Chapter 74

[English text for this chapter is available]

rājasūye bhagavato'grapūjanaṃ tato ruṣṭasya durvadattaḥ śiśupālasya bhagavatā vadhaśca |
śrīśuka uvāca |
evaṃ yudhiṣṭhiro rājā jarāsandhavadhaṃ vibhoḥ |
kṛṣṇasya cānubhāvaṃ taṃ śrutvā prītastamabravīt || 1 ||
[Analyze grammar]

śrīyudhiṣṭhira uvāca |
ye syustrailokyaguravaḥ sarve lokamaheśvarāḥ |
vahanti durlabhaṃ labdhvā śirasaivānuśāsanam || 2 ||
[Analyze grammar]

sa bhavān aravindākṣo dīnānāṃ īśamāninām |
dhatte'nuśāsanaṃ bhūman tadatyantaviḍambanam || 3 ||
[Analyze grammar]

na hyekasyādvitīyasya brahmaṇaḥ paramātmanaḥ |
karmabhirvardhate tejo hrasate ca yathā raveḥ || 4 ||
[Analyze grammar]

na vai te'jita bhaktānāṃ mamāhamiti mādhava |
tvaṃ taveti ca nānādhīḥ paśūnāmiva vaikṛtī || 5 ||
[Analyze grammar]

śrīśuka uvāca |
ityuktvā yajñiye kāle vavre yuktān sa ṛtvijaḥ |
kṛṣṇānumoditaḥ pārtho brāhmaṇān brahmavādinaḥ || 6 ||
[Analyze grammar]

dvaipāyano bharadvājaḥ sumanturgotamo'sitaḥ |
vasiṣṭhaścyavanaḥ kaṇvo maitreyaḥ kavaṣastritaḥ || 7 ||
[Analyze grammar]

viśvāmitro vāmadevaḥ sumatirjaiminiḥ kratuḥ |
pailaḥ parāśaro gargo vaiśampāyana eva ca || 8 ||
[Analyze grammar]

atharvā kaśyapo dhaumyo rāmo bhārgava āsuriḥ |
vītihotro madhucchandā vīraseno'kṛtavraṇaḥ || 9 ||
[Analyze grammar]

upahūtāstathā cānye droṇabhīṣmakṛpādayaḥ |
dhṛtarāṣṭraḥ sahasuto viduraśca mahāmatiḥ || 10 ||
[Analyze grammar]

brāhmaṇāḥ kṣatriyā vaiśyāḥ śūdrā yajñadidṛkṣavaḥ |
tatreyuḥ sarvarājāno rājñāṃ prakṛtayo nṛpa || 11 ||
[Analyze grammar]

tataste devayajanaṃ brāhmaṇāḥ svarṇalāṅgalaiḥ |
kṛṣṭvā tatra yathāmnāyaṃ dīkṣayāṃ cakrire nṛpam || 12 ||
[Analyze grammar]

haimāḥ kilopakaraṇā varuṇasya yathā purā |
indrādayo lokapālā viriñcibhavasaṃyutāḥ || 13 ||
[Analyze grammar]

sagaṇāḥ siddhagandharvā vidyādharamahoragāḥ |
munayo yakṣarakṣāṃsi khagakinnaracāraṇāḥ || 14 ||
[Analyze grammar]

rājānaśca samāhūtā rājapat‍nyaśca sarvaśaḥ |
rājasūyaṃ samīyuḥ sma rājñaḥ pāṇḍusutasya vai || 15 ||
[Analyze grammar]

menire kṛṣṇabhaktasya sūpapannamavismitāḥ |
ayājayan mahārājaṃ yājakā devavarcasaḥ |
rājasūyena vidhivat pracetasamivāmarāḥ || 16 ||
[Analyze grammar]

sūtye'hanyavanīpālo yājakān sadasaspatīn |
apūjayan mahābhāgān yathāvat susamāhitaḥ || 17 ||
[Analyze grammar]

sadasyāgryārhaṇārhaṃ vai vimṛśantaḥ sabhāsadaḥ |
nādhyagacchan nannanaikāntyāt sahadevastadābravīt || 18 ||
[Analyze grammar]

arhati hyacyutaḥ śraiṣṭhyaṃ bhagavānsātvatāṃ patiḥ |
eṣa vai devatāḥ sarvā deśakāladhanādayaḥ || 19 ||
[Analyze grammar]

yas ātmakamidaṃ viśvaṃ kratavaśca yadātmakāḥ |
agnirāhutayo maṃtrāḥ sāṅkhyaṃ yogaśca yatparaḥ || 20 ||
[Analyze grammar]

eka evādvitīyo'sau avaitadātmyamidaṃ jagat |
ātmanātmāśrayaḥ sabhyāḥ sṛjatyavati hantyajaḥ || 21 ||
[Analyze grammar]

vividhānīha karmāṇi janayan yadavekṣayā |
īhate yadayaṃ sarvaḥ śreyo dharmādilakṣaṇam || 22 ||
[Analyze grammar]

tasmāt kṛṣṇāya mahate dīyatāṃ paramārhaṇam |
evaṃ cetsarvabhūtānāṃ ātmanaścārhaṇaṃ bhavet || 23 ||
[Analyze grammar]

sarvabhūtātmabhūtāya kṛṣṇāyānanyadarśine |
deyaṃ śāntāya pūrṇāya dattasyānantyamicchatā || 24 ||
[Analyze grammar]

ityuktvā sahadevo'bhūt tūṣṇīṃ kṛṣṇānubhāvavit |
tacchrutvā tuṣṭuvuḥ sarve sādhu sādhviti sattamāḥ || 25 ||
[Analyze grammar]

śrutvā dvijeritaṃ rājā jñātvā hārdaṃ sabhāsadām |
samarhayaddhṛṣīkeśaṃ prītaḥ praṇayavihvalaḥ || 26 ||
[Analyze grammar]

tatpādāvavanijyāpaḥ śirasā lokapāvanīḥ |
sabhāryaḥ sānujāmātyaḥ sakuṭumbo vahanmudā || 27 ||
[Analyze grammar]

vāsobhiḥ pītakauṣeyaiḥ bhūṣaṇaiśca mahādhanaiḥ |
arhayitvāśrupūrṇākṣo nāśakat samavekṣitum || 28 ||
[Analyze grammar]

itthaṃ sabhājitaṃ vīkṣya sarve prāñjalayo janāḥ |
namo jayeti nemustaṃ nipetuḥ puṣpavṛṣṭayaḥ || 29 ||
[Analyze grammar]

itthaṃ niśamya damaghoṣasutaḥ svapīṭhād |
utthāya kṛṣṇaguṇavarṇanajātamanyuḥ |
utkṣipya bāhumidamāha sadasyamarṣī |
saṃśrāvayan bhagavate paruṣāṇyabhītaḥ || 30 ||
[Analyze grammar]

īśo duratyayaḥ kāla iti satyavatī śrutiḥ |
vṛddhānāmapi yad buddhiḥ bālavākyairvibhidyate || 31 ||
[Analyze grammar]

yūyaṃ pātravidāṃ śreṣṭhā mā mandhvaṃ bālabhāṣītam |
sadasaspatayaḥ sarve kṛṣṇo yat sammato'rhaṇe || 32 ||
[Analyze grammar]

tapovidyāvratadharān jñānavidhvastakalmaṣān |
paramaṛṣīn brahmaniṣṭhān lokapālaiśca pūjitān || 33 ||
[Analyze grammar]

sadaspatīn atikramya gopālaḥ kulapāṃsanaḥ |
yathā kākaḥ puroḍāśaṃ saparyāṃ kathamarhati || 34 ||
[Analyze grammar]

varṇāśramakulāpetaḥ sarvadharmabahiṣkṛtaḥ |
svairavartī guṇairhīnaḥ saparyāṃ kathamarhati || 35 ||
[Analyze grammar]

yayātinaiṣāṃ hi kulaṃ śaptaṃ sadbhirbahiṣkṛtam |
vṛthāpānarataṃ śaśvat saparyāṃ kathamarhati || 36 ||
[Analyze grammar]

brahmarṣisevitān deśān hitvaite'brahmavarcasam |
samudraṃ durgamāśritya bādhante dasyavaḥ prajāḥ || 37 ||
[Analyze grammar]

evaṃ ādīnyabhadrāṇi babhāṣe naṣṭamaṅgalaḥ |
novāca kiñcid bhagavān yathā siṃhaḥ śivārutam || 38 ||
[Analyze grammar]

bhagavan nindanaṃ śrutvā duḥsahaṃ tatsabhāsadaḥ |
karṇau pidhāya nirjagmuḥ śapantaścedipaṃ ruṣā || 39 ||
[Analyze grammar]

nindāṃ bhagavataḥ śrṛṇvan tatparasya janasya vā |
tato nāpaiti yaḥ so'pi yātyadhaḥ sukṛtāccyutaḥ || 40 ||
[Analyze grammar]

tataḥ pāṇḍusutāḥ kruddhā matsyakaikayasṛñjayāḥ |
udāyudhāḥ samuttasthuḥ śiśupālajighāṃsavaḥ || 41 ||
[Analyze grammar]

tataścaidyastvasaṃbhrānto jagṛhe khaḍgacarmaṇī |
bhartsayan kṛṣṇapakṣīyān rājñaḥ sadasi bhārata || 42 ||
[Analyze grammar]

tāvadutthāya bhagavān svān nivārya svayaṃ ruṣā |
śiraḥ kṣurāntacakreṇa jahāra patato ripoḥ || 43 ||
[Analyze grammar]

śabdaḥ kolāhalo'thāsīn śiśupāle hate mahān |
tasyānuyāyino bhūpā dudruvurjīvitaiṣiṇaḥ || 44 ||
[Analyze grammar]

caidyadehotthitaṃ jyotiḥ vāsudevamupāviśat |
paśyatāṃ sarvabhūtānāṃ ulkeva bhuvi khāccyutā || 45 ||
[Analyze grammar]

janmatrayānuguṇita vairasaṃrabdhayā dhiyā |
dhyāyan tanmayatāṃ yāto bhāvo hi bhavakāraṇam || 46 ||
[Analyze grammar]

ṛtvigbhyaḥ sasadasyebhyo dakṣināṃ vipulāmadāt |
sarvān saṃpūjya vidhivat cakre'vabhṛthamekarāṭ || 47 ||
[Analyze grammar]

sādhayitvā kratuḥ rājñaḥ kṛṣṇo yogeśvareśvaraḥ |
uvāsa katicin māsān suhṛdbhiḥ abhiyācitaḥ || 48 ||
[Analyze grammar]

tato'nujñāpya rājānaṃ anicchantamapīśvaraḥ |
yayau sabhāryaḥ sāmātyaḥ svapuraṃ devakīsutaḥ || 49 ||
[Analyze grammar]

varṇitaṃ tadupākhyānaṃ mayā te bahuvistaram |
vaikuṇṭhavāsinorjanma vipraśāpāt punaḥ punaḥ || 50 ||
[Analyze grammar]

rājasūyāvabhṛthyena snāto rājā yudhiṣṭhiraḥ |
brahmakṣatrasabhāmadhye śuśubhe surarāḍiva || 51 ||
[Analyze grammar]

rājñā sabhājitāḥ sarve suramānavakhecarāḥ |
kṛṣṇaṃ kratuṃ ca śaṃsantaḥ svadhāmāni yayurmudā || 52 ||
[Analyze grammar]

duryodhanamṛte pāpaṃ kaliṃ kurukulāmayam |
yo na sehe śrīyaṃ sphītāṃ dṛṣṭvā pāṇḍusutasya tām || 53 ||
[Analyze grammar]

ya idaṃ kīrtayed viṣṇoḥ karma caidya vadhādikam |
rājamokṣaṃ vitānaṃ ca sarvapāpaiḥ pramucyate || 54 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe uttarārdhe |
śiśupālavadho nāma catuḥsaptatitamo'dhyāyaḥ || 74 ||
[Analyze grammar]