacatuṣkike |
śodhayitvā tamuddeśaṃ suguptaṃ kārayettataḥ || 21 ||
[Analyze grammar]

sadaivodyāpanaṃ pārtha pādapānāṃ praśasyate |
śubhe'hni viprakathite grahanakṣatrasaṃyute || 22 ||
[Analyze grammar]

patākālaṃkṛtaṃ vṛkṣaṃ pūrvedyuradhivāsayet |
raktavastraiḥ samācchādya raktasūtreṇa veṣṭayet || 23 ||
[Analyze grammar]

piṣṭātakenāvakiretsarvauṣadhyā ca pādapam |
sthāpayetpūrṇakalaśāṃścaturdikṣu vicakṣaṇaḥ || 24 ||
[Analyze grammar]

pallavālaṃkṛtamukhānsitacandanacarcitān |
sitavāsoyugacchannānsakalānratnagarbhiṇaḥ || 25 ||
[Analyze grammar]

patākālaṃkṛtāḥ sarve kāryāstatsannidhau drumāḥ |
mūlavinyastakalaśā raktasūtrāvaguṇṭhitāḥ || 26 ||
[Analyze grammar]

raktapītasitācchādaiścarcitāḥ sumanoharaiḥ |
kaladhautamayānyatra phalāni daśa paṃca vā || 27 ||
[Analyze grammar]

tāmrapātryāṃ sabījāni saralānyadhivāsayet |
tūryamaṅgalaghoṣeṇa caturdikṣu kṣipedbalim || 28 ||
[Analyze grammar]

indrādilokapālebhyo bhūtebhyo maṃtravidguruḥ |
tataḥ prabhāte vimale kuṃḍaṃ kṛtvā samekhalam || 29 ||
[Analyze grammar]

grahayajñavidhānena śāṃtikarma samārabhet |
suvarṇālaṃkṛtānkṛtvā brāhmaṇānvedapāragān || 30 ||
[Analyze grammar]

caturo'ṣṭau yathāśaktyā vāsobhirabhipūjayet |
tilājyena ca homaḥ syāttuṣṭipuṣṭikaraḥ sadā || 31 ||
[Analyze grammar]

mātaraṃ sthāpayitvāgre pūjayetkusumākṣataiḥ |
śrapayitvā caruṃ samyakpāyasādyapariplutam || 32 ||
[Analyze grammar]

homādau jātakarmādi godānaṃ yāvadeva tu |
pādapaṃ snāpayitvā tu samaṃtraistīrthavāribhiḥ || 33 ||
[Analyze grammar]

jātakaṃ nāmakaraṇamannaprāśanameva ca |
suvarṇasūcyā kurvīta karṇavedhaṃ vidhānavit || 34 ||
[Analyze grammar]

jātarūpakṣureṇātra cūḍākāryā yathākramam |
badhnīyānmekhalāṃ mauñjīṃ vāsaśca paridhāpayet || 35 ||
[Analyze grammar]

yajamānastataḥ snātaḥ śuklāṃbaradharaḥ śuciḥ |
puṣpāñjaliḥ samabhyetya maṃtrametamudīrayet || 36 ||
[Analyze grammar]

ye śākhinaḥ śikhariṇāṃ śirasā vibhūṣā ye nandanādiṣu vaneṣu kṛtapratiṣṭhāḥ |
ye kāmadāḥ suranaroragakinnarāṇāṃ te me natasya duritārtiharā bhavaṃtu || 37 ||
[Analyze grammar]

etairdvijairvidhivaraprahuto hutāśaḥ paśyatyasāvahimadīdhitiraṃbarasthaḥ |
tvaṃ vṛkṣa putraparikalpanayā vṛto'si kāryaṃ sadaiva bhavatā mama putrakāryam || 38 ||
[Analyze grammar]

ityevamuktvā taṃ vṛkṣaṃ lālayitvā punaḥpunaḥ |
ghṛtapātre svavadanaṃ dṛṣṭvāśiṣamudīrayet || 39 ||
[Analyze grammar]

aṅgādaṅgātsaṃbhavasi hṛdayādabhijāyase |
ātmā vai putranāmāsi sa jīva śaradaḥ śatam || 40 ||
[Analyze grammar]

brāhmaṇānāṃ tato deyā dakṣiṇā hṛṣṭamānasaiḥ |
sthāpakāya śubhāṃ dhenuṃ dattvā kuryānmahotsavam || 41 ||
[Analyze grammar]

dīnānāthajanānāṃ ca bhojanaṃ cānivāritam |
itareṣāṃ pradātavyaṃ saṃtuṣṭena surāsavam || 42 ||
[Analyze grammar]

jñātibandhujanaiḥ sārddhaṃ svayaṃ bhuñjīta kāmataḥ |
preṣyāḥ karmakarāḥ sarve pūjanīyāḥ svaśaktitaḥ || 43 ||
[Analyze grammar]

ya evaṃ kurute pārtha vṛkṣāṇāṃ mahadutsavam |
sarvakāmānavāpnoti ihaloke paratra ca || 44 ||
[Analyze grammar]

putrairvinā śubhagatirna bhavennarāṇāṃ duṣputrakairiti tathobhayalokanāśaḥ |
etadvicārya sudhiyā paripālya vṛkṣānputrāḥ purāṇavidhinā parikalpanīyā || 45 ||
[Analyze grammar]