Chapter 10

[English text for this chapter is available]

sūta uvāca |
sa evaṃ anubhūyedaṃ nārāyaṇavinirmitam |
vaibhavaṃ yogamāyāyāḥ tameva śaraṇaṃ yayau || 1 ||
[Analyze grammar]

śrīmārkaṇḍeya uvāca |
prapanno'smyaṅghrimūlaṃ te prapannābhayadaṃ hare |
yanmāyayāpi vibudhā muhyanti jñānakāśayā || 2 ||
[Analyze grammar]

sūta uvāca |
tamevaṃ nibhṛtātmānaṃ vṛṣeṇa divi paryaṭan |
rudrāṇyā bhagavān rudro dadarśa svagaṇairvṛtaḥ || 3 ||
[Analyze grammar]

athomā taṃ ṛṣiṃ vīkṣya giriśaṃ samabhāṣata |
paśyemaṃ bhagavan vipraṃ nibhṛtātmendriyāśayam || 4 ||
[Analyze grammar]

nibhṛtodajhaṣavrātaṃ vātāpāye yathārṇavaḥ |
kurvasya tapasaḥ sākṣāt saṃsiddhiṃ siddhido bhavān || 5 ||
[Analyze grammar]

śrībhagavānuvāca |
naivecchatyāśiṣaḥ kvāpi brahmarṣirmokṣamapyuta |
bhaktiṃ parāṃ bhagavati labdhavān puruṣe'vyaye || 6 ||
[Analyze grammar]

athāpi saṃvadiṣyāmo bhavānyetena sādhunā |
ayaṃ hi paramo lābho nṛṇāṃ sādhusamāgamaḥ || 7 ||
[Analyze grammar]

sūta uvāca |
ityuktvā tamupeyāya bhagavān sa satāṃ gatiḥ |
īśānaḥ sarvavidyānāṃ īśvaraḥ sarvadehinām || 8 ||
[Analyze grammar]

tayorāgamanaṃ sākṣād īśayorjagadātmanoḥ |
na veda ruddhadhīvṛttiḥ ātmānaṃ viśvameva ca || 9 ||
[Analyze grammar]

bhagavān tadabhijñāya giriśo yogamāyayā |
āviśattadguhākāśaṃ vāyuśchidramiveśvaraḥ || 10 ||
[Analyze grammar]

ātmanyapi śivaṃ prāptaṃ taḍitpiṅgajaṭādharam |
tryakṣaṃ daśabhujaṃ prāṃśuṃ udyantaṃ iva bhāskaram || 11 ||
[Analyze grammar]

vyāghracarmāmbaraṃ śūla khaṭvāṅgacarmabhiḥ |
akṣamālāḍamaruka kapālāsidhanuḥ saha || 12 ||
[Analyze grammar]

bibhrāṇaṃ sahasā bhātaṃ vicakṣya hṛdi vismitaḥ |
kimidaṃ kuta eveti samādhervirato muniḥ || 13 ||
[Analyze grammar]

netre unmīlya dadṛśe sagaṇaṃ somayā'gatam |
rudraṃ trilokaikaguruṃ nanāma śirasā muniḥ || 14 ||
[Analyze grammar]

tasmai saparyāṃ vyadadhāt sagaṇāya sahomayā |
svāgatāsanapādyārghya gandhasrag dhūpadīpakaiḥ || 15 ||
[Analyze grammar]

āha cātmānubhāvena pūrṇakāmasya te vibho |
karavāma kimīśāna yenedaṃ nirvṛtaṃ jagat || 16 ||
[Analyze grammar]

namaḥ śivāya śāntāya sattvāya pramṛḍāya ca |
rajojuṣe'pya ghorāya namastubhyaṃ tamojuṣe || 17 ||
[Analyze grammar]

sūta uvāca |
evaṃ stutaḥ sa bhagavān ādidevaḥ satāṃ gatiḥ |
parituṣṭaḥ prasannātmā prahasan taṃ abhāṣata || 18 ||
[Analyze grammar]

śrībhagavānuvāca |
varaṃ vṛṇīṣva naḥ kāmaṃ varadeśā vayaṃ trayaḥ |
amoghaṃ darśanaṃ yeṣāṃ martyo yad vindate'mṛtam || 19 ||
[Analyze grammar]

brāhmaṇāḥ sādhavaḥ śāntā niḥsaṅgā bhūtavatsalāḥ |
ekāntabhaktā asmāsu nirvairāḥ samadarśinaḥ || 20 ||
[Analyze grammar]

salokā lokapālāstān vandantyarcantyupāsate |
ahaṃ ca bhagavān brahmā svayaṃ ca harirīśvaraḥ || 21 ||
[Analyze grammar]

na te mayyacyute'je ca bhidāmaṇvapi cakṣate |
nātmanaśca janasyāpi tad yuṣmān vayamīmahi || 22 ||
[Analyze grammar]

na hyammayāni tīrthāni na devāścetanojjhitāḥ |
te punanti urukālena yūyaṃ darśanamātrataḥ || 23 ||
[Analyze grammar]

brāhmaṇebhyo namasyāmo ye'smad rūpaṃ trayīmayam |
bibhratyātmasamādhāna tapaḥsvādhyāyasaṃyamaiḥ || 24 ||
[Analyze grammar]

śravaṇād darśanād vāpi mahāpātakino'pi vaḥ |
śudhyeran antyajāścāpi kimu saṃbhāṣaṇādibhiḥ || 25 ||
[Analyze grammar]

sūta uvāca |
iti candralalāmasya dharmaguhyopabṛṃhitam |
vaco'mṛtāyanaṃ ṛṣiḥ nātṛpyat karṇayoḥ piban || 26 ||
[Analyze grammar]

sa ciraṃ māyayā viṣṇoḥ bhrāmitaḥ karśito bhṛśam |
śivavāgamṛtadhvasta kleśapuñjastamabravīt || 27 ||
[Analyze grammar]

śrīmārkaṇḍeya uvāca |
aho īśvaralīleyaṃ durvibhāvyā śarīriṇām |
yannamantīśitavyāni stuvanti jagadīśvarāḥ || 28 ||
[Analyze grammar]

dharmaṃ grāhayituṃ prāyaḥ pravaktāraśca dehinām |
ācaranti anumodante kriyamāṇaṃ stuvanti ca || 29 ||
[Analyze grammar]

naitāvatā bhagavataḥ svamāyāmayavṛttibhiḥ |
na duṣyetānubhāvastaiḥ māyinaḥ kuhakaṃ yathā || 30 ||
[Analyze grammar]

sṛṣṭvedaṃ manasā viśvaṃ ātmanānupraviśya yaḥ |
guṇaiḥ kurvadbhirābhāti karteva svapnadṛg yathā || 31 ||
[Analyze grammar]

tasmai namo bhagavate triguṇāya guṇātmane |
kevalāyādvitīyāya gurave brahmamūrtaye || 32 ||
[Analyze grammar]

kaṃ vṛṇe nu paraṃ bhūman varaṃ tvad varadarśanāt |
yaddarśanātpūrṇakāmaḥ satyakāmaḥ pumān bhavet || 33 ||
[Analyze grammar]

varamekaṃ vṛṇe'thāpi pūrṇāt kāmābhivarṣaṇāt |
bhagavati acyutāṃ bhaktiṃ tatpareṣu tathā tvayi || 34 ||
[Analyze grammar]

sūta uvāca |
ityarcito'bhiṣṭutaśca muninā sūktayā girā |
taṃ āha bhagavān śarvaḥ śarvayā cābhinanditaḥ || 35 ||
[Analyze grammar]

kāmo maharṣe sarvo'yaṃ bhaktimān tvaṃ amadhokṣaje |
ākalpāntād yaśaḥ puṇyaṃ amajarāmaratā tathā || 36 ||
[Analyze grammar]

jñānaṃ traikālikaṃ brahman vijñānaṃ ca viraktimat |
brahmavarcasvino bhūyāt purāṇācāryatāstu te || 37 ||
[Analyze grammar]

sūta uvāca |
evaṃ varān sa munaye dattvāgāt tryakṣa īśvaraḥ |
devyai tatkarma kathayan anubhūtaṃ purāmunā || 38 ||
[Analyze grammar]

so'pyavāptamahāyoga mahimā bhārgavottamaḥ |
vicarati adhunāpyaddhā harāvekāntatāṃ gataḥ || 39 ||
[Analyze grammar]

anuvarṇitametatte mārkaṇḍeyasya dhīmataḥ |
anubhūtaṃ bhagavato māyāvaibhavamadbhutam || 40 ||
[Analyze grammar]

etat kecid avidvāṃso māyāsaṃsṛtirātmanaḥ |
anādyāvartitaṃ nṝṇāṃ kādācitkaṃ pracakṣate || 41 ||
[Analyze grammar]

ya evametadbhṛguvarya varṇitaṃ |
rathāṅgapāṇeḥ anubhāvabhāvitam |
saṃśrāvayet saṃśrṛṇuyādu tāvubhau |
tayorna karmāśayasaṃsṛtirbhavet || 42 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ dvādaśaskandhe daśamo'dhyāyaḥ || 10 ||
[Analyze grammar]