Chapter 54

śrīkṛṣṇa uvāca |
budhāṣṭamīvrataṃ bhūyo bravīmi śṛṇu pāṃḍava |
yena cīrṇena narakaṃ naraḥ paśyati na kvacit || 1 ||
[Analyze grammar]

purā kṛtayugasyādau ilo rājā babhūva ha |
bahubhṛtyasuhṛnmitramaṃtribhiḥ parivāritaḥ || 2 ||
[Analyze grammar]

jagāma himavatpārśve mahādevena vāritaḥ |
yo'nyaḥ praviśate bhūmau sā strī bhavati niścitam || 3 ||
[Analyze grammar]

sa rājā mṛgasaṃgena prāviśattadumāvane |
ekākī turagopetaḥ kṣaṇātstrītvaṃ jagāma ha || 4 ||
[Analyze grammar]

sā babhrāma vane śūnye pīnonnatapayodharā |
kuto'hamāgatetyevaṃ na tvabudhyata kiṃcana || 5 ||
[Analyze grammar]

tāṃ dadarśa budhaḥ saumyāṃ rūpaudāryaguṇānvitām |
aṣṭamyāṃ budhavāreṇa tasyāstuṣṭo budho grahaḥ || 6 ||
[Analyze grammar]

dadhau garbhaṃ tadudare ilāyā rūpatoṣitaḥ |
putramutpādayāmāsa yo'sau khyātaḥ purūravāḥ || 7 ||
[Analyze grammar]

caṃdravaṃśakaro rājā ādyaḥ sarvamahīkṣitām |
tataḥ prabhṛti pūjyeyamaṣṭamī budhasaṃyutā || 8 ||
[Analyze grammar]

sarvapāpapraśamanī sarvopadravanāśinī |
athānyadapi te vacmi dharmarāja kathānakam || 9 ||
[Analyze grammar]

āsīdrājā videhānāṃ mithilāyāṃ sa vairibhiḥ |
saṃgrāme nihato vīrastasya bhāryā daridriṇī || 10 ||
[Analyze grammar]

ūrmilā nāma babhrāma mahīṃ bālakasaṃyutā |
avaṃtī viṣayaṃ prāptā brāhmaṇasya niveśane || 11 ||
[Analyze grammar]

cakārodarapūrtyarthaṃ nityaṃ kaṃḍanapeṣaṇe |
hṛtvā sā stokagodhūmāndadau bālakayostadā || 12 ||
[Analyze grammar]

kāruṇyānmātṛvātsalyātkṣudhāsaṃpīḍyamānayoḥ |
kālena bahunā sādhvī pañcatvamagamacchubhā || 13 ||
[Analyze grammar]

putrastasyā videhāyāṃ gatvā svapiturāsane |
upaviṣṭaḥ sattvayogādbubhuje gāmanākulaḥ || 14 ||
[Analyze grammar]

anviṣya dharmarājño vai sā kanyā mithivaṃśajā |
vivāhitā hitā bhartuḥ sā mahānāyikā'bhavat || 15 ||
[Analyze grammar]

śyāmalā nāma cārvaṃgī prasiddhā śrūyate śrutau |
tāmuvāca varārohāṃ dharmarājaḥ svayaṃ priyām || 16 ||
[Analyze grammar]

vahasva sarvavyāpāraṃ śyāmale tvaṃ gṛhe mama |
kuru svajanabhṛtyānāṃ dānakṣepaṃ yathepsitam || 17 ||
[Analyze grammar]

kiṃ tvete paṃjarāḥ sapta kīlakairatiyaṃtritāḥ |
kadācidapi noddhāṭyāstvayā vaidehanaṃdini || 18 ||
[Analyze grammar]

evamastviti sāpyuktā nijaṃ karma cakāra ha |
kadācidvyākulībhūte dharmarāje videhajā |
uddhāṭayitvā prathamaṃ dadarśa jananīṃ svakām || 19 ||
[Analyze grammar]

sā pacyamānā kraṃdaṃtī bhīṣaṇairyamakiṃkaraiḥ |
helayā kṣipyate baddhvā taptataile punaḥpunaḥ || 20 ||
[Analyze grammar]

tathaiva tālakaṃ dattvā vrīḍitā sā manasvinī |
dvitīye paṃjare tadvatsā tāmevaṃ dadarśa ha || 21 ||
[Analyze grammar]

sudhāvallipyamānāṃ tāṃ śilātalpeṣṭakena tu |
tṛtīyapañjare tadvattāṃ dadarśa svamātaram |
krakacaiḥ pāṭyate mūrdhni ghaṇṭāyuktaiḥ karolbaṇaiḥ || 22 ||
[Analyze grammar]

caturthe pañjare sthāne bhīṣaṇairdāruṇānanaiḥ |
bhakṣyamāṇāṃ śvāpadaiśca kraṃdaṃtīṃ tāṃ punaḥ punaḥ || 23 ||
[Analyze grammar]

pañcame nihitā bhūmau kaṇṭhe pādena pīḍitā |
saṃdaṃśairvanaghātaiśca vidīrṇā kriyate ruṣā || 24 ||
[Analyze grammar]

ṣaṣṭhe cekṣuyantragatāṃ mastake mudgarāhatām |
saṃpīḍyamānāmaniśaṃ sudṛḍhāmikṣukhaṃḍavat || 25 ||
[Analyze grammar]

saptame pañjare cīrṇasvanāṃ pūtikagaṃdhinīm |
dṛṣṭvā tathā gatāṃ tāṃ tu mātaraṃ duḥkhakarṣitā |
śyāmalā mlānavadanā kiṃcinnovāca bhāminī || 26 ||
[Analyze grammar]

athāgataṃ yamaṃ prāha saroṣā śyāmalā patim |
kiṃ tavāpahṛtaṃ rājanmama mātrā sudāruṇam |
yeneyaṃ vividhairghātairvadhyate bahudhā tvayā || 27 ||
[Analyze grammar]

yamaḥ prāha priyāṃ dṛṣṭvā bhadre hyudghāṭitāstvayā |
ete pañjarakāḥ sapta niṣiddhā tvaṃ mayā purā || 28 ||
[Analyze grammar]

tava mātrā sutasnehādgodhūmā ye hṛtāḥ kila |
kiṃ na jānāsi tadbhadre yena ruṣṭā mamopari || 29 ||
[Analyze grammar]

brahmasvaṃ praṇayādbhuktaṃ dahatyāsaptamaṃ kulam |
tadeva cauryarūpeṇa dahatyācaṃdratārakam || 30 ||
[Analyze grammar]

godhūmāsta ime bhūtāḥ kṛmirūpāḥ sudāruṇāḥ |
ye purā brāhmaṇagṛhe hṛtāstava kṛte'nayā || 31 ||
[Analyze grammar]

śyāmalovāca |
jānāmi tadahaṃ sarvaṃ yanme mātrā kṛtaṃ purā |
tathāpi tvāṃ samāsādya sā ca jāmātaraṃ śubham |
mucyate kṛmirāśitvādyathā tadadhunā kuru || 32 ||
[Analyze grammar]

tacchrutvā cintayāviṣṭaściraṃ sthitvā jagāda tām |
dharmarājaḥ sahāsīnāṃ priyāṃ prāṇadhaneśvarīm || 33 ||
[Analyze grammar]

itaśca saptame'tīte janmani brāhmaṇī śubhā |
āsīstasmiṃstvayā saṃgātsakhīnāṃ paryupāsitā |
budhāṣṭamī susaṃpūrṇā yathoktaphaladāyinī || 34 ||
[Analyze grammar]

tatphalaṃ yaddadāsyasyai satyaṃ kṛtvā mamāgrataḥ |
tena mucyeta te mātā narakātpāpasaṃkaṭāt || 35 ||
[Analyze grammar]

tacchrutvā tvaritaṃ snātvā dadau puṇyaṃ svakaṃ kṛtam |
svamātuḥ śyāmalā tuṣṭā tena mokṣaṃ jagāma sā || 35 ||
[Analyze grammar]

ūrmilā rūpasaṃpannā divyadehadharā śubhā |
vimānavaramārūḍhā divyamālyāṃbarāvṛtā || 36 ||
[Analyze grammar]

bhartuḥ samīpe svargasthā dṛśyate'dyāpi sā janaiḥ |
budhasya pārśve nabhasi mithirājasamīpataḥ |
visphuraṃtī mahārāja budhāṣṭamyāḥ prabhāvataḥ || 37 ||
[Analyze grammar]

yudhiṣṭhira uvāca |
yadyevaṃ pravarā kṛṣṇa sā tithirvai budhāṣṭamī |
tasyā eva vidhiṃ brūhi yadi tuṣṭosi me prabho || 38 ||
[Analyze grammar]

śrīkṛṣṇa uvāca |
śṛṇu pāṃḍava yatnena budhāṣṭamyā vidhiṃ śubham |
yadāyadā sitāṣṭamyāṃ budhavāro bhavedyadi |
tadātadā ca sā grāhyā ekabhaktāśanairnṛbhiḥ || 39 ||
[Analyze grammar]

snātvā nadyāṃ tu pūrvāhne gṛhītvā kalaśaṃ navam |
jalapūrṇaṃ tu sadravyaṃ pūrṇapātrasamanvitam || 40 ||
[Analyze grammar]

aṣṭavārānprakartavyā vidhānaistu pṛthakpṛthak |
prathamā modakaiḥ kāryā dvitīyā pheṇakaistathā || 41 ||
[Analyze grammar]

tṛtīyā ghṛtapūpaiśca caturthī vaṭakairnṛpa |
pañcamī śubhrakāraiśca ṣaṣṭhī sohālakaistathā || 42 ||
[Analyze grammar]

aśokavartibhiḥ śubhraiḥ saptamī khaṃḍasaṃyutaiḥ |
aṣṭamī phalapuṣpaiśca kevalākhaṇḍapheṇikaiḥ |
evaṃ krameṇa kartavyā suhṛtsvajanabāṃdhavaiḥ || 43 ||
[Analyze grammar]

saha kṛtvā sthitairbhojyaṃ bhoktavyaṃ svasthamānasaiḥ |
upoṣyāṇāmidaṃ śreṣṭhaṃ kathayadbhiḥ śanaiḥśanaiḥ || 44 ||
[Analyze grammar]

śrutvāṣṭamī budhasyāpi māhātmyaṃ bhojanaṃ tyajet |
tāvadeva na bhoktavyaṃ kathā yāvatsamāpyate || 45 ||
[Analyze grammar]

tathā bhuktvā budhasyāgre ācamya ca punaḥpunaḥ |
viprāya vedaviduṣe taṃ bruvanpratipādayet || 46 ||
[Analyze grammar]

sākṣataṃ sahiraṇyaṃ ca jātarūpamayaṃ śubham |
arcitaṃ vividhaiḥ puṣpairdhūpadīpaiḥ sugaṃdhibhiḥ || 47 ||
[Analyze grammar]

pītavastraiḥ samācchannaṃ budhaṃ somātmajākṛtim |
māṣakeṇa suvarṇena tadardhārdhena vā punaḥ || 48 ||
[Analyze grammar]

oṃ budhāya namaḥ |
oṃ somātmajāya namaḥ |
oṃ durbuddhināśanāya namaḥ |
oṃ subuddhipradāya namaḥ |
oṃ tārājātāya namaḥ |
oṃ saumyagrahāya namaḥ |
oṃ sarvasaukhyapradāya namaḥ || ete pūjāmantrāḥ |
aṣṭamī tu yadā pūrṇā tadā rājarṣisattama |
brāhmaṇānbhojayedaṣṭau gāṃ dadyācca savatsikām || 49 ||
[Analyze grammar]

vastrālaṃkaraṇaiḥ sarvairbhūṣaṇairvividhairapi |
sapatnīkaṃ samabhyarcya karṇamātrāṃgulīyakaiḥ |
mantreṇānena kauṃteya dadyādevaṃ samācaran || 50 ||
[Analyze grammar]

budho'yaṃ pratigṛhṇātu dravyastho'yaṃ budhaḥ svayam |
dīyate budharājāya tuṣyatāṃ ca budho mama || 51 ||
[Analyze grammar]

budhaḥ saumyastārakeyo rājaputra ilāpatiḥ |
kumāro dvijarājasya yaḥ purūravasaḥ pitā || 52 ||
[Analyze grammar]

durbuddhibādhajanitaṃ nāśayitvā ca me budhaḥ |
saukhyaṃ ca saumanasyaṃ ca karotu śaśinaṃdanaḥ || 53 ||
[Analyze grammar]

ityuccārya gṛhītvā tu dadyānmaṃtrapuraḥsaram |
saptajanmani rājendra jāto jātismaro bhavet || 54 ||
[Analyze grammar]

dhanadhānyasamāyuktaḥ. putrapautrapravarddhanaḥ |
dīrṣāyurvipulānbhogānbhuktvā caiva mahītalaṃ || 55 ||
[Analyze grammar]

tataḥ sutīrthe maraṇaṃ dhyātvā nārāyaṇaṃ vibhum |
mṛto'sau svargamāpnoti purandarasamo naraḥ || 56 ||
[Analyze grammar]

vasate yāvadāsṛṣṭeḥ punarābhūtasaṃplavam |
evametanmayā khyātaṃ vratānāmuttamaṃ vratam || 57 ||
[Analyze grammar]

eṣaivaṃ ca mayākhyātā guhyā pārtha budhāṣṭamī |
yāṃ śrutvā brahmahā goghnaḥ sarvapāpaiḥ pramucyate || 58 ||
[Analyze grammar]

yaścāṣṭamīṃ budhayutāṃ samavāpya bhaktyā sampūjayedvidhusutaṃ kanapṛṣṭhasaṃ stham |
pakvānnapātrasahitaiḥ sahiṇyavastraiḥ paśyedasau yamapuraṃ na kadācideva || 59 ||
[Analyze grammar]