Chapter 32

sumanturuvāca |
pañcamī dayitā rājannāgānāṃ nandivardhinī |
pañcamyāṃ kila nāgānāṃ bhavatītyutsavo mahān || 1 ||
[Analyze grammar]

vāsukistakṣakaścaiva kāliyo maṇibhadrakaḥ |
airāvato dhṛtarāṣṭraḥ1 karkoṭakadhanañjayau |
ete prayacchantyabhayaṃ prāṇināṃ prāṇajīvitām || 2 ||
[Analyze grammar]

pañcamyāṃ snapayantīha nāgānkṣīreṇa ye narāḥ |
teṣāṃ kule prayacchanti te'bhayaprāṇadakṣiṇām || 3 ||
[Analyze grammar]

śaptā nāgā yadā mātrā dahyamānā divāniśam |
nirvāpayanti snapanairgavāṃ3 kṣīreṇa miśritaiḥ || 4 ||
[Analyze grammar]

ye snapayanti vai nāgānbhaktyā śraddhāsamanvitā |
teṣāṃ kule sarpabhayaṃ na bhavediti niścayaḥ || 5 ||
[Analyze grammar]

śatānīka uvāca |
mātrā śaptāḥ kathaṃ nāgāḥ kiṃ samuddiśya kāraṇam |
kathaṃ cānandakaraṇaṃ kasya vā samprasādajam || 6 ||
[Analyze grammar]

sumanturuvāca |
uccaiḥśravā aśvaratnaṃ śveto jāto'mṛtodbhavaḥ |
taṃ dṛṣṭvā cābravītkadrūrnāgānāṃ jananī svasām || 7 ||
[Analyze grammar]

aśvaratnamidaṃ śvetaṃ samprekṣe'mṛtasambhavam |
kṛṣṇāṃśca vīkṣase bālānsarvaṃ śvetamutāmbare || 8 ||
[Analyze grammar]

vinatovāca |
sarvaśveto hayavaro nāsya kṛṣṇo na lohitaḥ |
kathaṃ paśyasi kṛṣṇaṃ tvaṃ vinatovāca tāṃ svasām4 || 9 ||
[Analyze grammar]

kadrūruvāca |
vīkṣe'hamekanayanā kṛṣṇabālasamanvitam |
dvinetrā tvaṃ tu vinate na paśyasi paṇaṃ kuru || 10 ||
[Analyze grammar]

vinatovāca |
ahaṃ dāsī bhavitrī te kṛṣṇe keśe pradarśite |
na ceddarśayase kadru mama dāsī bhaviṣyasi || 11 ||
[Analyze grammar]

evaṃ te vipaṇaṃ kṛtvā gate krodhasamanvite |
vinatā śayane suptā kadrūrjihmamacintayat || 12 ||
[Analyze grammar]

āhūya putrānprovāca bālā bhūtvā hayottame |
tiṣṭhadhvaṃ vipaṇe jeṣye vinatāṃ jayagarddhinīm || 13 ||
[Analyze grammar]

procuste jihmabuddhiṃ tāṃ nāgā mātāṃ1 vigṛhya tu |
adharmyametanmātaste na kariṣyāma te vacaḥ || 14 ||
[Analyze grammar]

tāñśaśāpa ruṣā kadrūḥ pāvako vaḥ pradhakṣyati |
gate bahutithe kāle pāṇḍavo janamejayaḥ || 15 ||
[Analyze grammar]

sarpasatraṃ sa kartā vai bhuvi hyanyaiḥ suduṣkaram |
tasminsatre sa tigmāṃśuḥ pāvako vaḥ pradhakṣyati || 16 ||
[Analyze grammar]

evaṃ śaptvā ruṣā kadrūḥ kiñcinnoktavatī tu sā |
mātrā śaptāstathā nāgāḥ kartavyaṃ nānvapatsata || 17 ||
[Analyze grammar]

vāsukiṃ duḥkhitaṃ jñātvā brahmā provāca sāntvayan |
mā śuco vāsuke'tyarthaṃ śṛṇu madvacana param || 18 ||
[Analyze grammar]

yāyāvarakule jāto jaratkārūriti dvijaḥ |
bhaviṣyati mahātejāstasminkāle taponidhiḥ 1 | || 19 ||
[Analyze grammar]

bhaginīṃ ca jaratkāruṃ tasmai tvaṃ pratidāsyasi |
bhavitā tasya putro'sāvāstīka iti viśrutaḥ || 20 ||
[Analyze grammar]

sa tatsatraṃ pravṛddhaṃ vai nāgānāṃ bhayadaṃ mahat |
niṣedhetsumatirvāgbhiragryābhistaṃ naviṣyati || 21 ||
[Analyze grammar]

tadimāṃ bhaginīṃ rājaṃstasya tvaṃ pratidāsyasi |
jaratkāruṃ jaratkāroḥ pradadyā avicārayan || 22 ||
[Analyze grammar]

yadāsau prārthate'raṇye yatkiñciddhi vadiṣyati |
tatkartavyamaśaṅkena yadīccheḥ śreya ātmanaḥ || 23 ||
[Analyze grammar]

pitāmahavacaḥ śrutvā vāsukiḥ praṇipatya ca |
tathākarodyathā coktaṃ yatnaṃ ca paramāsthitaḥ || 24 ||
[Analyze grammar]

tacchrutvā pannagāḥ sarve praharṣotphullalocanāḥ |
punarjātamivātmānaṃ menire bhujagottamāḥ || 25 ||
[Analyze grammar]

tatra satraṃ mahābāho1 tava pitrā pravartitam |
ṛtvigbhiḥ sa hi teneha sarvalokeṣu duṣkaram || 26 ||
[Analyze grammar]

proktaṃ ca viṣṇunā pūrvaṃ dharmaputrasya dhīmataḥ |
avaśyaṃ tasya bhavitā nāgānāṃ bhayakārakam3 || 27 ||
[Analyze grammar]

tasmātkālāntarādrājansāgre varṣaśate gate |
tatsatraṃ bhavitā ghoraṃ nāgānāṃ kṣayakārakam || 28 ||
[Analyze grammar]

yāsyantyadharmabharitā dandaśūkā viṣolbaṇāḥ |
koṭisaṅkhyā mahārāja nipatiṣyantyaharniśam || 29 ||
[Analyze grammar]

apūrve tu nimagnānāṃ ghore raudrāgnisāgare |
āstīkastatra bhavitā teṣāṃ naurvahnisāgare || 30 ||
[Analyze grammar]

śrutvā sa cāgniṃ rājānamṛtvijastadanantaram |
nivartayiṣyate yāgaṃ nāgānāṃ mohanaṃ param || 31 ||
[Analyze grammar]

pañcamyāṃ tatra bhavitā brahmā provāca lelihān |
tasmādiyaṃ mahābāho pañcamī dayitā sadā |
nāgānāmānandakarī dattā vai brahmaṇā purā || 32 ||
[Analyze grammar]

kṛtvā tu bhojanaṃ pūrvaṃ brāhmaṇānāṃ tu kāmataḥ |
visṛjya nāgāḥ prīyantāṃ ye kecitpṛthivītale || 33 ||
[Analyze grammar]

ye ca helimarīcisthā ye'ntare divi saṃsthitāḥ |
ye nadīṣu mahānāgā ye sarasvatigāminaḥ |
ye ca vāpītaḍāgeṣu teṣu sarveṣu vai namaḥ || 34 ||
[Analyze grammar]

nāgānviprāṃśca sampūjya visṛjya ca yathārthataḥ |
tataḥ paścāttu bhuñjīta saha bhṛtyairnarādhipa || 35 ||
[Analyze grammar]

pūrvaṃ madhuramaśnīyāttato bhuñjīta kāmataḥ |
evaṃ niyamayuktasya yatphalaṃ tannibodha me || 36 ||
[Analyze grammar]

mṛto nāgapuraṃ yāti pūjyamāno'psarogaṇaiḥ |
vimānavaramārūḍho ramate kālamīpsitam || 37 ||
[Analyze grammar]

iha cāgatya rājāsāvayutānāṃ1 varo bhavet |
sarvaratnasamṛddhaḥ syādvāhanāḍhyaśca jāyate || 38 ||
[Analyze grammar]

pañca janmānyasau rājā dvāpare dvāpare bhavet |
ādhivyādhivinirmuktaḥ patnīputrasahāyavān |
tasmātpūjyāśca pālyāśca2 ghṛtapāyasaguggulaiḥ || 39 ||
[Analyze grammar]

śatānīka uvāca |
daśanti ye naraṃ vipra nāgāḥ krodhasamanvitāḥ |
bhavetkiṃ tasya daṣṭasya vistarād brūhi me dvija || 40 ||
[Analyze grammar]

sumanturuvāca |
nāgadaṣṭo naro rājanprāpya mṛtyuṃ vrajatyadhaḥ |
adho gatyā bhavetsarpo nirviṣo nātra saṃśayaḥ || 41 ||
[Analyze grammar]

śatānīka uvāca |
nāgadaṣṭaḥ pitā yasya bhrātā vā duhitāpi vā |
mātā putro'tha vā bhāryā kiṃ kartavyaṃ vadasva me || 42 ||
[Analyze grammar]

mokṣāya tasya viprendra dānaṃ vratamupoṣaṇam |
brūhi taddvijaśārdūla yena tadvai karomyaham || 43 ||
[Analyze grammar]

sumanturuvāca |
upoṣyā pañcamī rājannāgānāṃ puṣṭivardhinī |
tvamevamekaṃ rājendra vidhānaṃ śṛṇu bhārata || 44 ||
[Analyze grammar]

māsi bhādrapade yā tu kṛṣṇapakṣe1 mahīpate |
mahāpuṇyā tu sā proktā grāhyāpi ca mahīpate || 45 ||
[Analyze grammar]

jñeyā dvādaśa ṣañcamyo hāyane bharatarṣabha |
cartuthyāṃ tvekabhaktaṃ tu tasyāṃ naktaṃ prakīrtitam || 46 ||
[Analyze grammar]

bhuvi citramayānnāgānatha vā kaladhautakān |
kṛtvā dārumayānvāpi atha vā mṛnmayānnṛpa || 47 ||
[Analyze grammar]

pañcamyāmarcayedbhaktyā nāgānāṃ pañcakaṃ nṛpa |
karavīraiḥ śatapatrairjātīpuṣpaiśca suvrata || 48 ||
[Analyze grammar]

tathā gandhaiśca dhūpaiśca pūjya pañcakamuttamam || 3 ||
[Analyze grammar]

brāhmaṇaṃ bhojayetpaścād ghṛtapāyasamodakaiḥ || 49 ||
[Analyze grammar]

ananto vāsukiḥ śaṅkhaḥ padmaḥ kambala eva ca |
tathā karkoṭako nāgo nāgo hyaśvataro nṛpa || 50 ||
[Analyze grammar]

dhṛtarāṣṭraḥ śaṅkhapālaḥ kāliyastakṣakastathā |
piṅgalaśca tathā nāgo māsi māsi prakīrtitāḥ || 51 ||
[Analyze grammar]

vatsarānte pāraṇaṃ syādbrāhmaṇānbhojayedbahūn |
itihāsavide nāgaṃ gairikeṇa kṛtaṃ nṛpa |
tathārcanā pradātavyā vācakāya mahīpate || 52 ||
[Analyze grammar]

eṣa vai nāgapañcamyā5 vidhiḥ proktā budhairnṛpa |
tava pitrā kṛtaścaiva piturmokṣāya bhārata || 53 ||
[Analyze grammar]

tvamekamekaṃ vai vīra pañcamyāṃ bharatarṣabha |
suvarṇabhāraniṣpannaṃ nāgaṃ dattvā tathā ca gām || 54 ||
[Analyze grammar]

vyāsāya kuruśārdūla piturānṛṇyamāpnuyāḥ |
tava pitrā kṛtā hyevaṃ pañcamyupāsanā nṛpa || 55 ||
[Analyze grammar]

utsṛjya nāgatāṃ vīra tava pūrvapitāmahaḥ |
puṣpottaraṃ sado gatvā tathā puṣpasado nṛpa || 56 ||
[Analyze grammar]

sunāsīrasado gatvā tadā bhargasado gataḥ |
svabhūsadastato gatvā kañjajasya sado gataḥ || 57 ||
[Analyze grammar]

anye'pi ye kariṣyanti idaṃ vratamanuttamam |
daṣṭako mokṣyate teṣāṃ śubhaṃ sthānamavāpsyati || 58 ||
[Analyze grammar]

yaścedaṃ śṛṇuyānnityaṃ naraḥ1 śraddhāsamanvitaḥ |
kule tasya na nāgebhyo bhayaṃ bhavati kutracit || 59 ||
[Analyze grammar]