Chapter 113

viṣṇuruvāca |
surajyeṣṭha punarbrūhi yatpṛcchāmyahamāditaḥ |
yatphalaṃ samavāpnoti kārayitvā ravergṛham || 1 ||
[Analyze grammar]

devārcāṃ kārayitvā tu yatpuṇyaṃ puruṣo'śnute |
pūjayitvā ca vidhivadanulipya ca yatphalam || 2 ||
[Analyze grammar]

kāni mālyāni śastāni kāni nārhati bhāskaraḥ |
ke dhūpā bhānudayitāḥ ke varjyāśca jagatpateḥ || 3 ||
[Analyze grammar]

upacāraphalaṃ kiṃ syātkiṃ phalaṃ gītavādite |
ghṛtakṣīrādinā yattu snāpite bhāskare phalam || 4 ||
[Analyze grammar]

yathopalepanādau ca phalamabhyukṣitena tu |
divākaragṛhe tāta tadaśeṣaṃ vadasva me || 5 ||
[Analyze grammar]

brahmovāca |
sādhu vatsa yadetattvaṃ mārtaṇḍasyeha pṛcchasi |
śuśrūṣaṇe vidhiṃ puṇyaṃ tadihaikamanāḥ śṛṇu || 6 ||
[Analyze grammar]

yastu devālayaṃ bhānordārvaṃ śailamathāpi vā |
kārayenmṛnmayaṃ cāpi tasya puṇyaphalaṃ śṛṇu || 7 ||
[Analyze grammar]

ahanyahani yajñena yajato yanmahatphalam |
prāpnoti tatphalaṃ bhānoryaḥ kārayati mandiram || 8 ||
[Analyze grammar]

kulānāṃ śatamāgāmi samatītaṃ kulaṃ śatam |
kārayedbhagavaddhāma sa nayedarkalokatām || 9 ||
[Analyze grammar]

saptajanmakṛtaṃ pāpaṃ svalpaṃ vā yadi vā bahu |
bhānorālayavinyāsaprārambhādeva naśyati || 10 ||
[Analyze grammar]

saptalokamayo bhānustasya yaḥ kurute gṛham || 1 ||
[Analyze grammar]

pratiṣṭhāṃ samavāpnoti sa naraḥ sāptalaukikīm || 11 ||
[Analyze grammar]

praśastadeśabhūbhāge praśastaṃ bhavanaṃ raveḥ |
kārayedakṣayāṃllokānsa naraḥ pratipadyate || 12 ||
[Analyze grammar]

iṣṭakācayavinyāso yāvadvarṣāṇi tiṣṭhati |
tāvadvarṣasahasrāṇi tatkarturdivi saṃsthitiḥ || 13 ||
[Analyze grammar]

pratimāṃ lakṣaṇavatīṃ yaḥ kārayati mānavaḥ |
divākarasya tallokamakṣayaṃ pratipadyate || 14 ||
[Analyze grammar]

ṣaṣṭirvarṣasahasrāṇāṃ sahasrāṇi sa modate |
loke sumanasāṃ vīra pratyekaṃ madhusūdana || 15 ||
[Analyze grammar]

pratiṣṭhāpya raverarcāṃ supraśaste niveśane |
puruṣaḥ kṛtakṛtyo'sti na doṣaphalamaśnute || 16 ||
[Analyze grammar]

ye bhaviṣyanti ye'tītā ākalpaṃ puruṣāḥ kule |
tāṃstārayati saṃsthāpya devasya pratimāṃ raveḥ || 17 ||
[Analyze grammar]

anuśiṣṭāḥ kila purā yamena yamakiṅkarāḥ |
pāśadaṇḍakarāḥ kṛṣṇa prajāsaṃyamanodyatāḥ || 18 ||
[Analyze grammar]

yama uvāca |
viharantu yathānyāyaṃ niyogo me'nupālyatām |
nājñābhaṅgaṃ kariṣyanti bhavatāṃ jantavaḥ kvacit || 19 ||
[Analyze grammar]

kevalaṃ ye jaganmūlaṃ vivasvantamupāśritāḥ |
bhavadbhiḥ parihartavyāsteṣāṃ naiveha saṃsthitiḥ || 20 ||
[Analyze grammar]

ye tu vaivasvatā loke taccittāstatparāyaṇāḥ |
pūjayanti sadā bhānuṃ te ca tyājyā sudūrataḥ || 21 ||
[Analyze grammar]

tiṣṭhaṃśca prasvapangacchannuttiṣṭhanskhalite kṣute |
saṅkīrtayati devaṃ yaḥ sa nastyājyaḥ sudūrataḥ || 22 ||
[Analyze grammar]

nityanaimittikairdevaṃ ye yajanti tu bhāskaram |
na cālokyā bhavadbhiste yaddhyānaṃ haṃti vo gatim || 23 ||
[Analyze grammar]

ye puṣpadhūpavāso'bhirbhūṣaṇaiścāpi vallabhaiḥ |
arcayanti na te grāhyā matpituste parigrahāḥ || 24 ||
[Analyze grammar]

upalepanakartāraḥ kartāro mārjanasya ye |
arkālaye parityājyaṃ teṣāṃ tripuruṣaṃ kulam || 25 ||
[Analyze grammar]

ye vāyatanaṃ bhānoḥ kāritaṃ tatkulodbhavaḥ |
pumānna nāvalokyo vai bhavadbhirduṣṭacakṣuṣā || 26 ||
[Analyze grammar]

yenārcā bhagavadbhaktyā matpituḥ kāritā śubhā |
narāṇāṃ tatkulaṃ vīrāḥ sadā tyājyaṃ sudūrataḥ || 27 ||
[Analyze grammar]

bhavatāṃ bhramatāṃ yatra bhānusaṃśrayamudrayā |
na cājñābhaṅgakṛtkaścidbhaviṣyati naraḥ kvacit || 28 ||
[Analyze grammar]

ityuktāḥ kiṅkarāstena yamena sumahātmanā |
anāśritya vacaḥ kṛṣṇaḥ satrājitamatho gatāḥ || 29 ||
[Analyze grammar]

tasya te tejasā sarve bhānorbhaktasya suvrata |
mohitāḥ patitā bhūmau yathā ca vihagā nagāt || 30 ||
[Analyze grammar]

etāṃ mahāphalāṃ yorcāṃ bhānoḥ kārayate naraḥ |
tavākhyānaṃ mahābāho gṛhaṃ kārayituśca yat || 31 ||
[Analyze grammar]

yajñā narāṇāṃ pāpaughanāśakāḥ sarvakāmadāḥ |
tathaiveṣṭo jagadbhānuḥ sarvayajñamayo raviḥ || 32 ||
[Analyze grammar]