Chapter 43

yudhiṣṭhira uvāca |
saptamī ca yadā deva kena kālena pūjyate |
kiṃphalā niyamaḥ kaścidvada devakinandana || 1 ||
[Analyze grammar]

śrīkṛṣṇa uvāca |
śuklapakṣe tu saptamyāṃ yadādityadinaṃ bhavet |
saptamī vijayā nāma tatra dattaṃ mahā phalam || 2 ||
[Analyze grammar]

snānaṃ dānaṃ japo homa upavāsastathaiva ca |
sarvaṃ vijayasaptamyāṃ mahāpātakanāśanam || 3 ||
[Analyze grammar]

pradakṣiṇāṃ yaḥ kurute phalaiḥ puṣpai rdivākaram |
sa sarvaguṇasaṃpannaṃ putraṃ prānotyanuttamam || 4 ||
[Analyze grammar]

prathamā nālikeraistu dvitīyā raktanāgaraiḥ |
tṛtīyā mātuluṃgaiśca caturthī kadalīphalaiḥ || 5 ||
[Analyze grammar]

pañcamī varakūṣmāṇḍaiḥ ṣaṣṭhī pakvaistu teṃdukaiḥ |
vṛntākaiḥ saptamī deyā aṣṭottaraśatena ca || 6 ||
[Analyze grammar]

mauktikaiḥ padmarāgaiśca nīlaiḥ karketanaistathā |
gomedairvajravaiḍūryaiḥ śatenāṣṭādhikena tu || 7 ||
[Analyze grammar]

akṣoṭairbadarairbilvaiḥ karamardaiḥ sabarbaraiḥ |
āmrāmrātakajaṃbīrairjaṃbukarkoṭikāphalaiḥ || 8 ||
[Analyze grammar]

puṣpairdhūpaiḥ phalaiḥ patrairmodakairguṇakaiḥ śubhaiḥ |
ebhirvijayasaptamyāṃ bhānoḥ kuryātpradakṣiṇām || 9 ||
[Analyze grammar]

anyaiḥ phalaiśca kāmyaiśca aikṣavairgraṃthivarjitaiḥ |
raveḥ pradakṣiṇā deyā phalena phalamādiśet || 10 ||
[Analyze grammar]

na viśenna ca saṃjalpenna ca kaścidvadedapi |
ekacittatayā bhānuścintanāya prayacchati || 11 ||
[Analyze grammar]

vasordhārāpradātavyā bhānorgavyena sarpiṣā |
candrātapatraṃ badhnīyājjayaṃ kiṃkiṇikāyutam || 12 ||
[Analyze grammar]

kuṃkumena samālabhya puṣpadhūpaiśca pūjayet |
śubhaṃ nivedya naivedyaṃ tataḥ paścātkṣamāpayet || 13 ||
[Analyze grammar]

bhāno bhrāskaramārtaṇḍa caṇḍaraśme divākara |
ārogyamāyurvijayaṃ putraṃ dehi namo'stu te || 14 ||
[Analyze grammar]

upavāsena naktena tathaivāyācitena ca |
kṛtā niyamayuktena yā tviyaṃ jayasaptamī || 15 ||
[Analyze grammar]

rogī vimucyate rogāddaridraḥ śriyamāpnuyāt |
aputro labhate putraṃ vidyā vidyārthino bhavet || 16 ||
[Analyze grammar]

śuklapakṣe yadā pārtha sādityasaptamī bhavet |
tadā naktena mudgāśī kṣapayetsapta saptamī || 17 ||
[Analyze grammar]

bhūmau palāśapatreṣu snātvā hutvā yathāvidhi |
samāpte tu vrate dadyātsauvarṇaṃ mudgamiśritam || 18 ||
[Analyze grammar]

mudgaṃ śreṣṭhāya viprāya vācakāya viśeṣataḥ |
saptamyāṃ saptisaṃyukta ādityena narottama || 19 ||
[Analyze grammar]

upoṣya vidhinānena mantraprāśanapūjaneḥ |
ṣaḍakṣareṇa mantreṇa sarvaṃ kāryaṃ vijānatā || 20 ||
[Analyze grammar]

arcanaṃ vahnikāryaṃ ca śatamaṣṭottaraṃ naraḥ |
samāpte tu vrate paścātsuvarṇena ghaṭāpitam || 21 ||
[Analyze grammar]

sauvarṇaṃ bhāskaraṃ pārtha rukmapātragataṃ śubham |
raktāṃbaraṃ ca kāṣāyaṃ gandhaṃ dadyātsadakṣiṇam || 22 ||
[Analyze grammar]

mantreṇānena viprāya karmasiddhyai dvijātaye |
oṃ bhāskarāya sudevāya namastubhya yaśaskara || 23 ||
[Analyze grammar]

mamādya samīhitārthaprado bhava namonamaḥ |
dānāni ca pradeyāni gṛhāṇi śayanāni ca || 24 ||
[Analyze grammar]

śrāddhāni pitṛdevānāṃ śāśvatīṃ tṛptimicchatā |
yātrā praśastā yātṝṇāṃ rājñāṃ ca jayamicchatām || 25 ||
[Analyze grammar]

vijayo jāyate'vaśyaṃ yatīnāṃ ca nṛṇāṃ tadā |
atorthaṃ viśrutā loke sadā vijayasaptamī || 26 ||
[Analyze grammar]

evameṣā tithiḥ pārtha iha kāmapradā nṛṇām |
paratra sukhadā saumyā sūryalokapradāyinī || 27 ||
[Analyze grammar]

dātā bhogī ca caturo dīrghāyurnīrujaḥ sukhī |
ihāgatya bhavedrājā hastyaśvadhanaratnavān || 28 ||
[Analyze grammar]

nārī vā kurute yā tu sāpi tatpuṇyabhāginī |
bhavatyatra na saṃdehaḥ kāryaḥ pārtha tvayā kvacit || 29 ||
[Analyze grammar]

svargyā samīhitasukhārthaphalapradā ca yā mṛgyate munivaraiḥ pravarā tithīnām |
sā bhānupādakamalārcanaciṃtakānāṃ puṃsāṃ sadaiva vijayā vijayaṃ dadāti || 30 ||
[Analyze grammar]