Chapter 64

śrīkṛṣṇa uvāca |
pārtha pārthivavṛndānāṃ mukhapaṅkajasadrave |
śṛṇuṣvāvahito vacmi tavāśādaśamīvratam || 1 ||
[Analyze grammar]

nalanāmābhavatpūrvaṃ niṣadheṣu mahīpate |
sa bhrātrā nirjito rājye puṣkareṇeti naḥ śrutam || 2 ||
[Analyze grammar]

akṣairdyūtena rājendra niryayau bhāryayā saha |
vanaṃ pratibhayaṃ śūnyaṃ jhillīkagaṇanāditam || 3 ||
[Analyze grammar]

sa gatvā pratyahorātraṃ jalamātreṇa vartayan |
dadarśa vanamadhyasthāñchakunīnkāṃcanacchavīn || 4 ||
[Analyze grammar]

grahītumicchaṃstānrājansamācchādya svavāsasā |
khamāpetuḥ khagāstūrṇaṃ gṛhītvā vasanaṃ śubham || 5 ||
[Analyze grammar]

āsasāda samāḥ kāściddhṛtavāsāḥ suduḥkhitaḥ |
damayaṃtīṃ samāprāpya nidrayāpahṛtāṃ tadā |
duḥkhādutsṛjya gatavānbhāgyataḥ prāgdhaneśvaram || 5 ||
[Analyze grammar]

gate tu naiṣadhe bhaimī prabuddhai vāñcitānanā |
apaśyaṃtī nalaṃ vīraṃ vīra bhīmasutā vane |
itaścetaśca babhrāma hāheti rudatī muhuḥ || 7 ||
[Analyze grammar]

duḥkhaśokasamākrāṃtā naladarśanalālasā |
āsasāda dine kaiścitsā caidyapuramaṃjasā || 8 ||
[Analyze grammar]

unmattavatparivṛtā śiśubhiḥ kautukākulaiḥ |
sā dṛṣṭā cedirājasya jananyā janaveṣṭitā || 9 ||
[Analyze grammar]

candralekheva patitā bhūmau bhāsitadiṅmukhā |
āropya sā svabhavanaṃ pṛṣṭā kā tvaṃ varānane || 10 ||
[Analyze grammar]

uvāca bhaimī savrīḍaṃ sairaṃdhrīṃ māṃ nibodhatām |
na dhāvayeyaṃ caraṇau nocchiṣṭaṃ bhakṣayāmyaham || 11 ||
[Analyze grammar]

yadi prārthayate kaściddaṃḍyaste sāṃprataṃ bhavet |
pratijñayānayā devi tiṣṭheyaṃ tava veśmani |
evamastvanavadyāṃgi rāja mātāpyuvāca tām || 12 ||
[Analyze grammar]

evaṃvidhā tadbhavane kaṃcitkālamaniṃditā |
uvāsa vasanārddhena pravṛttāṃte kila dvijaḥ |
ānayāmāsa mudito damayaṃtīṃ gṛhaṃ pituḥ || 13 ||
[Analyze grammar]

mātrā pitrā samāyuktā sutairbhrātṛbhireva ca |
damayaṃtī tathāpyāste duḥkhaṃ naiṣadhavarjitā || 14 ||
[Analyze grammar]

provāca vimanāhūya vrataṃ dānamathāpi vā |
kathayadhvaṃ yathā me syādiṣṭena saha saṃgamaḥ || 15 ||
[Analyze grammar]

tatretihāsakuśalo vipraḥ provāca buddhimān |
bhadre tvamāśādaśamīṃ kuruṣvepsitasiddhidām || 16 ||
[Analyze grammar]

cakāra sarvaṃ tanvaṃgī yatpurāṇavidā tadā |
khyātamākhyānaviduṣā damanena purodhasā || 17 ||
[Analyze grammar]

vratasyāsya prabhāveṇa damayaṃtyā narottama |
saṃjātaḥ sukhado'tyarthaṃ bharttrā saha samāgamaḥ || 18 ||
[Analyze grammar]

yudhiṣṭhira uvāca |
kathamāśādaśamyeṣā govinda kriyate kadā |
sarvametatsamācakṣva māṃ sarvajñosi yādava || 19 ||
[Analyze grammar]

śrīkṛṣṇa uvāca |
rājyāśayā rājaputraḥ kṛṣyarthaṃ tu kṛṣīvalaḥ |
bhāryārthaṃ tu vaṇikputraḥ putrārthe gurviṇī tathā || 20 ||
[Analyze grammar]

dharmārthakāmasaṃsiddhayai lokakanyā varārthinī |
yaṣṭukāmo dvijavaro rogī rogāpanuttaye || 21 ||
[Analyze grammar]

cirapravāsite kāṃte kālena dhṛtipaṃḍitā |
eteṣvanyeṣu kartavyamāśāvratamidaṃ sadā || 22 ||
[Analyze grammar]

yadā yasya bhavedārtaṃ kāryate hi tadā vratam |
śuklapakṣe daśamyāṃ tu snātvā saṃpūjya devatāḥ || 23 ||
[Analyze grammar]

naktaṃ tadāśāḥ saṃpūjyāḥ puṣpālaktakacandanaiḥ |
gṛhāṅgaṇe lekhayitvā yavaiḥ piṣṭātakena vā |
dattvā ghṛtāktaṃ naivedyaṃ punaḥ kāryaṃ nivedayet || 24 ||
[Analyze grammar]

āśāścāśāḥ sadā saṃtu vidyaṃtāṃ ca manorathāḥ |
bhavatīnāṃ prasādena sadā kalyāṇamastviti || 25 ||
[Analyze grammar]

evaṃ saṃpūjya bhuñjīta dattvā viprāya dakṣiṇām |
anena kramayogena māsimāsi samācaret || 26 ||
[Analyze grammar]

yāvanmanorathaḥ pūrṇastataḥ paścātsamudyamāt |
māsi pūrṇe ca ṣaṇmāse varṣe varṣadvaye gate || 27 ||
[Analyze grammar]

sauvarṇāḥ kārayedāśā raupyapiṣṭātakena vā |
jñātibaṃdhujanaiḥ sārddhaṃ snātaḥ samyagalaṃkṛtaḥ || 28 ||
[Analyze grammar]

pūjayenmaṃtrasaṃdarbhairebhirdhyātvā gṛhāṃgaṇe || |
tava saṃnihitaḥ śakraḥ surāsuranamaskṛtaḥ |
pūrvā candreṇa sahitā aindrīdigdevate namaḥ || 29 ||
[Analyze grammar]

agneḥ parigrahādārye tvamāgneyīti paṭhyase |
tejomayī parā śaktirāgneyī varadā bhava || 30 ||
[Analyze grammar]

devarājaṃ samāsādya lokaḥ saṃyamayatyasau |
tena saṃyamanī yāsi yāmye kāmapradā bhava || 31 ||
[Analyze grammar]

khaḍgaṃsahātivikṛtā nairṛtistvamupābhṛtā |
tena nairṛtanāmnītvaṃ kṛtavānmaghavā sadā || 32 ||
[Analyze grammar]

tvayyāste bhavanādhāravaruṇo yādasāṃ patiḥ |
iṣṭakāmārthasiddhyarthaṃ vāruṇiprabhavā bhava || 33 ||
[Analyze grammar]

adhiśritāsi yasmāttvaṃ vāyunā jagadāyunā |
vāyavye tvamataḥ śāntiṃ nityaṃ yaccha namonamaḥ || 34 ||
[Analyze grammar]

kuberavāsataḥ saumyā prakhyātā tvamathottarā |
aiśānī jagadīśena śaṃbhunā tvamalaṃkṛtā |
atastvaṃ śivasānnidhyaṃ devi dehi śive namaḥ || 35 ||
[Analyze grammar]

sarpāṣṭakakulena tvaṃ sevitāsi tathāpyadhaḥ |
nāgāṃganābhiḥ sahitā hitā naḥ sarvadā bhava || 36 ||
[Analyze grammar]

saptalokaiḥ parigatā sarvadā tvaṃ śivā yataḥ |
sanakādyaiḥ parivṛtā brāhmī jihmānapākuru || 37 ||
[Analyze grammar]

nakṣatrāṇi ca sarvāṇi grahāstārāgrahāstathā |
nakṣatramātaro ye ca bhūtapretavināyakāḥ |
sarve mameṣṭasiddhyarthe bhavaṃtu praṇatāḥ sadā || 38 ||
[Analyze grammar]

ebhirmaṃtraiḥ samabhyarcya puṣpadhūpādinā tataḥ |
vāsobhirabhisaṃsthāpya phalāni vinivedayet || 39 ||
[Analyze grammar]

tattūryadhvanighoṣeṇa gatimaṅgalaniḥsvanaiḥ |
nṛtyatībhirvarastrībhistāṃ rātrimativāhayet || 40 ||
[Analyze grammar]

kuṃkumakṣodatīvreṇa dānamānādibhiḥ sukham |
prabhāte vedaviduṣe sarvaṃ tatpratipādayet || 41 ||
[Analyze grammar]

anena vidhinā sarvaṃ kṣamayanpraṇipatya ca |
bhuñjīta mitrasahitaḥ suhṛdbaṃdhujanairapi || 42 ||
[Analyze grammar]

ya evaṃ kurute pārtha daśamīvratamādarāt |
sa sarvakāmamāpnoti manasābhīpsitaṃ naraḥ || 43 ||
[Analyze grammar]

strībhirviśeṣataḥ kāryaṃ vratametadyudhiṣṭhira |
laghucittā yato nāryaḥ sadā kāmaparāyaṇāḥ || 44 ||
[Analyze grammar]

dhanyaṃ yaśasyamāyuṣyaṃ sarvakāmaphalapradam |
kathitaṃ te mahārāja mayā vratamanuttamam || 45 ||
[Analyze grammar]

ye mānavā manujapuṅgava kāmakāmāḥ saṃpūjayaṃti daśamīṣu sadā daśāśāḥ |
teṣāṃ viśeṣanihitā hṛdaye prakāmamāśāḥ phalaṃtyalamalaṃ bahunoditena || 46 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāda āśādaśamīvrataṃ nāma catuṣpaṣṭitamo'dhyāyaḥ || 64 ||
[Analyze grammar]