Chapter 70

śrīkṛṣṇa uvāca |
śṛṇu pārtha pravakṣyāmi govindaśayanaṃ vratam |
kaṭadānaṃ samutthānaṃ cāturmāsyavratakramam || 1 ||
[Analyze grammar]

yudhiṣṭhira uvāca |
kiṃ devaśayanaṃ nāma devassvapiti cāpyasau |
devaḥ kimarthaṃ svapiti kiṃ vidhānaṃ sadā vada || 2 ||
[Analyze grammar]

ke maṃtrāḥ ke ca niyamā vratānyatha kriyā ca kā |
kiṃ grāhyaṃ kiṃ ca bhoktavyaṃ supte deve janārdane || 3 ||
[Analyze grammar]

śrīkṛṣṇa uvāca |
mithunasthe sahasrāṃśau sthāpayenmadhusūdanam |
tulārāśigate tasminpunarutthāpayedvratam || 4 ||
[Analyze grammar]

adhimāse ca patite eṣa eva vidhikramaḥ |
nānyathā sthāpayeddevaṃ na caivotthāpayeddharim || 5 ||
[Analyze grammar]

āṣāḍhasya site pakṣe ekādaśyāmupoṣitaḥ |
sthāpayedbhaktimānviṣṇuṃ śaṃkhacakragadādharam || 6 ||
[Analyze grammar]

pītāṃbaradharaṃ saumyaṃ paryaṃke svāstṛte śubhe |
śuklavastrasamācchanne sopadhāne yudhiṣṭhira || 7 ||
[Analyze grammar]

itihāsapurāṇajño viṣṇubhaktopi yaḥ pumān |
snāpayitvā dadhikṣīraghṛtakṣaudrajalaistathā || 8 ||
[Analyze grammar]

samālabhya śubhairgaṃdhairdhūpairva strairalaṃkṛtam |
pūjayitvā kuṃkumādyairmaṃtreṇānena pāṇḍava || 9 ||
[Analyze grammar]

supte tvayi jagannātha jagatsuptaṃ bhavedidam |
vibuddhe tvayi budhyeta jagatsarvaṃ carācaram || 10 ||
[Analyze grammar]

evaṃ tāṃ pratimāṃ viṣṇoḥ sthāpayitvā yudhiṣṭhira |
tasyaivāgre svayaṃ vācaṃ gṛhṇīyānniyamāṃstataḥ || 11 ||
[Analyze grammar]

caturo vārṣikānmāsāndevasyotthāpanāvadhi |
strī vā naro vā madbhakto dharmārthaṃ sudṛḍhavrataḥ || 12 ||
[Analyze grammar]

gṛhṇīyānniyamānetāndaṃtadhāvanapūrvakam |
teṣāṃ phalāni vakṣyāmi tatkartṝṇāṃ pṛthakpṛthak || 13 ||
[Analyze grammar]

madhurasvaro bhavedrājā puruṣo guḍavarjanāt |
tailasya varjanātpārtha sundarāṃgaḥ prajāyate || 14 ||
[Analyze grammar]

kaṭutailaparityāgācchatrukṣayamavāpnuyāt |
madhūkatailatyāgena saubhāgyamatulaṃ bhavet || 15 ||
[Analyze grammar]

puṣpādibhogatyāgena svarge vidyādharo bhavet |
yogābhyāsī bhavedyastu sa brahmapadamāpnuyāt || 16 ||
[Analyze grammar]

kaṭukāmlatiktamadhurakṣārakāṣāyameva ca |
yo varjayetsa vairūpyaṃ daurgatyaṃ nāpnuyātkvacit || 17 ||
[Analyze grammar]

tāṃbūlavarjanādbhogī raktakaṇṭhaśca jāyate |
ghṛtatyāgātsulāvaṇyaṃ sarvasiddhiḥ punarbhavet || 18 ||
[Analyze grammar]

phalatyāgācca matimānbahuputraśca jāyate |
śākapatrāśanādrogī apakvādo'malo bhavet || 19 ||
[Analyze grammar]

pādābhyaṃgaparityāgācchirobhyaṃgācca pārthiva |
dīptimān dīptakaraṇo yakṣo dravyapatirbhavet || 20 ||
[Analyze grammar]

dadhidugdha takraniyamādgolokaṃ labhate naraḥ |
indrātithitvamāpnoti sthālīpākavivarjitāt || 21 ||
[Analyze grammar]

labheta saṃtatiṃ dīrghāṃ tāpapakvasya bhakṣaṇāt |
bhūmāvastaraśāyī ca viṣṇoranucaro bhavet || 22 ||
[Analyze grammar]

sadā muniḥ sadā yogī madhumāṃsasya varjanāt |
nirvyādhirnīrujaujasvī surāmadyavivarjanāt || 23 ||
[Analyze grammar]

evamādiparityāgāddharmaḥ syāddharmanandana |
ekāṃtaropavāsena brahmaloke mahīyate || 24 ||
[Analyze grammar]

dhāraṇaṃ nakharomāṇāṃ gaṃgāsnānaṃ dinedine |
maunavratī bhavedyastu tasyājñā'skhalitā bhavet || 25 ||
[Analyze grammar]

bhūmau bhuṃkte sadā yastu sa pṛthivyāḥ patirbhavet |
namo nārāyaṇāyeti japatonaśanaṃ phalam || 26 ||
[Analyze grammar]

pādābhivaṃdanādviṣṇorlabhedgodānajaṃ phalam |
viṣṇupādāṃbusaṃsparśātkṛtakṛtyo bhavennaraḥ || 27 ||
[Analyze grammar]

viṣṇudevakule kuryādupalepanamarcanam |
kalpasthāyī bhavedrājā sa naro nātra saṃśayaḥ || 28 ||
[Analyze grammar]

pradakṣiṇāśataṃ yastu karoti stutipāṭhakaḥ |
haṃsayuktavimānena sa ca viṣṇu puraṃ vrajet || 29 ||
[Analyze grammar]

gītavādyakaro viṣṇorgāṃdharvaṃ lokamāpnuyāt |
nityaṃ śāstravinodena lokānyastu prabodhati || 30 ||
[Analyze grammar]

sa vyāsarūpī bhagavānaṃte viṣṇupuraṃ vrajet |
puṣpamālādibhiḥ pūjāṃ kṛtvā viṣṇupuraṃ vrajet || 31 ||
[Analyze grammar]

nityasnāyī naro yastu narakaṃ sa na paśyati |
bhojanaṃ ca jayedyastu sa snānaṃ pauṣkaraṃ labhet || 32 ||
[Analyze grammar]

kṛtvā prekṣaṇakaṃ divyaṃ rājyaṃ so'psarasāṃ labhet |
ayācitena prāpnoti vāpīkūpe yathā phalam || 33 ||
[Analyze grammar]

ṣaṣṭhakālennabhojyena sthāyī svarge naro bhavet |
parṇeṣu yo naro bhuṃkte kurukṣetraphalaṃ labhet || 34 ||
[Analyze grammar]

śilāyāṃ bhojanānnityaṃ snānaṃ prayāgajaṃ bhavet |
yāmadvaye jalatyāgānna rogaiḥ paribhūyate || 35 ||
[Analyze grammar]

evamādivrate pārtha tuṣṭimāyāti hetutaḥ |
supte sati jagannāthe keśave garuḍadhvaje || 36 ||
[Analyze grammar]

nivartate kriyāḥ sarvāścāturvaṇyasya bhārata |
vivāhavratabaṃdhādibhūtasaṃskāradīkṣaṇam || 37 ||
[Analyze grammar]

yajñāśca gṛhaveśādi godānācca pratiṣṭhitam |
pūjyāni yāni karmāṇi tāni sarvāṇi varjayet || 38 ||
[Analyze grammar]

asaṃkrāṃtaṃ tu māsaṃ vai daive pitrye ca varjayet |
malimlucamaśaucaṃ ca sūryasaṃkrāṃtivarjitam || 39 ||
[Analyze grammar]

prāpte bhādrapade māsi ekādaśyāṃ dine hareḥ |
kaṭadānaṃ bhavedviṣṇormahāpūjā pravartayet || 40 ||
[Analyze grammar]

ya etadeva śayanaṃ tatredaṃ kāraṇaṃ śṛṇu |
purā tapaḥprabhāvena toṣayitvā hariṃ vibhum || 41 ||
[Analyze grammar]

mamāpi mānayatyaṅgaṃ prārthito yoganidrayā |
nirīkṣya cātmano devā ruddhaṃ lakṣmyā uraḥsthalam || 42 ||
[Analyze grammar]

śaṃkhacakrāsimārgādyairbāhavopyatha vakṣasā |
adho nābherviruddhaṃ me vainateyena pakṣiṇā || 43 ||
[Analyze grammar]

mukaṭena śiro ruddhaṃ kuṃḍalābhyāṃ ca karṇakau |
tato dadāvahaṃ tuṣṭo netrayoḥ sthānamādarāt || 44 ||
[Analyze grammar]

caturo vārṣikānmāsānmā'śritā sā bhaviṣyati |
yoganidrāpi māhātmyaṃ śrutvā paurātanaṃ śubham || 45 ||
[Analyze grammar]

cakāra locanāvāsamato'rthaṃ me yudhiṣṭhira |
ahaṃ ca tāṃ bhāvayitvā mānayāmi manasvinīm || 46 ||
[Analyze grammar]

yoganidrā mahānidrā śeṣābhiśayane sthitaḥ |
kṣīrodadhau ca viṃdhyagre dhautapādaḥ samāhitaḥ || 47 ||
[Analyze grammar]

lakṣmīkarāṃbujairacchairmṛdyamānapadadvayaḥ |
tasminkāle'pi madbhaktau yo māsāṃścaturaḥ kṣipet || 48 ||
[Analyze grammar]

vratairanekainiyamaiḥ pāṃḍavaśreṣṭha mānavaḥ |
kalpasthāyī viṣṇulokaṃ sa vrajennātra saṃśayaḥ || 49 ||
[Analyze grammar]

tato'vabudhyate devaḥ śrīmāñchaṅkhagadādharaḥ |
kārtike śuklapakṣasya ekādaśyāṃ pṛthakchṛṇu || 50 ||
[Analyze grammar]

mantreṇānena rājendra devamutthāpayeddvijaḥ |
idaṃ viṣṇurvicakrame svāsane ca tadā nṛpa || 51 ||
[Analyze grammar]

samutthite tadā viṣṇo kriyāḥ sarvāḥ pravartayet |
mahātūryarave rātrau bhrāmayetsyaṃdane sthitam || 52 ||
[Analyze grammar]

utthite devadeveśe nagare pārthivaḥ svayam |
dīpodrekakare mārge nṛtyagītajanākule || 53 ||
[Analyze grammar]

yaṃyaṃ dāmodaraḥ paśyedutthito dharaṇīdharaḥ |
taṃtaṃ pradeyaṃ rājendra sarvaṃ svargāya kalpate || 54 ||
[Analyze grammar]

rātrau prajāgare devamekādaśyāṃ surālaye |
prabhāte vimale snātvā dvādaśyāṃ viṣṇumarcayet || 55 ||
[Analyze grammar]

homayeddhavyavāhaṃ ca havyadravyairghṛtādibhiḥ |
tato viprāñchubhānsnātvā bhojayedannavistaraiḥ || 56 ||
[Analyze grammar]

ghṛtadadhikṣaudrakādyairguḍadhūpaiḥ samodakaiḥ |
yajamāno'pi saṃtuṣṭastvarā hāsyavivarjitaḥ || 57 ||
[Analyze grammar]

ekādaśa daśāṣṭau vā paṃca dvau vā kurūttama |
arcayeccandanairdhūpaiḥ puṣpairgandhairdvijottamān || 58 ||
[Analyze grammar]

śraddhoktavidhinā pārtha bhojayedbhāgyavānyatīn |
ācāṃtebhyastato dadyāttyāgaṃ yatkiñcideva hi || 59 ||
[Analyze grammar]

svavācā svamanobhīṣṭapatrapuṣpaphalādikam |
caturo vārṣikānmāsānniyamo yasya yaḥ kṛtaḥ || 60 ||
[Analyze grammar]

kathayitvā dvijebhyastaṃ dadyādbhaktyā sadakṣiṇām |
dattvā visarjayedviprāṃstato bhuñjīta ca svayam || 61 ||
[Analyze grammar]

yattyaktaṃ caturo māsānpravṛttintasya cācaret |
evaṃ ya ācaretpārtha so'nantaṃ dharmamāpnuyāt || 62 ||
[Analyze grammar]

avasāne tu rājendra vāsudevapurīṃ vrajet |
yasyāvighnaiḥ samāpyeta cāturmāsyavrataṃ nṛpa || 63 ||
[Analyze grammar]

sa bhavetkṛtakṛtyastu na punarmātṛko bhavet |
yo devaśayanaṃ pārtha māsaṃmāsaṃ samācareta || 64 ||
[Analyze grammar]

utthānaṃ cāpi kṛṣṇasya sa harerlokamāpnuyāt |
śṛṇoti dhyāyati stauti juhotyākhyāti yo naraḥ |
viṣṇorbhaktiṃ parāṃ pārtha sa gacchedvaiṣṇavaṃ padam || 65 ||
[Analyze grammar]

dugdhābdhibhogaśayane bhagavānananto yasmindine svapiti yatra vibudhyate vā |
tasminnananyamanasāmupavāsabhājāṃ puṃsāṃ dadāti sugatiṃ garuḍāṃgasaṃgī || 66 ||
[Analyze grammar]