Chapter 184

prakhyāte pratyayenaiva praśnapūrvaṃ pratigrahaḥ |
yajane'dhyāpane vāde ṣaḍvidho vedavikrayaḥ || 1 ||
[Analyze grammar]

veda vikrayanirdiṣṭaṃ striyā cāvarjitaṃ dhanam |
na deyaṃ pitṛdevebhyo yacca klībātkhagādhipa || 2 ||
[Analyze grammar]

anuyogena yo dadyādbrāhmaṇāya pratigraham |
sa pūrvaṃ narakaṃ yāti brāhmaṇāstadanaṃtaram || 3 ||
[Analyze grammar]

vedākṣarāṇi yāvaṃti niyujyanterthakāraṇāt |
tāvatyo bhrūṇahatyā vai vedavikrayamāpnuyāt || 4 ||
[Analyze grammar]

vaiśvadevena yo hīna ādityasya ca karmaṇaḥ |
sarve te vṛṣalā jñeyāḥ prāptavedāśca brāhmaṇāḥ || 5 ||
[Analyze grammar]

yeṣāmadhyayanaṃ nāsti ye ca kecidanagnayaḥ |
kulaṃ vā'śrotriyaṃ yeṣāṃ sarve te śūdradharmiṇaḥ || 6 ||
[Analyze grammar]

akṛtvā vaiśvadevaṃ tu yo bhuṅkte so'budhaḥ khaga |
vṛthā tenānnapākena yamayoniṃ vrajettu saḥ || 7 ||
[Analyze grammar]

priyo vā yadi vā dveṣyo mūrkhaḥ paṃḍita eva ca |
vaiśvadeve tu saṃprāpte so'tithiḥ svargasaṃkramaḥ || 8 ||
[Analyze grammar]

naikagrāmīṇamatithiṃ viprasāṃgatikaṃ tathā |
aciṃtyobhyāgato yasmāttasmādatithirucyate || 9 ||
[Analyze grammar]

aciṃtyaḥ sa tu vai nāmnā vaiśvadeva upāgataḥ |
atithiṃ taṃ vijānīyānna punaḥ pūrvamāgataḥ || 10 ||
[Analyze grammar]

yāvacca prāpnuyādannaṃ kṛtāśīḥ snātako dvijaḥ |
tasyānnasya caturbhāgaṃ haṃtakāraṃ viduḥ khaga || 11 ||
[Analyze grammar]

grāsamātrā bhavedbhikṣā catuṣkālaṃ caturguṇam |
puṣkalāni ca catvāri haṃtakāro vidhīyate || 12 ||
[Analyze grammar]

ārūḍho naiṣṭhikaṃ dharmaṃ yastu pracyavate punaḥ |
cāṃdrāyaṇaṃ carenmāsamiti viddhi khagādhipa || 13 ||
[Analyze grammar]

ārūḍhapatitāpatyā brāhmaṇo vṛṣalena ca |
dvāvetau viddhi cāṃḍālau veditrādyaśca jāyate || 14 ||
[Analyze grammar]

brāhmaṇī kulaṭā nityaṃ svakaṃ tyaktvā patiṃ khaga |
anyasya viśate gehe brāhmaṇasya khagādhipa || 15 ||
[Analyze grammar]

utpadyate tu yastasyā brāhmaṇena mahāmate |
sa cāṃḍālo mahānprokto mahācāṃḍāla ityuta || 16 ||
[Analyze grammar]

yastu pravrajito bhūtvā punaḥ sevati maithunam |
ṣaṣṭivarṣasahasrāṇi viṣṭhāyāṃ jāyate krimiḥ |
paṃcagavyena śuddhiḥ syādityāha mama dehakṛt || 17 ||
[Analyze grammar]

abhojyaṃ brāhmaṇasyānnaṃ vṛṣalena nimaṃtritam |
tathaiva vṛṣalasyānnaṃ brāhmaṇena nimaṃtritam || 18 ||
[Analyze grammar]

brāhmaṇānnaṃ dadacchūdraḥ śūdrānnaṃ brāhmaṇo dadat |
ubhāvetāvabhojyānnau bhuktvā cāṃdrāyaṇaṃ caret || 19 ||
[Analyze grammar]

upanikṣepadharmeṇa śūdrānnaṃ ca paceddvijaḥ |
abhojyaṃ tadbhavedannaṃ sa ca vipraḥ purohitaḥ || 20 ||
[Analyze grammar]

śūdrānnaṃ śūdrasaṃparkaṃ śūdreṇa saha vāsanam |
śūdrājjñānāgamaḥ kaścijvalaṃtamapi pātayet || 21 ||
[Analyze grammar]

śūdrānnopahatā viprā vihvalā ratilālasāḥ |
kupitāḥ kiṃ kariṣyaṃti nirviṣā iva pannagāḥ || 22 ||
[Analyze grammar]

hastadattāstu ye snehāllavaṇavyaṃjanādayaḥ |
dātāraṃ nādhitiṣṭhaṃti bhoktā bhuṃkte tu kilbiṣam || 23 ||
[Analyze grammar]

āyasena tu pātreṇa yadannamupadīyate |
bhoktā viṣṭhāśanaṃ bhuṃkte dātā tu narakaṃ vrajet || 24 ||
[Analyze grammar]

aṃgulyā daṃtakāṣṭhaṃ yatpratyakṣalavaṇaṃ ca yat |
mṛttikābhakṣaṇaṃ caiva tulyaṃ gomāṃsabhakṣaṇaiḥ || 25 ||
[Analyze grammar]

mukhe paryuṣite nityaṃ bhavatyaprayato dvijaḥ |
tasmācchuṣkamathārdraṃ vā bhakṣayeddaṃtadhāvanam || 26 ||
[Analyze grammar]

puṣpālaṃkāravastrāṇi gaṃdha mālyānulepanam |
upavāse na duṣyaṃti daṃtadhāvanamaṃjanam || 27 ||
[Analyze grammar]

gṛhāṃte vasate mūrkho dūre cāsya guṇānvitaḥ |
guṇanvite ca dātavyaṃ nāsti mūrkhavya tikramaḥ || 28 ||
[Analyze grammar]

brāhmaṇātikramo nāsti vipre vedavivarjite |
jvalaṃtamagnimutsṛjya na hi bhasmani hūyate || 29 ||
[Analyze grammar]

sannikṛṣṭamadhīyānaṃ brāhmaṇaṃ yo vyatikramet |
bhojanenaiva dānena dahatyāsaptamaṃ kulam || 30 ||
[Analyze grammar]

anūruruvāca |
evameva jagannātha devadeva jagatpate |
kiṃ tu yatte purā deva śrutaṃ vākyaṃ mahātmanaḥ || 31 ||
[Analyze grammar]

gadato nāradasyaiva śṛṇu tvaṃ vibudhādhipa |
gadato me suraśreṣṭha dharmyamarthaṃ sukhāvaham || 32 ||
[Analyze grammar]

satyaniṣṭhaṃ dvijaṃ yastu śuklajātiṃ priyaṃvadam |
mūrkhaṃ pākhaṃḍinaṃ vāpi vṛttihīnamathāpi vā || 33 ||
[Analyze grammar]

atikramya naro ghoraṃ narakaṃ pātayetkhaga |
sapta parānsapta pūrvānpuruṣānātmanā saha || 34 ||
[Analyze grammar]

tasmānnātikramedrājā brāhmaṇaṃ prātiveśikam |
saṃbandhatastathāsannaṃ dauhitraṃ vidyate tathā || 35 ||
[Analyze grammar]

bhāgineyaṃ viśeṣeṇa tathā baṃdhuṃ grahādhipa |
nātikramennarastvetānsumūrkhānapi gopate |
atikramya mahadraudraṃ rauravaṃ narakaṃ vrajet || 36 ||
[Analyze grammar]

āditya uvāca |
evametanna saṃdeho yathā vadasi khecara |
mamāpyavagataṃ vīra brāhmaṇaṃ na parīkṣayet || 37 ||
[Analyze grammar]

sarvadevamayaṃ vipraṃ sarvalokamayaṃ tathā |
tasmātsaṃpūjayedenaṃ na guṇāṃstasya ciṃtayet || 38 ||
[Analyze grammar]

kevalaṃ ciṃtayejjātiṃ na guṇānvinatātmaja |
tasmādāmaṃtrayetpūrvamāsannaṃ brāhmaṇaṃ budhaḥ || 39 ||
[Analyze grammar]

yastvāsannamatikramya brāhmaṇaṃ patitādṛte |
dūrasthānpūjayenmūḍho guṇāḍhyānnarakaṃ vrajet || 40 ||
[Analyze grammar]

devakarmavināśena brahmasvaharaṇena ca |
devadravyaṃ dvijānnaṃ ca brahmasvaṃ brāhmaṇārjitam |
viyonyāṃ kṣipate yastu viyonimadhigacchati || 41 ||
[Analyze grammar]

mā dadasveti yo brūyādgavāgnibrāhmaṇeṣu vai |
tiryagyoniśataṃ gatvā cāṃḍā leṣvabhijāyate || 42 ||
[Analyze grammar]

yattu vācā pratijñātaṃ karmaṇā nopapāditam |
tadṛṇaṃ dharmasaṃyuktamiha loke paratra ca || 43 ||
[Analyze grammar]

vedavidyāvratasnāte śrotriye gṛhamāgate |
krīḍaṃtyoṣadhayaḥ sarvā yāsyāmaḥ paramāṃ gatim || 44 ||
[Analyze grammar]

madhu māṃsaṃ surāṃ somaṃ lākṣādyaṃ lavaṇaṃ tathā |
vikrīyānyatamaṃ teṣāṃ dvijaścāṃdrāyaṇaṃ caret || 45 ||
[Analyze grammar]

guḍaṃ tilaṃ tathā nīlaṃ keśāngodhūmakānyavān |
vikrīya brāhmaṇo gāṃ ca kṛcchraṃ sāṃtapanaṃ caret || 46 ||
[Analyze grammar]

auṣṭramāvikadugdhaṃ ca annaṃ mṛtakasūtake |
caurasyānnaṃ mṛtaśrāddhe bhuktvā cāṃdrāyaṇaṃ caret || 47 ||
[Analyze grammar]

gavāṃ śṛṃgodake snāto mahānadyāśca saṃgame |
samudradarśanādvāpi śunā daṣṭaḥ śucirbhavet || 48 ||
[Analyze grammar]

vedavidyāvratasnātaḥ śunā daṣṭo dvijaḥ khaga |
hiraṇyodakamiśraṃ tu ghṛtaṃ prāśya viśuddhyati || 49 ||
[Analyze grammar]

tiṣṭhanvāpyatha vā gacchañchunā daṣṭo dvijaḥ khaga |
vajraṃ prāśya śuciḥ syādvai yathāha bhagavānmanuḥ || 50 ||
[Analyze grammar]

vratinaścāpi daṣṭasya trirātraṃ kṣapaṇaṃ smṛtam |
saghṛtaṃ ca tato bhuktvā vrataśeṣaṃ samācaret || 51 ||
[Analyze grammar]

brāhmaṇī tu śunā daṣṭā some dṛṣṭaṃ samācaret |
yadā na dṛśyate somaḥ prāyaścittaṃ kathaṃ bhavet || 52 ||
[Analyze grammar]

yāṃ diśaṃ vrajate somastāṃ diśaṃ cāvalokayet |
somamārgeṇa sā pūrvā pañcapūtena śudhyati || 53 ||
[Analyze grammar]

brāhmaṇasya brahmadvāre pūya śoṇitasaṃbhave |
krimibhirdaśyate yaśca niṣkṛtiṃ tasya vacmi te || 54 ||
[Analyze grammar]

gavāṃ tatra purīṣeṇa trikālaṃ snānamācaret |
dadhi kṣīraṃ ghṛtaṃ pītvā kṛmidaṣṭo viśudhyati || 55 ||
[Analyze grammar]

atha nābhyāḥ pradaṣṭasya āpādādvinatātmaja |
etadvinirdiśetprājñaḥ prāyaścittaṃ khagādhipa || 56 ||
[Analyze grammar]

nābhikaṇṭhāṃtare vīra yadā cotpadyate kṛmiḥ |
ṣaḍrātraṃ tu tadā proktaṃ prāyaścittaṃ manīṣibhiḥ || 57 ||
[Analyze grammar]

yadā daśaṃti śirasi kṛmayo vinatātmaja |
kṛcchraṃ tadā caretprājñaḥ śuddhaye kaśyapātmaja || 58 ||
[Analyze grammar]

mṛtānnaṃ madhu māṃsaṃ ca yastu bhuñjīta brāhmaṇaḥ |
sa trīṇyahānyupavasedekāhaṃ codake vaset || 59 ||
[Analyze grammar]