Chapter 2

[English text for this chapter is available]

vasudevāya devarṣināradopadeśaḥ tatra niminavayogeśvarasaṃvādarūpeṇa |
pūrvaṃ bhāgavatadharmasya bhāgavatalakṣaṇasya ca varṇanam |
śrīśuka uvāca |
govindabhujaguptāyāṃ dvāravatyāṃ kurūdvaha |
avātsīnnārado'bhīkṣṇaṃ kṛṣṇopāsanalālasaḥ || 1 ||
[Analyze grammar]

ko nu rājannindriyavān mukandacaraṇambujam |
na bhajet sarvatomṛtyuḥ upāsyamamarottamaiḥ || 2 ||
[Analyze grammar]

tamekadā tu devarṣiṃ vasudevo gṛhāgatam |
arcitaṃ sukhamāsīnamabhivādyedamabravīt || 3 ||
[Analyze grammar]

śrīvasudeva uvāca |
bhagavan bhavato yātrā svastaye sarvadehinām |
kṛpaṇānāṃ yathā pitroḥ uttamaślokavartmanām || 4 ||
[Analyze grammar]

bhūtānāṃ devacaritaṃ duḥkhāya ca sukhāya ca |
sukhāyaiva hi sādhūnāṃ tvādṛśāmacyutātmanām || 5 ||
[Analyze grammar]

bhajanti ye yathā devān devā api tathaiva tān |
chāyeva karmasacivāḥ sādhavo dīnavatsalāḥ || 6 ||
[Analyze grammar]

brahman tathāpi pṛcchāmo dharmān bhāgavatāṃstava |
yān śrutvā śraddhayā martyo mucyate sarvato bhayāt || 7 ||
[Analyze grammar]

ahaṃ kila purānantaṃ prajārtho bhuvi muktidam |
apūjayaṃ na mokṣāya mohito devamāyayā || 8 ||
[Analyze grammar]

yathā vicitravyasanād bhavadbhiḥ viśvatobhayāt |
mucyema hyañjasaivāddhā tathā naḥ śādhi suvrata || 9 ||
[Analyze grammar]

śrīśuka uvāca |
rājannevaṃ kṛtapraśno vasudevena dhīmatā |
prītastamāha devarṣiḥ hareḥ saṃsmārito guṇaiḥ || 10 ||
[Analyze grammar]

śrīnārada uvāca |
samyagetadvyavasitaṃ bhavatā sātvatarṣabha |
yat pṛcchase bhāgavatān dharmān tvaṃ viśvabhāvanān || 11 ||
[Analyze grammar]

śruto'nupaṭhito dhyāta ādṛto vānumoditaḥ |
sadyaḥ punāti saddharmo deva viśvadruho'pi hi || 12 ||
[Analyze grammar]

tvayā paramakalyāṇaḥ puṇyaśravaṇakīrtanaḥ |
smārito bhagavānadya devo nārāyaṇo mama || 13 ||
[Analyze grammar]

atrāpyudāharantīmam itihāsaṃ purātanam |
ārṣabhāṇāṃ ca saṃvādaṃ videhasya mahātmanaḥ || 14 ||
[Analyze grammar]

priyavrato nāma suto manoḥ svāyaṃbhuvasya yaḥ |
tasyāgnīdhrastato nābhiḥ ṛṣabhastatsutassmṛtaḥ || 15 ||
[Analyze grammar]

tamāhuḥ vāsudevāṃśaṃ mokṣadharmavivakṣayā |
avatīrṇaṃ sutaśataṃ tasyāsīd brahmapāragam || 16 ||
[Analyze grammar]

teṣāṃ vai bharato jyeṣṭho nārāyaṇaparāyaṇaḥ |
vikhyātaṃ varṣametadyat nāmnā bhāratamad‍bhutam || 17 ||
[Analyze grammar]

sa bhuktabhogāṃ tyaktvemāṃ nirgatastapasā harim |
upāsīnastatpadavīṃ lebhe vai janmabhistribhiḥ || 18 ||
[Analyze grammar]

teṣāṃ nava navadvīpapatayo'sya samantataḥ |
karmatantrapraṇetāra ekāśītirdvijātayaḥ || 19 ||
[Analyze grammar]

navābhavan mahābhāgā munayo hyarthaśaṃsinaḥ |
śramaṇā vātaraśanā ātmavidyāviśāradāḥ || 20 ||
[Analyze grammar]

kavirharirantarikṣaḥ prabuddhaḥ pippalāyanaḥ |
āvihotro'tha drumilaścamasaḥ karabhājanaḥ || 21 ||
[Analyze grammar]

ta ete bhagavadrūpaṃ viśvaṃ sadasadātmakam |
ātmano'vyatirekeṇa paśyanto vyacaran mahīm || 22 ||
[Analyze grammar]

avyāhateṣṭagatayaḥ surasiddhasādhya |
gandharvayakṣanarakinnaranāgalokān |
muktāścaranti municāraṇabhūtanātha |
vidyādharadvijagavāṃ bhuvanāni kāmam || 23 ||
[Analyze grammar]

ta ekadā nimeḥ satraṃ upajagmuḥ yadṛcchayā |
vitāyamānaṃ ṛṣibhiḥ ajanābhermahātmanaḥ || 24 ||
[Analyze grammar]

tān dṛṣṭvā sūryasaṅkāśān mahābhāgavatān nṛpa |
yajamāno'gnayo viprāḥ sarva evopatasthire || 25 ||
[Analyze grammar]

videhastānabhipretya nārāyaṇaparāyaṇān |
prītaḥ saṃpūjayāñcakre āsanasthān yathārhataḥ || 26 ||
[Analyze grammar]

tān rocamānān svarucā brahmaputropamān nava |
papraccha paramaprītaḥ praśrayāvanato nṛpaḥ || 27 ||
[Analyze grammar]

śrīvideha uvāca |
manye bhagavataḥ sākṣāt pārṣadān vo madhudviṣaḥ |
viṣṇorbhūtāni lokānāṃ pāvanāya caranti hi || 28 ||
[Analyze grammar]

durlabho mānuṣo deho dehināṃ kṣaṇabhaṅguraḥ |
tatrāpi durlabhaṃ manye vaikuṇṭhapriyadarśanam || 29 ||
[Analyze grammar]

ata ātyantikaṃ kṣemaṃ pṛcchāmo bhavato'naghāḥ |
saṃsāre'smin kṣaṇārdho'pi satsaṅgaḥ śevadhirnṛṇām || 30 ||
[Analyze grammar]

dharmān bhāgavatān brūta yadi naḥ śrutaye kṣamam |
yaiḥ prasannaḥ prapannāya dāsyatyātmānamapyajaḥ || 31 ||
[Analyze grammar]

śrīnārada uvāca |
evaṃ te niminā pṛṣṭā vasudeva mahattamāḥ |
pratipūjyābruvan prītyā sasadasyartvijaṃ nṛpam || 32 ||
[Analyze grammar]

śrīkaviruvāca |
manye'kutaścidbhayamacyutasya |
pādāmbujopāsanamatra nityam |
udvignabuddheḥ asadātmabhāvāt |
viśvātmanā yatra nivartate bhīḥ || 33 ||
[Analyze grammar]

ye vai bhagavatā proktā upāyā hyātmalabdhaye |
añjaḥ puṃsāmaviduṣāṃ viddhi bhāgavatān hi tān || 34 ||
[Analyze grammar]

yānāsthāya naro rājan na pramādyeta karhicit |
dhāvan nimīlya vā netre na skhalenna patediha || 35 ||
[Analyze grammar]

kāyena vācā manasendriyairvā |
buddhyātmanā vānusṛtasvabhāvāt |
karoti yad yat sakalaṃ parasmai |
nārāyaṇāyeti samarpayettat || 36 ||
[Analyze grammar]

bhayaṃ dvitīyābhiniveśataḥ syāt |
īśāt apetasya viparyayo'smṛtiḥ |
tanmāyayāto budha ābhajettaṃ |
bhaktyaikayeśaṃ gurudevatātmā || 37 ||
[Analyze grammar]

avidyamāno'pyavabhāti hi dvayoḥ |
dhyāturdhiyā svapnamanorathau yathā |
tatkarmasaṅkalpavikalpakaṃ mano |
budho niruṃdhyād abhayaṃ tataḥ syāt || 38 ||
[Analyze grammar]

śrṛṇvan subhadrāṇi rathāṅgapāṇeḥ |
janmāni karmāṇi ca yāni loke |
gītāni nāmāni tadarthakāni |
gāyan vilajjo vicaredasaṅgaḥ || 39 ||
[Analyze grammar]

evaṃvrataḥ svapriyanāmakīrtyā |
jātānurāgo drutacitta uccaiḥ |
hasatyatho roditi rauti gāya |
tyunmādavat nṛtyati lokabāhyaḥ || 40 ||
[Analyze grammar]

khaṃ vāyumagniṃ salilaṃ mahīṃ ca |
jyotīṃṣi sattvāni diśo drumādīn |
saritsamudrāṃśca hareḥ śarīraṃ |
yatkiṃ ca bhūtaṃ praṇamedananyaḥ || 41 ||
[Analyze grammar]

bhaktiḥ pareśānubhavo viraktiḥ |
anyatra caiṣa trika ekakālaḥ |
prapadyamānasya yathāśnatassyuḥ |
tuṣṭiḥ puṣṭiḥ kṣudapāyo'nughāsam || 42 ||
[Analyze grammar]

iti acyutāṅghriṃ bhajato'nuvṛttyā |
bhaktirviraktirbhagavatprabodhaḥ |
bhavanti vai bhāgavatasya rājan |
tataḥ parāṃ śāntimupaiti sākṣāt || 43 ||
[Analyze grammar]

śrīrājovāca |
atha bhāgavataṃ brūta yaddharmo yādṛśo nṛṇām |
yathācarati yad‍ brūte yairliṅgaiḥ bhagavatpriyaḥ || 44 ||
[Analyze grammar]

śrīhariruvāca |
sarvabhūteṣu yaḥ paśyedbhagavadbhāvamātmanaḥ |
bhūtāni bhagavatyātmanyeṣa bhāgavatottamaḥ || 45 ||
[Analyze grammar]

īśvare tadadhīneṣu bāliśeṣu dviṣatsu ca |
premamaitrīkṛpopekṣā yaḥ karoti sa madhyamaḥ || 46 ||
[Analyze grammar]

arcāyāmeva haraye pūjāṃ yaḥ śraddhayehate |
na tad‍bhakteṣu cānyeṣu sa bhaktaḥ prākṛtaḥ smṛtaḥ || 47 ||
[Analyze grammar]

gṛhītvāpīndriyairarthān yo na dveṣṭi na hṛṣyati |
viṣṇormāyāmidaṃ paśyan sa vai bhāgavatottamaḥ || 48 ||
[Analyze grammar]

dehendriprāṇamanodhiyāṃ yo |
janmāpyayakṣudbhayatarṣakṛcchraiḥ |
saṃsāradharmairavimuhyamānaḥ |
smṛtyā harerbhāgavatapradhānaḥ || 49 ||
[Analyze grammar]

na kāmakarmabījānāṃ yasya cetasi saṃbhavaḥ |
vāsudevaikanilayaḥ sa vai bhāgavatottamaḥ || 50 ||
[Analyze grammar]

na yasya janmakarmabhyāṃ na varṇāśramajātibhiḥ |
sajjate'sminnahaṃ bhāvo dehe vai sa hareḥ priyaḥ || 51 ||
[Analyze grammar]

na yasya svaḥ para iti vitteṣvātmani vā bhidā |
sarvabhūtasamaśśāntaḥ sa vai bhāgavatottamaḥ || 52 ||
[Analyze grammar]

tribhuvanavibhavahetave'pyakuṇṭha |
smṛtirajitātmasurādibhirvimṛgyāt |
na calati bhagavatpādāravindāt |
lava nimiṣārdhamapi yaḥ sa vaiṣṇavāgryaḥ || 53 ||
[Analyze grammar]

bhagavata uruvikramāṅghriśākhā |
nakhamaṇicandrikayā nirastatāpe |
hṛdi kathamupasīdatāṃ punaḥ sa |
prabhavati candra ivodite'rkatāpaḥ || 54 ||
[Analyze grammar]

visṛjati hṛdayaṃ na yasya sākṣād |
hariḥ avaśābhihito'pyaghaughanāśaḥ |
praṇayaraśanayā ghṛtāṅghripadmaḥ |
sa bhavati bhāgavatapradhāna uktaḥ || 55 ||
[Analyze grammar]