Chapter 19

sūta uvāca |
dṛṣṭvā sainyanipātaṃ ca balakhānirmahābalaḥ |
saṃprāpya mānasīṃ pīḍāṃ yuddhārthaṃ vimukho'bhavat || 1 ||
[Analyze grammar]

devasiṃhaṃ samāhūya trikālajñaṃ mahāmatim |
taṃ maṃtraṃ maṃtrayāmāsa kāryasiddhiryathā bhavet |
śrutvovāca mahāyogī devasiṃho mahābalaḥ || 2 ||
[Analyze grammar]

maheṃdratanayaḥ kaścitsarvaśastrāstrakovidaḥ |
tvatsainyaṃ rodhayitvā vai divyāstreṇa divāmukhe |
rātrau svayaṃ samāgamya karoti balasaṃkṣayam || 3 ||
[Analyze grammar]

atastvaṃ matsahāyena tālanena samanvitaḥ |
kṛṣṇāṃśena samāgamya śakra putraṃ śubhānanam |
vijayī bhava śīghraṃ hi no cedyāyāṃ yamakṣayam || 4 ||
[Analyze grammar]

iti śrutvā vacastasya devasiṃhasya bhāṣitam |
yatnaṃ cakāra balavānbhrātṛmitrasamanvitaḥ |
ekaviṃśābdakṛṣṇāṃśe saṃprāpte yuddhakovide |
senāṃ niveśayāmāsa poteṣu hayavāhanaḥ || 6 ||
[Analyze grammar]

arddhaṃ sainyaṃ ca tatraiva sthāpayitvā mahābalaḥ |
arddhasainyena kṛṣṇāṃśo dakṣiṇāṃ diśamāgamat || 7 ||
[Analyze grammar]

hayārūḍhāśca te śūrāḥ sarve yuddhasamanvitāḥ |
kapāṭaṃ dṛḍhamudghāṭya nagarāntamupāyayuḥ || 8 ||
[Analyze grammar]

hatvā te rakṣiṇaḥ sarvāṃlluṃṭhayitvā puraṃ śubham |
ripordurgaṃ samāsādya cakruḥ śatrormahākṣayam || 9 ||
[Analyze grammar]

rājño'ntaḥ puramāgatya kṛṣṇāṃśo balavattaraḥ |
dadarśa sundarīṃ bālāṃ padminīṃ padmalocanām |
saptālibhirvṛtāṃ ramyāṃ gītanṛtyaviśāradām || 10 ||
[Analyze grammar]

balāddolāṃ samāropya luṃṭhayitvā riporgṛham |
jagāma śivire tasminyatra jāto mahāraṇaḥ || 11 ||
[Analyze grammar]

balakhānistu balavāndevatālanasaṃyutaḥ |
jaghāna śātravīṃ senāmindulāstreṇa pālitām || 12 ||
[Analyze grammar]

sukhavarmāṇamāgatya senādhyakṣaṃ ripoḥ sutam |
sarvatastaṃ svakīyāstrairjaghnuste madavihvalāḥ || 13 ||
[Analyze grammar]

hate tasminmahāvīrye jayantaḥ krodhamūrcchitaḥ |
senāmujjīvayāṃcakre śakraputraḥ pratāpavān || 14 ||
[Analyze grammar]

śyālaṃ ca sukhavarmāṇaṃ saṃjīvya svagṛhaṃ yayau |
tatra dṛṣṭvā janānsarvānbahurodanatatparān || 15 ||
[Analyze grammar]

vismitaḥ sa yayau gehaṃ yathā pūrvaṃ tathāvidhaḥ |
na dadarśa priyāṃ tatra sakhībhiḥ sahitāṃ mune || 16 ||
[Analyze grammar]

āryyasiṃhagṛhaṃ gatvā pṛṣṭavānsarvakāraṇam |
jñātvā saṃluṭhitaṃ gehaṃ śatrubhiḥ śastrakovidaiḥ || 17 ||
[Analyze grammar]

ruroda subhṛśaṃ vīro hā priye madavihvale |
darśayādya mukhaṃ ramyaṃ tvatpatistvāṃ samutsukaḥ || 18 ||
[Analyze grammar]

ityevaṃ rodanaṃ kṛtvā vaḍavopari saṃsthitaḥ |
dhanustūṇīramādāya khaḍgaṃ śatruvimohanam |
ekākī sa yayau kruddho niśi yatra sthito ripuḥ || 19 ||
[Analyze grammar]

etasminsamaye vīro balakhānirmahābalaḥ |
dṛṣṭvā tāṃ sundarīṃ bālāṃ vilalāpa bhṛśaṃ muhuḥ || 20 ||
[Analyze grammar]

hā indula mahāvīra hā madbaṃdho priyaṃkara |
tvadyogyeyaṃ śubhā nārī rūpayauvanaśālinī || 21 ||
[Analyze grammar]

darśanaṃ dehi me śīghraṃ gṛhāṇādya śubhānanām |
ityuktvā mūrcchito bhūtvā mānase pūjayañchivām || 22 ||
[Analyze grammar]

tasminkāle ca saṃprāptaḥ śakraputro mahābalaḥ |
jaghāna śātravīṃ senāṃ kṛṣṇāṃśenaiva pālitām || 23 ||
[Analyze grammar]

dṛṣṭvā sainyanipātaṃ ca tālano vāhinīpatiḥ || |
siṃhanādaṃ nanādoccaiḥ siṃhinyupari saṃsthitaḥ || 24 ||
[Analyze grammar]

na jayaḥ sainyanāśena tava vīra bhaviṣyati |
māṃ hatvā jahi matsainyaṃ yoginbālasvarūpaka || 25 ||
[Analyze grammar]

iti śrutvā vacastasya śakraputro bhayaṃkaraḥ |
jaghāna hṛdaye bāṇānsa tu khaḍgena cācchinat |
svabhallena punarvīro daṃśayāmāsa vakṣasi || 26 ||
[Analyze grammar]

iṃdule mūrchite tasminvaḍavā divyarūpiṇī |
ākāśopari saṃprāpya jayantaṃ samabodhayat || 27 ||
[Analyze grammar]

tadā sa bālastvaritaḥ kālāstraṃ cāpa ādadhe |
tena jāto mahāñchabdastālanaḥ sa mamāra ha || 28 ||
[Analyze grammar]

mṛte senāpatau tasminkṛṣṇāṃśo madavihvalaḥ |
nabhomārgeṇa saṃprāpya jagarjja ca muhurmuhuḥ || 29 ||
[Analyze grammar]

indulaḥ krodhatāmrākṣastvāgneyaṃ śaramādade |
vahnibhūtaṃ nabhastatra svayogena mahābalaḥ |
kṛtvā śīghraṃ yayau śatruṃ sa tu vāyavyamādadhe || 30 ||
[Analyze grammar]

svayogenaiva kṛṣṇāṃśaḥ pītvā vāyavyamuttamam |
punarjagāma tatpārśvaṃ kalaikaḥ sa hareḥ svayam || 31 ||
[Analyze grammar]

tathāvidhaṃ ripuṃ dṛṣṭvā śakraputro mahābalaḥ |
gaṃdharvāstraṃ samādāya mohanāyopacakrame || 32 ||
[Analyze grammar]

punaryogabalenaiva tadastraṃ saṃkṣayaṃ gatam |
vāruṇaṃ śaramādāya tasyopari samākṣipat || 33 ||
[Analyze grammar]

svayogenaiva kṛṣṇāṃśo jalaṃ sarvaṃ mukhe'karot |
evaṃ sarvāṇi cāstrāṇi pītvā pītvā punaḥpunuḥ || 34 ||
[Analyze grammar]

yayau śīghraṃ prasannātmā bāhuśālī yatendriyaḥ |
iṃdulastu tadā kruddho'śvinīṃ tyaktvā bhuvi sthitaḥ |
carma khaḍgaṃ gṛhītvāśu khaḍgayuddhamacīkarat || 35 ||
[Analyze grammar]

etasminnaṃtare prāptā devādyāḥ sarvabhūmipāḥ |
dadṛśustanmahadyuddhaṃ sarvavismayakāraṇam || 36 ||
[Analyze grammar]

prātaḥkāle ca saṃprāpte balakhānirmahābalaḥ |
dadarśa vālakaṃ ramyaṃ jaṭājinasamanvitam || 37 ||
[Analyze grammar]

śrameṇa karśito vīraḥ śakraputraḥ pratāpavān |
balakhāneḥ piturbandhoḥ śapathaṃ kṛtavānsvayam || 38 ||
[Analyze grammar]

svakhaḍgenaiva kṛṣṇāṃśa śirastava harāmyaham |
no cenme dūṣitā mātā nāmnā svarṇavatī satī |
ityuktvā khaḍgamādāya yayau śīghraṃ ruṣānvitaḥ || 39 ||
[Analyze grammar]

balakhānistu taṃ jñātvā tyaktvāstraṃ premakātaraḥ |
putrāṃtikamupāgamya vacanaṃ cedamabravīt || 40 ||
[Analyze grammar]

he indula mahābhāga pitṛmātṛyaśaskara |
āhlādaprāṇasadṛśa svarṇavatyaṃgamānasa || 41 ||
[Analyze grammar]

pūrvaṃ hatvā ca māṃ vīra svapitṛvyaṃ tataḥ punaḥ |
tathaivodayasiṃhaṃ ca devasiṃhaṃ tathā kulam |
sukhī bhava mahāvīra gehe vai sukhavarmaṇaḥ || 42 ||
[Analyze grammar]

iti śrutvā vacastasya jñātvā ca svakulaṃ śiśuḥ |
tyaktvā khaḍgaṃ patitvā ca svapitṛvyasya pādayoḥ |
kṛtavānrodanaṃ gāḍhamaparādhanivṛttaye || 43 ||
[Analyze grammar]

uvāca madhuraṃ vākyaṃ śṛṇu tāta mama priya |
nārīyaṃ dūṣitā vedairnṛṇāṃ mohapradāyinī || 44 ||
[Analyze grammar]

devo vā mānuṣo vāpi pannago vāpi dānavaḥ |
āryya nārīmayairjālairbandhanāya samudyataḥ || 45 ||
[Analyze grammar]

sohamājanmaśuddhasya piturāhlādakasya ca |
gehe jāto jayantaśca śakraputraḥ svayaṃ vibho || 46 ||
[Analyze grammar]

padminyā janitaṃ mohaṃ gṛhītvā jñātavānna hi |
kṣamasva mama mandasya śeṣamajñānajaṃ pituḥ || 47 ||
[Analyze grammar]

ityuktvā sa punarbālo ruroda snehakātaraḥ |
senāmujjīvayāmāsa tālanaṃ ca mahābalam || 48 ||
[Analyze grammar]

iti śrutvā vacastasya kṛṣṇāṃśo vacanaṃ śiśoḥ |
paramānandamāgamya hṛdaye tamaropayat |
utsavaṃ kārayāmāsa tatra deśe janejane || 49 ||
[Analyze grammar]

āryyasiṃhastu tacchrutvā nānādravyasamanvitaḥ |
dadau kanyāṃ vidhānena padminīmiṃdulāya vai || 50 ||
[Analyze grammar]

śataṃ hayāṃstathā nāgānmuktāmaṇi vibhūṣitān |
kanyārthe tāndadau rājā jāmātre bahubhūṣaṇam || 51 ||
[Analyze grammar]

prasthānamakarotteṣāṃ sa premṇā vākyagadgadaḥ |
te tu sarve mudā yuktāḥ svagehaṃ śīghra māyayuḥ || 52 ||
[Analyze grammar]

uṣitvā māsamekaṃ tu tasminmārge bhayānake |
kīrtisāgaramāsādya cakruste bahudhotsavam || 53 ||
[Analyze grammar]

āhlādastu prasannātmā sutaṃ patnīsamanvitam |
dṛṣṭvā viprānsamāhūya dadau dānānyanekaśaḥ || 54 ||
[Analyze grammar]

daśahārākhyanagaraṃ saṃprāptaḥ svakulaissaha |
kṛṣṇāṃśasya mahākīrtirjātā loke jane jane || 59 ||
[Analyze grammar]

pṛthvīrājastu tacchrutvā vismayaṃ paramaṃ yayau |
sā tu vai padminī nārī durvāsaḥśāpamohitā || 56 ||
[Analyze grammar]

apsasarastvaṃ svayaṃ tyaktvā bhūmau nārītvamāgatā |
dvādaśābdapramāṇena soṣitvā jagatītale || 57 ||
[Analyze grammar]

yakṣmaṇā maraṇaṃ prāpya svargalokamupāyayau |
nava māsānkṛto vāsastayā cāhlā damaṃdire || 58 ||
[Analyze grammar]

iti śrībhaviṣye mahāpurāṇe pratisargaparvaṇi caturyugakhaṃḍāparaparyāye kaliyugīyetihāsasamuccaye ekonaviṃśo'dhyāyaḥ || 19 ||
[Analyze grammar]