Chapter 12

[English text for this chapter is available]

sūta uvāca |
namo dharmāya mahate namaḥ kṛṣṇāya vedhase |
brahmaṇebhyo namaskṛtya dharmān vakṣye sanātanān || 1 ||
[Analyze grammar]

etad vaḥ kathitaṃ viprā viṣṇoścaritamadbhutam |
bhavadbhiḥ yadahaṃ pṛṣṭo narāṇāṃ puruṣocitam || 2 ||
[Analyze grammar]

atra saṅkīrtitaḥ sākṣāt sarvapāpaharo hariḥ |
nārāyaṇo hṛṣīkeśo bhagavān sātvatāṃ patiḥ || 3 ||
[Analyze grammar]

atra brahma paraṃ guhyaṃ jagataḥ prabhavāpyayam |
jñānaṃ ca tadupākhyānaṃ proktaṃ vijñānasaṃyutam || 4 ||
[Analyze grammar]

bhaktiyogaḥ samākhyāto vairāgyaṃ ca tadāśrayam |
pārīkṣitaṃ upākhyānaṃ nāradākhyānameva ca || 5 ||
[Analyze grammar]

prāyopaveśo rājarṣeḥ vipraśāpāt parīkṣitaḥ |
śukasya brahmarṣabhasya saṃvādaśca parīkṣitaḥ || 6 ||
[Analyze grammar]

yogadhāraṇayotkrāntiḥ saṃvādo nāradājayoḥ |
avatārānugītaṃ ca sargaḥ prādhāniko'grataḥ || 7 ||
[Analyze grammar]

viduroddhavasaṃvādaḥ kṣattṛmaitreyayostataḥ |
purāṇasaṃhitāpraśno mahāpuruṣasaṃsthitiḥ || 8 ||
[Analyze grammar]

tataḥ prākṛtikaḥ sargaḥ sapta vaikṛtikāśca ye |
tato brahmāṇḍasambhūtiḥ vairājaḥ puruṣo yataḥ || 9 ||
[Analyze grammar]

kālasya sthūlasūkṣmasya gatiḥ padmasamudbhavaḥ |
bhuva uddharaṇe'mbhodheḥ hiraṇyākṣavadho yathā || 10 ||
[Analyze grammar]

ūrdhvatiryagavāksargo rudrasargastathaiva ca |
ardhanārīśvarasyātha yataḥ svāyaṃbhuvo manuḥ || 11 ||
[Analyze grammar]

śatarūpā ca yā strīṇāṃ ādyā prakṛtiruttamā |
santāno dharmapat‍nīnāṃ kardamasya prajāpateḥ || 12 ||
[Analyze grammar]

avatāro bhagavataḥ kapilasya mahātmanaḥ |
devahūtyāśca saṃvādaḥ kapilena ca dhīmatā || 13 ||
[Analyze grammar]

navabrahmasamutpattiḥ dakṣayajñavināśanam |
dhruvasya caritaṃ paścāt pṛthoḥ prācīnabarhiṣaḥ || 14 ||
[Analyze grammar]

nāradasya ca saṃvādaḥ tataḥ praiyavrataṃ dvijāḥ |
nābhestato'nucaritaṃ ṛṣabhasya bharatasya ca || 15 ||
[Analyze grammar]

dvīpavarṣasamudrāṇāṃ girinadyupavarṇanam |
jyotiścakrasya saṃsthānaṃ pātālanarakasthitiḥ || 16 ||
[Analyze grammar]

dakṣajanma pracetobhyaḥ tatputrīṇāṃ ca santatiḥ |
yato devāsuranarāḥ tiryaṅnagakhagādayaḥ || 17 ||
[Analyze grammar]

tvāṣṭrasya janmanidhanaṃ putrayośca diterdvijāḥ |
daityeśvarasya caritaṃ prahrādasya mahātmanaḥ || 18 ||
[Analyze grammar]

manvantarānukathanaṃ gajendrasya vimokṣaṇam |
manvantarāvatārāśca viṣṇorhayaśirādayaḥ || 19 ||
[Analyze grammar]

kaurmaṃ dhānvataraṃ mātsyaṃ vāmanaṃ ca jagatpateḥ |
kṣīrodamathanaṃ tadvad amṛtārthe divaukasām || 20 ||
[Analyze grammar]

devāsuramahāyuddhaṃ rājavaṃśānukīrtanam |
ikṣvākujanma tadvaṃśaḥ sudyumnasya mahātmanaḥ || 21 ||
[Analyze grammar]

ilopākhyānamatroktaṃ tāropākhyānameva ca |
sūryavaṃśānukathanaṃ śaśādādyā nṛgādayaḥ || 22 ||
[Analyze grammar]

saukanyaṃ cātha śaryāteḥ kakutsthasya ca dhīmataḥ |
khaṭvāṅgasya ca māndhātuḥ saubhareḥ sagarasya ca || 23 ||
[Analyze grammar]

rāmasya kośalendrasya caritaṃ kilbiṣāpaham |
nimeraṅgaparityāgo janakānāṃ ca sambhavaḥ || 24 ||
[Analyze grammar]

rāmasya bhārgavendrasya niḥkṣatṛīkaraṇaṃ bhuvaḥ |
ailasya somavaṃśasya yayāternahuṣasya ca || 25 ||
[Analyze grammar]

dauṣmanterbharatasyāpi śāntanostatsutasya ca |
yayāterjyeṣṭhaputrasya yadorvaṃśo'nukīrtitaḥ || 26 ||
[Analyze grammar]

yatrāvatīrṇo bhagavān kṛṣṇākhyo jagadīśvaraḥ |
vasudevagṛhe janma tato vṛddhiśca gokule || 27 ||
[Analyze grammar]

tasya karmāṇyapārāṇi kīrtitānyasuradviṣaḥ |
pūtanāsupayaḥpānaṃ śakaṭoccāṭanaṃ śiśoḥ || 28 ||
[Analyze grammar]

tṛṇāvartasya niṣpeṣaḥ tathaiva bakavatsayoḥ |
dhenukasya sahabhrātuḥ pralambasya ca saṃkṣayaḥ || 29 ||
[Analyze grammar]

gopānāṃ ca paritrāṇaṃ dāvāgneḥ parisarpataḥ |
damanaṃ kāliyasyāheḥ mahāhernandamokṣaṇam || 30 ||
[Analyze grammar]

vratacaryā tu kanyānāṃ yatra tuṣṭo'cyuto vrataiḥ |
prasādo yajñapat‍nībhyo viprāṇāṃ cānutāpanam || 31 ||
[Analyze grammar]

govardhanoddhāraṇaṃ ca śakrasya surabheratha |
yajñabhiṣekaṃ kṛṣṇasya strībhiḥ krīḍā ca rātriṣu || 32 ||
[Analyze grammar]

śaṅkhacūḍasya durbuddheḥ vadho'riṣṭasya keśinaḥ |
akrūrāgamanaṃ paścāt prasthānaṃ rāmakṛṣṇayoḥ || 33 ||
[Analyze grammar]

vrajastrīṇāṃ vilāpaśca mathurālokanaṃ tataḥ |
gajamuṣṭikacāṇūra kaṃsādīnāṃ tathā vadhaḥ || 34 ||
[Analyze grammar]

mṛtasyānayanaṃ sūnoḥ punaḥ sāndīpanerguroḥ |
mathurāyāṃ nivasatā yaducakrasya yatpriyam |
kṛtamuddhavarāmābhyāṃ yutena hariṇā dvijāḥ || 35 ||
[Analyze grammar]

jarāsandhasamānīta sainyasya bahuśo vadhaḥ |
ghātanaṃ yavanendrasya kuśasthalyā niveśanam || 36 ||
[Analyze grammar]

ādānaṃ pārijātasya sudharmāyāḥ surālayāt |
rukmiṇyā haraṇaṃ yuddhe pramathya dviṣato hareḥ || 37 ||
[Analyze grammar]

harasya jṛmbhaṇaṃ yuddhe bāṇasya bhujakṛntanam |
prāgjyotiṣapatiṃ hatvā kanyānāṃ haraṇaṃ ca yat || 38 ||
[Analyze grammar]

caidyapauṇḍrakaśālvānāṃ dantavakrasya durmateḥ |
śambaro dvividaḥ pīṭho muraḥ pañcajanādayaḥ || 39 ||
[Analyze grammar]

māhātmyaṃ ca vadhasteṣāṃ vārāṇasyāśca dāhanam |
bhārāvataraṇaṃ bhūmeḥ nimittīkṛtya pāṇḍavān || 40 ||
[Analyze grammar]

vipraśāpāpadeśena saṃhāraḥ svakulasya ca |
uddhavasya ca saṃvādo vasudevasya cādbhutaḥ || 41 ||
[Analyze grammar]

yatrātmavidyā hyakhilā proktā dharmavinirṇayaḥ |
tato martyaparityāga ātmayogānubhāvataḥ || 42 ||
[Analyze grammar]

yugalakṣaṇavṛttiśca kalau nṝṇāmupaplavaḥ |
caturvidhaśca pralaya utpattistrividhā tathā || 43 ||
[Analyze grammar]

dehatyāgaśca rājarṣeḥ viṣṇurātasya dhīmataḥ |
śākhāpraṇayanaṃ ṛṣeḥ mārkaṇḍeyasya satkathā |
mahāpuruṣavinyāsaḥ sūryasya jagadātmanaḥ || 44 ||
[Analyze grammar]

iti coktaṃ dvijaśreṣṭhā yatpṛṣṭo'haṃ ihāsmi vaḥ |
līlāvatārakarmāṇi kīrtitānīha sarvaśaḥ || 45 ||
[Analyze grammar]

patitaḥ skhalitaścārtaḥ kṣuttvā vā vivaśo bruvan |
haraye nama ityuccaiḥ mucyate sarvapātakāt || 46 ||
[Analyze grammar]

saṅkīrtyamāno bhagavān anantaḥ |
śrutānubhāvo vyasanaṃ hi puṃsām |
praviśya cittaṃ vidhunotyaśeṣaṃ |
yathā tamo'rko'bhramivātivātaḥ || 47 ||
[Analyze grammar]

mṛṣā girastā hyasatīrasatkathā |
na kathyate yadbhagavānadhokṣajaḥ |
tadeva satyaṃ taduhaiva maṅgalaṃ |
tadeva puṇyaṃ bhagavadguṇodayam || 48 ||
[Analyze grammar]

tadeva ramyaṃ ruciraṃ navaṃ navaṃ |
tadeva śaśvanmanaso mahotsavam |
tadeva śokārṇavaśoṣaṇaṃ nṛṇāṃ |
yaduttamaḥślokayaśo'nugīyate || 49 ||
[Analyze grammar]

na yadvacaścitrapadaṃ hareryaśo |
jagatpavitraṃ pragṛṇīta karhicit |
tad dhvāṅkṣatīrthaṃ na tu haṃsasevitaṃ |
yatrācyutastatra hi sādhavo'malāḥ || 50 ||
[Analyze grammar]

tadvāgvisargo janatāghasaṃplavo |
yasmin pratiślokamabaddhavatyapi |
nāmānyanantasya yaśo'ṅkitāni yat |
śrṛṇvanti gāyanti gṛṇanti sādhavaḥ || 51 ||
[Analyze grammar]

naiṣkarmyamapyacyuta bhāvavarjitaṃ |
na śobhate jñānamalaṃ nirañjanam |
kutaḥ punaḥ śaśvadabhadramīśvare |
na hyarpitaṃ karma yadapyanuttamam || 52 ||
[Analyze grammar]

yaśaḥśriyāmeva pariśramaḥ paro |
varṇāśramācāratapaḥśrutādiṣu |
avismṛtiḥ śrīdharapādapadmayoḥ |
guṇānuvādaśravaṇādarādibhirhareḥ || 53 ||
[Analyze grammar]

avismṛtiḥ kṛṣṇapadāravindayoḥ |
kṣiṇotyabhadrāṇi ca śaṃ tanoti ca |
sattvasya śuddhiṃ paramātmabhaktiṃ |
jñānaṃ ca vijñānavirāgayuktam || 54 ||
[Analyze grammar]

yūyaṃ dvijāgryā bata bhūribhāgā |
yacchaśvadātmanyakhilātmabhūtam |
nārāyaṇaṃ devamadevamīśaṃ |
ajasrabhāvā bhajatāviveśya || 55 ||
[Analyze grammar]

ahaṃ ca saṃsmārita ātmatattvaṃ |
śrutaṃ purā me paramarṣivaktrāt |
prāyopaveśe nṛpateḥ parīkṣitaḥ |
sadasyṛṣīṇāṃ mahatāṃ ca śrṛṇvatām || 56 ||
[Analyze grammar]

etadvaḥ kathitaṃ viprāḥ kathanīyorukarmaṇaḥ |
māhātmyaṃ vāsudevasya sarvāśubhavināśanam || 57 ||
[Analyze grammar]

ya etatśrāvayennityaṃ yāmakṣaṇamananyadhīḥ |
śraddhāvān yo'nuśrṛṇuyāt punātyātmānameva saḥ || 58 ||
[Analyze grammar]

dvādaśyāmekādaśyāṃ vā śrṛṇvannāyuṣyavān bhavet |
paṭhatyanaśnan prayataḥ tato bhavatyapātakī || 59 ||
[Analyze grammar]

puṣkare mathurāyāṃ ca dvāravatyāṃ yatātmavān |
upoṣya saṃhitāmetāṃ paṭhitvā mucyate bhayāt || 60 ||
[Analyze grammar]

devatā munayaḥ siddhāḥ pitaro manavo nṛpāḥ |
yacchanti kāmān gṛṇataḥ śrṛṇvato yasya kīrtanāt || 61 ||
[Analyze grammar]

ṛco yajūṃṣi sāmāni dvijo'dhītyānuvindate |
madhukulyā ghṛtakulyāḥ payaḥkulyāśca tatphalam || 62 ||
[Analyze grammar]

purāṇasaṃhitāṃ etāṃ adhītya prayato dvijaḥ |
proktaṃ bhagavatā yattu tatpadaṃ paramaṃ vrajet || 63 ||
[Analyze grammar]

vipro'dhītyāpnuyāt prajñāṃ rājanyodadhimekhalām |
vaiśyo nidhipatitvaṃ ca śūdraḥ śudhyeta pātakāt || 64 ||
[Analyze grammar]

kalimalasaṃhatikālano'khileśo |
hariritaratra na gīyate hyabhīkṣṇam |
iha tu punarbhagavānaśeṣamūrtiḥ |
paripaṭhito'nupadaṃ kathāprasaṅgaiḥ || 65 ||
[Analyze grammar]

tamahamajamanantamātmatattvaṃ |
jagadudayasthitisaṃyamātmaśaktim |
dyupatibhirajaśakraśaṅkarādyaiḥ |
duravasitastavamacyutaṃ nato'smi || 66 ||
[Analyze grammar]

upacitanavaśaktibhiḥ sva ātmani |
uparacitasthirajaṅgamālayāya |
bhagavata upalabdhimātradhāmne |
suraṛṣabhāya namaḥ sanātanāya || 67 ||
[Analyze grammar]

svasukhanibhṛtacetāstadvyudastānyabhāvo'pi |
ajitaruciralīlākṛṣṭasārastadīyam |
vyatanuta kṛpayā yaḥ tattvadīpaṃ purāṇaṃ |
tamakhilavṛjinaghnaṃ vyāsasūnuṃ nato'smi || 68 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ dvādaśaskandhe dvādaśaskandhārthanirūpaṇaṃ nāma dvādaśo'dhyāyaḥ || 12 ||
[Analyze grammar]