Chapter 23

[English text for this chapter is available]

śrībādarāyaṇiruvāca |
sa evamāśaṃsita uddhavena bhāgavatamukhyena dāśārhamukhyaḥ |
sabhājayanbhṛtyavaco mukundastamābabhāṣe śravaṇīyavīryaḥ || 1 ||
[Analyze grammar]

śrībhagavānuvāca |
bārhaspatya sa nāstyatra sādhurvai durjaneritaiḥ |
duraktairbhinnamātmānaṃ yaḥ samādhātumīśvaraḥ || 2 ||
[Analyze grammar]

na tathā tapyate viddhaḥ pumānbāṇaistu marmagaiḥ |
yathā tudanti marmasthā hyasatāṃ paruṣeṣavaḥ || 3 ||
[Analyze grammar]

kathayanti mahatpuṇyamitihāsamihoddhava |
tamahaṃ varṇayiṣyāmi nibodha susamāhitaḥ || 4 ||
[Analyze grammar]

kenacidbhikṣuṇā gītaṃ paribhūtena durjanaiḥ |
smaratā dhṛtiyuktena vipākaṃ nijakarmaṇām || 5 ||
[Analyze grammar]

avantiṣu dvijaḥ kaścidāsīdāḍhyatamaḥ śriyā |
vārtāvṛttiḥ kadaryastu kāmī lubdho'tikopanaḥ || 6 ||
[Analyze grammar]

jñātayo'tithayastasya vāṅmātreṇāpi nārcitāḥ |
śūnyāvasatha ātmāpi kāle kāmairanarcitaḥ || 7 ||
[Analyze grammar]

duḥśīlasya kadaryasya druhyante putrabāndhavāḥ |
dārā duhitaro bhṛtyā viṣaṇṇā nācaranpriyam || 8 ||
[Analyze grammar]

tasyaivaṃ yakṣavittasya cyutasyobhayalokataḥ |
dharmakāmavihīnasya cukrudhuḥ pañcabhāginaḥ || 9 ||
[Analyze grammar]

tadavadhyānavisrasta puṇyaskandhasya bhūrida |
artho'pyagacchannidhanaṃ bahvāyāsapariśramaḥ || 10 ||
[Analyze grammar]

jñātyo jagṛhuḥ kiñcitkiñciddasyava uddhava |
daivataḥ kālataḥ kiñcidbrahmabandhornṛpārthivāt || 11 ||
[Analyze grammar]

sa evaṃ draviṇe naṣṭe dharmakāmavivarjitaḥ |
upekṣitaśca svajanaiścintāmāpa duratyayām || 12 ||
[Analyze grammar]

tasyaivaṃ dhyāyato dīrghaṃ naṣṭarāyastapasvinaḥ |
khidyato bāṣpakaṇṭhasya nirvedaḥ sumahānabhūt || 13 ||
[Analyze grammar]

sa cāhedamaho kaṣṭaṃ vṛthātmā me'nutāpitaḥ |
na dharmāya na kāmāya yasyārthāyāsa īdṛśaḥ || 14 ||
[Analyze grammar]

prāyeṇāthāḥ kadaryāṇāṃ na sukhāya kadācana |
iha cātmopatāpāya mṛtasya narakāya ca || 15 ||
[Analyze grammar]

yaśo yaśasvināṃ śuddhaṃ ślāghyā ye guṇināṃ guṇāḥ |
lobhaḥ svalpo'pi tānhanti śvitro rūpamivepsitam || 16 ||
[Analyze grammar]

arthasya sādhane siddhe utkarṣe rakṣaṇe vyaye |
nāśopabhoga āyāsastrāsaścintā bhramo nṛṇām || 17 ||
[Analyze grammar]

steyaṃ hiṃsānṛtaṃ dambhaḥ kāmaḥ krodhaḥ smayo madaḥ |
bhedo vairamaviśvāsaḥ saṃspardhā vyasanāni ca || 18 ||
[Analyze grammar]

ete pañcadaśānarthā hyarthamūlā matā nṛṇām |
tasmādanarthamarthākhyaṃ śreyo'rthī dūratastyajet || 19 ||
[Analyze grammar]

bhidyante bhrātaro dārāḥ pitaraḥ suhṛdastathā |
ekā snigdhāḥ kākiṇinā sadyaḥ sarve'rayaḥ kṛtāḥ || 20 ||
[Analyze grammar]

arthenālpīyasā hyete saṃrabdhā dīptamanyavaḥ |
tyajantyāśu spṛdho ghnanti sahasotsṛjya sauhṛdam || 21 ||
[Analyze grammar]

labdhvā janmāmaraprārthyaṃ mānuṣyaṃ taddvijāgryatām |
tadanādṛtya ye svārthaṃ ghnanti yāntyaśubhāṃ gatim || 22 ||
[Analyze grammar]

svargāpavargayordvāraṃ prāpya lokamimaṃ pumān |
draviṇe ko'nuṣajjeta martyo'narthasya dhāmani || 23 ||
[Analyze grammar]

devarṣipitṛbhūtāni jñātīnbandhūṃśca bhāginaḥ |
asaṃvibhajya cātmānaṃ yakṣavittaḥ patatyadhaḥ || 24 ||
[Analyze grammar]

vyarthayārthehayā vittaṃ pramattasya vayo balam |
kuśalā yena sidhyanti jaraṭhaḥ kiṃ nu sādhaye || 25 ||
[Analyze grammar]

kasmātsaṅkliśyate vidvānvyarthayārthehayāsakṛt |
kasyacinmāyayā nūnaṃ loko'yaṃ suvimohitaḥ || 26 ||
[Analyze grammar]

kiṃ dhanairdhanadairvā kiṃ kāmairvā kāmadairuta |
mṛtyunā grasyamānasya karmabhirvota janmadaiḥ || 27 ||
[Analyze grammar]

nūnaṃ me bhagavāṃstuṣṭaḥ sarvadevamayo hariḥ |
yena nīto daśāmetāṃ nirvedaścātmanaḥ plavaḥ || 28 ||
[Analyze grammar]

so'haṃ kālāvaśeṣeṇa śoṣayiṣye'ṅgamātmanaḥ |
apramatto'khilasvārthe yadi syātsiddha ātmani || 29 ||
[Analyze grammar]

tatra māmanumoderandevāstribhuvaneśvarāḥ |
muhūrtena brahmalokaṃ khaṭvāṅgaḥ samasādhayat || 30 ||
[Analyze grammar]

śrībhagavānuvāca |
ityabhipretya manasā hyāvantyo dvijasattamaḥ |
unmucya hṛdayagranthīnśānto bhikṣurabhūnmuniḥ || 31 ||
[Analyze grammar]

sa cacāra mahīmetāṃ saṃyatātmendriyānilaḥ |
bhikṣārthaṃ nagaragrāmānasaṅgo'lakṣito'viśat || 32 ||
[Analyze grammar]

taṃ vai pravayasaṃ bhikṣumavadhūtamasajjanāḥ |
dṛṣṭvā paryabhavanbhadra bahvībhiḥ paribhūtibhiḥ || 33 ||
[Analyze grammar]

kecittriveṇuṃ jagṛhureke pātraṃ kamaṇḍalum |
pīṭhaṃ caike'kṣasūtraṃ ca kanthāṃ cīrāṇi kecana |
pradāya ca punastāni darśitānyādadurmuneḥ || 34 ||
[Analyze grammar]

annaṃ ca bhaikṣyasampannaṃ bhuñjānasya sarittaṭe |
mūtrayanti ca pāpiṣṭhāḥ ṣṭhīvantyasya ca mūrdhani || 35 ||
[Analyze grammar]

yatavācaṃ vācayanti tāḍayanti na vakti cet |
tarjayantyapare vāgbhiḥ steno'yamiti vādinaḥ |
badhnanti rajjvā taṃ kecidbadhyatāṃ badhyatāmiti || 36 ||
[Analyze grammar]

kṣipantyeke'vajānanta eṣa dharmadhvajaḥ śaṭhaḥ |
kṣīṇavitta imāṃ vṛttimagrahītsvajanojjhitaḥ || 37 ||
[Analyze grammar]

aho eṣa mahāsāro dhṛtimāngirirāḍiva |
maunena sādhayatyarthaṃ bakavaddṛḍhaniścayaḥ || 38 ||
[Analyze grammar]

ityeke vihasantyenameke durvātayanti ca |
taṃ babandhurnirurudhuryathā krīḍanakaṃ dvijam || 39 ||
[Analyze grammar]

evaṃ sa bhautikaṃ duḥkhaṃ daivikaṃ daihikaṃ ca yat |
bhoktavyamātmano diṣṭaṃ prāptaṃ prāptamabudhyata || 40 ||
[Analyze grammar]

paribhūta imāṃ gāthāmagāyata narādhamaiḥ |
pātayadbhiḥ sva dharmastho dhṛtimāsthāya sāttvikīm || 41 ||
[Analyze grammar]

dvija uvāca |
nāyaṃ jano me sukhaduḥkhaheturna devatātmā grahakarmakālāḥ |
manaḥ paraṃ kāraṇamāmananti saṃsāracakraṃ parivartayedyat || 42 ||
[Analyze grammar]

mano guṇānvai sṛjate balīyastataśca karmāṇi vilakṣaṇāni |
śuklāni kṛṣṇānyatha lohitāni tebhyaḥ savarṇāḥ sṛtayo bhavanti || 43 ||
[Analyze grammar]

anīha ātmā manasā samīhatā hiraṇmayo matsakha udvicaṣṭe |
manaḥ svaliṅgaṃ parigṛhya kāmānjuṣannibaddho guṇasaṅgato'sau || 44 ||
[Analyze grammar]

dānaṃ svadharmo niyamo yamaśca śrutaṃ ca karmāṇi ca sadvratāni |
sarve manonigrahalakṣaṇāntāḥ paro hi yogo manasaḥ samādhiḥ || 45 ||
[Analyze grammar]

samāhitaṃ yasya manaḥ praśāntaṃ dānādibhiḥ kiṃ vada tasya kṛtyam |
asaṃyataṃ yasya mano vinaśyaddānādibhiścedaparaṃ kimebhiḥ || 46 ||
[Analyze grammar]

manovaśe'nye hyabhavansma devā manaśca nānyasya vaśaṃ sameti |
bhīṣmo hi devaḥ sahasaḥ sahīyānyuñjyādvaśe taṃ sa hi devadevaḥ || 47 ||
[Analyze grammar]

taṃ durjayaṃ śatrumasahyavegamaruntudaṃ tanna vijitya kecit |
kurvantyasadvigrahamatra martyairmitrāṇyudāsīnaripūnvimūḍhāḥ || 48 ||
[Analyze grammar]

dehaṃ manomātramimaṃ gṛhītvā mamāhamityandhadhiyo manuṣyāḥ |
eṣo'hamanyo'yamiti bhrameṇa durantapāre tamasi bhramanti || 49 ||
[Analyze grammar]

janastu hetuḥ sukhaduḥkhayoścetkimātmanaścātra hi bhaumayostat |
jihvāṃ kvacitsandaśati svadadbhistadvedanāyāṃ katamāya kupyet || 50 ||
[Analyze grammar]

duḥkhasya heturyadi devatāstu kimātmanastatra vikārayostat |
yadaṅgamaṅgena nihanyate kvacitkrudhyeta kasmai puruṣaḥ svadehe || 51 ||
[Analyze grammar]

ātmā yadi syātsukhaduḥkhahetuḥ kimanyatastatra nijasvabhāvaḥ |
na hyātmano'nyadyadi tanmṛṣā syātkrudhyeta kasmānna sukhaṃ na duḥkham || 52 ||
[Analyze grammar]

grahā nimittaṃ sukhaduḥkhayoścetkimātmano'jasya janasya te vai |
grahairgrahasyaiva vadanti pīḍāṃ krudhyeta kasmai puruṣastato'nyaḥ || 53 ||
[Analyze grammar]

karmāstu hetuḥ sukhaduḥkhayoścetkimātmanastaddhi jaḍājaḍatve |
dehastvacitpuruṣo'yaṃ suparṇaḥ krudhyeta kasmai na hi karma mūlam || 54 ||
[Analyze grammar]

kālastu hetuḥ sukhaduḥkhayoścetkimātmanastatra tadātmako'sau |
nāgnerhi tāpo na himasya tatsyātkrudhyeta kasmai na parasya dvandvam || 55 ||
[Analyze grammar]

na kenacitkvāpi kathañcanāsya dvandvoparāgaḥ parataḥ parasya |
yathāhamaḥ saṃsṛtirūpiṇaḥ syādevaṃ prabuddho na bibheti bhūtaiḥ || 56 ||
[Analyze grammar]

etāṃ sa āsthāya parātmaniṣṭhāmadhyāsitāṃ pūrvatamairmaharṣibhiḥ |
ahaṃ tariṣyāmi durantapāraṃ tamo mukundāṅghriniṣevayaiva || 57 ||
[Analyze grammar]

śrībhagavānuvāca |
nirvidya naṣṭadraviṇe gataklamaḥ pravrajya gāṃ paryaṭamāna ittham |
nirākṛto'sadbhirapi svadharmādakampito'mūṃ munirāha gāthām || 58 ||
[Analyze grammar]

sukhaduḥkhaprado nānyaḥ puruṣasyātmavibhramaḥ |
mitrodāsīnaripavaḥ saṃsārastamasaḥ kṛtaḥ || 59 ||
[Analyze grammar]

tasmātsarvātmanā tāta nigṛhāṇa mano dhiyā |
mayyāveśitayā yukta etāvānyogasaṅgrahaḥ || 60 ||
[Analyze grammar]

ya etāṃ bhikṣuṇā gītāṃ brahmaniṣṭhāṃ samāhitaḥ |
dhārayañchrāvayañchṛṇvandvandvairnaivābhibhūyate || 61 ||
[Analyze grammar]