Chapter 125

śatānīka uvāca |
yadetaddṛśyate vyoma sūryasya purato dvija |
taducyate kimātmā ca kathaṃbhūtaśca kathyatām || 1 ||
[Analyze grammar]

sumaṃturuvāca |
haṃta vyoma pravakṣyāmi sūryapraharaṇaṃ śubham |
yadātmakaṃ hi yatproktaṃ yathā vasaṃti devatāḥ || 2 ||
[Analyze grammar]

purastācca catuḥśṛṃgaṃ tadvyomāyatanaṃ raveḥ |
vyomaśabdaṃ catuḥśṛṃgaṃ sarvadevamayaṃ ca yat || 3 ||
[Analyze grammar]

gairikārṇavasaṃbhūtaṃ yadaṃtargarbhamāśritam |
tatrotpannamidaṃ vyoma kalervyoma mahī smṛtā || 4 ||
[Analyze grammar]

varuṇasya yathā pāśo huṅkāro vedhaso yathā |
viṣṇoścāpi yathā cakraṃ triśūlaṃ tryaṃbakasya ca || 5 ||
[Analyze grammar]

indrasya ca yathā vajraṃ tathā vyoma raveḥ smṛtam |
tasminvyomni trayastriṃśatkrīḍanto yajñiyāḥ surāḥ || 6 ||
[Analyze grammar]

haraśca varṣaśuddhaśca tryaṃbakaścāparājitaḥ |
vṛṣākapiśca śaṃbhuśca kapardī raivatastathā |
īśvaro bhuvanaścaite rudrā ekādaśa smṛtāḥ || 7 ||
[Analyze grammar]

ādityānāṃ ca nāmāni viṣṇoścakrasya dīyatām |
aryamā ca tathā mitro bhago'tha varuṇastathā || 8 ||
[Analyze grammar]

vivasvāntsavitā caiva pūṣā tvaṣṭā tathaiva ca |
aṃśo bhagaścātitejā ādityā dvādaśa smṛtāḥ || 9 ||
[Analyze grammar]

dhruvo dharaśca somaśca āpaścaivā'nilo'nalaḥ |
pratyūṣaśca prabhātaśca vasavo'ṣṭau prakīrtitāḥ || 10 ||
[Analyze grammar]

nāsatyaścaiva dasraśca smṛtau dvāvaśvināvubhau |
viśvedevānpravakṣyāmi nāmatastānnibodhata || 11 ||
[Analyze grammar]

kraturdakṣo vasuḥ satyaḥ kālakāmau dhṛtiḥ kuruḥ |
śaṅkumātro vāmanaśca viśvedevā daśa smṛtāḥ || 12 ||
[Analyze grammar]

vartamānā ime devā bhaviṣyānantare śṛṇu |
yamaśca tuṣitāścaiva1 vasavo2 vaśavartinaḥ || 13 ||
[Analyze grammar]

satyāśca bhūtarajasaḥ sādhyāśca tadanantarā |
ṣaṭsu manvantareṣvevaṃ devā dvādaśadvādaśa || 3 ||
[Analyze grammar]

pārāvatāstathā cānye te hyāsaṃstuṣitaiḥ saha || 14 ||
[Analyze grammar]

sādhyāndevānpravakṣyāmi nāmatastānnibodha me |
mano'numantā prāṇaśca naro nārāyaṇastathā || 15 ||
[Analyze grammar]

vṛttilambo manuścaiva samo4 dharmaśca vīryavān |
vittasvāmī prabhuścaiva sādhyā dvādaśa kīrtitāḥ || 16 ||
[Analyze grammar]

ete yajñabhujo devāḥ sarvalokeṣu pūjitāḥ |
ādityāmeva te dhīra kaśyapasyātmajāḥ smṛtāḥ || 17 ||
[Analyze grammar]

viśve ca vasavaḥ sādhyā vijñeyā dharmasūnavaḥ |
evaṃ dharmasutaḥ somastṛtīyo vasuriṣyate || 18 ||
[Analyze grammar]

dharmo'pi brahmaṇaḥ putraḥ purāṇe niścayaṃ gataḥ |
atha cendrānvasūṃścaiva nāmabhiśca nibodha me || 19 ||
[Analyze grammar]

svāyambhuvo manuḥ pūrvaḥ tataḥ svārociṣaḥ smṛtaḥ |
uttamastāmasaścaiva raivataścākṣuṣastathā || 20 ||
[Analyze grammar]

ityete ṣaḍatikrāntāḥ saptamaḥ sāmprato manuḥ |
vaivasvateti vijñeyo bhaviṣyāḥ sapta cāpare || 21 ||
[Analyze grammar]

eṣāmādyorkasāvarṇirbrahmasāvarṇireva ca |
tasmācca bhavasāvarṇirdharmasāvarṇirityuta || 22 ||
[Analyze grammar]

pañcamo dakṣasāvarṇiḥ sāvarṇiḥ5 pañca kīrtitāḥ |
raucyo bhauvyaśca dvāvanyāvityete manavaḥ smṛtāḥ || 23 ||
[Analyze grammar]

indrastu viṣṇubhugjñeyo vidyutistadanantaram |
vibhuḥ prabhuścaiva śikhī tathaiva ca manojavaḥ || 24 ||
[Analyze grammar]

ojasvī sāmpratisvindro balirbhāvyastataḥ param |
adbhutastridivaścaiva daśamastvindra ucyate || 25 ||
[Analyze grammar]

susāttvikaśca1 kīrtiśca śatadhāmā2 divaspatiḥ |
iti bhūtā bhaviṣyāśca indrā jñeyāścaturdaśa || 26 ||
[Analyze grammar]

kaśyapo'trirvaśiṣṭhaśca bharadvājaśca gautamaḥ |
viśvāmitro jamadagniḥ saptaite ṛṣayaḥ smṛtāḥ || 27 ||
[Analyze grammar]

ataḥ paraṃ pravakṣyāmi maruto'gniparigrahān |
pravahothāvahaścaiva udvahaḥ saṃvahastathā || 28 ||
[Analyze grammar]

vivaho nivahaścaiva parivāhastathaiva ca |
antarikṣacarā3 hyete pṛthaṅmārgavisāriṇaḥ || 29 ||
[Analyze grammar]

sūryo'gniśca śucirnāmnā vaidyutaḥ pāvakaḥ smṛtaḥ |
nirmanthaḥ pavamāno'gnistrayaḥ proktā imegnayaḥ || 30 ||
[Analyze grammar]

agnīnāṃ putrapautrāstu catvāriṃśattathaiva tu |
marutāmapi sarveṣāṃ vijñeyāḥ saptasaptakāḥ || 31 ||
[Analyze grammar]

ṛtuḥ saṃvatsaro'hyagnirṛtavastasya jajñire |
ṛtuputrāśca vai pañca iti sargaḥ sanātanaḥ || 32 ||
[Analyze grammar]

saṃvatsarastu prathamo dvitīyaḥ parivatsaraḥ |
idvatsarastṛtīyastu caturthastvanuvatsaraḥ || 33 ||
[Analyze grammar]

pañcamo vatsarasteṣāmityevaṃ pañca te smṛtāḥ |
teṣu saṃvatsaro hyagniḥ sūryastu parivatsaraḥ || 34 ||
[Analyze grammar]

soma idvatsarasteṣāṃ vāyuścaivānuvatsaraḥ |
rudrastu vatsaro jñeyaḥ pañcaitā yugadevatāḥ || 35 ||
[Analyze grammar]

ārtavā pitaro jñeyā ye jātāḥ ṛtusūnavaḥ |
pitāmahāstu vijñeyāḥ pañcābdā brahmaṇaḥ sutāḥ || 36 ||
[Analyze grammar]

saumyā barhiṣadaścaiva agniṣvāttāśca ye trayaḥ |
ete vai pitarasteṣāṃ ye jīvatpitṛkā narāḥ || 37 ||
[Analyze grammar]

ādityaścaiva somaśca lohitāṅgo budhastathā |
bṛhaspatiśca śukraśca tathā helisutaśca yaḥ || 38 ||
[Analyze grammar]

uparāgaḥ śikhī cobhau navaite nu grahāḥ smṛtāḥ |
trailokyasya tvime nityaṃ bhāvābhāvanivedakāḥ || 39 ||
[Analyze grammar]

ādityaścaiva somaśca dvāvetau maṇḍalagrahau |
rāhuśchāyāgrahasteṣāṃ śeṣāstārā grahāḥ smṛtāḥ || 40 ||
[Analyze grammar]

nakṣatrādhipatiḥ somo graharājo divākaraḥ |
paṭhyate cāgnirāditya udakaścandramāḥ smṛtaḥ || 41 ||
[Analyze grammar]

ādityaḥ paṭhyate brahmā viṣṇusteṣāṃ tu candramāḥ |
maheśvarastu vijñeyastṛtīyastārakagrahaḥ || 42 ||
[Analyze grammar]

kaśyapasya sutaḥ sūryaḥ somo dharmasutaḥ smṛtaḥ |
devāsuragurū dvau tu nāmatastau1 mahāgrahau || 43 ||
[Analyze grammar]

prajāpatisutāvetāvubhau śukrabṛhaspatī |
budhaḥ somātmajaḥ śrīmāñchanī ravisutaḥ smṛtaḥ || 44 ||
[Analyze grammar]

siṃhikāyāḥ suto rāhuḥ ketustu brahmaṇaḥ sutaḥ |
sarveṣāṃ ca grahāṇāṃ hi adhastāccarate raviḥ || 45 ||
[Analyze grammar]

tato dūraṃ smṛtaṃ tāvadvidhornakṣatramaṇḍalam |
nakṣatrebhyaḥ kujabudhau śvetāhvastadanantaram || 46 ||
[Analyze grammar]

tasmānmāheśvaraścorddhvaṃ dhiṣaṇastadanantaram |
kṛṣṇaścordhvaṃ tatastasmādatha citraśikhaṇḍijaḥ || 47 ||
[Analyze grammar]

eṣāmeva kramaḥ proktāścāsaktaṃ tridivaṃ dhruve |
ādityanilayo rāhuḥ kadācitsomamārgagaḥ || 48 ||
[Analyze grammar]

sūryamaṇḍalasaṃsthastu1 śikhī sarpati sarvadā |
navayojanasāhasro vistāro bhārgavasya2 tu || 49 ||
[Analyze grammar]

dviguṇaḥ sūryavistārādvistāraḥ śaninaḥ smṛtaḥ |
triguṇaṃ3 maṃḍalaṃ jñeyaṃ nākṣatraṃ vistarādvidhoḥ || 50 ||
[Analyze grammar]

nakṣatramaṇḍalāttatra pādahīno bṛhaspatiḥ |
bṛhaspateḥ pādahīnaḥ śukroṅgāraka eva hi || 51 ||
[Analyze grammar]

vistāro maṇḍalānāṃ tu pādahīnastayorbudhaḥ |
budhatulyāni ṛkṣāṇi sarvaṛkṣāṇi yāni tu || 52 ||
[Analyze grammar]

yojanānyardhamātrāṇi tebhyo hrasvaṃ na vidyate |
rāhuḥ sūryapramāṇaśca kadācitsomasannibhaḥ || 53 ||
[Analyze grammar]

nakṣatragrahamānastu1 ketustvaniyataḥ smṛtaḥ |
avijñātagatiścaiva cañcalatvannarādhipa || 54 ||
[Analyze grammar]

tathālakṣitarūpastu bahurūpadharo hi saḥ |
bhūrlokaḥ pṛthivī proktā antarikṣaṃ bhuvaḥ smṛtam || 55 ||
[Analyze grammar]

svarlokastridivaṃ jñeyaṃ śeṣādūrdhvaṃ yathākramam |
bhūpatistu sadā tvagnistenāsau bhūpatiḥ smṛtaḥ || 56 ||
[Analyze grammar]

vāyurnabhaspatistena tathā sūryo divaspatiḥ |
gandharvāpsarasaścaiva guhyakāḥ siddharākṣasāḥ || 57 ||
[Analyze grammar]

bhūrlokavāsinaḥ sarve antarikṣacarāñchṛṇu |
marutaḥ saptamaskaṃdhe rudrāstatraiva cāśvinau || 58 ||
[Analyze grammar]

ādityā vasavaḥ sarve tathaiva ca gavāṃ gaṇāḥ |
caturthe tu maharloke vasante kalpavāsinaḥ || 59 ||
[Analyze grammar]

prajānāṃ patibhiḥ sarveḥ sahitāḥ kurunandana |
janaloke pañcame ca vasante bhūmidāḥ sadā || 60 ||
[Analyze grammar]

ṛtuḥ sanatkumārādyā vairājabhra tathāśrayāḥ |
satyastu saptame loke hyapunarmārgagāminām || 61 ||
[Analyze grammar]

brahmalokaḥ samākhyāto hyapratīghātalakṣaṇaḥ |
itihāsavido yatra krīḍante kurunandana || 62 ||
[Analyze grammar]

śṛṇvanti ca purāṇāni ye sadā bhīmanaṃdana |
mahītalātsahasrāṇāṃ śatādūrdhvaṃ divākaraḥ || 63 ||
[Analyze grammar]

śatayojanakoṭyastu1 bhūmerūrdhvaṃ dhruvaḥ sthitaḥ |
tato viṃśatilakṣastu trailokyotsedha ucyate || 64 ||
[Analyze grammar]

dviguṇaistu sahasraistu yojanānāṃ śateṣu ca |
lokāṃtaramatho caivaṃ dhruvādūrdhvaṃ vidhīyate || 65 ||
[Analyze grammar]

devadānavagandharvā yakṣarākṣasapannagāḥ |
bhūtā vidyādharāścaiva aṣṭau te devayonayaḥ || 66 ||
[Analyze grammar]

yasminvyomni tvime lokāḥ sapta vai sampratiṣṭhitāḥ |
marutaḥ pitaro hyete tasminnevāgnayo grahāḥ || 67 ||
[Analyze grammar]

yāstvapyetāḥ samākhyātā mayāṣṭau devayonayaḥ |
mūrtāścāmūrtayaścaiva sarvāstā vyomni saṃsthitāḥ || 68 ||
[Analyze grammar]

evaṃvidhamidaṃ vyoma sarvavyomamayaṃ smṛtam |
sarvadevamayaṃ caiva sarvagrahamayaṃ tathā || 69 ||
[Analyze grammar]

tasmādyo hyarcayedvyoma tena sarve'rcitāḥ surāḥ |
tasmātsarvaprayatnena śubhārthī vyoma cārcayet || 70 ||
[Analyze grammar]

yastvarcate sadā vyoma bhaktyā śraddhāsamanvitaḥ |
vṛṣadhvajasado rājansa gacchennātra saṃśayaḥ || 71 ||
[Analyze grammar]