Chapter 52

yudhiṣṭhira uvāca |
kimudvegādbhavetkṛtyamalakṣmīḥ kena hanyate |
mṛtavatsādikāryeṣu duḥsvapne ca kimiṣyate || 1 ||
[Analyze grammar]

śrīkṛṣṇa uvāca |
purā kṛtāni pāpāni phalaṃtyatra yudhiṣṭhira |
rogardaurgatyarūpeṇa tathaiveṣṭavighātanaiḥ || 2 ||
[Analyze grammar]

tadvighātāya vakṣyāmi sadā kalyāṇasaptamīm |
saptamīsnapanaṃ nāma vyādhipīḍāvināśanam || 3 ||
[Analyze grammar]

bālānāṃ maraṇaṃ yatra kṣīrapānaṃ praśasyate |
tadvadvṛddhāturāṇāṃ ca yauvane vāpi vartatām || 4 ||
[Analyze grammar]

śāntaye tatra vakṣyāmi mṛtavatsādike ca yat |
etadevādbhutodvegaciṃtāvibhramamānasam || 5 ||
[Analyze grammar]

varāhakalpe saṃprāpte manorvaivasvateṃ'tare |
kṛte yuge mahārāja haihayo rūpavarddhanaḥ || 6 ||
[Analyze grammar]

āsīnnṛpottamaḥ pūrvaṃ kṛtavīryaḥ pratāpavān |
sa saptadvīpamakhilaṃ pālayāmāsa bhūtalam || 7 ||
[Analyze grammar]

yāvadvarṣasahasrāṇi saptasaptati bhārata |
jātamātraṃ ca tasyātha śubhaṃ putraśataṃ kila || 8 ||
[Analyze grammar]

yavanasya tu śāpena vināśamagamatpurā |
kṛtavīryaḥ samārādhya sahasrāṃśuṃ divākaram || 9 ||
[Analyze grammar]

upavāsavratairdivyairvedasūktaiśca bhārata |
darśayāmāsa cātmānaṃ kṛtavīryasya bhānumat || 10 ||
[Analyze grammar]

kṛtavīryeṇa vai pṛṣṭaḥ provācedaṃ bṛhaspatiḥ |
atikleśena mahatā putrastava narādhipa || 11 ||
[Analyze grammar]

bhaviṣyati ciraṃjīvī kiṃ tu kalmaṣanāśanam |
saptamīsnapanaṃ vāpyāṃ kuru pāpavinaṣṭaye || 12 ||
[Analyze grammar]

jātasya mṛtavatsāyāḥ saptame māsi bhūpate |
gṛhatārābalaṃ labdhvā kṛtvā brāhmaṇavācanam || 13 ||
[Analyze grammar]

bālasya janmanakṣatraṃ varjayettāṃ tithiṃ budhaḥ |
sadvṛddhāturagāṇāṃ tu kṛtaṃ syāditi teṣu ca || 14 ||
[Analyze grammar]

gomayenopaliptāyāṃ bhūmāvekāgracittavān |
taṃḍulai raktaśāleyairvaruṇākṣīrasaṃyutam || 15 ||
[Analyze grammar]

nirvapetsūryamudgābhyāṃ mātṛbhyopi vidhānataḥ |
kīrtayetsūryadaivatyaṃ saptārciṣi ghṛtāhutīḥ || 16 ||
[Analyze grammar]

juhuyādrudrasūktena tadvadrudrāya bhārata |
hotavyāḥ samidhaścātra tatra vārkapalāśajāḥ || 17 ||
[Analyze grammar]

yavakṛṣṇatilairhomaḥ kartavyoṣṭaśataṃ punaḥ |
hutvā snānaṃ ca kartavyaṃ madhye gāṃgena dhīmatā || 18 ||
[Analyze grammar]

vipreṇa vedaviduṣā vidhivaddarbhapāṇinā |
sthāpayitvā catuṣkoṇe catuṣkuṃbhānpraśobhanān || 19 ||
[Analyze grammar]

pañcamaṃ ca punarmadhye cākṣatena vibhūṣitam |
sthāpayeddarpaṇākrāṃtaṃ saptarṣiṇābhimaṃtritam || 20 ||
[Analyze grammar]

saureṇa tīrthatoyena pūrṇacandramalānvitam |
sarvānsarvauṣadhiyutānpañcabhaṃgajalānvitān || 21 ||
[Analyze grammar]

paṃcaratnaphalairyuktāñchākhābhirapi veṣṭitān |
gajāśvarathyārājadvārvalmīkāddhradagokulāt || 22 ||
[Analyze grammar]

suśuddhāṃ mṛdamānīya sarveṣveva vinikṣipet |
caturṣvapi ca kuṃbheṣu ratnagarbheṣu madhyamam || 23 ||
[Analyze grammar]

gṛhītvā brāhmaṇaṃ cātra saurānmantrānudīrayet |
nārībhiḥ saptasaṃkhyābhī rathāṅgāṅābhiratra ca || 24 ||
[Analyze grammar]

bhojitābhiryathāśakti mālyavastravibhūṣaṇaiḥ |
saviprābhiśca kartavyaṃ mṛtavatsābhiṣecanam || 25 ||
[Analyze grammar]

dīrghāyurastu bālo'yaṃ jīvaputrā ca bhāvinī |
ādityacandramāsārdhaṃ grahanakṣatramaṇḍalam || 26 ||
[Analyze grammar]

śakraḥ salokapālo vai brahmā viṣṇurmaheśvaraḥ |
ete cānye ca vai devāḥ sadā pāṃtu kumārakam || 27 ||
[Analyze grammar]

māśanirmā sa hutabhuṅmā ca bālagrahā kvacit |
pīḍāṃ kurvaṃtu bālasya mā mātṛjanakasya vai || 28 ||
[Analyze grammar]

tataḥ śuklāmbaradharāḥ kumāraṃ patisaṃyutāḥ |
saptakaṃ pūjayedbhaktyā puṣpairgandhaiḥ phalaiḥ śubhaiḥ || 29 ||
[Analyze grammar]

kāñcanīṃ ca tataḥ kṛtvā tilapātropari sthitām |
pratimāṃ dharmarājasya gurave vinivedayet || 30 ||
[Analyze grammar]

vastrakāñcanaratnaughairbhakṣyaiḥ saghṛtapāyasaiḥ |
pūjayedbrāhmaṇāstadvadvittaśāṭhyaṃ vivarjayet |
bhuktvā ca guruṇā ceyamuccāryā maṃtrasaṃtatiḥ || 31 ||
[Analyze grammar]

dīrghāyurastu bālo'yaṃ yāvadvarṣaśataṃ sukhī |
yatkiñcidasya duritaṃ tatkṣiptaṃ vaḍa vāmukhe || 32 ||
[Analyze grammar]

brahmā rudro viṣṇuḥ skando vāyuḥ śakro hutāśanaḥ |
rakṣaṃtu sarve duṣṭebhyo varadā yāṃtu sarvadā || 33 ||
[Analyze grammar]

evamādīni cānyāni vadataḥ pūjayedgurūn |
śaktitaḥ kapilāṃ dattvā praṇipatya visarjayet || 34 ||
[Analyze grammar]

caruṃ ca putrasahitā praṇamya raviśaṃkarau |
hutaśeṣaṃ tadānīyādādityāya namo'stu te || 35 ||
[Analyze grammar]

ayamevādbhutaṃ yogo hyadbhuteṣu ca śasyate |
karturjanmani vṛkṣāṇāṃ devāntsaṃpūjayettadā |
śāṃtyarthaṃ śuklasaptamyāmetatkurvanna sīdati || 36 ||
[Analyze grammar]

puṇyaṃ pavitramāyuṣyaṃ saptamīsnapanaṃ raviḥ |
kathayitvā naraśreṣṭha tatraivāṃtaradhīyata || 37 ||
[Analyze grammar]

sa cānena vidhānena kārtavīryo'rjuno nṛpaḥ |
saṃvatsarāṇāmayutaṃ śaśāsa pṛthivīmimām || 38 ||
[Analyze grammar]

ārogyaṃ bhāskārādiccheddhanamiccheddhutāśanāt |
śaṃkarājjñānamicchettu gatimicchejjanārdanāt || 39 ||
[Analyze grammar]

etanmahāpātakanāśanaṃ syādapyakṣayaṃ vedavidaḥ paṭhaṃti |
śṛṇoti yaścainamananyacetāstasyāpi siddhiṃ munayo vadaṃti || 40 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde snapanasaptamīvratavarṇanaṃ nāma dvipaṃcāśattamo'dhyāyaḥ || 52 ||
[Analyze grammar]