Chapter 78

[English text for this chapter is available]

dantavakravidūrathavadhaḥ balarāmadvārā sūtaśiraśchedaśca |
athāṣṭasaptatitamo'dhyāyaḥ |
śrīśuka uvāca |
śiśupālasya śālvasya pauṇḍrakasyāpi durmatiḥ |
paralokagatānāṃ ca kurvanpārokṣyasauhṛdam || 1 ||
[Analyze grammar]

ekaḥ padātiḥ saṅkruddho gadāpāṇiḥ prakampayan |
padbhyāmimāṃ mahārāja mahāsattvo vyadṛśyata || 2 ||
[Analyze grammar]

taṃ tathāyāntamālokya gadāmādāya satvaraḥ |
avaplutya rathātkṛṣṇaḥ sindhuṃ veleva pratyadhāt || 3 ||
[Analyze grammar]

gadāmudyamya kārūṣo mukundaṃ prāha durmadaḥ |
diṣṭyā diṣṭyā bhavānadya mama dṛṣṭipathaṃ gataḥ || 4 ||
[Analyze grammar]

tvaṃ mātuleyo naḥ kṛṣṇa mitradhruṅmāṃ jighāṃsasi |
atastvāṃ gadayā manda haniṣye vajrakalpayā || 5 ||
[Analyze grammar]

tarhyānṛṇyamupaimyajña mitrāṇāṃ mitravatsalaḥ |
bandhurūpamariṃ hatvā vyādhiṃ dehacaraṃ yathā || 6 ||
[Analyze grammar]

evaṃ rūkṣaistudanvākyaiḥ kṛṣṇaṃ totrairiva dvipam |
gadayātāḍayanmūrdhni siṃhavadvyanadacca saḥ || 7 ||
[Analyze grammar]

gadayābhihato'pyājau na cacāla yadūdvahaḥ |
kṛṣṇo'pi tamahangurvyā kaumodakyā stanāntare || 8 ||
[Analyze grammar]

gadānirbhinnahṛdaya udvamanrudhiraṃ mukhāt |
prasārya keśabāhvaṅghrīndharaṇyāṃ nyapatadvyasuḥ || 9 ||
[Analyze grammar]

tataḥ sūkṣmataraṃ jyotiḥ kṛṣṇamāviśadadbhutam |
paśyatāṃ sarvabhūtānāṃ yathā caidyavadhe nṛpa || 10 ||
[Analyze grammar]

vidūrathastu tadbhrātā bhrātṛśokapariplutaḥ |
āgacchadasicarmābhyāmucchvasaṃstajjighāṃsayā || 11 ||
[Analyze grammar]

tasya cāpatataḥ kṛṣṇaścakreṇa kṣuraneminā |
śiro jahāra rājendra sakirīṭaṃ sakuṇḍalam || 12 ||
[Analyze grammar]

evaṃ saubhaṃ ca śālvaṃ ca dantavakraṃ sahānujam |
hatvā durviṣahānanyairīḍitaḥ suramānavaiḥ || 13 ||
[Analyze grammar]

munibhiḥ siddhagandharvairvidyādharamahoragaiḥ |
apsarobhiḥ pitṛgaṇairyakṣaiḥ kinnaracāraṇaiḥ || 14 ||
[Analyze grammar]

upagīyamānavijayaḥ kusumairabhivarṣitaḥ |
vṛtaśca vṛṣṇipravarairviveśālaṅkṛtāṃ purīm || 15 ||
[Analyze grammar]

evaṃ yogeśvaraḥ kṛṣṇo bhagavānjagadīśvaraḥ |
īyate paśudṛṣṭīnāṃ nirjito jayatīti saḥ || 16 ||
[Analyze grammar]

śrutvā yuddhodyamaṃ rāmaḥ kurūṇāṃ saha pāṇḍavaiḥ |
tīrthābhiṣekavyājena madhyasthaḥ prayayau kila || 17 ||
[Analyze grammar]

snātvā prabhāse santarpya devarṣipitṛmānavān |
sarasvatīṃ pratisrotaṃ yayau brāhmaṇasaṃvṛtaḥ || 18 ||
[Analyze grammar]

pṛthūdakaṃ bindusarastritakūpaṃ sudarśanam |
viśālaṃ brahmatīrthaṃ ca cakraṃ prācīṃ sarasvatīm || 19 ||
[Analyze grammar]

yamunāmanu yānyeva gaṅgāmanu ca bhārata |
jagāma naimiṣaṃ yatra ṛṣayaḥ satramāsate || 20 ||
[Analyze grammar]

tamāgatamabhipretya munayo dīrghasatriṇaḥ |
abhinandya yathānyāyaṃ praṇamyotthāya cārcayan || 21 ||
[Analyze grammar]

so'rcitaḥ saparīvāraḥ kṛtāsanaparigrahaḥ |
romaharṣaṇamāsīnaṃ maharṣeḥ śiṣyamaikṣata || 22 ||
[Analyze grammar]

apratyutthāyinaṃ sūtamakṛtaprahvaṇāñjalim |
adhyāsīnaṃ ca tānviprāṃścukopodvīkṣya mādhavaḥ || 23 ||
[Analyze grammar]

yasmādasāvimānviprānadhyāste pratilomajaḥ |
dharmapālāṃstathaivāsmānvadhamarhati durmatiḥ || 24 ||
[Analyze grammar]

ṛṣerbhagavato bhūtvā śiṣyo'dhītya bahūni ca |
setihāsapurāṇāni dharmaśāstrāṇi sarvaśaḥ || 25 ||
[Analyze grammar]

adāntasyāvinītasya vṛthā paṇḍitamāninaḥ |
na guṇāya bhavanti sma naṭasyevājitātmanaḥ || 26 ||
[Analyze grammar]

etadartho hi loke'sminnavatāro mayā kṛtaḥ |
vadhyā me dharmadhvajinaste hi pātakino'dhikāḥ || 27 ||
[Analyze grammar]

etāvaduktvā bhagavānnivṛtto'sadvadhādapi |
bhāvitvāttaṃ kuśāgreṇa karasthenāhanatprabhuḥ || 28 ||
[Analyze grammar]

hāhetivādinaḥ sarve munayaḥ khinnamānasāḥ |
ūcuḥ saṅkarṣaṇaṃ devamadharmaste kṛtaḥ prabho || 29 ||
[Analyze grammar]

asya brahmāsanaṃ dattamasmābhiryadunandana |
āyuścātmāklamaṃ tāvadyāvatsatraṃ samāpyate || 30 ||
[Analyze grammar]

ajānataivācaritastvayā brahmavadho yathā |
yogeśvarasya bhavato nāmnāyo'pi niyāmakaḥ || 31 ||
[Analyze grammar]

yadyetadbrahmahatyāyāḥ pāvanaṃ lokapāvana |
cariṣyati bhavāṃlloka saṅgraho'nanyacoditaḥ || 32 ||
[Analyze grammar]

śrībhagavānuvāca |
cariṣye vadhanirveśaṃ lokānugrahakāmyayā |
niyamaḥ prathame kalpe yāvānsa tu vidhīyatām || 33 ||
[Analyze grammar]

dīrghamāyurbataitasya sattvamindri yameva ca |
āśāsitaṃ yattadbrūte sādhaye yogamāyayā || 34 ||
[Analyze grammar]

ṛṣaya ūcuḥ |
astrasya tava vīryasya mṛtyorasmākameva ca |
yathā bhavedvacaḥ satyaṃ tathā rāma vidhīyatām || 35 ||
[Analyze grammar]

śrībhagavānuvāca |
ātmā vai putra utpanna iti vedānuśāsanam |
tasmādasya bhavedvaktā āyurindri yasattvavān || 36 ||
[Analyze grammar]

kiṃ vaḥ kāmo muniśreṣṭhā brūtāhaṃ karavāṇyatha |
ajānatastvapaitiṃ yathā me cintyatāṃ budhāḥ || 37 ||
[Analyze grammar]

ṛṣaya ūcuḥ |
ilvalasya suto ghoro balvalo nāma dānavaḥ |
sa dūṣayati naḥ satrametya parvaṇi parvaṇi || 38 ||
[Analyze grammar]

taṃ pāpaṃ jahi dāśārha tannaḥ śuśrūṣaṇaṃ param |
pūyaśoṇitavinmūtra surāmāṃsābhivarṣiṇam || 39 ||
[Analyze grammar]

tataśca bhārataṃ varṣaṃ parītya susamāhitaḥ |
caritvā dvādaśamāsāṃstīrthasnāyī viśudhyasi || 40 ||
[Analyze grammar]